Zɔbə pùə́ cʋ̀gʋ̀ ʋ dabara tə yuu wa
6
1 Zɔbə dàń le Elifazə, ʋ wʋ́:2 «Ooo! À pucʋnɩ tə yà nə wàá kʋ kəri,
à yobɩbɩlan tə mama yà nə wàá
duən nə tə kəni səkəri yuu wa,
3 sɩ́ʋ́n nə, tə dun yà wá doni mʋʋ nii kasɩlʋ.
Kʋ mʋ̀ nə pɩn à ma swɩ̀n vɛɛ.
4 Cɩ́gá, Yɩɩ tə nə wulə tə mɛ yuu wa
cɩan tə ta nə tə pórí,
yá tə cwan tə zʋa tə ja à waa cɩɩn nə.
Yɩɩ pɩn fən gən nə,
ndə kwatara nə kɩkarɩ nə sə ba ta.
5 Gaʋ bɩ̀nà wá zɩga galɩʋ wa,
ka tə ga kwi naaa?
Naʋ wodiu wá tígə́ kʋ yáá,
kʋ tə ga muni naaa?
6 Wodiu tə nə yɩ tanpwa wàá kʋ də́,
də nəkuən nə wà kʋ wa ken naaa?
Cacalɩ wa nəpon tə jə gwàlà naaa?
7 Won tə à yà nə ba sɛ̀ à dwen kʋ yɩra,
kʋ mʋ̀ dàń nə jìgə̀ à wodiu,
yá kʋ yɩ won tə à yà nə nyáŋá!
8 Aaa! Yɩɩ yà nə sɛ̀ ʋ le à lòrì tə,
ʋ ga pa à yala tə nii sú,
9 ʋ yà nə sɛ̀ ʋ tɩtaga nə,
ʋ yà nə sɛ̀ ʋ te ʋ jɩɩn,
ʋ jon à mɩɩ tə sə kʋ zwɛ̀,
10 kʋ yà wá zuri à bɩcan,
à ga fan də pupwən,
də à yɩra wiri, tə ba zwɛ̀ tə mɛ,
yá à yà bá vɩ Yɩɩ tə nə yɩ parɩ* nii sʋ̀ràn tə.
11 À dɩ̀àn wulə yə̀n nə, à ma dànɩ̀?
Yá à yígúrə́ wá ya nətə,
à ma pɩ̀à mɩdarɩ?
12 À dɩ̀àn tə yɩ ndə kapan nə naaa?
À yatanaŋʋ tə yɩ cɩnɩan naaa?
13 À kʋ́ʋ̀ jə à tɩntɩan sáŋʋ́ naaa?
À wà sáŋʋ́ mama nə kwɩ̀n naaa?
14 Lìù tə nə də́ càn
nə swə ʋ ba Yɩɩ tə nə wulə
tə mɛ yuu wa fən dəri,
ʋ dabɛɛ tə mɛ sə ʋ tʋn wʋywaŋʋ* ʋ yɩra.
15 À nubɩa tə gɩgarɩ nə ba dʋgʋ ndə nacoru nə,
nacorən tə, tə nɩ́á nə ba dánɩ́ tə ma wɩɩ.
16 Nacorən tə nɩ́á gʋgʋla máŋá tə wa,
tə nɩ́á tə yà nə cili ndə dwakafɩna nə,
nə wulə tə nyɩŋa.
17 Yá tɩlʋŋʋ máŋá wa, tə yàá wʋ.
Lʋan yɩcaʋ bárɩ́ nə mà tə,
tə yàá kʋ̀ naa nədʋ.
18 Ganbələ tɩ̀án pìí ba yá ba cwəŋə,
ba zʋ ba jɛ́n kasɔɔ lanworu wa.
19 Tema ganbələ tɩ̀án zəən nacorən təntə,
Saba ganbələ tɩ̀án ken ba yala tə nə.
20 Ba pùə́ cʋ̀gʋ̀, kʋ ga gwárɩ́ ba,
ba nə jələ tə yuu wa, ba ga bà ba yí
də nɩ́á tə̀lə́ tə wa yɩrɩ.
21 Yá sɩ́ʋ́n nə, á də jìgə̀ tʋtʋ à yáá con.
Á nɩ à yinəgə tə, yá fən zʋa aba.
22 À lòrì won á con naaa?
À swɩ̀n á con sə á lɩ won á jɩjə tə wa,
á ma də́ zìlə́ à yuu wa naaa?
23 À lòrì aba sə á jon nə à jarɩdon,
nə à yə̀ə́ wʋlʋnyɩna jɩɩn wa naaa?
24 Á kàrà nə, yá à wá pú à nii,
á bɩra nə à gɩʋ bwálɩ́.
25 Sʋ̀ràn tə nə twá cɩ́gá nə,
ndə kʋ nə mɛ nətʋ ba pùə́ cʋ̀gà!
Yá bɛ̀ɛ̀ yɩrɩ nə, á mʋ̀ caga à nii nə?
26 Á bʋŋa sə á caga à nii nə,
á ga jələ à sʋ̀ràn tə ndə sʋvɛɛ nə,
lìù tə ʋ nə ba yala jə nə swɩ̀n naaa?
27 À nə ywàŋá aba, á wá sɛ̀
á ja bitarʋ tətə á ma tá kwɛ́,
á ga yoli á dabɛɛ á də́!
28 Sɩ́ʋ́n nə, á dàń vivirə á yáá á kə à con:
À wàá kʋ̀nkʋ̀n à kʋ̀nɩ̀ á yáá con naaa?
29 À lòrì aba sə á zuri á yɩra,
á dànà ká jì pwìí bələ tɩ̀án.
Á zurə á yɩra, à tə wulə cɩ́gá cwəŋə wa!
30 Kʋ̀nkʋ̀n wulə à nii sʋgʋ wa naaa?
À nipaa yəri yolwan swɩ́án naaa?»