1 Samiyɛlə 30

Amalɛkə dwíí tə twi ba ta Sikəlagə, Davidə kwa nə

1 Dɩan batwa nii nə nə, Davidə də ʋ lɩ̀à tə yí Sikəlagə. Ba yí lá, də Amalɛkə dwíí tə twi, ba ta lʋʋ nii tə Negɛbə tə, də Sikəlagə. Ba ta Sikəlagə, ba ga sʋ̀rɩ́ kʋ. 2 Amalɛkə dwíí tə yà cɩ̀gà kana tə, də lɩ̀à tə mama, ba yà nə wulə Sikəlagə nə, bìsɩ́ná, də nəkwɩna mama, ba ja. Ba yà wà lìù mama gwɩ. Ba yɩ ba jɩn ba, ba kə lá, ba vìí. 3 Máŋá tə, Davidə də ʋ lɩ̀à tə nə twi, ba yí tɩʋ tə wa, ba nɩ də, kʋ dí mən. Yá Amalɛkə dwíí tə cɩ̀gà ba kana tə, də ba bɩ̀á tə, də ba bwɩ̀ɩ́ tə, ba ja, ba ja vìí. 4-5 Ba yà jɩn Davidə kana bələ tə, ba kə lá ba vìí. Ba mʋ́ nə yɩ Ahinowamə, ʋ nə yɩ Zwizəreyɛlə tíú, də Abigayilə, ʋ yà nə yɩ Nabalə kan, Karəmɛlə nə. Davidə də ʋ kwa lɩ̀à tə dàń lwə kori, ba kwi wuuu, ba gwàrɩ̀. 6 Pucʋnɩ nəfarʋ zʋa Davidə. Cɩ́gá, lalʋʋ tə yà swɩ̀n, də ba wá dɩlɩ wá də kapana. Ba lìù mama lɩŋa yà zaŋa, ba bɩ̀á tə də ba bwɩ̀ɩ́ tə yɩrɩ. Yá Davidə dàń pɩn ʋ jɩɩn dàn, kʋ twá də Ba-Yígúrə́-Jə-Tiu, ʋ nə yɩ ʋ Yɩɩ.

Davidə dɩŋɩ Amalɛkə dwíí tə kwa

7 Davidə swɩ̀n Yɩɩ joŋwanʋ Ahimelɛkə bìú Abɩyatarə con, ʋ wʋ́: «Ja Yɩɩ joŋwana pwárʋ́ wiən* tə, n bà, n pa nə!» Abɩyatarə ma ja tə, ʋ bà, ʋ pa wá. 8 Yá Davidə dàń bon, ʋ kə Ba-Yígúrə́-Jə-Tiu nə, ʋ wʋ́: «À nə dɩŋɩ dʋŋa ba tə kwa, à wá ja ba naaa?» Ba-Yígúrə́-Jə-Tiu le wá, ʋ wʋ́: «Dɩŋa ba kwa! Cɩ́gá mama, n wá ja ba, n ga wá jon n lɩ̀à tə.» 9 Davidə də ʋ kwa lɩ̀à biəyardʋ tə dàń zàn, ba dɩŋa Amalɛkə dwíí tə kwa. Ba nə vəli ba yí Besɔrə nacoru tə, ʋ kwa lɩ̀à tə duən zɩgɩ lá. 10 Ba yà yɩn lɩ̀à biələ, ba yà nə gwàrɩ̀, ba zɩga, ba wàrɩ̀ Besɔrə nacoru tə ba galɩ. Yá Davidə dàń kɛ̀ń də bara biənɩa, ʋ ma dɩŋɩ dʋŋa tə kwa.

Davidə ta Amalɛkə dwíí tə, ʋ də́

11 Davidə kwa lɩ̀à tə nɩ bɛɛ don kasɔɔ tə wa, ʋ nə yɩ Ezwipətə tíú, də ʋ bɛlʋ. Ba tì wá, ba ja bà Davidə con. Ba pɩn wá wodiu, ʋ də́, ba ga pa wá nɩ́á, ʋ nyʋn. 12 Ba tə pɩn wá kapɩra, ba nə cili, ba kə duən nə, tə kʋ̀, kúkúlí kɩkaʋ, də divɛn tɩ̀án bɩ̀á, ba nə cili, ba kə duən nə, tə kʋ̀, kúkúlə́ bələ. Ʋ nə dí ʋ zwɛ̀ kwa nə, ʋ pubʋŋa pìí ka bà. Cɩ́gá, bɛɛ təntə yà fwa dɩan batwa, ʋ nə wà wodiu dí, ʋ ga wà nɩ́á də nywɩn. 13 Davidə bwe wá, ʋ wʋ́: «Wàà nə tɩ mʋ́? Yə̀n nə, n nan?» Ʋ le, ʋ wʋ́: «À yɩ Ezwipətə tɩ̀án bìú, à ga yɩ Amalɛkə dwíí bɛɛ don yoŋu. Yá kʋ dɩan batwa nə, zə̀n kʋ tə, à yuu tíú tə nə vɩga nə, ʋ dʋgʋ, à yɩra nə ba zurə yɩrɩ. 14 Nə mʋ̀ nə vəli, nə ta kʋ̀ʋ̀ Keretʋa-ba lʋʋ nii Negɛbə vàn con, də Zwida lʋʋ nii tə wa, də Kalɛbə nagwanaa tə Negɛbə vàn con. Yá nə sʋ̀rɩ́ Sikəlagə.» 15 Davidə bwe wá, ʋ wʋ́: «N wá sɛ̀, n ya à yáá, n ja nə, n va lɩ̀à təntə con?» Ʋ le, ʋ wʋ́: «À wá ja mʋ́ à va ba con, də n nə dùə̀ də Yɩɩ, də n bá gʋ nə, n ga bá ja nə, n pa à yuu tíú tə nə.

16 Mə kʋ zɩgɩ nətʋ, bɛɛ tə ma ja Davidə, ʋ va Amalɛkə dwíí tə con. Ba vəli ba yí Amalɛkə dwíí tə, də ba larɩ, ba sú tɩa mama, ba ma də́, də ba nywɩn. Ba dàń yà wulə ba fwa pupwən, wiən tə mama yɩrɩ, ba nə ta ba jon Filisi lʋʋ nii tə, də Zwida lʋʋ nii tə wa. 17 Davidə púə́ ba ʋ kə, jɩjʋ fuən fuən. Ʋ ta ba wuuu, kʋ va kʋ yí bələ nii dɩɩn tə, didəni nii nə. Yá ba lìù mama wà wànɩ́, ʋ dəri ʋ jɛ́n, də kʋ nə tà ba kwa lɩ̀à biənɩa, ba nə dɩ̀gà nyʋgʋma yuu, ba dəri ba jɛ́n. 18 Davidə jon lɩ̀à tə mama, Amalɛkə dwíí tə yà nə jɩn. Yá mə kʋ zɩgɩ nətʋ, ʋ ma jon ʋ kana bələ tə də. 19 Ba lìù mama wà dʋŋa tə con mɛ. Davidə pìí ʋ jon ba mama, kʋ nə zɩgɩ ba wa nəkwɩa, kʋ va kʋ yí ba wa nəmaa, də ba bɩ̀á də ba bwɩ̀ɩ́, də wiən tə mama, Amalɛkə dwíí tə yà nə ta ba jon. Davidə pìí ʋ jon tə mɛ, ʋ ja bà. 20 Davidə jon vanmɩnɩ tə mama, də vanfaran tə mama. Yá lɩ̀à tə, ba yà nə wulə vàná təntə yáá, ba ja tə ba bɩ̀àn, dàń yà swɩ̀n, ba wʋ́: «Nə̀ń Davidə wiən tə, ʋ nə ta ʋ jon!»

21 Davidə pìí ʋ bà, ʋ yí ʋ kwa lɩ̀à biələ tə, ba yà nə gwàrɩ̀ zənzən, ba wàrɩ̀ ʋ kwa ba twá, kʋ pa, ba yá ba Besɔrə nacoru tə nii nə tə. Davidə kwa lɩ̀à təntə vəli ba jəri ʋ də ʋ kwa lɩ̀à tə duən tə. Davidə vəli ʋ yí ba yɩra, ʋ jʋn ba. 22 Wʋlʋnyɩna tə mama, də lɩ̀à tə, ba nə ba kʋkwa, ba nə yɩn lɩ̀à tə wa, ba nə twá Davidə nə, ba va kʋ̀ʋ̀ tə, dàń swɩ̀n, ba wʋ́: «Ba nə wà nə nə twá, ba va kʋ̀ʋ̀ tə yɩrɩ, ba bá na won mama wiən tə wa, nə nə ta nə jon kʋ̀ʋ̀ tə wa. Ba kana də ba bɩ̀á cɩcɩ nə, nə wá pa ba, sə ba jon, ba ja vìí.» 23 Yá Davidə swɩ̀n, ʋ wʋ́: «À nubɩa-ba, á dànà ká ja kʋ tə, Ba-Yígúrə́-Jə-Tiu nə pɩn nəba, á ma fwa nətʋ. Cɩ́gá, ʋ púə́ nə yuu nə, ʋ ga ja dʋŋa tə, ba nə twi, ba ta nəba, ʋ kə nə jɩɩn wa. 24 Á tətə na də kʋ tə, á nə swɩ̀n tə wà mɛ. Lìù tə, ʋ nə vəli kʋ̀ʋ̀ tə tori, də lìù tə, ʋ nə pìí ʋ zɩgɩ zɩla tə nii nə tori mɛ, sə tə ya nədʋ. Ba mama mɛ, sə ba tara wiən tə.» 25 Yá kʋ nə zɩgɩ kʋ dɩɩn təntə nə, ʋ pɩn kʋ nətʋ tə jì nii, də kʋ yɩ yoo, kʋ nə mɛ, sə kʋ ya nətʋ Yɩzərayɛlə wa. Yá kʋ dàń tʋŋa nətʋ, də zə̀n mama.

Davidə tarɩ wiən tə, ʋ nə ta ʋ jon

26 Máŋá tə Davidə nə pìí ʋ bà Sikəlagə, ʋ lɩ wiən tə duən, ʋ nə ta ʋ jon, ʋ pa, ba ja va, ba pa Zwida nagwanaa nəkwɩna tə nə, ba nə yɩ ʋ dabara. Ʋ pɩn, ba swɩ̀n ba con, ba wʋ́: «Nə ta Ba-Yígúrə́-Jə-Tiu dʋŋa tə, nə jon ba wiən. Á nəŋə tə wa zìlə́ wiən nə, á jon!» 27 Ʋ dàń pɩn, ba ja tə, ba va, ba pa nəkwɩna tə nə, ba nə wulə Betɛlə nə, də Ramɔtə nə, Negɛbə vàn con, də Yatirə nə, 28 də Arɔwɛrə nə, də Sifəmɔtə nə, də Ɛswətemʋa nə, 29 də Rakalə nə, də Yerameyɛlə dwíí tɩan tə wa, də yàrá dwíí tə tɩan tə wa, 30 də Orəma nə, də Bɔrə-Aswan nə, də Atakə nə, 31 də Ebəron nə, də bwálá tə mama nə, Davidə də ʋ kwa lɩ̀à tə nə twá lá, ba jírí.