Baana də Rekabə gʋa Yiswəboswɛtə
4
1 Máŋá tə Sayulə bìú Yiswəboswɛtəa nə nì də Abənɛrə tɩga Ebəron nə, ʋ jɩ̀àn gwarɩ, yá fən ga zʋ Yɩzərayɛlə lɩ̀à tə də mama. 2 Yiswəboswɛtə yà jə kwatara yáá tɩ̀án bələ. Ʋ don yɩrɩ nə yɩ Baana, ʋ don yɩrɩ ga nə Rekabə. Ba yɩ Bɛnzwamɛn dwíí tə wa bɛɛ don bɩ̀á, ʋ yɩrɩ nə yɩ Rimon, ʋ ga yɩ Beerɔtə tíú. Yá Beerɔtə yɩ Bɛnzwamɛn nagwanaa tə nə tɩ. 3 Máŋá don wa, Beerɔtə tɩ̀án yà dəri, ba va Gitayimə. Yá ba dàń yɩ vərə, ba twá ba jə̀ə́ lá, də zə̀n mama.4 Sayulə bìú Zonatan yà jɩn bìú, ʋ nɛɛ nə tɩga, ʋ yɩrɩ nə yɩ Mefiboswɛtə. Bisɩmaa tə yà jə bɩna bonu, máŋá tə wa lɩ̀à nə nan Zwizəreyɛlə, ba bà, ba swɩ̀n Sayulə də Zonatan tɩan tə yoo. Kʋ máŋá təntə wa, lìù tə ʋ yà nə ywàŋá bisɩmaa tə nə, tì wá, sə ʋ ja dəri. Ʋ dàń nə bɩbarɩ tə pɩn, bisɩmaa tə nan ʋ jɩɩn, ʋ tʋ, ʋ nɛɛ tə cʋ̀gʋ̀, ʋ dàń ga jì gwànʋ́.
5 Yá dɩɩn don nə, Berɔtə Rimon bɩ̀á tə, Rekabə də Baana vəli Yiswəboswɛtə sàń. Kʋ yɩn yɩcaʋ gùlú máŋá wa. Ba vəli ba yí, də ʋ tígə́, ʋ dwɛ̀ yɩcaʋ dwiən. 6-7 Ba zʋa ba yí dìə̀ tə titəŋi wa, ndə mɩna nə, ba zʋa, sə ba fwa. Ba nɩ Yiswəboswɛtə, də ʋ tígə́ ʋ gədo yuu, ʋ dipənə wa. Yá ba dàń zuə sɩ̀ʋ́, ʋ pùə́ wa, ba gʋ, ba goŋə ʋ yuu, ba ja nan ba vìí. Ba yɩn Araba tə cwəŋə tə wa, ba va tɩtɩn tə mama. 8 Ba jɩn Yiswəboswɛtə yuu tə, ba va, ba pa pɩ̀ʋ́ Davidə nə, Ebəron nə, ba ga swɩ̀n ʋ con, ba wʋ́: «Nə̀ń n dʋŋʋ Sayulə, ʋ yà nə pɩ̀à, sə ʋ lɩ n mɩɩ, bìú Yiswəboswɛtə yuu nə. Ba-Yígúrə́-Jə-Tiu fwi ʋ lɩŋa zə̀n kʋ tə, Sayulə də ʋ dwíí tə yuu wa, n mʋ̀ à yuu-tiu pìʋ́ yɩrɩ.» 9 Davidə le Berɔtə Rimon bɩ̀á tə, Rekabə də ʋ nubiu Baana, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! Ʋ mʋ̀ nə jon nə, wʋwalʋ yiri mama wa! 10 Lìù tə nə twi, ʋ swɩ̀n Sayulə tɩan tə yoo, à con, yà bʋŋa də kʋ yɩ sʋywáŋʋ́ nə, ʋ swɩ̀n, ʋ bɩrɩ nə. Yá à pɩn ba ja wá, ba gʋ Sikəlage nə, sə kʋ ya ʋ sʋywáŋʋ́ təntə ŋwɩ́rán! 11 Mə wʋlʋnyɩna dàń nə gʋa cɩ́gá tíú, ʋ dìə̀ wa, ʋ gədo yuu, nə à bá bwe ʋ jana tə yoo á con, tə nə wulə á jɩ̀àn nə, à ga pa, á nyʋn tɩa yuu naaa?»
12 Yá Davidə dàń pɩn nii, ʋ kwa lɩ̀à tə nə, ʋ pa, ba gʋ ba. Ba goŋi ba jɩ̀àn tə, də ba nɛɛ tə, ba ga goli ba, Ebəron buu tə nii nə. Ba tì Yiswəboswɛtə yuu tə, ba gùrì Abənɛrə libəri tə wa, Ebəron nə.