1 Samiyɛlə 23

Davidə ta Keyila tɩ̀án, ʋ jon Filisi tɩ̀án jɩɩn wa

1 Dɩɩn don nə, ba twi ba swɩ̀n Davidə con, də Filisi tɩ̀án tə wulə ba tɛ Keyila tɩ̀án, ba ga pɛ̀ ba wodirən, ba twɛ wa. 2 Davidə ma bon ʋ kə Ba-Yígúrə́-Jə-Tiu nə, ʋ wʋ́: «Kʋ mɛ, sə à va, à ta Filisi tɩ̀án tə naaa?» Ba-Yígúrə́-Jə-Tiu le Davidə, ʋ wʋ́: «Vəli! N wá ta Filisi tɩ̀án, n də́, n ga jon Keyila tɩ̀án tə.» 3 Yá Davidə lɩ̀à tə swɩ̀n ʋ con, ba wʋ́: «Nə̀ń fən nə, tə jə nəba, Zwida lʋʋ nii tə də tətə wa yəbə. Kʋ dàń wá kwɛn, kʋ ya nətə, də nə nə vəli Keyila, nə ta Filisi tɩ̀án kwatara tə?» 4 Davidə ma kʋ́ʋ̀ bon ʋ kə Ba-Yígúrə́-Jə-Tiu nə. Yá Ba-Yígúrə́-Jə-Tiu le wá, ʋ wʋ́: «Zàn n va Keyila. Cɩ́gá, à ken Filisi tɩ̀án tə, n jɩɩn wa.» 5 Davidə də ʋ lɩ̀à tə dàń vəli Keyila. Ʋ ta Filisi tɩ̀án tə, ʋ jon ba vàná, ʋ ga pa ba kwɩ̀n mɩ́ámɩ́án. Mə kʋ twá nətʋ, Davidə ma jon Keyila tɩ̀án. 6 Máŋá tə, Ahimelɛkə bìú Abɩyatarə yà nə dəri, ʋ va Davidə con, Keyila nə, ʋ yà tì Yɩɩ joŋwana pwárʋ́ wiən* tə, ʋ kə lá, ʋ va.

7 Lɩ̀à twi ba swìn Sayulə con, də Davidə twi Keyila. Sayulə dàń swɩ̀n, ʋ wʋ́: «Yɩɩ ken wá, à jɩɩn wa. Cɩ́gá, ʋ twi ʋ sun ʋ tɩ̀àn nii nə, tɩʋ wa, kʋ nə jə mimien də bòrə̀n.» 8 Sayulə dàń ken kwatara tə mama duən yáá, sə ba va, ba pú Davidə də ʋ lɩ̀à tə, ba kə, Keyila nə. 9 Davidə lwarɩ də, Sayulə wulə ʋ kəni sírí, sə ʋ tʋn yolwan ʋ yɩra. Yá ʋ dàń swɩ̀n Yɩɩ joŋwanʋ Abɩyatarə con, ʋ wʋ́: «Ja Yɩɩ joŋwana pwárʋ́ wiən tə, n bà, sə à ma bon, à kə Ba-Yígúrə́-Jə-Tiu nə!» 10 Davidə dàń swɩ̀n, ʋ wʋ́: «Ba-Yígúrə́-Jə-Tiu, Yɩzərayɛlə lɩ̀à Yɩɩ, à mʋ̀, n tʋtʋnʋ tə nì, də Sayulə bɩ̀àn, sə ʋ cʋ̀gʋ̀ Keyila tɩʋ tə, à mʋ̀ yɩrɩ. 11 Keyila tɩʋ tə yáá tɩ̀án tə wá ja nə, ba kə ʋ jɩɩn wa naaa? Sayulə cɩ́gá wá bà, ndə à mʋ̀, n tʋtʋnʋ tə nə nì kʋ nətʋ naaa? Ba-Yígúrə́-Jə-Tiu, Yɩzərayɛlə lɩ̀à Yɩɩ, à lòrì mʋ́, sə n le n tʋtʋnʋ tə! Yá Ba-Yígúrə́-Jə-Tiu le, ʋ wʋ́: «Sayulə wá bà.» 12 Davidə kʋ́ʋ̀ swɩ̀n, ʋ wʋ́: «Keyila tɩʋ tə yáá tɩ̀án tə wá ja à də à lɩ̀à tə, ba kə Sayulə jɩɩn wa naaa?» Yá Ba-Yígúrə́-Jə-Tiu le, ʋ wʋ́: «Ba wá ja mʋ́, ba kə ʋ jɩɩn wa.» 13 Davidə də ʋ lɩ̀à tə, ba yà nə yí ndə lɩ̀à biəyardʋ nə, dàń nan Keyila, ba va bwálá duən. Lɩ̀à swɩ̀n Sayulə con, də Davidə nan Keyila nə, ʋ jɛ́n. Yá Sayulə dàń kwɛ̀ kʋ̀ʋ̀ tə, ʋ kʋ́ʋ̀ wà vəli.

Zonatan twi ʋ dàn Davidə jɩɩn

14 Davidə yɩn pɩ̀ràn kwə̀lə́ wa, kasɔɔ lanworu tə wa. Ʋ yɩn pɛɛn tə wa, tə nə wulə Zifə kasɔɔ lanworu tə wa. Kʋ máŋá təntə mama, Sayulə yà tə twá lá, ʋ pɩ̀à wá. Yá Yɩɩ dàń nə wà Davidə, Sayulə jɩɩn wa ken. 15 Davidə yà wulə Hɔrəswa nə, Zifə kasɔɔ lanworu tə wa. Yá ʋ dàń nì də Sayulə nan, ʋ twá lá, ʋ twarɩ wá, sə ʋ gʋ.

16 Yá dɩɩn don nə, Sayulə bìú Zonatan zàn, ʋ va Davidə con, Hɔrəswa nə. Ʋ dàn Davidə jɩɩn, ʋ ga bɩrɩ də, Yɩɩ wulə də wá. 17 Ʋ swɩ̀n Davidə con, ʋ wʋ́: «Dàn ká pa fən ja mʋ́. Cɩ́gá, à nyɩna Sayulə bá na mʋ́, ʋ ja, ʋ kə ʋ jɩɩn wa. N mʋ̀ nə wá də́ pàrɩ̀ Yɩzərayɛlə lɩ̀à yuu wa. Yá à mʋ̀ yɩ, à wá ya, n səpuni nə, à danɩ n nə. À nyɩna Sayulə də yə̀ə́ kʋ nətʋ tə. 18 Ba mɛ bələ dàń tún nimarʋ, Ba-Yígúrə́-Jə-Tiu yáá con. Davidə yɩn Hɔrəswa nə, yá Zonatan ga pìí ʋ va ʋ sàń.

Zifə tɩ̀án bɩrɩ Davidə bwálɩ́, Sayulə nə

19 Zifə tɩ̀án vəli, ba swɩ̀n Sayulə con, Gibeya nə, ba wʋ́: «Davidə səgə nə con, Hɔrəswa pɩ̀ràn tə kwə̀lə́ wa. Ʋ wulə Hakila paan tə yuu wa, ka nə wulə Yeswimon jɩgwiə saparʋ con. 20 Sɩ́ʋ́n nə, pɩ̀ʋ́, máŋá tə mama n dàń nə swə, sə n bà. Yá nə mʋ̀ dàń wá ja wá, nə kə n mʋ̀ pɩ̀ʋ́ jɩɩn wa.» 21 Sayulə swɩ̀n ba con, ʋ wʋ́: «Ba-Yígúrə́-Jə-Tiu wá fwa zəni, á yɩra. Cɩ́gá, á dəri à yinəgə! 22 À dàń nə lòrì aba, sə á pìí á va, á kwɛn á twarɩ ʋ nɛɛ zəni, á lwarɩ, à ga na bwálɩ́ tə, ʋ nə twá. Á bwiə à jə́n, wàà nə nɩ wá. Cígá, ba swɩ̀n à con, də ʋ jə swɩan zənzən. 23 Á twara bwálá tə mama, ʋ nə wanɩ ʋ səgə lá, á na, á ga lwarɩ tə zəni. Kʋ kwa nə, á dàń wá pìí á bà, á pa nə ŋwɛn, tə nə yɩ cɩ́gá. Yá à dàń wá twá á nə, à va. Də ʋ nə wulə lʋʋ nii tə wa, à wá twarɩ wá, Zwida dwíə́ tə mama wa, yá à wá ja wá.» 24 Zifə tɩ̀án tə dàń zàn, ba də́ Sayulə yáá, ba pìí ba va Zifə. Kʋ máŋá tə wa, də Davidə də ʋ lɩ̀à tə yà wulə Mawon kasɔɔ lanworu tə wa, Araba* tə wa, kʋ nə wulə Yeswimon jɩgwiə saparʋ con. 25 Sayulə də ʋ kwatara dàń zàn ba va, sə ba twarɩ Davidə. Lɩ̀à swɩ̀n kʋ, ba bɩrɩ Davidə. Yá ʋ dàń cúə́, ʋ va ʋ wulə pɩ̀ràn tə wa, Mawon kasɔɔ lanworu tə wa. Sayulə nə nì kʋ, ʋ púə́ Davidə kwa, ʋ dɩŋɩ, ʋ va Mawon kasɔɔ lanworu tə wa. 26 Sayulə yà wulə paan tə yáá don nə, ʋ vəli, yá Davidə də ʋ lɩ̀à tə də ga wulə yáá tə don nə, ba vəli. Davidə yà yɩ ʋ dəri lala, sə ʋ jɛ́n Sayulə yáá nə. Yá Sayulə də ʋ lɩ̀à tə yí lá ba zwɛ̀, ba sə kɩkarɩ Davidə də ʋ lɩ̀à tə, ba ja. 27 Kʋ máŋá tə wa, lìù twi ʋ swɩ̀n Sayulə con, ʋ wʋ́: «Kə dɩ̀àn, n bà lala. Cɩ́gá, Filisi tɩ̀án tə púə́ lʋʋ nii tə ba kə, ba tɛ.» 28 Sayulə dàń pìí ʋ yá Davidə dɩŋʋ nə, ʋ ga va, sə ʋ ta Filisi tɩ̀án tə. Kʋ mʋ̀ nə pɩn, ba boŋə kʋ bwálɩ́ təntə “pwɩa pɩ̀ʋ̀.”