Zɔbə bələ nii də́də́ŋú
2
1 Dɩɩn don nə, Yɩɩ sàń lɩ̀à twi ba jəri duən Ba-Yígúrə́-Jə-Tiu yáá con, yá Sɩtana* də twi ba titəŋi wa, Ba-Yígúrə́-Jə-Tiu yáá con. 2 Ba-Yígúrə́-Jə-Tiu bwe Sɩtana, ʋ wʋ́: «Yə̀n nə n nan?» Sɩtana le Ba-Yígúrə́-Jə-Tiu ʋ wʋ́: «À yɩ à kɩkarɩ tɩa tə, à jírí ka wa. 3 Ba-Yígúrə́-Jə-Tiu swɩ̀n Sɩtana con, ʋ wʋ́: «N mɩ̀àn à tʋtʋnʋ Zɔbə n na? Lìù tə̀lə́ tɩa yuu wa, ʋ nə yɩ ndə ʋ nə! Ʋ yɩ bɛɛ tə ʋ nə yɩ təgətəgə, ʋ ga twá cɩ́gá nə ndə kʋ nə mɛ nətʋ. Ʋ dəri à mʋ̀ Yɩɩ fən, ʋ ga cɩ̀ ʋ tɩ̀àn nə də lwanɩ fwaŋʋ. Ʋ zɩga kankan ʋ ka ya təgətəgə tə wa, yá n yigə nə sə à cʋ̀gʋ̀ wá tʋtʋ. 4 Sɩtana le Ba-Yígúrə́-Jə-Tiu ʋ wʋ́: «Yatana nə ŋwɩ́n yatana! Kʋ tə mama ləzwənə nə jə, ʋ yàá pa kʋ sə ʋ ma jon ʋ mɩɩ. 5 Yá n dàń te n jɩɩn, n dwen ʋ kurən tə də ʋ yatanaŋʋ tə yɩra n jə́n! N wá na də ʋ wá zɩrɩ ʋ kə n nə nəpon nəpon.» 6 Ba-Yígúrə́-Jə-Tiu swɩ̀n Sɩtana con, ʋ wʋ́: «Nə̀ń wá nə, à ken wá n jɩɩn wa. N nə dàn ká dwen ʋ mɩɩ tə yɩra.» 7 Sɩtana dàń nan Ba-Yígúrə́-Jə-Tiu yáá con, ʋ vìí. Ʋ vəli ʋ dɩ̀ yɩra nʋran Zɔbə nə, kʋ nə zɩgɩ ʋ nɛɛ nə, kʋ dɩ̀ kʋ yí ʋ yupara. 8 Zɔbə dàń tì cucoo ʋ ma zɛ́ ʋ yɩra, ʋ ga jə̀ə́ tʋnan wa. 9 Ʋ kan tə swɩ̀n ʋ con, ʋ wʋ́: «N tə zɩga kankan, n ka ya təgətəgə tə wa! Zɩrɩ n kə Yɩɩ nə, n ga tɩ!» 10 Yá ʋ le wá, ʋ wʋ́: «N swɩ̀n ndə kan nə, ʋ nə yəri swɩan! Kʋ mɛ sə nə jon zəni Yɩɩ con, nə ga vɩ sə nə jon lwanɩ mʋ̀ naaa?»Yá yojanʋ tə mama wa, yolwan wà Zɔbə nii wa nan.
Zɔbə dabara batwa twi sə ba na wá
11 Zɔbə dabara batwa nì lɛɛ tə mama yoo tə nə yí wá, yá ba lìù mama nan ʋ lʋʋ nii wa, ʋ bà sə ʋ na wá. Kʋ yà yɩ Elifazə, ʋ nə nan Teman, də Bilədadə, ʋ nə nan Swuwa, də Sofarə, ʋ nə nan Naama. Ba vʋrɩ duən nə, sə ba va ba kə ʋ pupuə, ba ga kòrì wá. 12 Ba nə zɩgɩ kwa ba na Zɔbə, ba lwarɩ wá ba ga, yá ba dàń lwə kori, ba wulə ba kwi də ba sisigə. Ba van ba ganzɩfaran ba cɩrɩ, ba ga pɛ̀ pùrú ba mɩ́n yɩɩ nə, ba yuu con. 13 Kʋ kwa nə, ba də wá dàń jə̀ń tɩa, dɩan barpɛ də tɩtɩan barpɛ, yá ba lìù mama wà wànɩ́ ʋ súrí ʋ nii, ʋ swɩ̀n sʋgʋ Zɔbə con. Cɩ́gá, ba yà na də ʋ də́ càn zənzən.