Ba-Yígúrə́-Jə-Tiu mɛ də bʋra
103
1 Davidə gwaran.
À bwɩ Ba-Yígúrə́-Jə-Tiu nə, də à waa mama!
À bwɩ ʋ yɩrɩ tə nə, kʋ nə yɩ parɩ, də à pubʋŋa mama!
2 À jə̀rə́, bʋ Ba-Yígúrə́-Jə-Tiu nə,
dàń ká swɛ̀ɛ́ ʋ zəni yìə̀n tə nədʋ mama yoo!
3 Ʋ mʋ̀ nə kwɛn à cʋna tə mama
ʋ lɩ à də wá pwə́rə́ wa,
ʋ ga zwɛ̀ à yayɩran tə mama.
4 Ʋ mʋ̀ nə jon nə tɩan bʋʋ wa,
ʋ ga pú ʋ pubwanʋ tə,
də ʋ wʋywaŋʋ* tə à yuu nə, ndə payupuu nə.
5 Ʋ mʋ̀ nə pɩn nə wozəŋə yiri mama,
ʋ pɩn à dɩ̀àn pìí tə bwin, ndə zənpuu nə.
6 Ba-Yígúrə́-Jə-Tiu tʋŋa kʋ twá cɩ́gá cwəŋə nə,
ʋ ga bʋ̀rɩ̀ ʋ pɩn lɩ̀à tə mama nə, ba nə fɩfɩn.
7 Ʋ tún ʋ coŋi tə, ʋ pa Moyizə nə,
ʋ ga bɩrɩ ʋ dɩ̀àn tʋ̀tʋ̀nán tə Yɩzərayɛlə lɩ̀à nə.
8 Ba-Yígúrə́-Jə-Tiu yɩ pubwanʋ tíú,
ʋ dəri lɩ̀à yinəgə.
Ʋ yɩ wʋywanyiən, ʋ lɩŋa ba zaŋa lala.
9 Ʋ ba lɩ̀à nii nə caga máŋá mama,
ʋ ma ba lɩ̀à dʋŋa máŋá mama wuuu.
10 Ʋ ba nəba càn wa keni,
ʋ pɩn kʋ yí nə lwanɩ tə ŋwɩ́rán.
Ʋ ba nə yolwana tə jɩŋɩ ŋwɩ́n nə yɩra,
ndə kʋ nə mɛ nətʋ.
11 Yá Ba-Yígúrə́-Jə-Tiu wʋywaŋʋ tə dáá zənzən,
kʋ pa lɩ̀à tə nə, ba nə dəri ʋ fən,
ndə lanworu nə ŋʋ́ná də tɩa nətʋ.
12 Ʋ pɩn nə cʋna tə ŋʋ́ná də nəba,
ndə yɩɩ yipɩan nə ŋʋ́ná də yɩɩ yizwɩa nətʋ.
13 Ba-Yígúrə́-Jə-Tiu swə lɩ̀à tə nə dəri ʋ fən,
ndə nyɩna nə swə ʋ bɩ̀á nətʋ.
14 Cɩ́gá, ʋ yə̀ə́ won tə, ʋ nə ma fwa nəba,
ʋ yə̀ə́ də nə yɩ pùrú.
15 Ləzwənə dɩan yɩ ndə gaʋ nə,
ʋ yàá bori ndə kárɩ́ gaʋ pùní nə.
16 Vʋʋ nə twá kʋ yuu con kʋ kɛ̀ń,
kʋ yàá jɛ́n,
yá bwálɩ́ tə, kʋ yà nə wulə lá,
dàń yàá swɛ̀ɛ́ kʋ yoo.
17 Yá Ba-Yígúrə́-Jə-Tiu wʋywaŋʋ tə mʋ̀ wulə,
máŋá mama wuuu,
kʋ pa lɩ̀à tə nə, ba nə dəri ʋ fən.
Yá ʋ cɩ́gá cwəŋə tə yɩ ba bɩ̀á
də ba nɩ̀án nyiən, máŋá mama wuuu.
18 Kʋ yɩ nətʋ kʋ pa lɩ̀à tə nə,
ba nə zìlí ʋ nimarʋ tə nii,
ba ga sɛ̀ ba tʋŋa yìə̀n tə,
ʋ nə tún sə ba twá tə nə.
19 Ba-Yígúrə́-Jə-Tiu tún ʋ padaʋ tə lanworu tə wa,
yá ʋ də́ ʋ pàrɩ̀ tə wom mama yuu wa.
20 Á bwɩa Ba-Yígúrə́-Jə-Tiu nə,
á mʋ̀ ʋ malɩkɛ tə, á nə jə dɩ̀àn,
á ma tʋŋa á pɩn wá,
á ga zìlí ʋ nii, yoo mama wa!
21 Á bwɩa Ba-Yígúrə́-Jə-Tiu nə,
á mʋ̀ ʋ kwataraa tə mama,
á nə yɩ ʋ tʋ̀tʋ̀nà, á ga twá ʋ fɩra nə!
22 Ba-Yígúrə́-Jə-Tiu tʋ̀tʋ̀nán tə mama bwɩa ʋ nə,
bwálá tə mama wa, ʋ nə də́ pàrɩ̀!
À jə̀rə́, bʋ Ba-Yígúrə́-Jə-Tiu nə!