Davidə jìgə̀ kwatara púlí don yáá tíú
22
1 Kʋ kwa nə, Davidə nan Gatə, ʋ va ʋ səgə paan bʋʋ wa, Adulamə nə. Ʋ nubɩa tə, də ʋ dìə̀ lɩ̀à tə mama nì kʋ, yá ba dàń vəli ʋ con. 2 Yá lɩ̀à tə mama, ba nə wulə yinəgə wa, də ba tə, jɩŋa nə wulə ba yuu wa, də ba tə, ba nə wulə pucʋnɩ wa, dàń twi ba kun duən nə, Davidə con, yá ʋ dàń jìgə̀ ba pɩ̀ʋ́. Lɩ̀à tə, ba nə wulə Davidə con, yà yí ndə bara biənɩa nə.3 Yá Davidə dàń nan Adulamə, ʋ va Misəpe, kʋ nə wulə Mʋabə lʋʋ nii tə wa. Ʋ swɩ̀n Mʋabə pɩ̀ʋ́ tə con, ʋ wʋ́: «À lòrì mʋ́, sə n yá, sə à nyɩna tə də à nuu tə twá ba jə̀ń á con, kʋ ja vələ máŋá tə, á nə wá lwarɩ kʋ tə, Yɩɩ nə wá fwa, ʋ pa nə.» 4 Davidə dàń yá ʋ nyɩna tə də ʋ nuu tə, Mʋabə pɩ̀ʋ́ tə con. Ba yɩn lá, máŋá tə mama, Davidə nə yàá vəli ʋ səgə, ʋ yisəgə bwálɩ́ tə wa.
5 Yá dɩɩn don nə, Yɩɩ nii sʋ̀sʋ̀nʋ̀ Gadə swɩ̀n Davidə con, ʋ wʋ́: «Dàn ká ya yisəgə bwálɩ́ kʋ tə wa. Nan lá, n va n ya Zwida lʋʋ nii tə wa.» Davidə dàń nan lá, ʋ va ʋ wulə Erɛtə pún tə wa.
Sayulə pɩn ba gʋ Nɔbə joŋwana tə
6 Sayulə nì də ba nɩ Davidə də ʋ kwa lɩ̀à tə. Kʋ máŋá tə wa, də Sayulə yà jə̀ə́ ʋ padaʋ yuu, sʋnʋ də̀ń, Gibeya nə, dədolu tə yuu. Ʋ yà jə ʋ cwiin ʋ jɩɩn wa, ʋ tʋ̀tʋ̀nà tə mama ga zɩga, ba kɩkarɩ wa. 7 Ʋ swɩ̀n ʋ tʋ̀tʋ̀nà tə con, ʋ wʋ́: «Á mʋ̀ Bɛnzwamɛn dwíí lɩ̀à tə, á cʋga! Yɩzayi bìú tə wàá kárɩ́, də divɛn tɩ̀án kárɩ́, ʋ pɩn á mama nə naaa? Ʋ wàá ʋ pɩn á mama jì lɩ̀à mʋ̀rʋ̀, də lɩ̀à bíí yun tɩ̀án naaa? 8 Kʋ mʋ̀ yɩrɩ nə, á mama vʋrɩ, á zɩgɩ à nə. Á yə̀ə́ də, à bìú tə tún nimarʋ də Yɩzayi bìú tə, á lìù mama ga wà kʋ à con swɩ̀n. À yoo ba á lìù mama jə, sə kʋ tíú swɩ̀n à con, də à bìú tə sugu à tʋtʋnbiu tə, ʋ kə, sə ʋ pùrì à nɛɛ nə. Yá nə̀ń kʋ nə, ʋ zə̀n wulə kʋ ʋ tʋŋa.» 9 Yá Dowɛgə, ʋ nə yɩ Edomə tíú, ʋ ga yɩ Sayulə tʋ̀tʋ̀nà tə yáá tíú, le Sayulə, ʋ wʋ́: «À dɩɩn nɩ Yɩzayi bìú tə, də ʋ twi Ahitubə bìú Ahimelɛkə con, Nɔbə nə. 10 Yá Ahimelɛkə bon ʋ kə Ba-Yígúrə́-Jə-Tiu nə, ʋ pa Davidə nə. Ahimelɛkə pɩn wodirən Davidə nə. Ʋ pɩn wá Filisi tɩ̀án bɛɛ, Goliyatə kwatara sɩ̀ʋ́ tə də.»
11 Pɩ̀ʋ́ tə dàń tʋn, ʋ pa ba bon Yɩɩ joŋwanʋ Ahimelɛkə, ʋ nə yɩ Ahitubə bìú, də ʋ dìə̀ lɩ̀à tə mama, ba nə yɩ Yɩɩ joŋwana Nɔbə nə, sə ba bà ʋ con. Ba mama twi pɩ̀ʋ́ tə con. 12 Yá Sayulə dàń swɩ̀n Ahimelɛkə con, ʋ wʋ́: «Cʋgʋ zəni, Ahitubə bìú!» Ʋ le, ʋ wʋ́: «À cʋga, à nyɩna pɩ̀ʋ́!» 13 Sayulə bwe wá, ʋ wʋ́: «Bɛ̀ɛ̀ nə pɩn, n də Yɩzayi bìú tə ma vʋrɩ, á zɩgɩ à nə? N pɩn wá dipɛn, də kwatara sɩ̀ʋ́, n ga bon n kə Ba-Yígúrə́-Jə-Tiu nə, n pa wá, sə ʋ ma wànɩ́ ʋ zàn, ʋ zɩgɩ à nə, ʋ pùrì à nɛɛ nə. Yá nə̀ń kʋ nə, ʋ zə̀n wulə kʋ ʋ tʋŋa.» 14 Ahimelɛkə le pɩ̀ʋ́ tə, ʋ wʋ́: «Pɩ̀ʋ́, wàà nə wulə n tʋ̀tʋ̀nà tə mama wa, ʋ nə sɛ̀ nii ndə Davidə nə? Ʋ yɩ n bʋ̀á barɩ, ʋ yɩ lɩ̀à tə ba nə cɩ̀ n nə, yáá tíú, ʋ ga jə dun n dìə̀ tə wa. 15 Kʋ tà dɩɩn təntə nə nə, à sinti, à boŋə à kəni Ba-Yígúrə́-Jə-Tiu nə, à pɩn Davidə nə. Pɩ̀ʋ́, dàn ká kə yoo tə, à mʋ̀, n tʋtʋnʋ tə, nə à yə̀ə́, à nyɩna dìə̀ lìù mama yuu wa. Cɩ́gá, à mʋ̀, n tʋtʋnʋ tə yəri yoo mancɩn də tətə, yoo kʋ tə wa.» 16 Yá pɩ̀ʋ́ tə swɩ̀n, ʋ wʋ́: «Ba wá gʋ n mʋ̀ Ahimelɛkə, də n nyɩna dìə̀ lɩ̀à tə mama.»
17 Yá pɩ̀ʋ́ tə dàń swɩ̀n ʋ kwatara tə con, ba nə zɩga, ba kɩkarɩ wá, ʋ wʋ́: «Á vələ á gʋ Ba-Yígúrə́-Jə-Tiu joŋwana tə. Cɩ́gá, ba də san Davidə nə. Ba yà yə̀ə́ də ʋ yɩ ʋ dəri, sə ʋ jɛ́n, yá ba wà à con swɩ̀n.» Yá pɩ̀ʋ́ tʋ̀tʋ̀nà tə vɩga sə, sə ba zɩn ba jɩɩn, ba ma gʋ Ba-Yígúrə́-Jə-Tiu joŋwana tə. 18 Pɩ̀ʋ́ tə dàń ma swɩ̀n Dowɛgə con, ʋ wʋ́: «Vəli n gʋ Yɩɩ joŋwana tə.» Yá Dowɛgə, ʋ nə yɩ Edomə tíú, dàń vəli ʋ gʋ Yɩɩ joŋwana tə. Kʋ dɩɩn tə nə, ʋ gʋa Yɩɩ joŋwana sapwɩnɩa də bonu, ba nə zwɩ Yɩɩ joŋwana culu ganbʋa. 19 Yá Nɔbə nə, kʋ mʋ̀ Yɩɩ joŋwana tɩʋ təntə, Sayulə pɩn ba ja kwatara sɩ̀ʋ́, ba ma gʋ bara tə, də kana tə, də bìsɩ́ná tə, də bìsɩ̀nɩ́ tə, də nɩan tə, də bɩnɛ tə, də pee tə.
Ahimelɛkə bìú Abɩyatarə dəri ʋ jɛ́n, Sayulə yáá nə
20 Yá Ahitubə bìú Ahimelɛkə bìú nədʋ cɩcɩ nə wànɩ́, ʋ dəri ʋ jɛ́n. Ʋ yɩrɩ nə yɩ Abɩyatarə. Ʋ dəri ʋ va Davidə con. 21 Abɩyatarə vəli ʋ swɩ̀n Davidə con, də Sayulə gʋa Ba-Yígúrə́-Jə-Tiu joŋwana tə. 22 Davidə ma swɩ̀n Abɩyatarə con, ʋ wʋ́: «Kʋ dɩɩn tə nə, à nɩ Dowɛgə, ʋ nə yɩ Edomə tíú, Nɔbə nə. À yà ga yə̀ə́ də, ʋ wá swɩ̀n kʋ Sayulə con. Kʋ yɩ à mʋ̀ yɩrɩ nə, ba gʋa n nyɩna dìə̀ lɩ̀à tə mama. 23 Zɩgɩ à con, dàn ká pa fən ja mʋ́. Cɩ́gá, lìù tə ʋ nə pɩ̀à, sə ʋ lɩ à mɩɩ tə, pɩ̀à, sə ʋ lɩ n də mɩɩ. Yá n nə wulə à con, à wá ywàń n yuu zəni.»