5
1 Elifazə swɩ̀n ʋ súrí lá, ʋ wʋ́: «N dàń bon n kə!
Lìù wulə sə ʋ le mʋ́ naaa?
Yɩɩ sàń lɩ̀à wàà nə nə, n wá bubwi n kə?
2 Cɩ́gá, lɩŋa yàá gʋ ləbibənu,
yá wʋgwɩʋ yàá pa ləyiru tɩ.
3 À nɩ ləbibənu də ʋ dəkuu zʋa tɩa,
yá à zɩrɩ à kə ʋ sàń tə nə lala, à wʋ́:
4 “Yɩɩ wá pa ʋ bɩ̀á kwɩ̀n sáŋʋ́ nə,
sə ba tɩtaga ba bʋra bwálɩ́ nə,
yá lìù mama ba ba joŋə!
5 Yɩɩ wá pa lɩ̀à tə niən nə jə
də́ ləbibənu kárá wiən!
Yɩɩ wá pa ba zʋ casʋran
dabɔɔ də tətə wa, ba lɩ tə!
Yɩɩ wá pa wʋkorunyɩna də́ ʋ jɩjə tə.”
6 Yolwan ba pùrú wa naŋa,
yinəgə ma ba tɩa yuu pɛ́n.
7 Ləzwənə yinəŋə yɩ ka naŋa ʋ tətə,
ndə mənpwanɩ nə zaŋa tə dɩ̀ yɩɩ nətʋ.
8 À mʋ̀ wá twarɩ Yɩɩ,
yá Yɩɩ con nə, à wá tún à yojanʋ tə nii.
9 Ʋ tʋŋa yofaran, tə də̀ń nə lu zənzən,
yogwaran kapʋpʋ, tə nə warɩ tə gàlɩ̀.
10 Ʋ pɩn dwà nɩ̀ tɩa yuu wa,
ʋ ga pɩn nɩ́á gàrɩ̀ kárɩ́ nə.
11 Ʋ zɩ̀n lɩ̀à tə yà nə ba dun jə,
ʋ kəni dun bwálɩ́ nə,
yá ʋ pɩn pupwən lɩ̀à tə nə,
ba yà nə wulə lúə́ pucʋnɩ wa.
12 Ʋ cʋ̀gà yɩ́á swɩan tɩ̀án tana,
kʋ pa ba jɩ̀àn wàrɩ̀ ba pubʋŋa yìə̀n
tə tʋŋa tə pɩn tə jì.
13 Ʋ janɩ wʋbʋnyɩna də̀ń nə,
ba tətə yɩ́á swɩan yìə̀n tə wa,
yá gɩgɩrɩnyɩna yìə̀n tə ba nə vʋrɩ, wàrɩ̀ tə jì.
14 Ba yàá jəri yikunu yɩcaʋ wa,
yá ba tɩtɛ yɩcakʋrʋ wa, ndə kʋ yɩ tɩtɩn.
15 Yá Yɩɩ mʋ̀ yàá jon lalaŋʋ,
wʋlʋnyɩna nii kwatara sɩ̀ʋ́ tə jɩɩn wa.
Ʋ joŋə wá dɩ̀àn tíú jɩɩn wa.
16 Kʋ mʋ̀ nə pɩn labwanʋ jə yala,
yá lɩ̀à tə nə tì kʋ̀nkʋ̀n cwəŋə nii də̀ŋì.
17 Nə̀ń, pupwən lìù nə yɩ lìù tə,
Yɩɩ nə yàá pá ʋ kə cwəŋə wa!
Dàn ká gwìə̀n kàrà tə,
Yɩɩ tə nə wulə tə mɛ yuu wa nə kàrɩ̀ mʋ́!
18 Cɩ́gá, ʋ mʋ̀ nə caŋɩ,
ʋ mʋ̀ ga nə ywarɩ də.
Ʋ mʋ̀ nə kɛ́n,
yá ʋ mʋ̀ jɩ̀àn nə pɩn yazurə.
19 Ʋ wá jon mʋ́ jɩgwarʋ wa nɛɛ bardʋ,
yá kʋ nə yí nɛɛ barpɛ də tətə,
yolwan tə bá yí mʋ́.
20 Niən máŋá wa,
ʋ wá jon mʋ́ tɩan jɩɩn wa,
yá kʋ̀ʋ̀ máŋá wa,
ʋ wá jon mʋ́ kwatara sɩ̀ʋ́ jɩɩn wa.
21 Ʋ wá cɩ̀ n nə,
lɩ̀à nii sʋkʋkwɩnan bá ja n tʋtʋŋɩ,
yá won fən ba ja mʋ́,
máŋá tə wa cʋcʋran nə twi.
22 N bá yəni won tə nə yɩ cʋcʋran də niən,
yá ganaŋa fən bá ja mʋ́.
23 Cɩ́gá, n wá ja nimarʋ də kárɩ́ kapana,
yá sìə́ wá ya n də ganaŋa pwə́rə́ wa.
24 N wá na də bɩcan sìə́ wulə n dìə̀ wa,
yá n nə ywàń n najɩrɩ,
n wá na də won mama wà mʋ́ mùrì.
25 N wá na də n dwíí pùlì zənzən,
yá n nɩ̀án wá ya ndə kasɔɔ gaʋ nə.
26 N wá kwɩn zənzən,
yá n wá tɩ də n tə dà,
ndə mɩgugunə nə, ba nə lɩ
ba tún woceri máŋá wa.
27 Nə̀ń yoo tə nə nə zəən nə na:
Mə kʋ nə nətʋ!
Kʋ dàń wulə də mʋ́,
sə n nì, n ga sɛ̀ kʋ!»