Davidə kʋ́ʋ̀ nɩ cwəŋə, sə ʋ gʋ Sayulə, yá ʋ tə vɩga, sə ʋ gʋ wá
26
1 Zifə tɩ̀án vəli ba swɩ̀n Sayulə con, Gibeya nə, ba wʋ́: «Davidə səgə Akila paan tə yuu, ka nə wulə Yeswimon yáá con.» 2 Sayulə dàń zàn, ʋ lɩ Yɩzərayɛlə kwatara babara mʋ̀rʋ̀ batwa, ʋ ja va Zifə kasɔɔ lanworu tə wa, sə ʋ ma pɩ̀à Davidə. 3 Sayulə ken ʋ kwatara sàń Akila paan tə yuu wa, Yeswimon yáá con, cwəŋə tə nii nə. Yá Davidə ga wulə kasɔɔ lanworu tə wa. Ʋ nì də Sayulə dɩŋɩ ʋ kwa, ʋ bɩ̀àn kasɔɔ lanworu tə wa. 4 Ʋ dàń tʋn lɩ̀à, ʋ pa ba va, ba mɩ̀àn ba na, də Sayulə cɩ́gá twi. 5 Davidə dàń zàn, ʋ va ʋ yí bwálɩ́ tə, Sayulə nə ken ʋ kwatara sàń tə. Ʋ nɩ bwálɩ́ tə Sayulə nə pə̀ní, ʋ ga na bwálɩ́ tə, Nɛrə bìú Abənɛrə, ʋ nə yɩ Sayulə kwatara yuu tíú, də nə pə̀ní. Sayulə yà yɩ ʋ pə̀ní kwatara sàń tə titəŋi wa, kwatara tə dàń ga kɩkarɩ wá.6 Davidə swɩ̀n Ahimelɛkə con, ʋ nə yɩ Ititə, də Seruwiya bìú Abiswayi con, ʋ nə yɩ Zʋabə nubiu, ʋ wʋ́: «Wàà nə wá twá à nə, ʋ va Sayulə con, kwatara sàń tə wa? Yá Abiswayi le, ʋ wʋ́: «À mʋ̀ wá twá n nə, à va.» 7 Davidə də Abiswayi vəli Sayulə kwatara tə con, tɩtɩn nə. Sayulə yà tígə́ kwatara sàń tə titəŋi wa, ʋ dwɛ̀, ʋ ga cwɛn ʋ cwiin tɩa, ʋ yuu con. Abənɛrə də kwatara tə yà tígə́, ba kɩkarɩ wá. 8 Abiswayi ma swɩ̀n Davidə con, ʋ wʋ́: «Zə̀n kʋ tə, Yɩɩ ken n dʋŋʋ tə, n jɩɩn wa. N dàń pa nə cwəŋə, sə à zwa wá də à cwiin tə, à marɩ tɩa, naa nədʋ, kʋ tà nɛɛ bələ yoo!» 9 Yá Davidə swɩ̀n Abiswayi con, ʋ wʋ́: «Dàn ká gʋ wá! Cɩ́gá, wàà nə wàá pɩ̀ʋ́ tə, Ba-Yígúrə́-Jə-Tiu nə kúrí*, ʋ gwɩ, kʋ ga yanɩ tʋtʋ?» 10 Yá Davidə swɩ̀n, ʋ súrí lá, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! Ba-Yígúrə́-Jə-Tiu tətə nə wá gʋ wá. Kʋ wàá də, ʋ máŋá nə wá yí, ʋ tɩ, nə à yə̀ə́, kʋ̀ʋ̀ nə, ʋ wá va, ʋ tɩ lá. 11 Yɩɩ wá cɩ̀, sə à gʋ pɩ̀ʋ́ tə, Ba-Yígúrə́-Jə-Tiu nə kúrí! Tì ʋ cwiin tə mʋ̀ʋ́, kʋ nə wulə ʋ yuu con, də nɩ́á kúnkólú tə, sə nə ja vìí.» 12 Davidə dàń tì cwiin tə, də nɩ́á kúnkólú tə, tə yà nə wulə Sayulə yuu con, ba ja vìí. Lìù mama wà ba nɩ, lìù mama də ga wà lwarɩ, də ba twi lá. Cɩ́gá, ba mama yà dwɛ̀, yá lìù mama wà dwiən nə zàn. Cɩ́gá, Ba-Yígúrə́-Jə-Tiu yà pɩn dwiən nəfarʋ tì ba.
13 Kʋ kwa nə, Davidə cúə́, ʋ va ʋ dɩ̀ ʋ zɩga paan tə don yuu wa, yiŋʋnɩ. Laŋa yà wulə ʋ də Sayulə kwatara tə pwə́rə́ wa, zənzən. 14 Yá Davidə dàń bubwi, ʋ kə Sayulə kwatara tə nə, ʋ bon Nɛrə bìú Abənɛrə, ʋ wʋ́: «Abənɛrə, n ba le naaa?» Abənɛrə ma le, ʋ wʋ́: «N mʋ̀ nə yɩ wàà, n ma fwa zizigu pɩ̀ʋ́ tə yuu con nətən?» 15 Davidə ma swɩ̀n Abənɛrə con, ʋ wʋ́: «N tà bɛɛ naaa? Wàà nə yɩ n kamandon Yɩzərayɛlə wa? Bɛ̀ɛ̀ dàń nə pɩn, n ma wà pɩ̀ʋ́ tə nə cɩ̀, ʋ nə yɩ n yuu-tiu? Cɩ́gá, lɩ̀à tə wa lìù don yà twi, sə ʋ gʋ pɩ̀ʋ́ tə, ʋ nə yɩ n yuu-tiu. 16 N wà zəni fwa. Kʋ yɩ cɩ́gá, Ba-Yígúrə́-Jə-Tiu wulə! Á mɛ, sə ba gʋ aba, á nə wà á yuu-tiu tə nə cɩ̀ yɩrɩ. Ʋ mʋ̀ pɩ̀ʋ́ tə, Ba-Yígúrə́-Jə-Tiu nə kúrí. Sɩ́ʋ́n nə, n dàń ywàń n jə̀ń pɩ̀ʋ́ tə cwiin tə, də nɩ́á kúnkólú tə, tə yà nə wulə ʋ yuu con tə, wulə yə̀n nə?» 17 Sayulə lwarɩ Davidə kori, ʋ ga bwe, ʋ wʋ́: «À bìú Davidə, cɩ́gá mama, kʋ yɩ n mʋ̀ kori naaa?» Davidə le, ʋ wʋ́: «Awo! À yuu-tiu pɩ̀ʋ́, kʋ yɩ à mʋ̀ kori!» 18 Yá Davidə swɩ̀n, ʋ súrí lá, ʋ wʋ́: «À yuu-tiu, bɛ̀ɛ̀ nə pɩn, n ma wulə à mʋ̀ n tʋtʋnʋ tə kwa, n dɩŋɩ? Bɛ̀ɛ̀ nə à fwa? Bɛ̀ɛ̀ yolwan nə wulə à tʋtʋnɛɛ tə wa? 19 Sɩ́ʋ́n nə, à lòrì mʋ́, à yuu-tiu, pɩ̀ʋ́, sə n cʋgʋ à mʋ̀, n tʋtʋnʋ tə sʋgʋ. Də kʋ nə yɩ Ba-Yígúrə́-Jə-Tiu nə sugə mʋ́, ʋ kəni à nə, sə ʋ sɛ̀, ʋ jon zìlə́ won. Yá kʋ dàń nə yɩ ləzoni, sə Ba-Yígúrə́-Jə-Tiu yàlà ba, ʋ yáá con, ba nə dɩŋɩ nə, ba lɩ zə̀n kʋ tə, ba ga yá à tori tə, Ba-Yígúrə́-Jə-Tiu nə tanɩ, sə ʋ pa nə, tə yɩrɩ. Kʋ nətʋ tə yɩ ndə, ba nə wʋ́, à vəli, à tʋn à pa yɩa duən nə! 20 Ooo! À lòrì Yɩɩ, sə à jana dàn ká lwa tɩa, bwálɩ́ don nə, də kʋ nə tà Ba-Yígúrə́-Jə-Tiu yáá con! Cɩ́gá, Yɩzərayɛlə pɩ̀ʋ́ tə nan, sə ʋ ta kʋ̀ʋ̀ də à mʋ̀ kəseli ka tə nyandon! Kʋ yɩ ndə, ba nə dɩŋɩ lúə́ pɛɛn wa!» 21 Sayulə swɩ̀n, ʋ wʋ́: «À tʋn lwanɩ! Pìí n bà, à bìú Davidə. À kʋ́ʋ̀ bá fwa yolwan n yɩra, n nə bɩrɩ nə, zə̀n kʋ tə, də à mɩɩ tə jə funə, kʋ pa mʋ́ yɩrɩ. À tʋn nyɩnyan yoo, kʋ pa à dwá zənzən.» 22 Davidə le, ʋ wʋ́: «Nə̀ń pɩ̀ʋ́ tə cwiin tə nə. Pa balandʋrʋ tə don bà ʋ tì kʋ. 23 Ba-Yígúrə́-Jə-Tiu wá ŋwɩ́n lìù mama jɩŋɩ, kʋ mɛ, ʋ nə tʋŋa cɩ́gá, ʋ ga sɛ̀ nii zəni nətʋ. Cɩ́gá, Ba-Yígúrə́-Jə-Tiu yà ken mʋ́ à jɩɩn wa, zə̀n kʋ tə. Yá à wà sɛ̀, sə à gʋ mʋ́, n nə yɩ pɩ̀ʋ́ tə, Ba-Yígúrə́-Jə-Tiu nə kúrí tə yɩrɩ. 24 Yá zə̀n kʋ tə, ndə n mɩɩ tə yoo nə cà zənzən, kʋ pa nə nətʋ, mə à də mɩɩ tə yoo cà zənzən, kʋ pa Ba-Yígúrə́-Jə-Tiu nə nətʋ. Yá kʋ mʋ̀ yɩrɩ, ʋ wá jon nə, wʋwalʋ yiri mama wa.» 25 Sayulə swɩ̀n Davidə con, ʋ wʋ́: «Yɩɩ wá fwa zəni n yɩra, à bìú Davidə! N wá tʋn yìə̀n zənzən, yá n wá də́ dɩ̀àn!» Kʋ kwa nə, Davidə tì ʋ cwəŋə, ʋ vìí, yá Sayulə də ga pìí, ʋ va ʋ sàń.