Davidə jon Mefiboswɛtə, ʋ kə ʋ con
9
1 Dɩɩn don nə, pɩ̀ʋ́ Davidə swɩ̀n, ʋ wʋ́: «Lìù mama wà Sayulə dìə̀ tə wa gɛ naaa? À swə, sə à fwa wʋywaŋʋ* kʋ tíú yɩra, Zonatan yuu yɩrɩ.» 2 Sayulə dìə̀ tə yà jə tʋtʋnʋ don, ʋ yɩrɩ nə yɩ Siba. Ba jɩn wá, ba bà Davidə con. Yá pɩ̀ʋ́ Davidə dàń bwe wá, ʋ wʋ́: «N mʋ̀ nə yɩ Siba naaa?» Siba le, ʋ wʋ́: «À yuu-tiu, mə à nə!» 3 Pɩ̀ʋ́ Davidə bwe, ʋ wʋ́: «Lìù mama wà gɛ Sayulə dìə̀ tə wa, sə à fwa Yɩɩ wʋywaŋʋ tə, ʋ yɩra naaa?» Siba ma le pɩ̀ʋ́ Davidə, ʋ wʋ́: «Zonatan bìú nədʋ nə ga, ʋ nɛɛ nə tɩga.» 4 Pɩ̀ʋ́ Davidə bwe wá, ʋ wʋ́: «Ʋ wulə yə̀n nə?» Siba le wá, ʋ wʋ́: «Ʋ wulə Amɩyɛlə bìú Makirə con, Lodebarə nə.» 5 Pɩ̀ʋ́ Davidə dàń pɩn, ba va ba lɩ Mefiboswɛtə, Amɩyɛlə bìú Makirə dìə̀ wa, Lodebarə nə, ba ja bà. 6 Yá Zonatan bìú Mefiboswɛtə, ʋ nə yɩ Sayulə nàʋ́, dàń twi, ʋ tʋ ʋ nadwana yuu, ʋ pú ʋ yáá tɩa, Davidə yáá con, ʋ pa wá dun*. Davidə bon wá, ʋ wʋ́: «Mefiboswɛtə!» Mefiboswɛtə ma le, ʋ wʋ́: «À sɛ̀, à yuu-tiu!» 7 Davidə dàń swɩ̀n ʋ con, ʋ wʋ́: «Dàn ká pa fən ja mʋ́! À wá fwa wʋywaŋʋ n yɩra, n nyɩna Zonatan yuu yɩrɩ. À wá pìí à pa mʋ́, n nɩbɛɛ Sayulə kárɩ́ tə mama, n ga wá də́ à con, máŋá mama.» 8 Mefiboswɛtə tʋa ʋ nadwana yuu, ʋ pa dun Davidə nə, ʋ ga swɩ̀n, ʋ wʋ́: «À mʋ̀ n tʋtʋnʋ tə nə yɩ bɛ̀ɛ̀, n ma bʋ́n à mʋ̀ kukurətɩgʋ kʋ tə nyandon yoo?»9 Yá pɩ̀ʋ́ Davidə bon Sayulə tʋtʋnʋ Siba, ʋ swɩ̀n ʋ con, ʋ wʋ́: «À pɩn won tə mama, kʋ yà nə yɩ n yuu-tiu Sayulə də ʋ dìə̀ tə mama nyiən, ʋ nàʋ́ tə nə. 10 Yá n mʋ̀ də n bɩ̀á tə, də n tʋtʋnbɩa tə dàń wá vàrà kárɩ́ tə, n ja tə wiən n bà, n pa n yuu-tiu tə nàʋ́ tə nə, sə ʋ wànɩ́ ʋ na ʋ nii wodiu. Yá Mefiboswɛtə, ʋ nə yɩ n yuu-tiu tə nàʋ́, dàń wá də́ à con, máŋá mama.» Yá Siba yà jə bɩ̀á fugə də bonu, də tʋtʋnbɩa sapwa. 11 Siba ma swɩ̀n pɩ̀ʋ́ Davidə con, ʋ wʋ́: «À mʋ̀ n tʋtʋnʋ tə wá tʋn won tə mama, n mʋ̀ à nyɩna pɩ̀ʋ́ nə pɩn nə nii, sə à tʋn.» Yá Mefiboswɛtə dàń yà də́ Davidə con, ndə ʋ bɩ̀á tə duən nə. 12 Mefiboswɛtə yà jə bisɩmabara, ʋ yɩrɩ nə yɩ Mika. Yá lɩ̀à tə mama, ba yà nə wulə Siba dìə̀ wa dàń yà yɩ Mefiboswɛtə tʋ̀tʋ̀nà. 13 Mefiboswɛtə dàń yà wulə Zwerizalɛmə nə, ʋ ga də́ pɩ̀ʋ́ Davidə con, máŋá mama. Ʋ nɛɛ bələ tə mɛ yà cʋ̀gʋ̀, ʋ jì gwànʋ́.