Bələ nii sagɩ tə
Samiyɛlə
nə pʋ́pʋ́nɩ́
Davidə pùə́ cʋ̀gʋ̀ Sayulə də Zonatan tɩan tə yɩrɩ
1
1 Sayulə tɩan kwa nə, Davidə nə ta Amalɛkə dwíí tə, ʋ də́, ʋ pìí ʋ bà máŋá tə wa, ʋ fwa dɩan bələ Sikəlagə nə. 2 Yá kʋ dɩan batwa dɩɩn nə, bɛɛ don nan Sayulə kwatara sàń tə wa, ʋ bà Davidə con. Ʋ gànàn yà kàrɩ́, ʋ yuu ga sú də pùrə́n. Máŋá tə, ʋ nə twi, ʋ yí Davidə yɩra, ʋ tʋa tɩa, ʋ nadwana yuu, ʋ pa dun Davidə nə*. 3 Davidə ma bwe wá, ʋ wʋ́: «Yə̀n nə n nan?» Ʋ le wá, ʋ wʋ́: «À yɩ à dəri, à nan Yɩzərayɛlə kwatara sàń tə wa.» 4 Yá Davidə dàń bwe wá, ʋ wʋ́: «Kʋ yɩ nətə? Tún n nii, n bɩrɩ nə!» Bɛɛ tə swɩ̀n, ʋ wʋ́: «Yɩzərayɛlə kwatara tə dəri ba jɛ́n, kʋ̀ʋ̀ tə wa. Yá ba wa lɩ̀à zənzən də tɩga. Sayulə tətə də ʋ bìú Zonatan mɛ tɩga.» 5 Yá Davidə dàń bwe balandʋrʋ tə, ʋ nə wulə, ʋ túŋə́ nii tə, ʋ bɩrɩ wá tə, ʋ wʋ́: «Nətə nə n fwa, n ma yə̀ə́ də, Sayulə də ʋ bìú Zonatan tɩga?» 6 Balandʋrʋ tə, ʋ nə túŋə́ nii tə, ʋ bɩrɩ wá tə, ma le, ʋ wʋ́: «Kʋ yɩ kʋ tʋa, kʋ zən də, à yà wulə Giləbʋa paan tə yuu wa. À nɩ Sayulə də ʋ nyɩ́n ʋ cwiin yuu wa, yá dʋŋa tə kwatara səsen kòrə̀n, də ba səsədɩra dàń yà nyɩ́n ba bɩ̀àn, ʋ nə. 7 Ʋ viviri, ʋ na nə, ʋ ma bon nə. À ma sɛ̀, à wʋ́: “Nə̀ń nə!” 8 Ʋ bwe nə, sə ʋ jə́n, à yɩ wàà. À ma swɩ̀n də, à yɩ Amalesitə. 9 Yá ʋ dàń lòrì nə, sə à bà, à gʋ wá. Cɩ́gá, yɩviru yà jə wá, yá ʋ mɩɩ ga tə wà zwɛ̀. 10 À yà yə̀ə́ də, ʋ tʋrɩ tə kwa nə, ʋ kʋ́ʋ̀ wàrɩ̀ ʋ dʋŋa tə yáá nə, ʋ jɛ́n. Yá à dàń vəli, à gʋ wá. À tì payupuu tə, kʋ yà nə púə́ ʋ yuu nə, də valɩ tə, ka yà nə wulə ʋ jɩɩn nə. Tə nə à ja bà yəbə, sə à pa n mʋ̀, à yuu-tiu tə nə.»11 Davidə van ʋ gànàn, ʋ cɩrɩ, yá lɩ̀à tə mama, ba yà nə wulə də wá, də fwa nətʋ. 12 Ba fwa lúə́, Sayulə, də ʋ bìú Zonatan, də Yɩzərayɛlə lɩ̀à tə mama yɩrɩ, ba nə yɩ Ba-Yígúrə́-Jə-Tiu lɩ̀à, ba nə tɩga kʋ̀ʋ̀ tə wa. Ba kwi, ba vwa ba níə́, kʋ va kʋ yí didəni. 13 Kʋ kwa nə, Davidə bwe balandʋrʋ tə, ʋ nə tún nii tə, ʋ wʋ́: «N yɩ yə̀n tíú?» Yá ʋ le, ʋ wʋ́: «À yɩ Amalɛkə dwíí bɛɛ don bìú, ʋ twá ʋ jə̀ə́ lʋʋ nii tə wa.» 14 Davidə swɩ̀n ʋ con, ʋ wʋ́: «Kʋ yɩ nətə, fən ma wà mʋ́ jɩn, sə n zɩ̀n n jɩɩn, n ma gʋ pɩ̀ʋ́ tə, Ba-Yígúrə́-Jə-Tiu nə kúrí*?» 15 Yá Davidə dàń bon ʋ balandʋra tə wa lìù don, ʋ swɩ̀n ʋ con, ʋ wʋ́: «Bà, n mà bɛɛ wà tə, n gʋ!» Yá ʋ dàń mà Amalɛkə dwíí bɛɛ tə, ʋ gʋ. 16 Davidə yà swɩ̀n Amalɛkə dwíí bɛɛ tə con, ʋ wʋ́: «N mʋ̀ nə gʋa n tɩ̀àn*! Cɩ́gá, n nii tə nə jɩn mʋ́, kʋ pa nə. N mʋ̀ tətə nə swɩ̀n də, n mʋ̀ nə gʋa pɩ̀ʋ́ tə, Ba-Yígúrə́-Jə-Tiu nə kúrí!»
Davidə dɩga lúə́ pucʋnɩ gwaran, ʋ ma kwi Sayulə də Zonatan nə
17 Kʋ kwa nə, Davidə dɩga lúə́ pucʋnɩ gwaran tə tə, ʋ ma kwi Sayulə də ʋ bìú Zonatan nə. 18 Yá ʋ dàń pɩn nii, sə ba kwè tə, Zwida dwíí tə. Ka yɩ twan tárá nuŋə. Ba pʋ́pʋ́nɩ́ ka, ba kə cɩ́gá tíú sagɩ tə wa.
19 Yɩzərayɛlə, ba gʋa n dun tə,
ba dʋgʋ n pɛɛn tə yuu wa!
Kʋ fwa nətə, kwatara babɩran ma tʋ, ba tɩ?
20 Á dànà ká swɩ̀n kʋ, á bɩrɩ Gatə tɩʋ tə wa.
Á dànà ká bòrì kʋ coŋi yuu, Aswəkelon tɩʋ tə wa.
Kʋ dàn ká pa, Filisi tɩ̀án bwɩ̀ɩ́ tə fwa pupwən.
Kʋ dàn ká pa, ba mʋ̀ lɩ̀à tə nə yəri Yɩɩ, bwɩ̀ɩ́ tə jwɛ.
21 Nyʋnʋ kʋ́ʋ̀ bá vwa Giləbʋa pɛɛn tə yuu wa.
Dwà də ma kʋ́ʋ̀ bá nà tə yuu wa.
Kárɩ́ kʋ́ʋ̀ bá ya lá, tə wiən nə bɩ.
Cɩ́gá, mə pɛɛn təntə yuu wa nə,
kwatara babɩran natanan jon ba jɩɩn, tə tʋ tɩa.
Nə̀ń kʋ cavɩra nyɩɛn!
Ba kʋ́ʋ̀ bá ja nʋga, ba ma tùrì Sayulə nàtànà tə.
22 Zonatan yà ba pìí, ʋ kəni ʋ kwa, də ʋ twan tə,
də ʋ nə wà dʋŋa jana lwɛ́,
ʋ ga pa kwatara babɩran nwɩn nan.
Sayulə ba ʋ kwatara sɩ̀ʋ́ tə ja pìí, ʋ twi tʋtʋ.
23 Sayulə də Zonatan lʋʋ wúlú tə mama wa,
lalʋʋ tə yà sóní ba zənzən.
Yá ba tɩan də wa, ba wà pwɛ̀, ba yá duən.
Ba yà lɩŋa, ba doni toli,
ba ga dà, ba doni gərən.
24 Yɩzərayɛlə bwɩ̀ɩ́ ba, á kwie Sayulə nə!
Ʋ mʋ̀ yà nə pɩn, á zwɩ dun ganmʋla,
ʋ ga pɩn, á nàŋà á gànàn, də sɩ́án bwanzɩla.
25 Kʋ fwa nətə, kwatara babɩran ma tʋ,
ba tɩ kʋ̀ʋ̀ tə wa?
Kʋ fwa nətə, ba ma gʋ Zonatan,
ba dʋgʋ pɛɛn tə yuu wa?
26 À wulə pucʋnɩ wa n yɩrɩ, à nubiu Zonatan!
Á yà swə n yáá yoo zənzən.
N sonu tə, n yà nə jə n pa nə,
yà jə fɩra zənzən.
Kʋ yà jə fɩra, kʋ doni kana sonu.
27 Kʋ fwa nətə, kwatara babɩran ma tʋ, ba tɩ?
Kʋ fwa nətə, kwatarɩ zɩla tə ma jɛ́n?