À bwɩ Yɩɩ nə ʋ nə fwa won mama
104
1 À jə̀rə́, bʋ Ba-Yígúrə́-Jə-Tiu nə!Ba-Yígúrə́-Jə-Tiu, à tíú Yɩɩ, n dáá zənzən!
N zʋa poni də dun, ndə ganzwɩʋ nə.
2 N ja poni n pipini n tɩ̀àn, ndə n gànʋ̀ nə.
N larɩ lanworu tə, ndə gansili nə.
3 N lwə̀ n dəyuu dìì tə nɩ́á tə yuu wa,
bakwan tə ga yɩ n səsen koru.
N wulə vʋʋ tə vànà yuu wa, n vəli.
4 N jɩn vʋʋ tə, n ma fwa n tʋntʋna,
n ga ja mənvwə n ma fwa n tʋ̀tʋ̀nà.
5 N tún tɩa tə ka dəkuu yuu wa,
ka wàrɩ̀ ka vuvugə, abada.
6 N pɩn mʋʋ piri ka yuu nə, ndə gànʋ̀ nə,
nɩ́á tə dɩ̀gà tə yí pɛɛn tə yupara wa.
7 Tə dəri máŋá tə wa, n nə caga tə nii nə.
Tə nì n dwà bagʋ tə, tə ga dəri tə jɛ́n.
8 Tə twá pɛɛn tə yuu, tə kɛ̀ɛ́ tə cú varɩ tə wa,
tə va tə yí bwálɩ́ tə, n nə tún n pa tə.
9 N tún sɩswɩan n pa tə, tə nə wà mɛ sə tə lɛ lá,
tə dàn ká pìí tə bà tə piri tɩa tə yuu nə.
10 N pɩn nabuliyɩa nɩ́á dəri tə twá nacorən wa,
tə vəli tə twá pɛɛn pwə́rə́ wa.
11 Ganaŋa tə mama nywɩn nɩ́á təntə,
gaʋ bɩnɛɛ də ga nywɩn nɩ́á tə swí lá.
12 Lanworu zuŋi ken tə pwalan nɩ́á tə nii nə,
tə ga kwi tɩ̀án tə vʋran wa.
13 N zɩgɩ lanworu tə wa,
n pa dwà nɩ̀ pɛɛn yuu wa,
tɩa tə ga sú də n tʋ̀tʋ̀nán tə.
14 N pɩn gaʋ pɛ́n, sə vàná də́,
n ga pa tɩ̀án tə, sə ləzoni vàrà,
ba ma na ba nii wodiu, tɩa yuu wa.
15 Divɛn pɩn ləzoni pwìí poli,
kʋ pɩn ba yɛɛ pɩpɩlɩ, kʋ doni nʋga.
Wodiu pɩn ləzoni bɩcanɩ janɩ dɩ̀àn.
16 Ba-Yígúrə́-Jə-Tiu tɩ̀án tə nywɩn nɩ́á tə swí,
Liban sɩsaban tɩ̀án tə, ʋ nə cwɛn.
17 Mə lá nə zuŋi tə fwa tə pwalan,
dwanʋ də ga fwa kʋ dìə̀ nyənbori tɩ̀án tə wa.
18 Pɛɛn tə, tə yuu nə dara də tɩa,
yɩ gaʋ bʋtɩlan nyiən,
pɩ̀ràn tə ga yɩ nyana yisəgə bwálɩ́.
19 N fwa cànà tə sə n ma bɩrɩ máŋá,
yá yɩcaʋ tə yə̀ə́ máŋá tə, kʋ nə mɛ sə kʋ zʋ.
20 N pɩn yikunu bà, tɩa ga yì,
ganaŋa tə mama ga zàn tə vəli.
21 Gəbalɩ tə baa, tə pɩ̀à tə nii wodiu,
tə lòrì tə nii wodiu Yɩɩ con.
22 Yɩcaʋ nə pɛ́n, tə yàá pìí tə va
tə təgə tə yipaa bwálɩ́ nə.
23 Ləzwənə dàń yàá nan ʋ va ʋ tʋ̀tʋ̀nán,
yá ʋ yàá tʋn, kʋ va kʋ yí didəni.
24 Ba-Yígúrə́-Jə-Tiu, n tʋ̀tʋ̀nán tə dáá!
N fwa tə mama də wʋbʋŋa.
Tɩa tə súə́ də wiən tə n nə fwa.
25 Nə̀ń mʋʋ nəfarʋ tə, kʋ nə wala zənzən.
Mə lá nə nɩ́á wa vanmɩnɩ,
də vanfaran kapʋpʋ, tə nə wàrɩ̀ tə gàlɩ̀ wulə.
26 Nɩ́á yuu bwərə wulə kʋ yuu wa, tə vəli,
də mʋʋ wojijiru* tə n nə fwa, sə kʋ bwan lá.
27 Nɩ́á wa wiən təntə mama jələ n yuu wa,
sə n pa tə tə nii wodiu kʋ diŋə máŋá wa.
28 N nə pɩn tə wodiu, tə yàá pɛ̀,
n nə súrí n jɩɩn, tə yàá də́ tə sú.
29 Yá n nə viviri n kwa n ma sà tə, fən yàá zʋ tə,
n nə jon tə siŋu tə, tə yàá tɩ, tə jì pùrú.
30 N nə pɩn tə n siŋu tə, tə yàá jì wonəŋə,
yá n dàń yàá pa won mama jì wadʋn tɩa yuu wa.
31 Ba-Yígúrə́-Jə-Tiu mɛ də dun máŋá mama wuuu!
Ba-Yígúrə́-Jə-Tiu wá fwa pupwən ʋ tʋ̀tʋ̀nán tə yɩrɩ!
32 Ʋ ywàŋá tɩa tə, yá ka wulə ka vuvugə,
ʋ dwen pɛɛn tə yɩra, yá tə kwé mən.
33 À wá nun à pa Ba-Yígúrə́-Jə-Tiu nə,
à lʋʋ wúlú tə mama wa.
À wá bʋ à tíú Yɩɩ nə, máŋá tə mama,
à mɩɩ nə wá ya lʋʋ wa.
34 Pa à gwaran tə twá n fɩra nə!
À mʋ̀ pupwən yɩ ka naŋa Ba-Yígúrə́-Jə-Tiu con!
35 Yɩɩ wá pa yolwafwana tə nyʋn tɩa yuu wa,
sə ba tə nə ba Yɩɩ nii zìlí kʋ́ʋ̀ dàn ká ya lʋʋ wa!
À jə̀rə́, bʋ Ba-Yígúrə́-Jə-Tiu nə!
Á bwɩa Ba-Yígúrə́-Jə-Tiu nə!