22
1 Davidə dàń swɩ̀n, ʋ wʋ́: «Ba-Yígúrə́-Jə-Tiu dìə̀ tə wá ya yəbə, Yɩɩ joŋi bwálɩ́ tə, Yɩzərayɛlə lɩ̀à nə wá sʋ̀rɩ́ jwəŋə kʋ yuu wa, wá ya yəbə.Davidə tanɩ Yɩɩ dìə̀ tə lwiu
2 Davidə pɩn nii sə ba kə vərə tə nə twá ba jə̀ə́ Yɩzərayɛlə lʋʋ nii tə wa duən yáá nə. Ʋ lɩ tʋ̀tʋ̀nà ʋ tún, sə ba sə̀ kapana, sə ba ma lwà Yɩɩ dìə̀ tə. 3 Ʋ tanɩ lugu zənzən də ʋ tún, sə ba ma fwa cɩan tə nə wá paa mimien daran tə, də gwalɩ tə. Ʋ tanɩ cɩnɩan zənzən də ʋ tún, kʋ nə wàrɩ̀ kʋ kəri. 4 Ʋ tanɩ sɩsaban daran zənzən də, tə nə wàrɩ̀ tə gàlɩ̀. Cɩ́gá, Sidon də Tirə tɩ̀án yà ja sɩsaban daran zənzən, ba bà, ba pa Davidə nə. 5 Davidə yà swɩ̀n, ʋ wʋ́: «À bìú Salʋmʋn yɩ ləzwəndʋn, ʋ tə nə ba pubʋŋa jə. Yá dìə̀ tə ba nə wá lwà ba pa Ba-Yígúrə́-Jə-Tiu nə, mɛ sə ka yɩrɩ nan lʋʋ níə́ tə mama wa, ka yuu danɩ, də ka zəni yɩrɩ. Kʋ mʋ̀ nə pɩn, à wá tanɩ ka zɩla à tún ʋ nə.» Mə kʋ zɩgɩ nətʋ, Davidə ma tanɩ wiən kapʋpʋ, də ʋ tə wà tɩ.
Davidə pɩn nii Salʋmʋn nə, sə ʋ lwà Yɩɩ dìə̀ tə
6 Davidə bon ʋ bìú Salʋmʋn, ʋ ga pa wá nii, sə ʋ lwà dìə̀, ʋ pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 7 Davidə swɩ̀n Salʋmʋn con, ʋ wʋ́: «À bìú, à tətə yà bʋŋa à bɩcan wa, sə à lwà dìə̀, à pa Ba-Yígúrə́-Jə-Tiu nə, ʋ nə yɩ à tíú Yɩɩ. 8 Yá Ba-Yígúrə́-Jə-Tiu dàń swɩ̀n à con, ʋ wʋ́: «N lwá jana zənzən, kʋ̀ʋ̀ nəfaran tə wa, n nə ta. Jana təntə mama yɩrɩ, n nə lwá tɩa yuu wa, à yáá con, kʋ tà n mʋ̀ kʋ́ʋ̀ nə wá lwà dìə̀, sə ba bon à yɩrɩ ka wa. 9 Yá n wá lɩra bìú, ʋ mʋ̀ wá ya sìə́ lìù. À wá jon wá ʋ dʋŋa tə mama jɩɩn wa, ba nə kɩkarɩ wá, à ga wá pa wá sìə́. Ʋ yɩrɩ wá ya Salʋmʋna, yá à wá pa sìə́ də yazurə Yɩzərayɛlə lɩ̀à nə, ʋ lʋʋ wúlú mama wa. 10 Mə ʋ mʋ̀ nə wá lwà dìə̀ ʋ pa nə. Ʋ wá ya à bìú, à ga wá ya ʋ nyɩna. À wá pa ʋ pàrɩ̀ tə dəkuu ja dɩ̀àn Yɩzərayɛlə wa, máŋá mama wuuu.»
11 Sɩ́ʋ́n nə à bìú, Ba-Yígúrə́-Jə-Tiu nə wá ya də mʋ́, sə n wànɩ́ n lwà ʋ mʋ̀ Ba-Yígúrə́-Jə-Tiu, ʋ nə yɩ n Yɩɩ, dìə̀ tə, ndə ʋ nə kàn kʋ nikanɩ ʋ pa mʋ́ nətʋ. 12 Ʋ mʋ̀ nə wá pa mʋ́ pubʋnzəŋu də swɩan, máŋá tə wa, ʋ nə wá tún mʋ́ Yɩzərayɛlə lɩ̀à pàrɩ̀ tə yuu wa, sə n wànɩ́ n zìlí Ba-Yígúrə́-Jə-Tiu, ʋ nə yɩ n Yɩɩ, nii* tə. 13 N nə zìlí, n ga twá yìə̀n tə nə, Yɩɩ nə pɩn tə pʋ́pʋ́nɩ́ tə tún, də yìə̀n tə ʋ nə bɩrɩ Moyizə nə, sə Yɩzərayɛlə lɩ̀à tʋn, n yoo mama wá jì. N dàń pa n jɩɩn dàn, n ga ja wʋdɩʋ. Dàn ká pa fən ja mʋ́, dàn ká vɩvaga. 14 À ken dɩ̀àn à pɩ̀à sɩ́án tɔnə 3 000, də wárʋ́ tɔnə 30 000. Cɩnɩan tə də lugu tə mʋ̀ wàrɩ̀ tə kəri, tə nə dáá zənzən yɩrɩ. À tə tanɩ dɛɛ də kapana də, yá n tə wàá tə duən n súrí lá nə. 15 N wá na tʋ̀tʋ̀nà kapʋpʋ, ba nə kwɩ kapana, də ba tə nə sè kapana də daran, də ba tə nə jə tʋ̀tʋ̀nán yiri mama yənu. 16 N wá na sɩ́án, də wárʋ́, də cɩnɩan, də lugu, tə nə dáá zənzən. N dàń zàn n tʋn, yá Ba-Yígúrə́-Jə-Tiu wá ya də mʋ́.»
17 Kʋ kwa nə, Davidə pɩn nii Yɩzərayɛlə lɩ̀à yáá tɩ̀án tə mama nə, sə ba san ʋ bìú Salʋmʋn nə. 18 Ʋ swɩ̀n ba con, ʋ wʋ́: «Ba-Yígúrə́-Jə-Tiu, ʋ nə yɩ á Yɩɩ tə̀lə́ də aba naaa? Ʋ wá aba sìə́ pɩn bwálá tə mama wa, tə nə kɩkarɩ aba naaa? Cɩ́gá, ʋ pɩn à də́ dɩ̀àn lʋʋ nii tə lɩ̀à tə yuu wa, yá ba dàń sɛ̀ ʋ mʋ̀ Ba-Yígúrə́-Jə-Tiu də ʋ lɩ̀à tə nii. 19 Á dàń pɩ̀à Ba-Yígúrə́-Jə-Tiu, ʋ nə yɩ á Yɩɩ, də á bɩcan mama, də á pubʋŋa mama. Á zaŋa á lwà Ba-Yígúrə́-Jə-Tiu wúlú bwálɩ́ tə, sə á kə ʋ nimarʋ culu daka tə, də ʋ culu tʋtʋnzɩla tə dìə̀ təntə wa, á nə wá lwà, sə ba bon ʋ yɩrɩ ka wa.»