Zɔbə 1

Zɔbə

DƏN LANŊƲ SƲRAN

(1—3)

Zɔbə təntən də́də́ŋú

1 Bɛɛ don yɩn Usə lʋʋ nii tə wa, ʋ yɩrɩ nə yɩ Zɔbə. Bɛɛ təntə yà yɩ təgətəgə, ʋ ga twá cɩ́gá nə ndə kʋ nə mɛ nətʋ. Ʋ yà dəri Yɩɩ fən, ʋ ga cɩ̀ ʋ tɩ̀àn nə də lwanɩ fwaŋʋ. 2 Ʋ yà jə bɩbara barpɛ də bwɩ̀ɩ́ batwa. 3 Ʋ yà jə vanmɩnɩ mʋ̀rʋ̀ barpɛ, də nyʋgʋmɛ mʋ̀rʋ̀ batwa, də navalan mʋ̀rʋ̀, də bɩnakana biənu, də tʋ̀tʋ̀nà kapʋpʋ. Bɛɛ təntə yà yɩ ləzwənfarʋ ʋ doni yɩɩ yɩpɩan con lɩ̀à tə mama. 4 Ʋ bɩ̀á tə yà vəli duən sànɩ́ ba də́ cànà, ba joŋə duən yuu nə, ba ga boŋə ba nakwana batwa tə, ba pɩn ba twi ba də́, ba ga nywɩn də ba. 5 Cànɩ̀ tə diŋə dɩan nə kɛ̀ń, Zɔbə yàá pa ʋ bɩ̀á tə bà ʋ yáá con, yá ʋ yàá kwɛn ba ʋ lɩ durən yìə̀n wa. Ʋ yàá zàn jɩjʋ fuən fuən, ʋ fwa joŋi ba nə sʋ̀rɩ́*, ʋ pa Yɩɩ nə, ba lìù mama yuu yɩrɩ. Cɩ́gá, Zɔbə yà swɩ̀n ʋ waa con, ʋ wʋ́: «Kʋ wàá də à bɩ̀á tə tʋn cʋna, ba ga zɩrɩ ba kə Yɩɩ nə, ba bɩcan wa.» Mə nətʋ nə Zɔbə yà tʋŋa máŋá mama.

6 Dɩɩn don nə, Yɩɩ sàń lɩ̀à twi ba jəri duən Ba-Yígúrə́-Jə-Tiu yáá con, yá Sɩtana* də twi ba titəŋi wa. 7 Ba-Yígúrə́-Jə-Tiu bwe Sɩtana, ʋ wʋ́: «Yə̀n nə n nan?» Sɩtana le Ba-Yígúrə́-Jə-Tiu, ʋ wʋ́: «À yɩ à kɩkarɩ tɩa tə, à jírí ka wa.» 8 Ba-Yígúrə́-Jə-Tiu swɩ̀n Sɩtana con, ʋ wʋ́: «N mɩ̀àn à tʋtʋnʋ Zɔbə n na? Lìù tə̀lə́ tɩa yuu wa, ʋ nə yɩ ndə ʋ nə! Ʋ yɩ bɛɛ tə ʋ nə yɩ təgətəgə, ʋ ga twá cɩ́gá nə ndə kʋ nə mɛ nətʋ. Ʋ dəri à mʋ̀ Yɩɩ fən, ʋ ga cɩ̀ ʋ tɩ̀àn nə də lwanɩ fwaŋʋ.» 9 Yá Sɩtana le Ba-Yígúrə́-Jə-Tiu, ʋ wʋ́: «Kʋ yɩ tʋtʋ yɩrɩ nə Zɔbə dəri n mʋ̀ Yɩɩ fən naaa? 10 N wà ʋ yuu nə pwí, ʋ mʋ̀ də ʋ dìə̀ lɩ̀à, də won tə mama nə yɩ ʋ mʋ̀ nyiən naaa? N fwa zəni ʋ jɩɩn tʋtʋŋɩ yɩra, yá n pɩn ʋ vàná pùlì tə sú lʋʋ nii tə. 11 N dàń te n jɩɩn, n dwen won tə mama yɩra kʋ nə yɩ ʋ mʋ̀ nyiən n jə́n! N wá na də ʋ wá zɩrɩ ʋ kə n nə nəpon nəpon.» 12 Ba-Yígúrə́-Jə-Tiu swɩ̀n Sɩtana con, ʋ wʋ́: «Nə̀ń, à pɩn mʋ́ cwəŋə won tə mama yuu wa, kʋ nə yɩ ʋ mʋ̀ nə tɩ, n nə dàn ká dwen ʋ tətə yɩra.»

Sɩtana dàń nan Ba-Yígúrə́-Jə-Tiu yáá con, ʋ vìí.

13 Dɩɩn don nə, Zɔbə bɩ̀á tə də ʋ bwɩ̀ɩ́ tə yà wulə ba də́ də ba nywɩn divɛn ba zʋnʋ nəkwɩa tə dìə̀ wa. 14 Yá tʋntʋnʋ twi ʋ swɩ̀n Zɔbə con, ʋ wʋ́: «Nɩan tə yà wulə tə vàrɩ̀, yá bɩnakanɩ tə yà zɩga tə də́ gaʋ tə səpuni nə. 15 Yá Saba tɩ̀án ŋwɩna twi ba cɩ̀ tə ba ja, ba ga gʋ tʋ̀tʋ̀nà tə mama mɩ́ámɩ́án də kwatara sɩ̀ʋ́. À mʋ̀ cɩcɩ nə wànɩ́ à jɛ́n ba yáá nə, yá à twi sə à swɩ̀n yoo tə nə tʋn, à bɩrɩ mʋ́.» 16 Təntən tʋntʋnʋ tə yà tə wà swɩ̀n ʋ zwɛ̀, də ʋ don də twi ʋ swɩ̀n, ʋ wʋ́: «Dwà baa vanmɩnɩ tə də tʋ̀tʋ̀nà tə ka gʋ. À mʋ̀ cɩcɩ nə wànɩ́ à jon à tɩ̀àn, yá à twi sə à swɩ̀n yoo tə nə tʋn, à bɩrɩ mʋ́.» 17 Ʋ yà tə wà swɩ̀n ʋ zwɛ̀, də ʋ don də kʋ́ʋ̀ twi ʋ swɩ̀n, ʋ wʋ́: «Kaləde tɩ̀án púlə́ batwa twi ba cɩ̀ nyʋgʋmɛ tə ba ja, ba ga gʋ tʋ̀tʋ̀nà tə mama mɩ́ámɩ́án də kwatara sɩ̀ʋ́. À mʋ̀ cɩcɩ nə wànɩ́ à jɛ́n ba yáá nə, yá à twi sə à swɩ̀n yoo tə nə tʋn, à bɩrɩ mʋ́.» 18 Ʋ də yà tə wà swɩ̀n ʋ zwɛ̀, də ʋ don də kʋ́ʋ̀ twi ʋ swɩ̀n, ʋ wʋ́: «N bɩ̀á tə də n bwɩ̀ɩ́ tə yà wulə ba də́ də ba nywɩn divɛn ba zʋnʋ nəkwɩa tə dìə̀ wa, 19 yá vʋʋ nəfarʋ nan kasɔɔ lanworu tə vàn con, kʋ bà kʋ mà dìə̀ tə nigwancɩan banɩa tə, kʋ dɩ ləzwəndʋn tə yuu nə, kʋ gʋ. À mʋ̀ cɩcɩ nə wànɩ́ à jon à tɩ̀àn, yá à twi sə à swɩ̀n yoo tə nə tʋn, à bɩrɩ mʋ́.» 20 Zɔbə dàń zàn, ʋ van ʋ ganzɩfarʋ ʋ cɩrɩ, ʋ pàrɩ́ ʋ yuu, ʋ ga tʋ tɩa, ʋ nadwana yuu, ʋ pú ʋ yáá tɩa, ʋ pa dun Yɩɩ nə, 21 ʋ ga swɩ̀n, ʋ wʋ́: «À nan à nuu pùə́ wa də yaswələ, yá à wá pìí à va ciru də yaswələ. Ba-Yígúrə́-Jə-Tiu nə pɩn, yá Ba-Yígúrə́-Jə-Tiu nə pìí ʋ jon! Ba-Yígúrə́-Jə-Tiu yɩrɩ mɛ də bʋra!» 22 Yìə̀n təntə mama wa, Zɔbə wà cʋna tʋn, yá ʋ wà sʋlwan mama swɩ̀n, ʋ zɩgɩ Yɩɩ nə.