Davidə vɩga, sə ʋ gʋ Sayulə
24
1 Davidə dàń nan kʋ bwálɩ́ tə wa, ʋ va ʋ wulə Eyin-Gedi pɩ̀ràn tə kwə̀lə́ wa. 2 Máŋá tə Sayulə nə vəli ʋ ta Filisi tɩ̀án tə, ʋ pìí ʋ bà, ba swɩ̀n ʋ con də, Davidə wulə Eyin-Gedi kasɔɔ lanworu tə wa. 3 Yá Sayulə dàń lɩ kwatara babɩran mʋ̀rʋ̀ batwa, Yɩzərayɛlə kwatara tə mama wa, ʋ ja va, sə ʋ ma twarɩ Davidə də ʋ lɩ̀à tə, Gaʋ Bʋtɩlan Pɩ̀ràn tə van con. 4 Ʋ vəli ʋ yí petun, tə nə wulə cwəŋə tə nii nə. Paan bʋʋ yà wulə kʋ bwálɩ́ təntə wa. Yá Sayulə dàń zʋa kʋ wa, sə ʋ jə̀ń kəduə yuu. Yá Davidə də ʋ lɩ̀à tə yà dí yáá, ba zʋ ba jə̀ə́ paan bʋʋ tə də̀ń də̀ń con. 5 Davidə lɩ̀à tə sʋsʋnɩ ʋ zɩɩn wa, ba wʋ́: «Zə̀n kʋ tə nə yɩ dɩɩn tə, Ba-Yígúrə́-Jə-Tiu nə swɩ̀n kʋ yoo n con, də ʋ wá kə n dʋŋʋ tə, n jɩɩn wa. Yá n dàń wá ja wá, n tʋn kʋ tə, n nə swə.» Davidə dàń zàn sənbwen, ʋ va ʋ goŋə Sayulə gànʋ̀ tə nii, ʋ fʋ. 6 Yá kʋ kwa nə, Davidə nɩ də, ʋ bɩcan mà gùlú, ʋ nə goŋi Sayulə gànʋ̀ tə nii yɩrɩ. 7 Yá ʋ dàń swɩ̀n ʋ lɩ̀à tə con, ʋ wʋ́: «Yɩɩ wá cɩ̀, sə à gʋ à yuu-tiu tə, ʋ mʋ̀ pɩ̀ʋ́ tə, Ba-Yígúrə́-Jə-Tiu nə kúrí*! Cɩ́gá, Ba-Yígúrə́-Jə-Tiu nə kúrí wá, sə ʋ ya pɩ̀ʋ́.» 8 Sʋ̀ràn təntə nə nə, Davidə twá, ʋ ma cɩ̀ ʋ lɩ̀à tə nə, ba wà Sayulə gwɩ. Yá Sayulə dàń zàn paan bʋʋ tə wa, ʋ nan, ʋ tì ʋ cwəŋə, ʋ vìí. 9 Kʋ kwa nə, Davidə də zàn paan bʋʋ tə wa, ʋ nan, ʋ ga bon ʋ kə Sayulə kwa, ʋ wʋ́: «À nyɩna pɩ̀ʋ́, à yuu-tiu!» Sayulə ma viviri, ʋ ywàń ʋ kwa. Yá Davidə dàń tʋa ʋ nadwana yuu, ʋ pú ʋ yáá tɩa, ʋ pa wá dun*. 10 Davidə bwe Sayulə, ʋ wʋ́: «Bɛ̀ɛ̀ nə pɩn, n ma cʋga sʋ̀ràn tə, lɩ̀à nə swɩ̀n n con, də à mʋ̀ Davidə pɩ̀à n lwanɩ? 11 Zə̀n kʋ tə, n tətə na də n yɩ́á, də Ba-Yígúrə́-Jə-Tiu yà ken mʋ́, à jɩɩn wa, paan bʋʋ tə wa. À lɩ̀à tə duən yà wʋ́, à gʋ mʋ́, yá à dəri n yinəgə. À wà sɛ̀, sə à gʋ mʋ́, n nə yɩ à yuu-tiu, n ga yɩ pɩ̀ʋ́ tə, Ba-Yígúrə́-Jə-Tiu nə kúrí tə yɩrɩ. 12 À nyɩna pɩ̀ʋ́, ywàń. Ywàń n gànʋ̀ tə nii nə, à jɩɩn wa. À wànɩ́ à goŋə n gànʋ̀ tə nii, yá à wà mʋ́ gwɩ. N dàń mɛ, sə n twá kʋ nətʋ nə, n ma lwarɩ də, à ba wʋlʋŋʋ n yɩra tʋŋa, à ma ba n nə zɩga. À wà lwanɩ tʋn, à zɩgɩ n nə. Yá n mʋ̀ yɩ n púə́ à kwa, n dɩŋɩ nə, sə n lɩ à mɩɩ! 13 Ba-Yígúrə́-Jə-Tiu nə wá ya à də mʋ́ pwə́rə́ wá, ʋ bʋ̀rɩ̀ nə bʋra! Ba-Yígúrə́-Jə-Tiu nə wá fwi ʋ lɩŋa, n yuu wa, à yɩrɩ! Yá à mʋ̀ jɩɩn dàń nə bá zɩgɩ n nə. 14 Ndə zwansɩsara nədwan tə nə swɩ̀n, kʋ wʋ́: “Wʋlʋŋʋ yɩ kʋ naŋa wʋlʋnyɩna con.” Yá à mʋ̀ dàń nə bá zɩ̀n à jɩɩn, à zɩgɩ n nə. 15 Wàà yɩrɩ nə Yɩzərayɛlə pɩ̀ʋ́ tə vəli kʋ̀ʋ̀? Wàà kwa nə ʋ púə́, ʋ dɩŋɩ? Kʋ yɩ à mʋ̀ yɩrɩ nə! À mʋ̀ kukurətɩgʋ kʋ tə nyandon! À mʋ̀ kəseli ka tə nyandon! 16 Ba-Yígúrə́-Jə-Tiu nə wá ya à də mʋ́ pwə́rə́ wa, ʋ bʋ̀rɩ̀ nə bʋra, ʋ ga bɩrɩ lìù tə, ʋ nə yɩ cɩ́gá tíú. Ʋ mʋ̀ nə wá ywàń yoo tə nə yɩ nətʋ, ʋ ga wá bʋ̀rɩ̀, ʋ pa nə cɩ́gá. Ʋ mʋ̀ nə wá ta, ʋ jon nə, n jɩɩn wa.17 Máŋá tə Davidə nə swɩ̀n sʋ̀ràn təntə Sayulə con, ʋ zwɛ̀, Sayulə bwe, ʋ wʋ́: «À bìú Davidə, cɩ́gá mama, kʋ tə yɩ n mʋ̀ kori nə, à nə̀ń nətən?» Yá Sayulə dàń lwə kori, ʋ wulə ʋ kwi. 18 Kʋ kwa nə, ʋ swɩ̀n Davidə con, ʋ wʋ́: N yɩ cɩ́gá tíú, n doni nə. Cɩ́gá, n fwa zəni à yɩra, yá à ga ja lwanɩ, à ma ŋwɩ́n mʋ́. 19 Zə̀n kʋ tə, n bɩrɩ nə bɩcabwanʋ tə, n nə ma tʋŋa, n pɩn nə. Ba-Yígúrə́-Jə-Tiu yà ken nə, n jɩɩn wa, yá n wà sɛ̀, sə n gʋ nə. 20 Wàà nə yàá na ʋ dʋŋʋ, ʋ ga yá wá, ʋ pa ʋ vìí də yazurə? Ba-Yígúrə́-Jə-Tiu wá ŋwɩ́n mʋ́, kʋ tə yɩrɩ, n nə fwa, n pa nə, zə̀n kʋ tə! 21 Sɩ́ʋ́n nə, à yə̀ə́ də kʋ ba tʋ́tʋ̀ná jə, n cɩ́gá wá də́ pàrɩ̀, yá Yɩzərayɛlə lɩ̀à payuu tə wá ya n jɩɩn wa. 22 Sɩ́ʋ́n nə, n dàń dù də Ba-Yígúrə́-Jə-Tiu yɩrɩ tə, də à tɩan kwa nə, n bá gʋ à dwíí tə, à nə ken lʋʋ wa, yá n bá pa à yɩrɩ jɛ́n, à nyɩna dìə̀ tə wa.» 23 Davidə dùə̀ də ʋ wá tʋn ndə nətʋ nə, Sayulə nə swɩ̀n. Kʋ kwa nə, Sayulə pìí ʋ va ʋ sàń, Davidə də ʋ lɩ̀à tə də ga pìí ba va ba yisəgə bwálɩ́ tə nə.