Filisi tɩ̀án tə lɩ Davidə ba wa
29
1 Filisi tɩ̀án tə ken ba kwatara tə mama duən yáá, Afɛkə nə. Yá Yɩzərayɛlə lɩ̀à tə də kun duən nə, Zwizəreyɛlə nə, nabuliyii tə nii nə. 2 Filisi yun tɩ̀án tə yà wulə kwatara bíí bíí, də kwatara mʋ̀rʋ̀ mʋ̀rʋ̀ yáá, ba vəli. Yá Davidə də ʋ lɩ̀à tə ga wulə ba mama kwa, ba vəli, ba daa Akiswə nə. 3 Filisi kwatara yun tɩ̀án tə bwe, ba wʋ́: «Bɛ̀ɛ̀ nə Ebərə ba tə pɩ̀à yəbə?» Yá Akiswə le Filisi kwatara yun tɩ̀án tə, ʋ wʋ́: «Kʋ yɩ Davidə! Ʋ yà yɩ Yɩzərayɛlə pɩ̀ʋ́ Sayulə tʋtʋnʋ. Ʋ nə dəri ʋ bà, ʋ wulə à con, kʋ dàń dwə bɩnɩ. Yá kʋ nə zɩgɩ ʋ túrí dɩɩn tə nə, kʋ bà kʋ yí zə̀n, à wà yolwan mama nɩ, ʋ yɩra.» 4 Yá Filisi kwatara yun tɩ̀án tə lɩŋa zàn Akiswə yuu wa, ba ga swɩ̀n ʋ con, ba wʋ́: «Pa bɛɛ wà tə pìí ʋ vìí. Pa ʋ pìí ʋ va, ʋ ya bwálɩ́ tə nə, n nə tún wá. Kʋ wà mɛ, sə ʋ twá nə nə, ʋ va kʋ̀ʋ̀ tə. Ʋ nə twá nə nə, kʋ wàá də, ʋ wá pìí ʋ jì nə dʋŋʋ kʋ̀ʋ̀ tə wa, ʋ ta nəba. Nətə nə ʋ mʋ̀ bɛɛ təntə wá fwa, sə ʋ də ʋ yuu-tiu tə ma pìí ba kə duən yuu, də kʋ nə tà nə kwatara tə yun nə, ʋ wá goŋə, ʋ ja va, ʋ pa wá? 5 Kʋ tà ʋ mʋ̀ Davidə təntə nə, ba ja gwaran də sɩʋ, ba ma bʋ ʋ nə, ba wʋ́,Sayulə gʋa dʋŋa mʋ̀rʋ̀,
yá Davidə ga gʋ dʋŋa mʋ̀rʋ̀ fugə tə naaa?»
6 Akiswə dàń bon Davidə, ʋ swɩ̀n ʋ con, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! N yɩ cɩ́gá tíú. Cɩ́gá, kʋ nə zɩgɩ dɩɩn tə nə, n nə twi à con, kʋ bà kʋ yí zə̀n, à wà yolwan mama nɩ, n yɩra. Yá à mʋ̀ yà swə, sə n twá à nə, n ta kʋ̀ʋ̀ kʋ tə. Yá Filisi yun tɩ̀án tə duən tə dàń nə ba n yáá yoo swə. 7 Sɩ́ʋ́n nə, n dàń pìí, n vìí də sìə́. Kʋ nə yɩn nətʋ, n bá tʋn yoo mama, kʋ nə ba ywán də Filisi yun tɩ̀án tə.» 8 Davidə swɩ̀n Akiswə con, ʋ wʋ́: «Bɛ̀ɛ̀ nə à fwa? Kʋ nə zɩgɩ dɩɩn tə nə, à nə twi n con, kʋ bà kʋ yí zə̀n, bɛ̀ɛ̀ yolwan nə n nɩ, à mʋ̀ n tʋtʋnʋ tə yɩra, kʋ nə pɩn, à wàrɩ̀ à twá à vəli, à tɛ n mʋ̀ à yuu-tiu pɩ̀ʋ́ tə dʋŋa tə?» 9 Akiswə le Davidə, ʋ wʋ́: «À yə̀ə́ kʋ nətʋ tə. N yoo mama ywán də nə, ndə Yɩɩ malɩka nə. Yá Filisi kwatara yun tɩ̀án tə dàń nə və, sə n twá nə nə, n va kʋ̀ʋ̀ tə. 10 Sɩ́ʋ́n nə, n dàń zàn jɩjʋ fuən fuən, n mʋ̀ də n yuu-tiu tə tʋ̀tʋ̀nà tə, ba nə twá n nə, ba bà, á zaŋa jɩjʋ fuən fuən, máŋá tə wa poni nə wulə, á vìí.» 11 Kʋ tɩpʋrɩ jɩjʋ nə, Davidə də ʋ lɩ̀à tə zàn fuən fuən, ba pìí ba va Filisi lʋʋ nii tə wa. Yá Filisi tɩ̀án tə ga zàn, ba va Zwizəreyɛlə.