Nabalə vɩga sə ʋ san Davidə nə
25
1 Samiyɛlə tɩga, yá Yɩzərayɛlə lɩ̀à tə mama dàń kun duən nə, ba kwi ʋ lúə́. Ba gùrì wá ʋ sàń nə, Rama nə. Kʋ kwa nə, Davidə zàn ʋ va Paran kasɔɔ lanworu tə wa. 2 Bɛɛ don yà wulə Mawon nə, ʋ nə jə tʋ̀tʋ̀nán Karəmɛlə nə. Bɛɛ təntə yà yɩ jɩjə nəfarʋ tíú. Ʋ yà jə pee mʋ̀rʋ̀ batwa, də bʋ̀nɩ̀ mʋ̀rʋ̀. Yá ʋ dàń yà wulə Karəmɛlə nə, ʋ fɩnɩ ʋ pee bɔɔ. 3 Bɛɛ təntə yɩrɩ nə yɩ Nabalə. Ʋ kan yɩrɩ nə yɩ Abigayilə. Kan tə yà yɩ wʋbʋŋa tíú, ʋ ga yɩ kabwaŋʋ. Yá bɛɛ tə mʋ́ yoo yà cà, ʋ ga yɩ wʋlwanyiən. Ʋ yà yɩ Kalɛbə dwíí tə wa lìù.4 Davidə nì kasɔɔ lanworu tə wa, də Nabalə wulə ʋ fɩnɩ ʋ pee bɔɔ. 5 Davidə dàń ma tʋn ʋ kwa lɩ̀à fugə, Nabalə con, ʋ wʋ́: «Á vələ Nabalə con, Karəmɛlə nə, á swɩ̀n də à mʋ̀ nə wʋ́, á bɩ̀àn, á jʋn wá. Yá á dàń wá swɩ̀n ʋ con də, 6 Yɩɩ wá pa bɩnɩ kʋ tə ya zəni, kʋ pa wá! Ʋ wá ja yazurə, ʋ dìə̀ lɩ̀à wá ja yazurə, yá won tə mama, kʋ nə yɩ ʋ nyiən, wá ja yazurə! 7 Kʋ kwa nə, á wá swɩ̀n də, à nì də, ʋ wulə ʋ fɩnɩ ʋ pee bɔɔ. Yá máŋá tə mama, ʋ payɩra tə nə yɩn nə con, Karəmɛlə nə, nə wà yolwan ba yɩra tʋn, ba won də ga wà jɛ́n. 8 Ʋ wàá ʋ tʋ̀tʋ̀nà tə, ʋ bwe. Ba wá swɩ̀n də kʋ yɩ cɩ́gá. Yá à dàń lòrì wá, sə ʋ pa á mʋ̀, à kwa lɩ̀à tə na yuywaŋʋ, ʋ yáá con, nə nə twi ʋ con cànà dɩɩn nə yɩrɩ. À lòrì wá, sə ʋ pa kʋ tə, ʋ nə wàá ʋ nɩ, á mʋ̀, ʋ tʋ̀tʋ̀nà tə, də ʋ bìú Davidə nə.»
9 Davidə kwa lɩ̀à tə nə vəli, ba yí lá, ba tún Davidə sʋ̀ràn təntə mama nii Nabalə con, ba dàń ga zɩga, ba cʋga ʋ nə. 10 Yá Nabalə le Davidə ba, ʋ wʋ́: «Davidə nə yɩ wàà? Yá Yɩzayi bìú tə nə yɩ wàà? Zə̀n kʋ tə, ywə́ŋə́ dàá zənzən, ba nə naŋa ba yun tɩ̀án con, ba dəri ba jɛ́n. 11 À wàrɩ̀ à dipɛn tə, də à nɩ́á tə, də à nàŋʋ́ tə à nə tanɩ, sə à pa lɩ̀à tə nə, ba nə fɩnɩ à pee bɔɔ tə, à tì à pɩn lɩ̀à nə, à nə yəri ba yinaŋa.» 12 Davidə kwa lɩ̀à tə ma pìí, ba tì cwəŋə, ba bà, ba swɩ̀n Nabalə sʋ̀ràn təntə mama, ba bɩrɩ wá. 13 Yá Davidə dàń swɩ̀n ʋ kwa lɩ̀à tə con, ʋ wʋ́: «Á lìù mama tì ʋ kwatara sɩ̀ʋ́, ʋ vwa ʋ tàŋá voru nə!» Yá ba lìù mama vwə ʋ kwatara sɩ̀ʋ́, ʋ tàŋá voru nə. Davidə də vwə ʋ kwatara sɩ̀ʋ́ ʋ tàŋá voru nə. Yá lɩ̀à, ba nə yí ndə biənɩa nə, púə́ Davidə kwa, lɩ̀à biələ ga pìí, ba zɩga zɩla tə nii nə.
14 Nabalə tʋ̀tʋ̀nà tə wa lìù don twi, ʋ swɩ̀n Nabalə kan Abigayilə con, ʋ wʋ́: «Nə̀ń, Davidə zɩgɩ kasɔɔ lanworu tə wa, ʋ tʋn lɩ̀à, sə ba jʋn nə yuu tíú tə, yá nə yuu tíú tə za ba nicɔɔ. 15 Yá máŋá tə wa, nə nə yɩn gaʋ tə wa, nə də lɩ̀à təntə nə jəri duən, ba yàá tʋn zəni nə yɩra zənzən. Ba wà yolwan nə yɩra tʋn, nə won mama də ga wà jɛ́n. 16 Máŋá tə mama nə nə yɩn ba con, nə cɩ̀ vàná tə nə, ba yɩn ndə bírə́ nə, ba cɩ̀ nə nə, tɩtɩn də yɩcaʋ. 17 Sɩ́ʋ́n nə, n dàń bʋ́n kʋ yuu wa zəni, sə n na kʋ tə n nə mɛ, sə n fwa. Cɩ́gá, ba ken sírí, sə ba gʋ nə yuu tíú tə, də ʋ dìə̀ lɩ̀à tə mama. Nə yuu tíú tə mʋ̀ yɩ wʋlwanyiən. Lìù wàrɩ̀ yoo ʋ con, n swɩ̀n, n pɩn ʋ nì kʋ də̀ń!»
18 Abigayilə zàn lala ʋ tì dipɛn biələ, də divɛn púrə́ bələ, də pee bonu ba nə sàn, də wobɩa ba nə kwàrɩ̀, zʋbərə bonu, də divɛn tɩ̀án bɩ̀á, ba nə cili, ba kə duən nə, tə kʋ̀, kúkúlə́ bíí, də kapɩra, ba nə cili, ba kə duən nə, tə kʋ̀, kúkúlə́ biələ. 19 Ʋ tì tə, ʋ ma zɩn bɩnɛ, ʋ ga swɩ̀n ʋ tʋ̀tʋ̀nà tə con, ʋ wʋ́: «Á yana à yáá! À tətə wulə á kwa!» Yá Abigayilə wà yoo mama ʋ barɩ Nabalə con swɩ̀n. 20 Abigayilə dàń dɩ̀gà bɩna yuu, ʋ naŋa paan tə yáá don wa, ʋ cwí, də nə̀ń Davidə də ʋ lɩ̀à tə nə, yáá con, ba də ma bɩ̀àn. Abigayilə də ba dàń zə́n ba jəri duən. 21 Davidə yà swɩ̀n ʋ waa con, ʋ wʋ́: «À cɩ̀gà bɛɛ wà tə wiən tə mama nə, kasɔɔ lanworu tə wa, kʋ pa ʋ won mama wà jɛ́n. Yá kʋ nətʋ tə ba də̀ń jə. Nə̀ń kʋ nə, ʋ ja lwanɩ, ʋ ma ŋwɩ́n zəni tə, à nə tʋn ʋ yɩra. 22 Kʋ nə yí jɩjʋ, də Nabalə dìə̀ bɛɛ nədʋ tətə mɩɩ tə siŋə, sə Yɩɩ cʋ̀gʋ̀ nə!»
23 Máŋá tə Abigayilə nə nɩ Davidə, ʋ nan bɩna tə yuu, ʋ cú lala. Ʋ tʋa ʋ nadwana yuu, ʋ pú ʋ yáá tɩa, Davidə yáá con, ʋ pa wá dun*. 24 Kʋ kwa nə, ʋ tʋa Davidə nɛɛ nə, ʋ ga swɩ̀n ʋ con, ʋ wʋ́: «Kʋ yɩ à mʋ̀ nə ga n nə, à yuu-tiu! À lòrì, sə n pa cwəŋə à mʋ̀, n tʋtʋnʋ tə nə, sə à swɩ̀n yoo, n con. Cʋgʋ sʋ̀ràn tə, n tʋtʋnʋ tə nə pɩ̀à, sə ʋ swɩ̀n n con. 25 À yuu-tiu, dàn ká tan Nabalə con. Ʋ yɩ wʋlwanyiən. Ʋ cɩ́gá mɛ də ʋ yɩrɩ tə. Ʋ yɩrɩ tə də̀ń nə yɩ nyɩnyaŋʋ. Yá ʋ cɩ́gá yɩ nyɩnyaŋʋ. Yá à mʋ̀, n tʋtʋnʋ tə wà lɩ̀à tə nɩ, à yuu-tiu tə nə tʋn nə con. 26 Sɩ́ʋ́n nə, à yuu-tiu, kʋ yɩ cɩ́gá, Ba-Yígúrə́-Jə-Tiu wulə, n də ga wulə! Kʋ yɩ Ba-Yígúrə́-Jə-Tiu nə cɩ̀gà n nə, sə n dàn ká lɩ lìù mɩɩ, n ma pa cɩ́gá n tɩ̀àn nə. Yɩɩ wá pa n dʋŋa tə, də lɩ̀à tə, ba nə pɩ̀à, sə ba tʋn lwanɩ n mʋ̀ à yuu-tiu tə yɩra, ya ndə Nabalə nə. 27 Sɩ́ʋ́n nə, à yuu-tiu, à dàń lòrì mʋ̀, sə n jon à zìlə́ wiən tə, à nə ja bà, sə à pa mʋ́, n tara n pa lɩ̀à tə nə, ba nə wulə n kwa. 28 À kəni yìə́n lá n nə, à cʋna tə yɩrɩ. Cɩ́gá, Ba-Yígúrə́-Jə-Tiu wá pa à yuu-tiu dìə̀ tə ja dɩ̀àn, à yuu-tiu nə tɛ Ba-Yígúrə́-Jə-Tiu kʋ̀ʋ̀ tə yɩrɩ. Yá Yɩɩ wá cɩ̀, sə lìù na yolwan n yɩra, mɩ́ámɩ́án, máŋá tə mama, n nə wá ya lʋʋ wa! 29 Də lìù nə zàn, ʋ zɩga n mʋ̀ à yuu-tiu tə nə, ʋ dʋŋa mʋ́, sə ʋ lɩ n mɩɩ, Ba-Yígúrə́-Jə-Tiu tə, ʋ nə yɩ n Yɩɩ, wá pú n yuu nə. Yá n dʋŋa tə mʋ̀, ʋ wá dɩlɩ ba yiŋʋnɩ, ndə kapadɩla nə, ʋ ma dɩlɩ. 30 Máŋá don wa, Ba-Yígúrə́-Jə-Tiu wá fwa zəni tə mama, ʋ nə kàn nii, də ʋ wá tʋn, ʋ pa mʋ́, ʋ pa kʋ nii sú. Yá ʋ wá tún mʋ́, sə n ya Yɩzərayɛlə lɩ̀à tə yáá tíú. 31 Yá kʋ máŋá tə wa, kʋ wà mɛ, sə n mʋ̀ à yuu-tiu tə pùə́ cʋ̀gʋ̀, n nə wá bʋ́n də n lɩ lɩ̀à mɩa tʋtʋ, sə n ma pa cɩ́gá n tɩ̀àn nə yɩrɩ. Yá máŋá tə, Ba-Yígúrə́-Jə-Tiu nə fwa zəni tə n yɩra, sə n lìí à mʋ̀, n tʋtʋnʋ tə yoo.»
32 Davidə swɩ̀n Abigayilə con, ʋ wʋ́: «À bwɩ Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ! Ʋ mʋ̀ nə tʋn mʋ́, zə̀n kʋ tə, sə n jəri nə. 33 Yɩɩ wá fwa zəni n yɩra, n pubʋnzəŋu tə yɩrɩ. Yɩɩ tə ga wá fwa zəni n yɩra, n nə cɩ̀gà à nə, zə̀n kʋ tə, sə à dàn ká lɩ lìù mɩɩ, à ma pa cɩ́gá à tɩ̀àn nə tə yɩrɩ. 34 Yá kʋ yɩ cɩ́gá, Ba-Yígúrə́-Jə-Tiu tə, ʋ nə yɩ Yɩzərayɛlə lɩ̀à Yɩɩ wulə! Ʋ mʋ̀ nə cɩ̀gà à nə, sə à dàn ká tʋn lwanɩ, n yɩra. N yà nə wà twi, n jəri nə lala, tɩa yà bɩ̀àn sə ka pʋrɩ, də bɛɛ nədʋ tətə yà wà gɛ Nabalə dìə̀ tə wa.» 35 Davidə jon wiən tə Abigayilə nə ja bà, sə ʋ pa wá, ʋ ga swɩ̀n ʋ con, ʋ wʋ́: «Pìí n va n sàń, də bɩcan sìə́. Nə̀ń, à nì n kori tə, à ga sɛ̀ n lòrí tə.»
36 Abigayilə dàń pìí, ʋ va Nabalə con. Ʋ twi də Nabalə wulə ʋ də́ cànà nəfarʋ, ndə pɩ̀ʋ́ cànà nə, ʋ dìə̀ wa. Nabalə yà sùə́ də pupwən, ʋ ga nyʋn sana, ʋ bʋbʋnɩ. Kʋ nətʋ tə pɩn, Abigayilə wà yoo mama ʋ con swɩ̀n, tɩa kori ka pʋrɩ. 37 Yá tɩa nə pʋrɩ, jɩjʋ nə, Nabalə sana tə nan ʋ yɩ́á wa, ʋ kan tə dàń ga man yoo tə nə tʋn, ʋ bɩrɩ wá. Sʋgʋ tə vuvugu Nabalə bɩcan, ʋ ŋʋnan mama ga tɩ. 38 Kʋ nə yí ndə dɩan fugə, kwa nə, Ba-Yígúrə́-Jə-Tiu mà Nabalə, yá ʋ tɩga.
Nabalə tɩan kwa nə, Davidə tì Abigayilə, ʋ ma fwa ʋ kan
39 Davidə nə nì də Nabalə tɩga, ʋ swɩ̀n, ʋ wʋ́: «À bwɩ Ba-Yígúrə́-Jə-Tiu nə, ʋ nə bʋ̀rɩ̀ ʋ pa nə, cavɩra tə yɩrɩ, Nabalə nə ken à nə. Ʋ cɩ̀gà à mʋ̀, ʋ tʋtʋnʋ tə nə, sə à dàn ká tʋn lwanɩ. Ba-Yígúrə́-Jə-Tiu pɩn Nabalə wʋlʋŋʋ tə pìí kʋ nyʋn ʋ tətə yuu wa.» Davidə tʋn lɩ̀à, ʋ pa ba swɩ̀n Abigayilə con, də ʋ swə, sə ʋ tì wá, ʋ ma fwa ʋ kan. 40 Davidə tʋntʋna tə vəli ba yí Abigayilə Karəmɛlə nə. Ba swɩ̀n ʋ con, ba wʋ́: «Davidə nə tʋn nəba n con. Ʋ wʋ́ nə bɩ̀àn nə tì mʋ́, nə ja bà, sə ʋ ma fwa ʋ kan.» 41 Abigayilə dàń zàn, ʋ tʋ ʋ nadwana yuu, ʋ pú ʋ yáá tɩa, ʋ ga swɩ̀n, ʋ wʋ́: «À mʋ̀ ʋ tʋtʋnʋ tə sɛ̀, sə à jì à yuu-tiu tə yoŋu, à sɩ̀n ʋ tʋ̀tʋ̀nà tə nɛɛ.» 42 Yá Abigayilə dàń zàn lala, ʋ dɩ bɩna yuu, ʋ tʋtʋnbwɩ bonu nan ba kwé wá, ʋ twá Davidə tʋntʋna tə nə, ʋ vìí. Yá ʋ dàń vəli ʋ jì Davidə kan.