3
1 Kʋ̀ʋ̀ tə dán zənzən Davidə lɩ̀à tə, də Sayulə lɩ̀à tə pwə́rə́ wa. Davidə dɩ̀àn yà súrí wuuu, yá Sayulə lɩ̀à tə ga bwànɩ̀ wuuu.Davidə bɩ̀á tə, ʋ nə lɩrɩ Ebəron nə
2 Davidə lɩrɩ bɩ̀á Ebəron nə. Ʋ bikwɩa nə yɩ Amənon. Ʋ nuu nə yɩ Ahinowamə, ʋ nə yɩ Zwizəreyɛlə tíú. 3 Ʋ bələ nii bìú nə yɩ Kiləyabə. Ʋ nuu nə yɩ Abigayilə, ʋ yà nə yɩ Nabalə kan, Karəmɛlə nə. Batwa nii bìú nə yɩ Abəsalomə. Ʋ nuu nə yɩ Maka, ʋ nə yɩ Geswurə pɩ̀ʋ́ Taləmayi bʋ̀á. 4 Banɩa nii bìú nə yɩ Adoniya. Ʋ nuu yɩrɩ nə Hagitə. Bonu nii bìú nə yɩ Swefatɩya. Ʋ nuu yɩrɩ nə Abitalə. 5 Yá bardʋ nii bìú nə yɩ Yitəreyamə. Ʋ yɩ Davidə kan Egəla nə lɩrɩ wá. Mə bɩ̀á təntə nə Davidə lɩrɩ Ebəron nə.
Abənɛrə də Yiswəboswɛtə ga duən nə
6 Kʋ̀ʋ̀ tə nə yɩn Sayulə lɩ̀à tə, də Davidə lɩ̀à tə pwə́rə́ wa, máŋá tə wa, Abənɛrə nɩ dun zənzən, Sayulə dìə̀ tə wa. 7 Yá Sayulə yà jə kabiə, ʋ yɩrɩ nə Risəpa. Ʋ yɩ Aya bʋ̀á. Dɩɩn don nə, Yiswəboswɛtəa caga Abənɛrə nii nə, kan təntə yɩrɩ, ʋ wʋ́: «Bɛ̀ɛ̀ nə pɩn, n ma pə̀ń də à nyɩna kabiə tə?» 8 Abənɛrə lɩŋa zàn zənzən, Yiswəboswɛtə bwiə təntə yɩrɩ. Yá ʋ dàń le, ʋ wʋ́: «À yɩ Zwida dwíí tə kukurə naaa? Kʋ tà zə̀n nə, à dàń nə pɩ̀à, sə à tʋn, à twá cɩ́gá nə, ndə kʋ nə mɛ nətʋ*, à pa n nyɩna Sayulə dìə̀ tə, də ʋ nubɩa tə, də ʋ dabara tə nə. À cɩ̀gà n tətə nə, à wà yá, à pa Davidə jɩɩn zʋ mʋ́. Yá zə̀n kʋ tə, n mʋ̀ dàń caga à nii nə, yoo yɩrɩ, à də kan təntə pwə́rə́ wa! 9-10 Sɩ́ʋ́n nə, à dùə̀ də, à dàń yɩ à wà tʋn, à pa Davidə nə. Yɩɩ wá cʋ̀gʋ̀ à mʋ̀ Abənɛrə yáá də à kwa, də à nə wà kʋ nətʋ tʋn. Ba-Yígúrə́-Jə-Tiu swɩ̀n də, ʋ wá jon pàrɩ̀ tə Sayulə də ʋ dìə̀ tə con, ʋ ga tún Davidə, sə ʋ ya pɩ̀ʋ́ Yɩzərayɛlə lɩ̀à tə, də Zwida dwíí tə yuu wa, kʋ nə zɩgɩ Dan, kʋ va kʋ yí Bɛrəsweba.» 11 Yá Yiswəboswɛtə kʋ́ʋ̀ wà wànɩ́, ʋ pìí ʋ le Abənɛrə yoo nədʋ tətə, Abənɛrə fən yà nə jə wá yɩrɩ.
Abənɛrə ken nimarʋ də Davidə
12 Abənɛrə tʋn lɩ̀à Davidə con, ʋ tətə yuu yɩrɩ, sə ba swɩ̀n, ba wʋ́: «Lʋʋ nii tə yɩ wàà nə tɩ?» Ʋ swɩ̀n, ʋ súrí lá, ʋ wʋ́: «N dàń tún nimarʋ də nə, yá à wá san mʋ́, à viviri Yɩzərayɛlə lɩ̀à tə mama, à pa mʋ́.» 13 Davidə le, ʋ wʋ́: «Kʋ ziən! À wá tún nimarʋ də mʋ́! À dàń nə lòrì won nədʋ, n con: Dí yáá n ja Sayulə bʋ̀á Mikalə, n bà, n pa nə. Kʋ nə tà kʋ mʋ̀, n nə twi à yáá con, à bá tan n con.» 14 Yá Davidə dàń tʋn lɩ̀à Sayulə bìú Yiswəboswɛtəb con, sə ba swɩ̀n, ba wʋ́: «Pa à kan Mikalə nə. Filisi tɩ̀án pantanan bíí nə, à ma càrà wá.» 15 Yiswəboswɛtə dàń ma pa, ba jon Mikalə, ʋ barɩ Palətɩyɛlə con, ʋ nə yɩ Layiswə bìú. 16 Palətɩyɛlə púə́ ʋ kan tə kwa, də ʋ kwi, wuuu, ʋ va ʋ yí Bahurimə. Abənɛrə ma swɩ̀n Palətɩyɛlə con, ʋ wʋ́: «Pìí n vìí!» Yá ʋ dàń pìí, ʋ vìí.
17 Abənɛrə də Yɩzərayɛlə nəkwɩna tə vʋrɩ, ʋ ga swɩ̀n ba con, ʋ wʋ́: «Fuən mama, á yà pɩ̀à, sə Davidə ya á pɩ̀ʋ́. 18 Á dàń tʋŋa kʋ yoo təntə sɩ́ʋ́n. Cɩ́gá, Ba-Yígúrə́-Jə-Tiu swɩ̀n də, kʋ wá twá də ʋ tʋtʋnʋ Davidə, ʋ ma jon ʋ lɩ̀à tə, Filisi tɩ̀án jɩɩn wa, də ba dʋŋa tə duən mama jɩɩn wa.» 19 Abənɛrə swɩ̀n kʋ nətʋ tə, Bɛnzwamɛn dwíí lɩ̀à tə də con. Yá kʋ kwa nə, ʋ dàń vəli, sə ʋ swɩ̀n Davidə con, Ebəron nə, də yoo tə ywán kʋ pa Yɩzərayɛlə də Bɛnzwamɛn dwíí lɩ̀à tə mama nə. 20 Abənɛrə jɩn bara sapwa, ʋ ma kwé ʋ tɩ̀àn, ʋ ja va Davidə con, Ebəron nə. Yá Davidə dàń pɩn, ba də́ cànà, Abənɛrə də bara tə, ba yà nə kwé wá, yuu yɩrɩ. 21 Abənɛrə swɩ̀n Davidə con, ʋ wʋ́: «Yá sə à pìí à va, à kə Yɩzərayɛlə lɩ̀à tə mama duən nə, sə ba ya n mʋ̀ à nyɩna pɩ̀ʋ́ kwa. Ba wá tún nimarʋ də mʋ́, yá n dàń wá də́ pàrɩ̀ bwálɩ́ tə mɛ, n nə pɩ̀à.» Davidə pɩn cwəŋə Abənɛrə nə, yá ʋ dàń nan, ʋ vìí də yazurə.
Zʋabə gʋa Abənɛrə
22 Abənɛrə zə́n ʋ vìí, kʋ fwa mancɩn, də nə̀ń Davidə tʋtʋna tə də Zʋabə nə, ba nan kʋ̀ʋ̀, ba bà də wiən kapʋpʋ, ba nə ta, ba jon. Kʋ máŋá tə wa, də Abənɛrə yà kʋ́ʋ̀ tə̀lə́ Davidə con, Ebəron nə. Cɩ́gá, Davidə yà pɩn wá cwəŋə, ʋ nan, ʋ vìí də yazurə. 23 Máŋá tə, Zʋabə də kwatara tə mama, ba yà nə wulə də wá, nə twi ba yí, lìù don swɩ̀n Zʋabə con, ʋ wʋ́: «Nɛrə bìú Abənɛrə twi pɩ̀ʋ́ Davidə con, yá ʋ yá wá, ʋ pa, ʋ pìí ʋ vìí də yazurə.» 24 Zʋabə ma va, ʋ yí pɩ̀ʋ́ Davidə, ʋ bwe wá, ʋ wʋ́: «Bɛ̀ɛ̀ yoo nə, n fwa nətən? Nə̀ń kʋ nə, Abənɛrə twi n con! Bɛ̀ɛ̀ dàń nə pɩn, n yá wá, n pa, ʋ pìí ʋ vìí də yazurə? 25 N yə̀ə́ Nɛrə bìú Abənɛrə zəni! Ʋ yɩ ʋ twi, sə ʋ gɩgarɩ mʋ́, ʋ lwarɩ n kàrá naŋʋ, də n dìə̀ zwɩʋ máŋá, də won tə mama, n nə tʋŋa.»
26 Zʋabə nə nan Davidə con kwa nə, ʋ tʋn lɩ̀à, ʋ pa, ba dɩŋa Abənɛrə kwa, ba va, ba ja wá, Sɩra nɩ́á gwàlʋ́* tə, kʋ də̀ń nə lu tə nii nə, ba ja pìí ba bà, də Davidə yəri. 27 Máŋá tə Abənɛrə nə pìí ʋ bà Ebəron, Zʋabə van wá, ʋ ja nan kwa, ʋ va tɩʋ tə mimii wa, ndə yoo nə, ʋ pɩ̀à, sə ʋ swɩ̀n ʋ cɩcɩ con. Yá kʋ bwálɩ́ təntə wa, ʋ zuə sɩ̀ʋ́ Abənɛrə pùə́ wa. Ʋ gʋa wá, ʋ kə ʋ nyánʋ́ Asayɛlə gʋrɩ tə bʋʋ wa.
28 Kʋ kwa nə, Davidə nì kʋ, yá ʋ dàń swɩ̀n, ʋ wʋ́: «Ba-Yígúrə́-Jə-Tiu tətə yə̀ə́ də, à mʋ̀ də à payuu tə yəri yoo mama, Nɛrə bìú Abənɛrə tɩan tə yoo wa. 29 Jana təntə yoo wá nyʋn Zʋabə, də ʋ nyɩna dìə̀ tə mama yuu wa! Máŋá mama, lɩ̀à wá ya Zʋabə dìə̀ wa, ba yɩra nə jə nʋran, tə nə bùlì nɩ́á, nə à yə̀ə́, lɩ̀à dayaan nə jə ba, nə à yə̀ə́, lɩ̀à ba nə tʋŋa kana tʋ̀tʋ̀nán, nə à yə̀ə́, lɩ̀à ba nə wá gʋ də kwatara sɩ̀ʋ́, nə à yə̀ə́, lɩ̀à niən nə jə ba!» 30 Mə kʋ twá nətʋ, Zʋabə də ʋ nubiu Abiswayi ma gʋ Abənɛrə, ʋ nə gʋa ba nyánʋ́ Asayɛlə, Gabawon kʋ̀ʋ̀ tə wa yɩrɩ.
31 Davidə swɩ̀n Zʋabə də lalʋʋ tə mama con, ba yà nə wulə də wá, ʋ wʋ́: «Á kàrá á gànàn, sə á pipini á tɩ̀àn də ganlwaran. Á kwie Abənɛrə lúə́.» Yá pɩ̀ʋ́ Davidə tətə dàń púə́ tɩgɩ tə kwa, ba nə zɩŋa. 32 Ba gùrì Abənɛrə Ebəron nə. Pɩ̀ʋ́ Davidə kwi də ʋ sisigə, Abənɛrə libəri tə yuu wa, yá lalʋʋ tə də mama kwi. 33 Kʋ kwa nə, pɩ̀ʋ́ Davidə dɩga lúə́ pucʋnɩ gwaran Abənɛrə yɩrɩ, ʋ wʋ́:
«Abənɛrə yà mɛ, sə ʋ tɩ,
ndə ləyiru nə tɩ nətʋ naaa?
34 N jɩ̀àn yà wà vwe,
n nɛɛ də yà ga tə̀lə́ banzala wa!
Yá n tʋa, n tɩ,
ndə lìù nə, ʋ nə tʋa wʋlʋnyɩna yáá con.»
35 Lalʋʋ tə mama twi, ba kòrì Davidə, sə ʋ də́ wodiu, də tɩa tə wà yì. Yá ʋ dùə̀, ʋ wʋ́: «À nə ken wodiu, nə à yə̀ə́, won yiri mama à nii, də yɩɩ tə wà zwɩ, sə Yɩɩ cʋ̀gʋ̀ à yáá də à kwa*!» 36 Lalʋʋ tə mama lwarɩ kʋ, ba ga sɛ̀ kʋ. Won tə mama, pɩ̀ʋ́ tə nə fwa, lalʋʋ tə mama yàá sɛ̀ kʋ. 37 Yá lalʋʋ tə mama, də Yɩzərayɛlə lɩ̀à tə mama dàń lwarɩ, kʋ dɩɩn tə nə, də kʋ tà pɩ̀ʋ́ Davidə nə pɩn nii, ba ma gʋ Nɛrə bìú Abənɛrə. 38 Pɩ̀ʋ́ Davidə swɩ̀n ʋ tʋ̀tʋ̀nà tə con, ʋ wʋ́: «Á yəri də, kʋ yɩ pabiu nəfarʋ nə tɩŋa zə̀n, Yɩzərayɛlə wa naaa? 39 À mʋ̀, zə̀n kʋ tə, də à yɩ pɩ̀ʋ́ tə mɛ, à bwànà. Yá lɩ̀à ba tə mʋ̀, Seruya bɩ̀á tə yoo dà, kʋ doni nə. Yá Ba-Yígúrə́-Jə-Tiu wá ŋwɩ́n wʋlʋnyiən wʋlʋŋʋ tə ŋwɩ́rán, ʋ pa wá.»