Pɩ̀ʋ́ tə sɛ̀ sə ʋ tì cɩ́gá cwəŋə Yɩɩ Yáá con
101
1 Davidə gwaran.
À pɩ̀à sə à nun wʋywaŋʋ* də cɩ́gá cwəŋə yoo,
à ga siən n mʋ̀ Ba-Yígúrə́-Jə-Tiu.
2 À wá zìlí lɩ̀à tə nə yɩ təgətəgə nii zəni.
Máŋá kwà wa nə n wá bà à con?
À wá ya à dìə̀ lɩ̀à tə titəŋi wa də bɩcan kʋ nə yɩ təgətəgə.
3 À bá pa wokʋkwɩʋn mama bà à yáá con.
À culi lɩ̀à tə nə ba Yɩɩ nə twá də pùə́ nədʋ tʋtʋnɛɛ tə.
Yìə̀n təntə fɩra ba nə jə.
4 À ba pɩ̀à sə yolwan mama ya à bɩcan wa.
À ba pɩ̀à sə à yəni lwanɩ.
5 À wá pa lɩ̀à tə nə səgə ba swɩ̀n yolwana,
ba pɩn lɩ̀à duən nə pú ba nii.
À bá kə à nii lɩ̀à tə nə gònì lɩ̀à,
də ba tə nə fwa fwìə́ kwa.
6 À wá pɩ̀à lɩ̀à tə,
lìù nə wàá ba yuu wa n jələ lʋʋ nii tə wa,
sə ba ya də nə.
Lìù tə nə yɩ təgətəgə wá ya à tʋtʋnʋ.
7 Gɩgɩrɩnyiən bá twá ʋ ya à dìə̀ wa.
Kʋnkʋnʋ bá zɩgɩ à yáá con.
8 Jɩjʋ mama, à wá pa lʋʋ nii tə
wʋlʋnyɩna tə mama pú ba nii,
sə kʋ dɩŋa yolwafwana tə mama,
kʋ lɩ Ba-Yígúrə́-Jə-Tiu tɩʋ tə wa.