2 Samiyɛlə 2

Zwida dwíí tə tún Davidə, sə ʋ ya ba pɩ̀ʋ́

1 Tə mʋ̀ yìə̀n təntə kwa nə, Davidə bon ʋ kə Ba-Yígúrə́-Jə-Tiu nə, ʋ wʋ́: «À wàá Zwida dwíí tɩʋ tə don wa, à vəli à jəni?» Ba-Yígúrə́-Jə-Tiu le wá, ʋ wʋ́: «Vəli!» Davidə ma bwe, ʋ wʋ́: «Tɩʋ kwà nə, à mɛ sə à va?» Yá Ba-Yígúrə́-Jə-Tiu le, ʋ wʋ́: «Vəli Ebəron!» 2 Davidə də ʋ kana bələ tə, dàń vəli Ebəron. Kana təntə nə yɩ Ahinowamə, ʋ nə yɩ Zwizəreyɛlə tíú, də Abigayilə, ʋ yà nə yɩ Nabalə kan, Karəmɛlə nə. 3 Davidə pɩn ʋ kwa lɩ̀à tə də lìù mama, də ʋ dìə̀ lɩ̀à twá ba va Ebəron. Ba vəli ba jə̀ə́ Ebəron tɩbii tə wa.

4 Zwida dwíí tə lɩ̀à twi lá, yá ba dàń twɛ́n dun nʋga* Davidə yuu wa, ba tún wá, sə ʋ ya Zwida dwíí tə pɩ̀ʋ́. Lɩ̀à swɩ̀n ba bɩrɩ Davidə nə, də Yabɛswə tɩ̀án nə gùrì Sayulə. Yabɛswə yɩ kʋ wulə Galadə nagwanaa tə wa. 5 Yá Davidə dàń tʋn lɩ̀à, Yabɛswə tɩ̀án con, Galadə nə, ʋ wʋ́: «Ba-Yígúrə́-Jə-Tiu wá fwa zəni á yɩra! Á bɩrɩ wʋywaŋʋ* tə, á nə jə də á yuu-tiu Sayulə, yá á tì wá, á gùrì. 6 Sɩ́ʋ́n nə, à lòrɩ̀ sə Ba-Yígúrə́-Jə-Tiu tʋn wʋywaŋʋ á yɩra, kʋ twá cɩ́gá nə, ndə kʋ nə mɛ nətʋ! À də wá fwa zəni á yɩra, á nə tʋn kʋ yoo təntə yɩrɩ. 7 Á pɩan á jɩɩn dàn, sə á ga ya ladɩra. Cɩ́gá, á yuu-tiu Sayulə tɩga! Yá kʋ dàń yɩ à mʋ̀ yuu wa nə, Zwida dwíí tə lwá nʋga, sə à ya ba pɩ̀ʋ́.»

Ba tún Yiswəboswɛtə, sə ʋ ya Yɩzərayɛlə pɩ̀ʋ́

8 Kʋ máŋá tə wa, Nɛrə bìú Abənɛrə, ʋ nə yɩ Sayulə kwatara yuu tíú, jɩn Sayulə bìú Yiswəboswɛtə, ʋ ja va Mahanayimə. 9 Abənɛrə tún Yiswəboswɛtə, sə ʋ də́ pàrɩ̀ Galadə, də Aswɛrə, də Zwizəreyɛlə, də Efərayimə, də Bɛnzwamɛn nagwanɛɛ tə yuu wa. Kʋ yà yɩ Yɩzərayɛlə lʋʋ nii tə mama yuu wa. 10 Sayulə bìú Yiswəboswɛtə jìgə̀ Yɩzərayɛlə pɩ̀ʋ́ máŋá tə wa, də ʋ jə bɩna sapwɩlə. Yá ʋ dí pàrɩ̀ bɩna bələ. Yá Zwida dwíí tə mʋ̀ yà twá Davidə nə. 11 Davidə dí Zwida dwíí tə pàrɩ̀, Ebəron nə, bɩna barpɛ, də cànɩ̀ bardʋ.

Zwida dwíí tə də Yɩzərayɛlə lɩ̀à tə ta duən Gabawon nə

12 Nɛrə bìú Abənɛrə, də Sayulə bìú Yiswəboswɛtə tʋ̀tʋ̀nà tə nan Mahanayimə, ba va Gabawon con. 13 Seruya bìú Zʋabə, də Davidə tʋ̀tʋ̀nà tə də nan, ba va lá. Kwatara púlə́ bələ təntə vəli, tə jəri duən Gabawon càrʋ́ tə nii nə. Púlí tə don yà wulə càrʋ́ tə vàn don nə, kʋ don də ga wulə vàn tə don nə. 14 Abənɛrə swɩ̀n Zʋabə con, ʋ wʋ́: «Nə pɩan nə balandʋra tə zàn, ba bɩrɩ dɩ̀àn duən nə, nə yáá con.» Zʋabə le, ʋ wʋ́: «À sɛ̀, ba zaŋa!» 15 Balandʋra tə zàn ba nan. Ba gàlɩ̀ balandʋra fugə də bələ Bɛnzwamɛn dwíí tə wa, ba nə yɩ Sayulə bìú Yɩswə-Boswətə kwatara. Yá ga gàlà balandʋra fugə də bələ Davidə tʋ̀tʋ̀nà tə də wa. 16 Ba lìù mama pùrì ʋ jarɩdon yuu nə, ba ga zwa ba kwatara sɩ̀án, ba dɩ duən səpunə wa, ba mɛ ga twá duən, ba tʋ. Yá ba dàń dɩga kʋ bwálɩ́ təntə, kʋ nə wulə Gabawon nə yɩrɩ, Ɛləkatə-Atəsurimə. 17 Kʋ nətʋ tə zɩ̀n kʋ̀ʋ̀, kʋ yɩn dɩ̀àn zənzən, kʋ dɩɩn təntə nə. Yá Davidə tʋ̀tʋ̀nà tə ta Abənɛrə də Yɩzərayɛlə lɩ̀à, ba də́.

18 Seruya bɩ̀á batwa tə yà wulə kʋ bwálɩ́ təntə wa. Ba mʋ̀ nə yɩ Zʋabə, də Abiswayi, də Asayɛlə. Asayɛlə nɛɛ yà lɩŋa tɩa, ndə felə nə. 19 Yá Asayɛlə dàń púə́ Abənɛrə kwa, ʋ dɩŋɩ wá. Ʋ wà yori, ʋ va jɩzən, nə à yə̀ə́ jɩgwiə, ʋ ga yá Abənɛrə. 20 Abənɛrə ma viviri, ʋ swɩ̀n ʋ con, ʋ wʋ́: «Kʋ yɩ n mʋ̀ Asayɛlə naaa?» Ʋ le, ʋ wʋ́: «Awo, kʋ yɩ à mʋ̀!» 21 Abənɛrə ma swɩ̀n ʋ con, ʋ wʋ́: «Yori n va jɩzən, nə à yə̀ə́ jɩgwiə, n ga yá nə. Dɩŋa balandʋra tə lìù don, n ja, n gʋ, n ga tì ʋ kwatarɩ zɩla tə.» Yá Asayɛlə yà ba pɩ̀à, sə ʋ pìí, ʋ yá Abənɛrə. 22 Abənɛrə kʋ́ʋ̀ swɩ̀n Asayɛlə con, ʋ wʋ́: «Pìí n yá nə, kʋ nə tà kʋ mʋ̀, à wá gʋ mʋ́. Yá kʋ kwa nə, à kʋ́ʋ̀ bá wànɩ́ n zʋnʋ Zʋabə yáá wa, à ywàń.» 23 Yá Asayɛlə tə vɩga, sə ʋ pìí, ʋ yá Abənɛrə nə. Abənɛrə dàń ma ja ʋ cwiin tə nii sɩsɩŋa tə, ʋ zwa Asayɛlə pùə́ wa, kʋ va kʋ twá ʋ kwa, kʋ nan. Asayɛlə tʋa, ʋ tɩ bwálɩ́ təntə tətə wa. Lɩ̀à tə mama nə twi, ba yí bwálɩ́ tə, Asayɛlə nə tʋa, ʋ tɩ lá, ba cən ba zɩgɩ.

24 Yá Zʋabə də Abiswayi púə́ Abənɛrə kwa, ba dɩŋɩ. Ba yí Gibeya-Ama, də yɩɩ wulə kʋ zwɩ. Gibeya-Ama yɩ kʋ wulə Giya yɩɩ yipɩan con, cwəŋə tə nii nə, ka nə vələ Gabawon kasɔɔ lanworu tə con. 25 Bɛnzwamɛn dwíí kwatara tə nan, ba kun duən nə, ba zɩga Abənɛrə kwa, paan don yuu wa. 26 Yá Abənɛrə dàń bon, ʋ kə Zʋabə nə, ʋ wʋ́: «Kwatara sɩ̀án tə yɩ nə wá ma gʋ duən, nə ba gwɩ nə zwɛ̀ naaa? N yəri də, kʋ nətʋ tə wá ja pucʋnɩ, kʋ bà naaa? Bɛ̀ɛ̀ nə n dànɩ̀, sə n ma pa nii n kwatara tə nə, sə ba yá ba nubɩa tə dɩŋʋ nə?» 27 Yá Zʋabə də kʋ́ʋ̀ bon, ʋ kə Abənɛrə nə, ʋ wʋ́: «Kʋ yɩ cɩ́gá, Yɩɩ wulə! N yà nə wà lòrì, sə nə yá kʋ̀ʋ̀ tə, à lɩ̀à tə yà yɩ, ba wá dɩŋa ba nubɩa tə kwa wuuu, kʋ ja vələ jwɩan jɩjʋ.» 28 Zʋabə dàń wúrí nabwana, yá kwatara tə mama cən ba zɩgɩ. Ba kʋ́ʋ̀ wà Yɩzərayɛlə lɩ̀à tə kwa dɩŋɩ. Yá ba kʋ́ʋ̀ wà duən tɛ.

29 Abənɛrə də ʋ lɩ̀à tə yɩn Araba tə wa, ba va tɩtɩn tə mama. Ba vəli ba bɩn Zʋrədɛn mʋnaa tə, ba nan ba twá kʋ bwálɩ́ tə, ba nə boŋə Bitəron tə mama wa, ba lɛ, ba va Mahanayimə. 30 Zʋabə pìí ʋ yá Abənɛrə dɩŋʋ nə, ʋ ga bà, ʋ kə ʋ lɩ̀à tə mama duən yáá. Lɩ̀à fugə də nʋgʋ yà nə tə̀lə́ Davidə tʋ̀tʋ̀nà tə nii nə, kʋ dàń súrí Asayɛlə nə. 31 Yá Davidə tʋ̀tʋ̀nà tə mʋ̀ yà gʋa lɩ̀à biətwa də sapwɩtwa, Bɛnzwamɛn dwíí tə wa, ba yà nə yɩ Abənɛrə kwatara. 32 Ba tì Asayɛlə, ba ja va ba gùrì ʋ nyɩna libəri tə wa, Bɛtəleyɛmə nə. Kʋ kwa nə, Zʋabə də ʋ lɩ̀à tə vəli tɩtɩn tə mama, yá yɩɩ pɛ́n máŋá tə wa, də ba yí Ebəron.