Yɩɩ joŋwana púlə́ púlə́ yoo
24
1 Nə̀ń Aron bɩ̀á Yɩɩ joŋwana púlí tə yɩra: Kʋ yɩ Aron bɩ̀á Nadabə, də Abihu, də Eleyazarə, də Yɩtamarə. 2 Nadabə də Abihu dí ba nyɩna Aron yáá ba tɩ. Ba tɩga də ba wà bìú lɩrɩ. Eleyazarə də Yɩtamarə dàń nə yɩn Yɩɩ joŋwana, ba tʋn Yɩɩ joŋwanɩ tʋtʋŋɩ tə. 3 Davidə də Sadɔkə, ʋ nə yɩ Eleyazarə bìú don, də Ahimelɛkə, ʋ nə yɩ Yɩtamarə bìú don, nə san duən nə, ba pwɛ̀ tʋ̀tʋ̀nán tə, ba ma tara Aron dwíí tə. 4 Ba nɩ də Eleyazarə dwíí tə wa bara dáá ba doni Yɩtamarə dwíí tə wa bara tə. Ba ma pwɛ̀ Eleyazarə dwíí tə púlə́ fugə də bardʋ, də ba yáá tɩ̀án, ba ga pwɛ̀ Yɩtamarə dwíí tə púlə́ nana, də ba yáá tɩ̀án. 5 Ba pwárɩ́ ba ma pwɛ̀ ba púlə́ púlə́. Cɩ́gá, Yɩɩ wúlú gànsìlí tə tʋ̀tʋ̀nà, də Yɩɩ tʋ̀tʋ̀nà yà wulə Eleyazarə dwíí tə, də Yɩtamarə dwíí tə wa. 6 Netaneyɛlə bìú Swemaya, ʋ nə pʋ́pʋ́nɩ́ saga, ʋ ga yɩ Levi dwíí tə wa lìù, pʋ́pʋ́nɩ́ ba yɩra pɩ̀ʋ́ tə, də dìì tɩ̀án tə, də Yɩɩ joŋwanʋ Sadɔkə, də Abɩyatarə bìú Ahimelɛkə, də Yɩɩ joŋwana dìì tɩ̀án tə, də Levi dwíí dìì tɩ̀án tə yáá con. Ba yàá lɩ dìə̀ nədʋ ba pa Eleyazarə nə, ba ga lɩ dìə̀ nədʋ don ba pa Yɩtamarə də nə.7 Yehoyaribə nə yɩ təntən lìù pwárʋ́ tə nə jɩn, bələ nii lìù nə yɩ Yedaya, 8 batwa nii lìù nə yɩ Harimə, banɩa nii lìù nə yɩ Seworimə, 9 bonu nii lìù nə yɩ Maləkɩya, bardʋ nii lìù nə yɩ Miyaminə, 10 barpɛ nii lìù nə yɩ Hakɔsə, nana nii lìù nə yɩ Abɩya, 11 nʋgʋ nii lìù nə yɩ Zozuwe, fugə nii lìù nə yɩ Swekanɩa, 12 fugə nədʋ nii lìù nə yɩ Eliyaswibə, fugə bələ nii lìù nə yɩ Yakimə, 13 fugə batwa nii lìù nə yɩ Hupa, fugə banɩa nii lìù nə yɩ Yeswebeyabə, 14 fugə bonu nii lìù nə yɩ Biləga, fugə bardʋ nii lìù nə yɩ Yɩmɛrə, 15 fugə barpɛ nii lìù nə yɩ Ezirə, fugə nana nii lìù nə yɩ Hapisɛsə, 16 fugə nʋgʋ nii lìù nə yɩ Petahiya, sapʋa nii lìù nə yɩ Ezekɩyɛlə, 17 sapʋa də nədʋ nii lìù nə yɩ Yakin, sapʋa də bələ nii lìù nə yɩ Gamulə, 18 sapʋa də batwa nii lìù nə yɩ Delaya, sapʋa də banɩa nii lìù nə yɩ Mazɩa.
19 Mə nətʋ nə ba tún ba, sə ba tʋn Yɩɩ tʋ̀tʋ̀nán tə Ba-Yígúrə́-Jə-Tiu dìə̀ tə wa, ba ga twá yìə̀n tə nə, ba nɩbɛɛ Aron nə bɩrɩ də, Yɩzərayɛlə lɩ̀à Yɩɩ tə nə pɩn nii, sə ba tʋn.
Levi dwíí tə lɩ̀à duən yoo
20 Nə̀ń Levi dwíí tə lɩ̀à duən: Aməramə bɩ̀á tə wa, kʋ yɩ Swubayɛlə, Swubayɛlə bɩ̀á tə wa, kʋ yɩ Yedeya, 21 Rehabɩa bɩ̀á tə wa, kʋ yɩ Yɩswɩya, ʋ nə yɩ ba yáá tíú. 22 Yɩsarə bɩ̀á tə wa, kʋ yɩ Swelomɔtə, də Yahatə. 23 Ebəron bɩ̀á tə wa, kʋ yɩ Yeriya, ʋ nə yɩ ba yáá tíú, də Amarɩya, ʋ nə yɩ bələ nii lìù, də Yahaziyɛlə, ʋ nə yɩ batwa nii lìù, də Yekameyamə, ʋ nə yɩ banɩa nii lìù. 24 Uziyɛlə bɩ̀á tə wa, kʋ yɩ Mika. Mika bɩ̀á tə wa, kʋ yɩ Swamirə. 25 Mika nubiu Yɩswɩya bɩ̀á tə wa, kʋ yɩ Zakari. 26 Merari bɩ̀á tə wa, kʋ yɩ Mali, də Muswi, də Yazɩa. 27 Merari bìú Yazɩa bɩ̀á tə wa, kʋ yɩ Swohamə, də Zakurə, də Yibəri. 28 Mali bɩ̀á tə wa, kʋ yɩ Eleyazarə, ʋ nə wà bìú lɩrɩ, 29 də Kiswə, ʋ bìú nə yɩ Yerameyɛlə. 30 Muswi bɩ̀á tə wa, kʋ yɩ Mali, də Edɛrə, də Yerimɔtə. Mə Levi dwíí tə yɩn nətʋ, ba dìì tə wa. 31 Ba də yɩ ba pwárɩ́ ba ma kúrí ba, sə ba tʋn Yɩɩ dìə̀ tə tʋ̀tʋ̀nán tə, ndə ba nə pwárɩ́ ba ma kúrí Aron bɩ̀á tə, ba nə yɩ ba nubɩa nətʋ. Ba pwárɩ́ ba ma kúrí ba pɩ̀ʋ́ Davidə, də Sadɔkə, də Ahimelɛkə, də Yɩɩ joŋwana dìì tɩ̀án tə, də Levi dwíí dìì tɩ̀án tə yáá con. Kʋ nətʋ pɩn ba jələ nyánʋ́ nəmaa dwíí, ndə ba nə jələ zʋnʋ nəkwɩa dwíí nətʋ.