Zɔbə ŋʋŋwɩn Yɩɩ yáá con
7
1 Zɔbə swɩ̀n ʋ súrí lá, ʋ wʋ́:«Ləzwənə də́ càn tɩa yuu wa,
ndə lìù nə tʋŋa dɩ̀àn tʋ̀tʋ̀nán,
yá ʋ dɩan yɩ ndə tʋtʋnʋ dɩan nə,
ʋ nə tʋŋa sə ba ŋwɩ́n wá.
2 Kʋ yɩ ndə yoŋu nə pɩ̀à sìə́,
nə à yə̀ə́ ndə tʋtʋnʋ nə dànɩ̀ ʋ ŋwɩ́rán.
3 À tori yɩ càn nə à dí cànɩ̀ kapʋpʋ,
yá tɩtɩan kapʋpʋ yinəgə nə yɩ à ŋwɩ́rán.
4 À nə tígə́, à yàá bwe à tɩ̀àn sə à jə́n,
máŋá kwà wa nə, à wá zàn?
Tɩa yàá ba lala pʋrɩ,
yá à dàń yàá bɩ́bɩ́lɩ́ wuuu,
tɩa kori ka pʋrɩ.
5 Zʋnzʋran də durən dalɩ
tə pú à yatana nʋran nə,
à tànʋ̀ tə pʋa, kʋ lɛ́.
6 À dɩan tə dəri lala
tə doni gantwasʋrʋ gantwadaʋ.
Tə zwɛ̀, yala kʋ́ʋ̀ tə̀lə́.
7 À tíú Yɩɩ, à lòrì mʋ́
sə n lìí n tɩ̀àn, də à mɩɩ tə yɩ vʋʋ!
À yii kʋ́ʋ̀ ba dì ywánɩ́!
8 Yii tə yà nə ywàŋá nə, kʋ́ʋ̀ ba na nə.
N yɩ́á wá twarɩ nə, yá à kʋ́ʋ̀ bá ya lá.
9 Bakwan yàá laga, kʋ jɛ́n.
Mə nətʋ nə ləzwənə də yàá va ciru,
yá ʋ ba pìrí ʋ twi.
10 Ʋ kʋ́ʋ̀ bá pìí ʋ bà ʋ dìə̀ wa,
yá ʋ sàń tə kʋ́ʋ̀ bá yəni wá.
11 Kʋ mʋ̀ nə pɩn, à kʋ́ʋ̀ bá ja à nii.
À jə̀rə́ tə wulə jɩgwarʋ wa,
kʋ mʋ̀ nə pɩn, à wá swɩ̀n.
À pùə́ cʋ̀gʋ̀ zənzən,
kʋ mʋ̀ nə pɩn, à wá ŋʋŋwɩn.
12 À yɩ mʋʋ, nə à yə̀ə́ mʋʋ wojijiru,
n ma túŋə́ lɩ̀à sə ba cɩ̀ à nə?
13 À nə swɩ̀n də à wá na sìə́ à gədo yuu,
də à ŋʋŋwɩan tə wá zwɛ̀ à sapaa wa,
14 n yàá pa pandwɩa kə bɩcapuri à nə,
n yàá pa nɩʋn pa fən gən nə.
15 À yà swə sə n kàŋà nə n gʋ!
Cɩ́gá, à yà nə tɩga kʋ kʋ́kwà,
à nə bwànɩ́ à ga kurən nətən!
16 À yɩra ga!
À bá ya lʋʋ wa wuuu!
Yá nə sənbwen!
Cɩ́gá, à dɩan yɩ ndə fanɩʋ nə.
17 Ləzwənə yɩ bɛ̀ɛ̀, n ma jələ wá,
n bʋŋa ʋ yoo zənzən,
18 n ywàŋá ʋ yuu zəni dɩɩn mama,
n ga mɩlɩ wá máŋá mama nətən?
19 Máŋá kwà wa nə n wá viviri n yáá
n kə kwa, n ga yá nə?
Máŋá kwà wa nə n wá yá nə,
sə à lìrə̀ à mɩmɩa?
20 À nə swə à tʋn cʋna,
bɛ̀ɛ̀ yolwan nə à ma fwa mʋ́,
n mʋ̀ lìù tə n nə ywàŋá ləzoni yuu?
Bɛ̀ɛ̀ nə pɩn n ja nə n jì n bʋ̀là won?
À jìgə̀ n yuu zɩlɩ naaa?
21 Bɛ̀ɛ̀ nə pɩn n ba à cʋna tə kwɛn n lɩ,
n ga yá à yolwan tə n pɩn kʋ kɛ̀ń?
Cɩ́gá, sɩ́ʋ́n nə, à vələ sə à pə̀ń pùrú wa.
N wá twarɩ nə, yá à kʋ́ʋ̀ bá ya lá.»