Davidə vəli, ʋ səgə Filisi tɩ̀án con
27
1 Davidə bʋ́n ʋ waa con, ʋ wʋ́: «À nə wá ya yəbə, Sayulə wá gʋ nə, dɩɩn don nə. Yoo don mama tə̀lə́, à nə wàá à fwa, də kʋ nə tà, sə à dəri à va, à ya Filisi lʋʋ nii tə wa. À nə fwa nətʋ, Sayulə dàń wá yá à twarʋ nə, Yɩzərayɛlə lʋʋ nii tə wa. Yá à dàń wá wànɩ́, à jon à tɩ̀àn, ʋ jɩɩn wa.» 2 Davidə dàń zàn, ʋ ja ʋ lɩ̀à biəyarədʋ tə, ba yà nə wulə də wá, ʋ galɩ, ʋ va Mawokə bìú Akiswə con, ʋ nə yɩ Gatə pɩ̀ʋ́. 3 Davidə də ʋ lɩ̀à tə, də ba lìù mama dìə̀ lɩ̀à dàń vəli, ba wulə Gatə nə, Akiswə con. Davidə kana bələ tə yà wulə ʋ con. Ba mʋ̀ nə yɩ Ahinowamə, ʋ nə yɩ Zwizəreyɛlə tíú, də Abigayilə, ʋ yà nə yɩ Nabalə kan, Karəmɛlə nə. 4 Lɩ̀à twi ba swɩ̀n Sayulə con, də Davidə dəri ʋ va Gatə. Yá Sayulə dàń yá Davidə twarʋ nə.5 Dɩɩn don nə, Davidə swɩ̀n Akiswə con, ʋ wʋ́: «Də à nə nɩ yuywaŋʋ n yáá con, sə n pa nə bwálɩ́ tɩbiə tə don wa, sə à va à jə̀ń lá. Cɩ́gá, à yɩ n tʋtʋnʋ, yá kʋ wà mɛ, sə à twá, à ya patɩʋ tə wa, də mʋ́.» 6 Yá kʋ dɩɩn təntə tətə nə, Akiswə pɩn Sikəlagə Davidə nə. Mə kʋ zɩgɩ nətʋ, Zwida pɛ̀gá tə ma tɩnɩ Sikəlagə, kʋ bà kʋ yí zə̀n. 7 Davidə yɩn Filisi lʋʋ nii tə wa, ʋ fwa bɩnɩ, də cànɩ̀ banɩa.
8 Davidə də ʋ lɩ̀à tə yà vəli, ba tɛ Geswurə tɩ̀án, də Gezɛrə tɩ̀án, də Amalɛkə dwíí tə. Cɩ́gá, ba mʋ́ dwíə́ təntə nə dí yáá ba ya lʋʋ nii təntə wa, kʋ nə zɩgɩ Swurə, kʋ va kʋ yí Ezwipətə lʋʋ nii. 9 Davidə yà vəli, ʋ gwɩ lʋʋ nii təntə dwíə́ tə. Ʋ yàá gʋ ba bara də ba kana mama mɩ́ámɩ́án, lìù mama ba gɛ, ʋ ga ja ba vanmɩnɩ, də ba vanfaran, də ba bɩnɛ, də ba nyʋgʋma, ʋ pɛ̀ ba gànàn, ʋ ja pìí ʋ va Akiswə con. 10 Akiswə nə bwe, ʋ wʋ́: «Yə̀n nə, á zə̀n ta?» Davidə yàá le, ʋ wʋ́: «Nə zə̀n ta Zwida lʋʋ nii Negɛbə vàn con.» Nə à yə̀ə́, «nə ta Yerameyɛlə dwíí tə lʋʋ nii Negɛbə vàn con.» Nə à yə̀ə́, «nə ta yàrá dwíí tə lʋʋ nii Negɛbə vàn con.» 11 Davidə yà ba sɛ̀, ʋ pɩn ba janɩ bɛɛ, nə à yə̀ə́ kan, ʋ mɩɩ nə siŋə, ba ja twi Gatə. Ʋ yà swɩ̀n ʋ waa con də, dʋŋa tə wàá ba, ba lwɛ́ ba dʋga. Kʋ wàá də, ba wá swɩ̀n də, Davidə fwa nətən də nətən. Yá mə Davidə tʋtʋnɛɛ yɩn nətʋ, máŋá tə mama, ʋ nə yɩn Filisi lʋʋ nii tə wa. 12 Akiswə yà jə Davidə dɩ̀àn, ʋ ga swɩ̀n ʋ waa con, ʋ wʋ́: «Davidə pɩn, ʋ dwíí tɩ̀án Yɩzərayɛlə lɩ̀à tə waa nan wá. Yá ʋ dàń wá ya à tʋtʋnʋ, máŋá mama wuuu.»