Elifazə bɩrɩ də pupwən lìù nə yɩ lìù tə Yɩɩ nə pɛ́ ʋ kəni cwəŋə wa
4
1 Elifazə, ʋ nə nan Teman tì sʋgʋ, yá ʋ swɩ̀n Zɔbə con, ʋ wʋ́:2 «Lìù nə swɩ̀n sʋgʋ n con,
n wá wànɩ́ kʋ n cʋgʋ?
Yá wàà nə wàá ʋ nii ʋ pwí?
3 N mʋ̀ lìù tə n nə kàrɩ̀ lɩ̀à kapʋpʋ,
n ga dàn lɩ̀à tə nə wulə jɩgwarʋ wa jɩ̀àn,
4 n sʋ̀ràn yà zɩ̀n lɩ̀à tə nə mà ba nɛɛ
ba twɩ, tə zɩga yɩɩ nə,
n ga pɩn lɩ̀à tə ba nadwana nə gori,
pìí tə kwànɩ́.
5 Yá sɩ́ʋ́n nə, lɛɛ dàń yí n də,
yá n mʋ̀ jɩ̀àn dàń gwàrɩ̀!
Sɩ́ʋ́n nə, yoo dàń jə n də,
yá n mʋ̀ pùə́ dàń cʋ̀gʋ̀!
6 Kʋ tà n nə dəri Yɩɩ fən tə
yuu wa nə n jələ naaa?
Kʋ tà n nə yɩ təgətəgə tə
nə pɩn n jə yala naaa?
7 Bʋ́n zəni n jə́n,
wàà nə yoo dí,
yá ʋ wà yoo cʋ̀gʋ̀?
Yə̀n nə n tə nɩ lɩ̀à tə
nə yɩ mənəmənə də lɛɛ dí ba?
8 Ndə à nə nɩ kʋ nətʋ,
lɩ̀à tə nə vàrɩ̀ wʋlʋŋʋ,
ba ga dwì yolwan,
yàá ca kʋ lənə.
9 Yɩɩ mɩɩ vʋʋ yàá gʋ ba,
ʋ lɩŋa tə vʋʋ yàá də́ ba.
10 Ʋ yàá pa Gəru bagʋ
də wojankadiu kwirə nyʋn lá,
yá gəbala yelə ga kɛ́n.
11 Gəru yàá tɩ,
nàŋʋ́ nə tə̀lə́ sə kʋ də́ yɩrɩ,
yá gəkan bɩ̀á yàá laga duən yáá nə.
12 Sʋgʋ twi kʋ tʋ à zɩɩn wa,
à zɩɩn nì kʋ də ba sʋsʋnɩ.
13 Máŋá tə twara nə twá tɩtɩn nɩʋn nə,
tə bà ləzoni pubʋŋa wa,
máŋá tə ba nə dwɛ̀ lɩ́gɩ́,
14 fən zʋa nə, à ga zəzəgə,
yá à kurən tə mama vɩvaga.
15 Siŋu twá à yáá wa,
yá à yɩra kʋran wun.
16 Won yà zɩga yɩɩ nə,
yá à yəri kʋ nə yɩ won tə,
kʋ yà yɩ yɩywara nə à na à yáá con.
Yá à nì kori kʋ nə sʋsʋnɩ, kʋ wʋ́:
17 “Ləzwənə wàá cɩ́gá tíú ʋ yanɩ,
ʋ doni Yɩɩ naaa?
Ʋ wàá parɩ ʋ yanɩ,
ʋ doni lìù tə nə fwa wá naaa?
18 Yɩɩ dàń taa nə ba
ʋ tʋ̀tʋ̀nà tə tətə yuu wa jələ,
ʋ nə na gɩʋ ʋ malɩkɛ tə tətə tʋtʋnɛɛ wa,
19 kʋ dàń nə ma bwe ləzoni nə,
ʋ nə ma də daʋ!
Ba mʋ̀ lɩ̀à tə nə yɩ pùrú,
ba nə tɩtaga ndə tʋ́á nə!
20 Kʋ nə zɩgɩ jɩjʋ, kʋ ja vələ didəni,
ba wàá ba mama ba nyʋnyʋga,
ba pɩn ba jɛ́n mɩ́ámɩ́án,
yá kʋ tà lìù mama yáá.
21 Ba mɩɩ ŋwənə kwə,
yá ba tɩ, də ba wà wʋbʋŋa nɩ.”»