1 Samiyɛlə 28

Davidə jìgə̀ Akiswə cìrʋ́, ʋ cɩ̀ ʋ nə

1 Máŋá don wa, Filisi tɩ̀án tə ken ba kwatara tə duən yáá, sə ba tà kʋ̀ʋ̀ də Yɩzərayɛlə lɩ̀à tə. Yá Akiswə dàń swɩ̀n Davidə con, ʋ wʋ́: «N yə̀ə́ zəni də, n mʋ̀ də n lɩ̀à tə mɛ, sə á ya à kwatara púlí tə wa, á san nə, sə nə ta kʋ̀ʋ̀ tə.» 2 Davidə le Akiswə, ʋ wʋ́: «Kʋ ziən! N tətə wá na kʋ tə, n tʋtʋnʋ tə nə wá tʋn» Yá Akiswə kʋ́ʋ̀ swɩ̀n Davidə con, ʋ wʋ́: «Kʋ ziən! À wá pa n mʋ̀ nə ya à cɩ̀rʋ́, n cɩ̀ à nə, máŋá mama wuuu.

Fən pɩn Sayulə cʋ̀gʋ̀ culu

3 Kʋ máŋá tə wa, də Samiyɛlə tɩga. Yɩzərayɛlə lɩ̀à tə mama yà kwi ʋ lúə́, ba ga gùrì wá ʋ sàń Rama nə. Sayulə yà lɩ vʋra tə, də yinara tə mama, lʋʋ nii tə wa.

4 Filisi tɩ̀án tə kun duən nə, ba bà, ba kə ba kwatara sàń Swunɛmə nə. Sayulə də ken Yɩzərayɛlə kwatara tə mama duən yáá, ba bà, ba kə ba kwatara sàń Giləbʋa paan tə yuu. 5 Sayulə nə nɩ Filisi tɩ̀án kwatara sàń tə, fən zʋa wá. Yá ʋ bɩcan ga vɩvaga zənzən. 6 Sayulə bon ʋ kə Ba-Yígúrə́-Jə-Tiu nə, yá Ba-Yígúrə́-Jə-Tiu wà wá le. Ʋ wà pandwɩa, nə à yə̀ə́, Yɩɩ joŋwanʋ pwárʋ́, nə à yə̀ə́, Yɩɩ nii sʋ̀sʋ̀nà nə twá, ʋ ma le wá.

7 Sayulə dàń swɩ̀n ʋ tʋ̀tʋ̀nà tə con, ʋ wʋ́: «Á pɩ̀à kan, ʋ nə boŋə tɩga nii, á pa nə, sə à va, à bon nii ʋ con.» Ʋ tʋ̀tʋ̀nà tə ma swɩ̀n ʋ con, ba wʋ́: «Kan don wulə Eyin-Dɔrə nə, ʋ boŋə tɩga nii. 8 Sayulə dàń lwàń, ʋ zʋ gànàn duən, sə lɩ̀à dàn ká lwarɩ wá. Ʋ lɩ bara bələ, ʋ ma kwé ʋ tɩ̀àn, ʋ ja nan, ʋ vìí. Ba vəli ba yí kan tə sàń tɩtɩn nə. Sayulə swɩ̀n kan tə con, ʋ wʋ́: «Mà kapan, n pa nə! À wá bɩrɩ mʋ́ tɩgɩ, sə n bon ʋ nii, n pa nə.» 9 Kan tə le wá, ʋ wʋ́: «N yə̀ə́ kʋ tə Sayulə nə tʋn! N yə̀ə́ də, ʋ lɩ vʋra tə, də yinara tə lʋʋ nii tə wa! Bɛ̀ɛ̀ nə pɩn, n ma pɩ̀à, n kə nə yoo wa, n pa ba gʋ nə?» 10 Yá Sayulə dùə̀ də Ba-Yígúrə́-Jə-Tiu, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! Yolwan mama bá yí mʋ́, yoo kʋ tə wa.» 11 Kan tə bwe, ʋ wʋ́: «Wàà nii nə, n pɩ̀à, sə à bon?» Ʋ le, ʋ wʋ́: «Bon Samiyɛlə nii, n pa nə!» 12 Yá kan tə nə nɩ Samiyɛlə, ʋ mà bubwiə tantan, ʋ ga swɩ̀n Sayulə con, ʋ wʋ́: «Bɛ̀ɛ̀ nə pɩn, n ma dwá nə? N mʋ́ nə yɩ Sayulə!» 13 Pɩ̀ʋ́ Sayulə le wá, ʋ wʋ́: «Dàn ká pa fən ja mʋ́! Bɛ̀ɛ̀ nə, n na?» Kan tə le Sayulə, ʋ wʋ́: «À na ciru*, kʋ naŋa tɩa. 14 Sayulə bwe, ʋ wʋ́: «kʋ nyən nətə?» Kan tə le, ʋ wʋ́: «Kʋ yɩ bazʋnʋ nə naŋa. Ʋ zʋa ganzwɩfarʋ.» Sayulə lwarɩ də kʋ yɩ Samiyɛlə. Yá ʋ dàń tʋa ʋ nadwana yuu, ʋ pú ʋ yáá tɩa, ʋ pa wá dun*. 15 Samiyɛlə bwe Sayulə, ʋ wʋ́: «Bɛ̀ɛ̀ nə pɩn, n ma wuwalɩ nə, n pa à pìí à nan?» Sayulə le, ʋ wʋ́: «À wulə pucʋnɩ nəfarʋ wa. Filisi tɩ̀án tə wulə nə ba tɛ, yá Yɩɩ viviri ʋ kwa, ʋ ma sà nə. Ʋ wà Yɩɩ nii sʋ̀sʋ̀nà tə, nə à yə̀ə́, pandwɩa nə twá, ʋ ma le nə. Kʋ mʋ̀ nə pɩn, à ma bon mʋ́, sə n bɩrɩ nə kʋ tə, à nə mɛ, sə à fwa.» 16 Samiyɛlə swɩ̀n, ʋ wʋ́: «Ba-Yígúrə́-Jə-Tiu viviri ʋ kwa, ʋ ma sà mʋ́, yá ʋ dàń jìgə̀ n dʋŋʋ. Bɛ̀ɛ̀ nə, n dàń boŋə n kəni à nə, sə à fwa? 17 Kʋ tə Ba-Yígúrə́-Jə-Tiu nə dí yáá, ʋ twá də nə, ʋ ma swɩ̀n n con tə nə, ʋ tʋn n yɩra, ʋ pa kʋ nii sú. Ba-Yígúrə́-Jə-Tiu van pàrɩ̀ tə, ʋ cɩrɩ, ʋ jon n jɩɩn wa, ʋ pa n jəndon nə, ʋ mʋ́ nə yɩ Davidə. 18 N wà Ba-Yígúrə́-Jə-Tiu nii zìlí. N wà ʋ lɩŋa fwi Amalɛkə yuu wa. Kʋ mʋ̀ nə pɩn, Ba-Yígúrə́-Jə-Tiu ma tʋŋa nətʋ n yɩra, zə̀n kʋ tə. 19 Yá kʋ tə nə súrí lá, Ba-Yígúrə́-Jə-Tiu wá ja n mʋ̀ də Yɩzərayɛlə lɩ̀à tə, ʋ kə Filisi tɩ̀án tə jɩɩn wa. Jwɩan nə, n mʋ̀ də n bɩ̀á tə wá bà à con, ciru nə. Yá Ba-Yígúrə́-Jə-Tiu wá ja Yɩzərayɛlə kwatara tə, ʋ kə Filisi tɩ̀án tə jɩɩn wa.» 20 Sayulə nə nì Samiyɛlə sʋ̀ràn təntə, fən zʋa wá, ʋ ga sori ʋ tʋ tɩa, ʋ tígə́ nədarʋ sələlələ. Kʋ tə nə súrí lá, dɩ̀àn yà tə̀lə́ ʋ yɩra, ʋ yà nə wà wodiu dí, kʋ yɩtʋrɩ tə mama, də kʋ tɩtɩn tə mama wa yɩrɩ. 21 Kan tə twi, ʋ yí ʋ yɩra, ʋ na də fən zʋa wá zənzən. Yá ʋ swɩ̀n Sayulə con, ʋ wʋ́: «Nə̀ń kʋ nə, n tʋtʋnbʋa tə cʋgʋ n sʋgʋ. À dʋgʋ à mɩɩ, à ga sɛ̀, à tʋn kʋ tə, n nə pɩn nə nii, sə à tʋn. 22 Sɩ́ʋ́n nə, n də dàń cʋgʋ n tʋtʋnbʋa tə sʋgʋ. Yá sə à pa mʋ́ wodiu mancɩn, sə n də́. Kʋ mʋ̀, n wá na dɩ̀àn, n ja pìí, n vìí.» 23 Yá Sayulə vɩga, ʋ ga swɩ̀n, ʋ wʋ́: «À bá də́.» Ʋ tʋ̀tʋ̀nà tə də kan tə san duən nə, ba kalɩ wá, yá ʋ sɛ̀ ba nii. Ʋ nyɩ́n ʋ zàn, ʋ jə̀ə́ gədo yuu. 24 Kan tə yà jə nabiə, ʋ nə kʋ̀nɩ̀, ka tún nʋga. Ʋ jɩn ka lala, ʋ gʋ, ʋ fwa mun, ʋ ywɛ́, ʋ ma fwa dipɛn, tə nə wà sabwarɩ ken. 25 Ʋ tì tə, ʋ tún Sayulə də ʋ tʋ̀tʋ̀nà tə yáá, ba də́. Kʋ kwa nə, ba dàń zàn, ba vìí, kʋ tɩtɩn tə mama.