Davidə kwɛn Levi dwíí tə ʋ tún púlə́ púlə́
23
1 Máŋá tə Davidə nə kwɩn, ʋ jì bazʋnʋ zənzən, ʋ tún ʋ bìú Salʋmʋn, sə ʋ ya Yɩzərayɛlə pɩ̀ʋ́. 2 Kʋ kwa nə, ʋ ken Yɩzərayɛlə lɩ̀à yáá tɩ̀án tə mama, də Yɩɩ joŋwana tə mama, də Levi dwíí tə mama duən yáá nə.3 Ba gàlɩ̀ Levi dwíí lɩ̀à tə nədʋ nədʋ, ba tə nə jə bɩna fɩtwa, də ba tə nə dwə nətʋ. Ba yɩn bara 38 000. 4 Yá Davidə dàń tún ba lɩ̀à 24 000, sə ba ywàń Ba-Yígúrə́-Jə-Tiu dìə̀ tə lwiu tʋ̀tʋ̀nán tə yuu nə. Ʋ tún ba lɩ̀à 6 000, sə ba ya tʋ̀tʋ̀nán yun tɩ̀án, də lɩ̀à ba nə bʋ̀rɩ̀ bʋra. 5 Ʋ tún ba lɩ̀à 4 000, sə ba ya mimii nəcɩra, ʋ ga tún ba lɩ̀à 4 000 duən, sə ba bʋ Ba-Yígúrə́-Jə-Tiu nə, də gwaran zɩla tə ʋ nə fwa kʋ yɩrɩ.
6 Davidə pwɛ̀ Levi dwíí tə púlə́ púlə́, kʋ twá də Levi bɩ̀á Gɛrəswon, də Kehatə, də Merari dwíə́ tə nə.
7 Gɛrəswon bɩ̀á nə yɩ Ladan də Swimeyi. 8 Ladan bɩ̀á nə yɩ Yehiyɛlə, də Zetamə, də Zʋwɛlə. Yehiyɛlə yà nə yɩ ba yáá tíú. Ba mama yɩn bɩ̀á batwa. 9 Swimeyi bɩ̀á nə yɩ Swelomitə, də Hazɩyɛlə, də Haran. Ba mama yɩn bɩ̀á batwa. Mə ba mʋ̀ nə yɩn Ladan dwíə́ tə yáá tɩ̀án.
10 Swimeyi bɩ̀á duən nə yɩ Yahatə, də Zɩzaa, də Yewuswə, də Beriya. Ba yɩn bɩ̀á banɩa. 11 Yahatə yà nə yɩ ba yáá tíú, Zɩza ga daa ʋ nə. Yewuswə, də Beriya wà bɩ̀á zənzən lɩrɩ. Yá ba dàń jələ ba, ndə dìə̀ nədʋ lɩ̀à nə.
12 Kehatə bɩ̀á nə yɩ Aməramə, də Yɩsarə, də Ebəron, də Uziyɛlə. Ba mama yɩn bɩ̀á banɩa. 13 Aməramə bɩ̀á nə yɩ Aron də Moyizə. Ba lɩ Aron ba tún, sə ʋ ya Ba-Yígúrə́-Jə-Tiu cɩcɩ nyiən, sə ʋ də ʋ bɩ̀á tə tʋn ba pa Ba-Yígúrə́-Jə-Tiu nə, máŋá mama wuuu. Ba mɛ sə ba tʋn Yɩɩ joŋwana tʋ̀tʋ̀nán tə, Yɩɩ wúlú bwálɩ́ tə wa, sə ba sʋ̀rɩ́ wusinə, ba pa Ba-Yígúrə́-Jə-Tiu nə, ba ga lòrì də Ba-Yígúrə́-Jə-Tiu yɩrɩ tə, sə Yɩɩ fwa zəni Yɩzərayɛlə lɩ̀à tə yɩra, máŋá mama. 14 Moyizə mʋ̀ yɩn Yɩɩ lìù, ba ga gàlà ʋ bɩ̀á tə, ba kə Levi dwíí tə wa. 15 Moyizə bɩ̀á nə yɩ Gɛrəswomə də Eliyezɛrə. 16 Gɛrəswomə bìú nə yɩ Swebuwɛlə, ʋ nə yɩ yáá tíú. 17 Eliyezɛrə bìú nə yɩ Rehabɩa, ʋ nə yɩ yáá tíú. Eliyezɛrə wà bìú don lɩrɩ. Yá Rehabɩa mʋ̀ lɩrɩ bɩ̀á kapʋpʋ. 18 Yɩsarə bìú nə yɩ Swelomitə, ʋ nə yɩ yáá tíú. 19 Ebəron bɩ̀á nə yɩ ʋ bikwɩa Yeriya, də Amarɩya, ʋ nə yɩ ʋ bələ nii bìú, də Yahazɩyɛlə, ʋ nə yɩ ʋ batwa nii bìú, də Yekamamə, ʋ nə yɩ ʋ banɩa nii bìú. 20 Uziyɛlə bɩ̀á nə yɩ ʋ bikwɩa Mika, də Yɩswɩya, ʋ nə yɩ ʋ bələ nii bìú.
21 Merari bɩ̀á nə yɩ Mali də Muswi. Mali bɩ̀á nə yɩ Eleyazarə də Kiswə. 22 Eleyazarə tɩga də ʋ wà bibɛɛ lɩrɩ. Bikana cɩcɩ nə ʋ lɩrɩ. Ba nubɩa tə nə yɩ Kiswə bɩ̀á tə nə swe ba, ba ma fwa ba kana. 23 Muswi bɩ̀á nə yɩ Mali, də Edɛrə, də Yeremɔtə. Ba yɩn bɩ̀á batwa.
24 Mə Levi dwíí tə yɩn nətʋ. Ba lìù mama yɩn ʋ dìə̀ tíú. Ba gàlɩ̀ ba nədʋ nədʋ, ba pʋ́pʋ́nɩ́ ba yɩra ba tún saga wa. Ba lɩ̀à tə mama, ba nə jə bɩna sapʋa, də ba tə nə dwə nətʋ, yà mɛ sə ba tʋn Ba-Yígúrə́-Jə-Tiu dìə̀ tʋ̀tʋ̀nán tə. 25 Cɩ́gá, Davidə yà swɩ̀n, ʋ wʋ́: «Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ pɩn sìə́ ʋ lɩ̀à tə nə, yá ʋ mʋ̀ Ba-Yígúrə́-Jə-Tiu tətə dàń wulə Zwerizalɛmə wa, máŋá mama wuuu. 26 Levi dwíí tə də kʋ́ʋ̀ bá zɩn Yɩɩ wúlú gansili tə, də kʋ tʋtʋnzɩla tə mama.» 27 Mə kʋ zɩgɩ Davidə talɩkwa sʋgʋ təntə yuu wa, ba ma gàlà Levi dwíí lɩ̀à tə nə jə bɩna sapʋa, də ba tə nə dwə nətʋ, ba pʋ́pʋ́nɩ́ ba yɩra sagɩ wa. 28 Levi dwíí tə yà mɛ sə ba twá Aron dwíí tə nii nə, ba ma tʋn Ba-Yígúrə́-Jə-Tiu dìə̀ tə wa. Ba mʋ̀ nə mɛ sə ba ywàń napakolən tə, də dibɩa tə yuu, ba kwɛn Yɩɩ dìə̀ tʋtʋnzɩla tə mama ba lɩ durən wa, ba ga tʋn Yɩɩ dìə̀ tʋ̀tʋ̀nán tə. 29 Ba mɛ sə ba tanɩ dipɛn tə, ba nə tuŋə ba pɩn Yɩɩ nə, də mun tə, ba nə ma fwa vàrʋ́ calɩ* jwəŋə tə, də ŋʋ̀nán tə nə wà sabwarɩ ken, də gàtó tə ba nə wùə̀ wopɩpaʋ yuu, nə à yə̀ə́ gàtó yiri don mama. Ba tə mɛ sə ba ywàń wiən tə, ba nə ma kəri, də tə tə, ba nə ma maŋa yuu nə. 30 Ba mɛ sə ba ya lá, jɩjʋ də didəni mama, ba nuŋə gwaran, ba ma bwɩ Ba-Yígúrə́-Jə-Tiu nə. 31 Ba mɛ sə ba ya lá sìə́ dɩɩn mama nə, də candʋan mama dɩɩn nə, də cànà diŋə mama dɩɩn nə, ba fwa jwəŋə tə mama ba nə sʋ̀rɩ́*, ba pɩn Ba-Yígúrə́-Jə-Tiu nə. Máŋá mama, ba mɛ sə ba tʋn ba tʋ̀tʋ̀nán tə mama, ba pa tə nii sú, Ba-Yígúrə́-Jə-Tiu yáá con. 32 Ba mʋ̀ nə wá ywàń Yɩɩ jə́rə́ gansili* tə, də ʋ wúlú bwálɩ́ tə yuu, ba ga twá Aron bɩ̀á tə nii nə, ba nə yɩ ba nubɩa, ba ma tʋn Ba-Yígúrə́-Jə-Tiu dìə̀ tʋ̀tʋ̀nán tə.