ZƆBƏ DƏ Ʋ DABARA BATWA TƏ VIƏ
(3—31)
Zɔbə bɩrɩ də lʋʋ yanʋ ba nywarɩ jə
3 «Yɩɩ pa sə tɩtɩn tə à nuu nə jɩn à pùə́,
də dɩɩn tə ʋ nə lɩrɩ nə tə, nyʋn lá!
4 Dɩɩn təntə ji yikunu!
Yɩɩ kʋ́ʋ̀ dàn ká bʋ́n kʋ yoo lanworu tə wa,
ʋ kʋ́ʋ̀ dàn ká pa poni pɩ̀rɩ̀ kʋ!
5 Yikunu də tɩan yɩywara bwìə́ kʋ bwiə,
sə bakwan pú kʋ yuu nə,
sə yikunu yìə̀n ga pa fən gən kʋ!
6 Yikunu ja tɩtɩn təntə!
Kʋ dàn ká jwɛ bɩnɩ dɩan tə wa,
ba dàn ká gàlà kʋ ba kə cànɩ̀ wa!
7 Yɩɩ pa sə ba dàn ká ja
bisɩmaa mama pùə́, kʋ tɩtɩn təntə nə,
sə pupwən cə̀rə́ dàn ká ya kʋ wa.
8 Lɩ̀à tə nə zɩrɩ ba kəni dɩan nə,
ba ga yə̀ə́ ka zɩ̀n mʋʋ wojijiru* tə,
ba nə boŋə Levɩatan*,
bɩra də kʋ yɩ dɩɩn kʋkwɩʋn!
9 Kʋ tɩbɩlakʋnʋ kacɩlacɛɛ dànà ká ja poni,
sə kʋ dàn yɩcaʋ poni kʋ ga,
sə kʋ dàn ká na tɩbɩlakʋnʋ yɩ́á də tə súrí!
10 Cɩ́gá, kʋ wà à nuu lɩra sun,
sə à dàn ká nan ʋ pùə́ wa, à də́ càn.
11 Bɛ̀ɛ̀ nə pɩn à ma wà tɩ à nuu pùə́ wa?
Bɛ̀ɛ̀ nə pɩn à mɩɩ ma wà zwɛ̀,
máŋá tə wa à nə nan ʋ pùə́ wa?
12 Bɛ̀ɛ̀ nə pɩn à ma na nɛɛ sə tə jon nə,
də nyɩla sə à ŋʋ̀à?
13 Kʋ nə tà nətʋ, də sɩ́ʋ́n nə,
à yà yɩ à tígə́ sənbwen, à dwɛ̀,
yá à yà wá wànɩ́ à ya sìə́ wa
14 də tɩa yuu pɛ̀gá tə də kwenə tə,
ba yà nə pìí ba lwè birizurən tə
yà nə jìgə̀ dibwərən,
ba ma pɩn yɩrɩ ba tɩ̀àn nə.
15 À yà wá ya də pàbɩ̀á tə nə jə sɩ́án,
ba ga kə wárʋ́ ba sú ba dìì nii.
16 Nə à yə̀ə́ à yà bá ya lá də tətə,
ndə bìú nə, ba nə càrɩ̀ ba dʋgʋ,
ndə bìsɩ̀nɩ́ nə, ba yii nə wà poni dì.
17 Libəri wa, wʋlʋnyɩna kʋ́ʋ̀ ba dwanɩ,
yá mə lá nə lɩ̀à tə nə gwàrɩ̀,
ba dɩ̀àn ga zwɛ̀ tígə́ ba sìí.
18 Bandiə lɩ̀à mama wulə sìə́ wa,
ba kʋ́ʋ̀ ba lìù tə nə fɩfɩn ba kori nə̀ń.
19 Ləzwənbii də ləzwənfaran mɛ wulə lá,
yá yoŋu tɩ ʋ tɩ̀àn ʋ yuu-tiu jɩɩn wa.
20 Bɛ̀ɛ̀ nə pɩn Yɩɩ pɩn poni lìù tə nə,
ʋ nə də́ càn,
yá ʋ pɩn mɩɩ lɩ̀à tə nə, ba nə də́ yinəgə?
21 Ba dànɩ̀ tɩan yá tə ba twi,
ba pɩ̀à tə ba doni jɩjə wiən.
22 Ba yà wá jwɛ ba ga làrɩ̀,
də ba yà nə nɩ libəri!
23 Bɛ̀ɛ̀ nə pɩn Yɩɩ pɩn mɩɩ lìù tə nə,
ʋ nə yəri ʋ yáá yitie,
yá ʋ cɩ̀ kʋ tíú yáá nə tɩa mama?
24 Cɩ́gá, súrə́ nə yɩ à nii wodiu,
yá à bubwiə pwin ka naŋa, ndə nɩ́á nə.
25 Yoo tə kʋ fən nə jə nə,
kʋ mʋ̀ nə yí nə.
Yoo tə à nə dəri,
kʋ mʋ̀ nə jə nə.
26 À ba à ywánɩ́ nə̀ń,
à ba sìə́ jə, à ma ba yazurə də jə.
À yɩ à wulə wʋwalʋ wa máŋá mama.»