21
1 Kʋ kwa nə, Davidə dàń zàn ʋ vìí, Zonatan ga pìí ʋ va tɩʋ tə wa.Davidə Vəli Nɔbə
2 Davidə vəli Yɩɩ joŋwanʋ Ahimelɛkə con, Nɔbə nə. Yá Ahimelɛkə twi ʋ jəri Davidə, də ʋ vɩvaga, ʋ ga bwe wá, ʋ wʋ́: «Kʋ yɩ nətə n ma yɩ n cɩcɩ, lìù mama tə̀lə́ də mʋ́?» 3 Davidə le Yɩɩ joŋwanʋ Ahimelɛkə, ʋ wʋ́: «Pɩ̀ʋ́ nə tʋn nə, ʋ ga pa nə nii, də lìù mama wà mɛ, sə ʋ lwarɩ yoo tə yɩrɩ, ʋ nə tʋn nə. Yá kʋ nə yɩ kwa lɩ̀à tə mʋ̀, à bɩrɩ ba bwálɩ́ don, sə nə jəri duən lá. 4 Bɛ̀ɛ̀ wodiu nə wulə n con, sɩ́ʋ́n sɩ́ʋ́n nətən? Pa nə dipɛn bonu, nə à yə̀ə́, won tə, n nə wàá n nɩ.» 5 Yɩɩ joŋwanʋ tə le Davidə, ʋ wʋ́: «À ba dipɛn nəkaʋ jə. Dipɛn tə nə wulə, yɩ Yɩɩ nyiən*. À wàá tə mʋ́ à pɩn, də n kwa lɩ̀à tə nə cɩ̀gà ba tɩ̀àn nə, də kana ka pə̀ń.» 6 Davidə ma le Yɩɩ joŋwanʋ tə, ʋ wʋ́: «Cɩ́gá mama, máŋá mama, à nə naŋa, nə yàá cɩ̀ nə tɩ̀àn nə, də kana ka pə̀ń. Yá à kwa lɩ̀à tə kwatarɩ zɩla tə yàá yɩ Yɩɩ nyiən. Yá zə̀n kʋ tə naŋʋ tə yɩ kʋ cɩcɩ, kʋ mʋ̀ yɩrɩ, tə mɛ, sə tə ya Yɩɩ nyiən, tə doni.» 7 Yɩɩ joŋwanʋ tə dàń pɩn dipɛn tə, nə yɩ Yɩɩ nyiən tə, Davidə nə. Cɩ́gá, dipɛn don yà tə̀lə́ lá, də kʋ nə tà dipɛn tə, ba nə yàá túŋə́, ba pɩn Yɩɩ nə. Dɩɩn tə ba nə yàá tì dipɛn təntə, ba yàá lwàń ba tún dipɛn nədʋn, kʋ bwálɩ́ nə. 8 Yá kʋ dɩɩn tə tətə nə, Sayulə tʋ̀tʋ̀nà tə wa lìù don yà wulə, kʋ bwálɩ́ tə wa, Ba-Yígúrə́-Jə-Tiu yáá con. Bɛɛ təntə yà yɩ Edomə tíú, ʋ yɩrɩ nə yɩ Dowɛgə. Ʋ mʋ̀ yà nə yɩ Sayulə payɩra tə mama yáá tíú. 9 Davidə bwe Ahimelɛkə, ʋ wʋ́: «N ba cwiin, nə à yə̀ə́ kwatara sɩ̀ʋ́ jə, n con yəbə? Cɩ́gá, pɩ̀ʋ́ tə yoo tə yɩn bɩbarʋ, kʋ pa, à wà à kwatara sɩ̀ʋ́, nə à yə̀ə́, à kwatarɩ zɩlɩ mama tì.» 10 Yɩɩ joŋwanʋ tə ma le, ʋ wʋ́: «Nə̀ń Goliyatə, Filisi tɩ̀án bɛɛ tə, n nə gʋa Ela vara tə wa, kwatara sɩ̀ʋ́ tə nə. Kʋ pipini də gànʋ̀, kʋ tígə́ Yɩɩ joŋwana culu gànʋ̀* tə kwa con. N nə pɩ̀à kʋ, sə n tì. Kwatara sɩ̀ʋ́ don tə̀lə́ yəbə, də kʋ nə tà kʋ mʋ̀.» Yá Davidə dàń swɩ̀n, ʋ wʋ́: «Kwatara sɩ̀ʋ́ don tə̀lə́, kʋ zəni nə yí kʋ. Pa kʋ nə.»
Davidə dəri ʋ va Filisi tɩ̀án tə con, Gatə nə
11 Kʋ dɩɩn tə mama, Davidə nan lá, ʋ dəri, sə ʋ jɛ́n Sayulə yáá nə. Ʋ vəli Akiswə con, ʋ nə yɩ Gatə pɩ̀ʋ́. 12 Akiswə tʋ̀tʋ̀nà tə swɩ̀n ʋ con, ba wʋ́: «Pɩ̀ʋ́, kʋ tà Davidə wà tə, nə yɩ Yɩzərayɛlə lʋʋ nii tə pɩ̀ʋ́ tə naaa? Kʋ tà ʋ mʋ̀ nə, ba ja gwaran də sɩʋ, ba ma bʋ ʋ nə, ba wʋ́,
Sayulə gʋa dʋŋa mʋ̀rʋ̀,
yá Davidə ga gʋ dʋŋa mʋ̀rʋ̀ fugə tə naaa?»
13 Davidə lìí sʋ̀ràn təntə yoo, yá Gatə pɩ̀ʋ́ Akiswə fən dàń zʋa wá zənzən. 14 Ʋ dàń jɩn ʋ tɩ̀àn, ʋ ma fwa ndə ləbibənu nə, Filisi tɩ̀án tə yáá con, ʋ twá ba wa, ʋ fwa bibənyiən. Ʋ yà bɩ̀rɩ̀ wiən mimien tə bòrə̀n yɩra, ʋ ga yá ʋ mɩmɩpun, tə nan tə pàlɩ̀, ʋ twaŋa yuu wa. 15 Yá Akiswə dàń swɩ̀n ʋ tʋ̀tʋ̀nà tə con, ʋ wʋ́: «Á tətə na də bɛɛ wà tə yɩ nyɩnyaŋʋ. Bɛ̀ɛ̀ yɩrɩ nə, á ja wá, á bà à con? 16 Kʋ yɩ nyɩnyaŋa nə, à pɩ̀à à ga naaa? Sə kʋ yɩ bɛ̀ɛ̀ nə pɩn, á ma ja bɛɛ wà tə, á bà, á pa ʋ twá lá, ʋ fwa ʋ nyɩnyanyiən tə, à yáá con? Bɛɛ wà tə ba à mʋ̀ dìə̀ zwɩ.»