Filisi tɩ̀án tə dí dɩ̀àn: Sayulə də ʋ bɩ̀á tə tɩga
31
1 Filisi tɩ̀án tə zɩ̀n kʋ̀ʋ̀ də Yɩzərayɛlə lɩ̀à tə. Yɩzərayɛlə kwatara tə dəri Filisi tɩ̀án tə yáá nə, yá Filisi tɩ̀án tə gʋa ba zənzən, Giləbʋa paan tə yuu wa. 2 Filisi tɩ̀án tə púə́ Sayulə də ʋ bɩ̀á tə kwa, ba dɩŋɩ də dɩ̀àn. Ba gʋa Sayulə bɩ̀á Zonatan, də Abinadabə, də Maləkisʋa. 3 Kʋ̀ʋ̀ tə dàń yà cà zənzən, kʋ pa Sayulə nə. Twan tárá tə nɩ wá, yá fən dàń zʋa wá zənzən, kʋ pa ʋ vɩvaga ba yáá con. 4 Sayulə dàń swɩ̀n lìù tə con, ʋ nə zɩŋa ʋ kwatarɩ zɩla tə, ʋ wʋ́: «Van n kwatara sɩ̀ʋ́ tə n cʋ̀rɩ̀, n ma zwa nə n gʋ, sə lɩ̀à ba tə nə yəri Yɩɩ, dàn ká bà ba bàn nə, ba ga zwa nə ba gʋ.» Yá lìù tə, ʋ nə zɩŋa Sayulə kwatarɩ zɩla tə wà sɛ̀. Cɩ́gá, fən yà jə wá zənzən. Sayulə ma tì ʋ tətə kwatara sɩ̀ʋ́ tə, ʋ cwɛn kʋ də̀ń tɩa, ʋ ga tʋ kʋ yuu wa, ʋ pa kʋ zwa wá kʋ gʋ. 5 Lìù tə nə zɩŋa Sayulə kwatarɩ zɩla tə nə nɩ də ʋ tɩga, ʋ də cwɛn ʋ kwatara sɩ̀ʋ́ tə də̀ń tɩa, ʋ ga tʋ kʋ yuu wa, ʋ pa kʋ zwa wá, ʋ də twá Sayulə nə ʋ tɩ. 6 Mə kʋ twá nətʋ, Sayulə də ʋ bɩ̀á batwa tə, də lìù tə nə zɩŋa ʋ kwatarɩ zɩla tə, də ʋ kwatara tə mama, ma twá duən ba tɩ, dɩɩn nədʋ. 7 Yɩzərayɛlə lɩ̀à tə, ba yà nə wulə vara tə vàn tə don nə, də Zʋrədɛn mʋnaa tə vàn tə don nə nɩ Yɩzərayɛlə kwatara tə də ba dəri, ba ga nì də Sayulə də ʋ bɩ̀á tə tɩga. Ba də dàń nan ba dəri ba yá ba tɩan tə. Yá Filisi tɩ̀án tə dàń vəli ba wulə tɩan təntə wa.8 Kʋ tɩpʋrɩ nə, Filisi tɩ̀án tə twi, sə ba lɩ tɩga tə yɩra zɩla tə. Yá ba dàń nɩ Sayulə də ʋ bɩ̀á batwa tə, ba tɩga ba tígə́ Giləbʋa paan tə yuu. 9 Ba za Sayulə yuu ba goŋə, ba ga ja ʋ kwatarɩ zɩla tə, ba lɩ ba yá wá. Kʋ kwa nə, ba tʋn lɩ̀à Filisi lʋʋ nii tə mama wa, sə ba swɩ̀n ŋwɛn nəywáŋʋ́ təntə, ba bɩrɩ ba woŋwanan dìì wa, də ba lalʋʋ tə nə. 10 Ba ken Sayulə kwatarɩ zɩla tə ba woŋwanan tə, ba nə boŋə Asətarəte* dìə̀ wa, ba ga vwa ʋ tɩgɩ tə, ba goli Bɛtə-Swan birinaa tə nə. 11 Yabɛswə, kʋ nə wulə Galadə nagwanaa wa tɩ̀án nə nì kʋ tə, Filisi tɩ̀án tə nə tʋn Sayulə yɩra, 12 ba babara tə mama nan kʋ tɩtɩn tə mama, ba va ba lɩ Sayulə, də ʋ bɩ̀á tə tɩga tə, Bɛtə-Swan bírə́ tə yɩra, ba ja pìí ba bà Yabɛswə. Yá ba dàń sʋ̀rɩ́ ba Yabɛswə nə. 13 Ba pɛ̀ ba kurən tə, ba gùrì sɩsanʋ tə də̀ń nə, Yabɛswə nə, ba ga vwa ba níə́ dɩan barpɛ.