Pucʋnɩ də yala yoo
102
1 Yinənyiən yɩjʋnɩ, ʋ nə ma túŋə́ ʋ nii Yɩɩ yáá con, máŋá tə wa ʋ dɩ̀àn nə zwɛ̀.
2 Ba-Yígúrə́-Jə-Tiu, cʋgʋ à yɩjʋnɩ tə,
sɛ̀ sə à bubwiə tə dɩ̀ ka yí n con!
3 Dàn ká viviri n kwa n ma sà nə,
máŋá tə wa, à nə wulə pucʋnɩ wa!
Guni n zɩɩn n kə à con!
Dɩɩn tə à nə bon mʋ́, sə n le nə lala.
4 Cɩ́gá, à mɩɩ zwɛ̀ ndə ŋwɩn nə,
à kurən ga lɩŋɩ ndə mən nə.
5 À bɩcan kʋa, ndə gaʋ nə ba nə gɩan,
à ga swɛ̀ɛ́ sə à də́ à wodiu tətə.
6 À kwi zənzən,
kʋ pa à tànʋ̀ marɩ à kurən yɩra.
7 À jìgə̀ ndə caŋwara nə, kasɔɔ lanworu wa,
à yɩ ndə cirə lwara nə, dibwərən wa.
8 À ba dwɛ̀,
ndə zuŋə nə jə̀ə́ dəyuu wa, ka cɩcɩ.
9 Dɩɩn mama, à dʋŋa fɩfɩn nə.
Ba lɩŋa zaŋa à yuu wa,
ba ga ja à yɩrɩ ba ma zɩrɩ ba kəni lɩ̀à nə.
10 Tʋntʋnʋ nə yɩ à wodiu,
yá à yinɩa yàá gùlí won tə mama wa,
à nə nywɩn.
11 N lɩŋa zàn à yuu wa zənzən,
n waa ga nan nə,
yá n dàń jɩn nə, n dɩlɩ yiŋʋnɩ.
12 À mɩɩ wulə kʋ zwɛ̀,
ndə yɩywara nə kɛ̀ń nətʋ,
à ga kʋ̀ ndə gaʋ nə.
13 Yá n mʋ̀ Ba-Yígúrə́-Jə-Tiu yɩ pɩ̀ʋ́ máŋá mama wuuu.
Ba wá lìí n yoo máŋá də máŋá mama wuuu,
14 n ga wá zàn n tʋn yoo,
n nə swə Siyon tɩʋ tə yɩrɩ.
Cɩ́gá, máŋá yí sə n fwa pubwanʋ kʋ yɩra.
Awoo, máŋá yí!
15 Cɩ́gá, nə mʋ̀ n tʋ̀tʋ̀nà tə swə kʋ kapana tə,
kʋ pùrú tə yinəgə ga jə nəba.
16 Dwíə́ nəkaran* tə dàń wá dəri
Ba-Yígúrə́-Jə-Tiu yɩrɩ tə fən,
yá tɩa yuu pɛ̀gá tə wá zìlí ʋ dun tə.
17 Máŋá tə Ba-Yígúrə́-Jə-Tiu nə wá pìí
ʋ lwà Siyon tɩʋ tə,
ʋ wá bɩrɩ ʋ tɩ̀àn ʋ dun tə wa.
18 Ʋ wá viviri ʋ yáá ʋ kə yinənyiən con,
ʋ cʋgʋ wá, ʋ bá gwìə̀n ʋ yɩjʋnɩ.
19 Ba mɛ sə ba pʋ́pʋ́nɩ́ kʋ ba tún,
dwíə́ tə yɩrɩ, tə nə bɩ̀àn,
yá lalʋʋ nədʋn wá bʋ Ba-Yígúrə́-Jə-Tiu nə.
20 Ba-Yígúrə́-Jə-Tiu jə̀ń lanworu tə wa,
ʋ wúlú bwálɩ́ tə wa, ʋ guni ʋ ywàń.
Ʋ jə̀ń lanworu tə wa, ʋ ywàń tɩa,
21 sə ʋ cʋgʋ bandiə lɩ̀à kwirə,
ʋ ga jon ba tə nə wulə tɩan jɩɩn wa.
22 Ba dàń wá cə̀rí Ba-Yígúrə́-Tiu yɩrɩ tə Siyon tɩʋ tə wa,
ba ga siən wá Zwerizalɛmə tɩʋ tə wa,
23 máŋá tə lalʋʋ tə mama nə wá kun duən nə,
sə ba tʋn ba pa Ba-Yígúrə́-Jə-Tiu nə.
24 Ʋ pɩn à dɩ̀àn zwɛ̀ à cwəŋə titəŋi wa,
ʋ ga goŋə à lʋʋ wúlú ʋ mun.
25 Kʋ mʋ̀ nə pɩn à swɩ̀n, à wʋ́:
«À tíú Yɩɩ, n mʋ̀ nə wulə máŋá mama wuuu.
Dàn ká jon à mɩɩ tə də kʋ máŋá wà yí.»
26 N nə dɩga tɩa dəkuu, kʋ máŋá ba yigə,
lanworu tə ga yɩ n jɩ̀àn tʋtʋŋɩ.
27 Wiən təntə mama wá jɛ́n,
yá n mʋ̀ wá ya lá wuuu.
Tə mama wá kwɩ̀n ndə gànʋ̀ nə,
n ga wá lwàń tə,
ndə ba nə lwànɩ́ ganzwɩʋ nətʋ,
yá tə wá yá bwálɩ́.
28 Yá n mʋ̀ wulə wuuu, n ba lwànɩ́,
n bɩna də ga ba zwɛ̀.
29 N tʋ̀tʋ̀nà tə bɩ̀á dəkuu wá zʋ tɩa,
yá ba dwíí tə wá ya n yáá con, máŋá mama.