Yɩɩ kàn nikanɩ ʋ pa Davidə də ʋ dwíí nə
17
1 Davidə dàń yà wulə ʋ də́ ʋ pàrɩ̀ tə də sìə́. Dɩɩn don nə, pɩ̀ʋ́ Davidə swɩ̀n Yɩɩ nii sʋ̀sʋ̀nʋ̀ Natan con, ʋ wʋ́: «N dàń ywàń n jə́n! À mʋ̀ wulə dìə̀ wa, ba nə lwə̀ də sɩsaban dɛɛ, yá Yɩɩ nimarʋ culu daka tə mʋ̀ ga wulə gànsìlí də̀ń.» 2 Natan ma le pɩ̀ʋ́ Davidə, ʋ wʋ́: «Vəli n tʋn kʋ tə, n nə bʋŋa n waa con, kʋ yoo təntə yuu wa. Cɩ́gá, Ba-Yígúrə́-Jə-Tiu wulə də mʋ́.»3 Yá kʋ tɩtɩn nə, Ba-Yígúrə́-Jə-Tiu swɩ̀n sʋ̀ràn tə tə, Natan con, ʋ wʋ́: 4 «Vəli n swɩ̀n à tʋtʋnʋ Davidə con, də à mʋ̀ Ba-Yígúrə́-Jə-Tiu nə swɩ̀n də, kʋ tà ʋ mʋ̀ nə wá lwà dìə̀ ʋ pa nə, sə à ya ka wa. 5 Cɩ́gá, kʋ nə zɩgɩ dɩɩn tə nə, à nə lɩ Yɩzərayɛlə lɩ̀à tə, Ezwipətə lʋʋ nii tə wa, kʋ bà kʋ yí zə̀n, à tə wà dìə̀ wa yɩn. Gansilə nə yɩn à dìə̀, máŋá tə mama à nə ja ba à vəli. 6 Yá kʋ máŋá təntə mama, à nə ja Yɩzərayɛlə lɩ̀à tə à vəli, à kúrí lɩ̀à ba dwíə́ tə wa, sə ba ywàń Yɩzərayɛlə lɩ̀à tə yuu, ba nə yɩ à mʋ̀ lɩ̀à. Yá à dàń nə wà ba ladʋa tətə nii nə caga, ʋ nə wà sɩsaban dɛɛ dìə̀ lwè, ʋ pa nə yɩrɩ. 7 Kʋ mʋ̀ yɩrɩ, n wá swɩ̀n à tʋtʋnʋ Davidə con də, à mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n də, à mʋ̀ nə lɩ wá vàná yɩrʋ wa, sə ʋ də́ pàrɩ̀ Yɩzərayɛlə lɩ̀à tə yuu wa, ba nə yɩ à mʋ̀ lɩ̀à. 8 À yɩn də wá bwálɩ́ tə mama wa, ʋ nə vəli. À pɩn ʋ də́ dɩ̀àn ʋ dʋŋa tə mama yuu wa, à ga pa ʋ yɩrɩ nan, ndə tɩa yuu pɛ̀gá nəfaran tə yɩrɩ nə nan nətʋ. 9 À wá pa bwálɩ́ Yɩzərayɛlə lɩ̀à tə nə, ba nə yɩ à mʋ̀ lɩ̀à. À wá kə ba bwálɩ́ nədʋ nə, sə kʋ ya ba mʋ̀ nyiən, ba ya lá. Yá wʋwalʋ kʋ́ʋ̀ bá yí ba, wʋlʋnyɩna də ga kʋ́ʋ̀ bá na ba, ba fʋfʋlɩ, ndə fuən tə nə, 10 də máŋá tə wa, à nə tún lɩ̀à tə nə bʋ̀rɩ̀ bʋra, Yɩzərayɛlə lɩ̀à tə yuu wa, ba nə yɩ à mʋ̀ lɩ̀à. À pɩn ʋ də́ dɩ̀àn ʋ dʋŋa tə mama yuu wa. Yá à dàń swɩ̀n ʋ con, sə ʋ lwarɩ də, à mʋ̀ Ba-Yígúrə́-Jə-Tiu nə wá lwà dìə̀, à pa ʋ mʋ̀ Davidə nə. 11 Yá máŋá tə, ʋ mɩɩ nə wá bà kʋ zwɛ̀, ba tì ba gùrì, ʋ nyɩna-ba con, ba nə dí yáá ba tɩ, à wá tún ʋ tətə bìú tə don, ʋ nə lɩrɩ, sə ʋ də́ pàrɩ̀, ʋ yuu nə. Yá à ga wá pa ʋ pàrɩ̀ tə dəkuu ja dɩ̀àn. 12 Mə ʋ bìú təntə nə wá lwà dìə̀, à yɩrɩ yuu wa. Yá à dàń wá pa ʋ pàrɩ̀ tə dəkuu ja dɩ̀àn, máŋá mama wuuu. 13 À wá ya ʋ nyɩna, ʋ də ga wá ya à bìú. Yá à bá lwàń à wʋywaŋʋ* tə mʋ̀, à nə tʋŋa ʋ yɩra, ndə à nə lwàń kʋ lìù tə yɩra ʋ nə dí ʋ yáá. 14 À wá tún wá, sə ʋ yà à lɩ̀à tə pɩ̀ʋ́, máŋá mama wuuu, yá ʋ padaʋ tə dəkuu wá ja dɩ̀àn, máŋá mama wuuu.»
15 Kʋ tɩpʋrɩ nə, Natan swɩ̀n sʋ̀ràn təntə mama, Yɩɩ nə swɩ̀n ʋ con, nɩʋn təntə wa, ʋ bɩrɩ Davidə nə.
Davidə yɩjʋnɩ
16 Pɩ̀ʋ́ Davidə dàń vəli, ʋ tʋ Ba-Yígúrə́-Jə-Tiu yáá con, ʋ swɩ̀n, ʋ wʋ́: «Yuu-Tiu, Ba-Yígúrə́-Jə-Tiu, à mʋ̀ nə yɩ wàà? Yá bɛ̀ɛ̀ nə yɩ à dìə̀ tə, n ma tʋn zəni à yɩra, kʋ mɛ nətən? 17 Yá n mʋ̀ Ba-Yígúrə́-Jə-Tiu na də, kʋ tə wà n fɩra yí. N tə swɩ̀n n nə wá pa à dìə̀ tə də ya nətʋ, máŋá wa ka nə bɩ̀àn. Kʋ tə nə dwə, n tə swɩ̀n kʋ n bɩrɩ à mʋ̀ lìù tə nə, à nə yɩ ləzwənə, ndə à dwə à duən, Ba-Yígúrə́-Jə-Tiu, à tíú Yɩɩ! 18 Bɛ̀ɛ̀ nə à mʋ̀ Davidə kʋ́ʋ̀ wàá à swɩ̀n n con, à súrí dun tə nə n nə pɩn nə? N tətə yə̀ə́ à mʋ̀ n tʋtʋnʋ tə! 19 Ba-Yígúrə́-Jə-Tiu, kʋ yɩ à mʋ̀ n tʋtʋnʋ tə yɩrɩ nə, n tʋn yofaran tə tə mama, kʋ twá n fɩra nə, n ga pa ba lwarɩ tə. 20 Ba-Yígúrə́-Jə-Tiu, n ba kamandon jə, yá Yɩɩ don tə̀lə́, də kʋ nə tà n mʋ̀, ndə nə nə nì kʋ nətʋ. 21 Dwíí don kʋ́ʋ̀ wulə tɩa yuu wa, ba yɩa nə vəli tə jon ba, tə ma fwa tə lɩ̀à, ndə Yɩzərayɛlə dwíí tə nə, ba nə yɩ n mʋ̀ lɩ̀à naaa? Yɩzərayɛlə dwíí tə cɩcɩ nə, n mʋ̀ Yɩɩ vəli n tʋn yofaran, də dɩ̀àn tʋ̀tʋ̀nán, n ma dɩŋa dwíə́ nəkaran* n lɩ ba yáá con, n ga jon ba Ezwipətə tɩ̀án jɩɩn wa, n ma fwa n lɩ̀à. Yá kʋ nətʋ tə dàń pɩn n yɩrɩ nan. 22 N tún Yɩzərayɛlə lɩ̀à tə, n pa ba dəkuu ja dɩ̀àn, sə ba ya n mʋ̀ lɩ̀à, máŋá mama wuuu. Yá n mʋ̀ Ba-Yígúrə́-Jə-Tiu dàń nə jìgə̀ ba Yɩɩ. 23 Sɩ́ʋ́n nə, Ba-Yígúrə́-Jə-Tiu, à dàń lòrì mʋ́ sə n pa sʋgʋ tə n nə swɩ̀n, à mʋ̀ n tʋtʋnʋ tə də à dìə̀ tə yuu wa nii sú máŋá mama wuuu, ndə n nə swɩ̀n nətʋ. 24 Awo, pa sə kʋ nii sú, sə n yɩrɩ tə na dun máŋá mama, sə lɩ̀à ga swɩ̀n də, Ba-Yígúrə́-Jə-Tiu, Yɩzərayɛlə lɩ̀à Yɩɩ tə ʋ nə yɩ kwatara Yɩɩ, nə yɩ Yɩzərayɛlə lɩ̀à Yɩɩ! Tún à mʋ̀ n tʋtʋnʋ Davidə dìə̀ tə, n pa ka dəkuu ja dɩ̀àn, n yáá con. 25 Cɩ́gá, n tətə à tíú Yɩɩ nə bɩrɩ à mʋ̀ n tʋtʋnʋ tə nə, də n wá lwà dìə̀ n pa nə! Kʋ mʋ̀ nə pɩn, à mʋ̀ n tʋtʋnʋ tə ma na wʋdɩʋ, à ma lòrì kʋ yoo təntə n con. 26 Sɩ́ʋ́n nə, Ba-Yígúrə́-Jə-Tiu, n mʋ̀ nə yɩ Yɩɩ, yá n swɩ̀n zəni tə yoo, n nə pɩ̀à n tʋn à mʋ̀ n tʋtʋnʋ tə yɩra, n bɩrɩ nə. 27 À dàń lòrì mʋ́ sɩ́ʋ́n nə, sə n tʋn zəni à mʋ̀ n tʋtʋnʋ tə dìə̀ tə yɩra, sə ka na yuywaŋʋ n yáá con, máŋá mama wuuu! Cɩ́gá, n mʋ̀ Ba-Yígúrə́-Jə-Tiu nə tʋn zəni, kʋ zəni təntə yàá wulə máŋá mama wuuu.»