Zɔbə bɩrɩ də ʋ jə dansɩa lìù Yɩɩ sàń nə
16
1 Zɔbə dàń le ʋ wʋ́:2 «À dí yáá à nì yìə̀n tə tə yiri nɛɛ kapʋpʋ.
Á mama yɩ lɩ̀à tə á nə yəri
ka kòrì lìù, sə ʋ yɩra zuri!
3 Á mʋ̀ lɩ̀à tə, á nə swɩ̀n à con, á wʋ́: “Máŋá kà wa nə, n wá yá sʋvɛɛ swɩʋn nə?
Bɛ̀ɛ̀ nə zɩ̀n n lɩŋa, kʋ pɩn n le vɛɛ?”
4 À də yà wàá à swɩ̀n ndə á nə,
də kʋ yà nə yɩ á mʋ̀ nə wulə à bwálɩ́ nə.
À yà wàá sʋ̀ràn à swɩ̀n à zɩga á nə,
də à vuvugə à yuu á yɩrɩ.
5 Yá à dàń nə wá dàn á jɩɩn də à nii,
à nipənən pʋpwagʋ ga pa á yɩra zuri.
*
6 À nə swə à swɩ̀n, à yɩra ba zuri,
à ma nə yá sʋgʋ nə də,
à càn tə tə bá va yiŋʋnɩ tə yá nə.
7 Yá sɩ́ʋ́n nə, Yɩɩ, n bwànɩ̀ nə.
Cɩ́gá, n pɩn à dìə̀ lɩ̀à mama tɩ.
8 N pɩn à yɩra pɩ̀nɩ̀, tə tún feli,
tə jì dansɩa, tə zɩga à nə.
À bwànʋ́ tə zɩga à yáá con,
kʋ swɩ̀n kʋ zɩga à nə.
9 Yɩɩ lɩŋa van nə tə lee, ʋ ga tɛ nə.
À dʋŋʋ kɩkɩnɩ ʋ yelə ʋ ja zɩga à nə.
À jarɩdon fin ʋ yɩ́á à yuu wa.
10 Lɩ̀à kàń ba níə́ ba ja zɩga à nə,
ba tʋran tə yɩ̀ nə,
ndə ba nə farɩ à pɩpara nə.
Ba mama kún duən nə, ba zɩga à nə.
11 Yɩɩ ken nə jɩmurinyʋa jɩɩn wa,
ʋ dɩlɩ nə wʋlʋnyɩna jɩ̀àn wa.
*
12 À yà wulə à bwálɩ́ nə də yazurə,
yá ʋ vuvugu nə.
Ʋ jɩn à kətuu nə, ʋ ga nyʋnyʋgʋ nə.
Ʋ zɩ̀n nə ʋ zɩgɩ yɩɩ nə,
sə à ya ʋ bʋ̀là won.
13 Ʋ cɩan tə naŋa tɩa mama,
tə twi tə janɩ nə.
Ʋ ta à tanpɩrɩbɩa ʋ cʋ̀rɩ̀,
ʋ wà à yinəgə dəri,
ʋ lwá à lɩ̀ŋɩ́ tɩa.
14 Ʋ dəri ʋ bà à nə, ndə kwatarʋ nə,
ʋ mà nə, ʋ tún nʋran kapʋpʋ à yɩra.
15 À nyan ganlɔɔ, à ma pú à yatana nə,
à ga pú à yáá pùrú wa.
16 À kwi à yɩ́á sɩan.
Tɩan yuywara wulə à yɩkʋla yuu.
17 Yá à jɩ̀àn wà lwanɩ tʋn,
à yɩjʋnɩ də ga ba durən jə.
*
18 Tɩa, dàn ká sùń à jana tə yuu nə!
Won mama dàn ká cɩ̀ à bubwiə tə yáá nə!
19 Sɩ́ʋ́n nə, à dàń jə dansɩa lìù Yɩɩ sàń nə,
à jə lìù yɩɩ nə, baan baan,
ʋ nə swɩ̀n ʋ zwɩ à kwa.
20 À dabara fʋfʋlɩ nə,
Yɩɩ nə nə à kwi à bɩrɩ.
21 À lòrì à dansɩa lìù tə,
sə ʋ ya lwɛnʋ ləzwənə də Yɩɩ pwə́rə́ wa,
də ləzwənə də ʋ don pwə́rə́ wa!
22 Cɩ́gá, à bɩna nii cé,
yá à wá tì cwəŋə tə nə vəli,
yá ka ba pìí ka twi, à vìí.»