1 Samiyɛlə 20

Zonatan saŋa Davidə nə

1 Davidə nan Nayɔtə, Rama nii nə, ʋ dəri ʋ bà Zonatan con, ʋ bwe wá, ʋ wʋ́: «Bɛ̀ɛ̀ nə à fwa? Bɛ̀ɛ̀ nə à cʋ̀gʋ̀? Bɛ̀ɛ̀ yolwan nə à tʋn n nyɩna tə yɩra, ʋ ma pɩ̀à, sə ʋ lɩ à mɩɩ?» 2 Zonatan ma le wá, ʋ wʋ́: «Kʋ wàrɩ̀ mɩ́ámɩ́án! N ba tɩ. À nyɩna ba yofarʋ, nə à yə̀ə́ yobiə mama tʋŋa, də ʋ wà dí yáá, ʋ swɩ̀n kʋ à con. Bɛ̀ɛ̀ dàń nə wá pa, à nyɩna səgə yoo kʋ tə mʋ̀, à yáá nə! Kʋ wàrɩ̀ mɩ́ámɩ́án.» 3 Yá Davidə də dùə̀, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə, n də ma wulə! Nagalʋ nədʋ cɩcɩ nə wulə, à də tɩan pwə́rə́ wa.» N nyɩna tə yə̀ə́ də, n nə lwarɩ kʋ, kʋ wá wʋwalɩ mʋ́, ʋ nə yə̀ə́ də, à də mʋ́ yɩ dabara tə yɩrɩ. Kʋ mʋ̀ nə pɩn, ʋ ba pɩ̀à, sə n yəni kʋ.» 4 Zonatan ma swɩ̀n Davidə con, ʋ wʋ́: «À wá tʋn kʋ tə, n nə pɩ̀à, à pa mʋ́.» 5 Yá Davidə dàń swɩ̀n Zonatan con, ʋ wʋ́: «Nə̀ń kʋ nə, jwɩan yɩ candʋan. Yá à mɛ, sə à jə̀ń də pɩ̀ʋ́ tə, sə nə də́ wodiu. À dàń nə lòrì mʋ́, sə n pa nə cwəŋə, sə à va à səgə kasɔɔ con, kʋ ja vələ dɩan batwa dɩɩn tə didəni nə. 6 Kʋ wàá də, n nyɩna tə wá lwarɩ də à tə̀lə́. Ʋ nə bwe à yoo, n wá swɩ̀n də, à lòrì mʋ́ pwəpwə, sə n pa nə cwəŋə, sə à dəri lala, à va, à sàń Betəleyɛmə. À nyɩna dìə̀ tə mama nə jə bɩnɩ mama joŋi, ba pɩ̀à ba fwa yɩrɩ. 7 Yá ʋ nə swɩ̀n, ʋ wʋ́, “kʋ ziən”, kʋ jə bɩcan sìə́, kʋ pa à mʋ̀, n tʋtʋnʋ tə nə. Yá ʋ lɩŋa dàń nə nyɩ́n tə zàn, sə n lwarɩ də ʋ ken ʋ sírí, sə ʋ gʋ nə. 8 N pɩn à də mʋ́ tún nimarʋ də Ba-Yígúrə́-Jə-Tiu yɩrɩ tə. Kʋ mʋ̀ yɩrɩ, n dàń tʋn wʋywaŋʋ* à mʋ̀, n tʋtʋnʋ tə yɩra. Yá à cɩ́gá nə cʋ̀gʋ̀ yoo, sə n tətə gʋ nə. Dàn ká ja nə n va, n pa n nyɩna tə nə.» 9 Zonatan swɩ̀n Davidə con, ʋ wʋ́: «Dàn ká kə n pubʋŋa wa, də à yə̀ə́ yolwan nii nə, à nyɩna tə nə ken sírí, sə ʋ tʋn n yɩra, à ga wà kʋ swɩ̀n, à bɩrɩ mʋ́!» 10 Davidə bwe Zonatan, ʋ wʋ́: «Də n nyɩna tə nə caga n nii nə, wàà nə wá swɩ̀n kʋ, ʋ bɩrɩ nə?» 11 Zonatan ma le Davidə, ʋ wʋ́: «Bà nə va kasɔɔ con!» Ba mɛ bələ ma twá duən, ba va kasɔɔ con.

12 Yá Zonatan dàń swɩ̀n Davidə con, ʋ wʋ́: «À dùə̀ də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ! Jwɩan nə, nə à yə̀ə́ kaan nə, kʋ bɩ̀àn, sə kʋ yí ndə máŋá ka tə wa, də à mà à nyɩna pùə́ nə, à na ʋ pubʋŋa. Də ʋ pùə́ nə ywán də n mʋ̀ Davidə, à wá tʋn lìù, sə kʋ tíú swɩ̀n n con. 13 Yá à nyɩna dàń nə yɩ yolwan nə, ʋ cɩ́gá bʋŋa, sə ʋ tʋn n yɩra, à nə wà kʋ swɩ̀n, à bɩrɩ mʋ́, sə á ga yá mʋ́, à pa n vìí də yazurə, sə Ba-Yígúrə́-Jə-Tiu cʋ̀gʋ̀ à mʋ̀ Zonatan yáá də à kwa! À lòrì, sə Ba-Yígúrə́-Jə-Tiu ya də mʋ́, ndə ʋ nə yɩn də à nyɩna nətʋ! 14 Də à mɩɩ tə nə wulə lʋʋ, n wá tʋn Ba-Yígúrə́-Jə-Tiu wʋywaŋʋ tə à yɩra, yá à bá tɩ. 15 Yá də à dàń nə tɩga də, n bá sɛ̀, n yá n wʋywaŋʋ tə fwaŋʋ nə, à dìə̀ tə yɩra, də Ba-Yígúrə́-Jə-Tiu nə swə, ʋ gʋ n mʋ̀ Davidə dʋŋa tə mama tɩa yuu wa.» 16 Yá Zonatan dàń tún nimarʋ də Davidə dìə̀ tə, ʋ ga swɩ̀n ʋ wʋ́: «Ba-Yígúrə́-Jə-Tiu nə wá fwi ʋ lɩŋa, Davidə dʋŋa tə yuu wa!» 17 Zonatan kʋ́ʋ̀ pɩn Davidə dù, ʋ sonu tə yɩrɩ, ʋ nə swə wá. Cɩ́gá, Zonatan yà swə Davidə, ndə ʋ tətə nə.

18 Zonatan swɩ̀n Davidə con, ʋ wʋ́: «Jwɩan yɩ candʋan. Ba wá lwarɩ də n tə̀lə́, lìù nə bá ya n yijaa tə nə yɩrɩ. 19 Yá kaan nə, n dàń wá va n yí bwálɩ́ tə, n nə dí yáá n səgə lá, yoo tə dɩɩn nə. N wá jə̀ń Ezɛlə kapan tə bɩan nə. 20 Yá à mʋ̀ dàń wá ta cɩan batwa kʋ vàn tə yuu, ndə won nə à tɛ. 21 Kʋ kwa nə, À wá tʋn bisɩmabara tə, sə ʋ va, ʋ twarɩ cɩan tə, ʋ ja bà. À nə swɩ̀n ʋ con də, “cɩan tə wà ʋ bwálɩ́ tə yí, ʋ pìí ʋ bà ʋ kwa con, ʋ tì tə, ʋ ja bà”, kʋ nətʋ bɩrɩ də, yoo mama tə̀lə́. Yá n bɩcan mɛ, sə kʋ ja sìə́. N dàń wàá n twi. Kʋ yɩ cɩ́gá, Ba-Yígúrə́-Jə-Tiu wulə! 22 Yá à dàń nə swɩ̀n bisɩmabara tə con də, “cɩan tə kɛ̀ń ʋ bwálɩ́ tə, tə wulə ʋ yáá con”, kʋ nətʋ bɩrɩ də́ n mɛ, sə n dəri n vìí. Cɩ́gá, kʋ máŋá təntə wa, Ba-Yígúrə́-Jə-Tiu pɩn mʋ́ cwəŋə, sə n vìí. 23 Yá kʋ dàń nə yɩ sʋgʋ tə mʋ̀, à də mʋ́ nə swɩ̀n nə tún, Ba-Yígúrə́-Jə-Tiu nə yɩ dansɩa lìù, à mʋ̀ də mʋ́ pwə́rə́ wa, máŋá mama wuuu, kʋ yɩrɩ!»

24 Davidə dàń vəli ʋ səgə kasɔɔ tə wa. Candʋan dɩɩn tə yí, yá pɩ̀ʋ́ Sayulə dàń vəli ʋ jə̀ə́, sə ʋ də́ cànà wodiu. 25 Pɩ̀ʋ́ Sayulə jə̀ń ʋ gólí yuu, ʋ dɩan mɛ yijaa nə, bírə́ yɩra. Zanatan zàn, Abənɛrə ga va ʋ jə̀ə́ Sayulə səpuni nə. Yá Davidə mʋ̀ yà tə̀lə́ ʋ yijaa tə nə. 26 Yá Sayulə wà yoo mama swɩ̀n, kʋ dɩɩn tə nə. Cɩ́gá, ʋ yà bʋŋa ʋ waa con, də kʋ wá ya Davidə tʋn durən yoo. Ʋ yà bʋŋa də cɩ́gá mama, kʋ yɩ durən yoo nə, Davidə tʋn. 27 Yá kʋ tɩpʋrɩ nə, candʋan dɩan bələ dɩɩn tə nə, Davidə tə wà ʋ yijaa tə nə yɩn. Sayulə dàń ma bwe ʋ bìú Zonatan, ʋ wʋ́: «Bɛ̀ɛ̀ nə pɩn, Yɩzayi bìú tə ma wà wodiu diŋə bwálɩ́ nə twi, dɩ̀ɩ̀n də zə̀n mama?» 28 Zonatan le Sayulə, ʋ wʋ́: «Davidə lòrì nə pwəpwə, sə à pa wá cwəŋə, sə ʋ va Bɛtəleyɛmə. 29 Ʋ swɩ̀n də, ʋ nyɩna dìə̀ tə jə joŋi tɩʋ tə wa, ba pɩ̀à ba fwa. Yá ʋ zʋnʋ də bon wá, sə ʋ kə dɩ̀àn ʋ bà. Yá ʋ dàń lòrì nə, sə à yá wá, sə ʋ va ʋ na ʋ nubɩa tə, də ʋ cɩ́gá nə nɩ yuywaŋʋ à yáá con. Mə kʋ mʋ̀ nə pɩn, Davidə ma wà pɩ̀ʋ́ wodiu tə diŋə bwálɩ́ nə twi.» 30 Sayulə lɩŋa zàn Zonatan yuu wa, ʋ ga swɩ̀n ʋ con, ʋ wʋ́: «N mʋ̀ bikʋkwɩʋn! Ba nii zìlí tíú! N bʋŋa də à yəri də, n nii yɩ kʋ wulə Yɩzayi bìú tə kwa naaa? Kʋ dàń nə yɩ n mʋ̀ cavɩra, də n nuu tə dəmunu. 31 Cɩ́gá, Yɩzayi bìú tə mɩɩ nə zə́n kʋ wulə lʋʋ wa, n mʋ̀ də n pàrɩ̀ tə mɛ bá na yazurə. Sɩ́ʋ́n nə, n dàń tʋn lɩ̀à, n pa ba ja wá, ba ja bà ba pa nə. Cɩ́gá, ʋ mɛ tɩan.» 32 Zonatan le ʋ nyɩna Sayulə, ʋ wʋ́: «Bɛ̀ɛ̀ yɩrɩ nə ʋ mɛ, sə ʋ tɩ? Bɛ̀ɛ̀ nə ʋ fwa?» 33 Yá Sayulə zɩn ʋ cwiin tə, sə ʋ ma cwiin Zonatan. Zonatan dàń lwarɩ, də ʋ nyɩna tə cɩ́gá ken sírí, sə ʋ gʋ Davidə. 34 Zonatan dàń nyɩ́n ʋ zàn wodiu tə diŋə bwálɩ́ nə, də lɩŋa. Yá ʋ kʋ́ʋ̀ wà wodiu tə dí, kʋ mʋ̀ candʋan dɩan bələ nii dɩɩn tə nə. Cɩ́gá, Davidə yoo yà yɩ̀ wá zənzən, ʋ nyɩna tə nə kəni cavɩra ʋ nə yɩrɩ.

35 Kʋ tɩpʋrɩ jɩjʋ nə, Zonatan vəli kasɔɔ con, sə ʋ jəri Davidə, ndə ba nə swɩ̀n ba tún nətʋ. Ʋ yà jɩn bisɩmabarɩbiə, ʋ ma kwé ʋ tɩ̀àn. 36 Ʋ swɩ̀n bisɩmabara tə con, ʋ wʋ́: «Dəri n va, n twarɩ cɩan tə tə, à nə wá ta, n ja bà. Bisɩmabara dəri ʋ vələ, Zonatan ga ta cɩɩn, kʋ kɛ̀ń wá. 37 Bisɩmabara tə nə yí Zonatan cɩɩn tə nə tʋa lá bwálɩ́, Zonatan bubwi ʋ kə ʋ kwa, ʋ wʋ́: «Cɩɩn tə wà mʋ́ kɛ̀ń, kʋ tʋ n yáá con naaa?» 38 Ʋ tə bubwi ʋ kə ʋ nə, ʋ wʋ́: «Dəri lala, kə dɩ̀àn, dàn ká zɩgɩ!» Yá Zonatan bisɩmabara tə pɛ̀ cɩan tə, ʋ ja pìí ʋ bà ʋ yuu-tiu Zonatan con. 39 Bisɩmabara tə yà yəri kʋ nətʋ tə də̀ń. Zonatan də Davidə cɩcɩ yà nə yə̀ə́ kʋ də̀ń. 40 Zonatan pɩn ʋ kwatarɩ zɩla tə, bisɩmabara tə nə, ʋ yà nə wulə də wá, ʋ ga swɩ̀n ʋ con, sə ʋ ja tə, ʋ pìí, ʋ va sàń.

41 Bisɩmabara tə viru kwa nə, Davidə zàn jɩgwiə saparʋ yuu, ʋ nan. Ʋ tʋa ʋ nadwana yuu, ʋ pú ʋ yáá tɩa, nɛɛ batwa. Yá ba dàń pùrì duən, ba kə duən nyʋna nə, ba ga kwi. Yá Davidə dàń nə kwi zənzən, ʋ doni. 42 Kʋ kwa nə, Zonatan swɩ̀n Davidə con, ʋ wʋ́: «Vəli də bɩcan sìə́. N dàń nə lìí n tɩ̀àn nə durə tə yoo, à də mʋ́ nə dùə̀ də Ba-Yígúrə́-Jə-Tiu yɩrɩ tə. Nə bələ tə dùə̀, də Ba-Yígúrə́-Jə-Tiu nə wá ya dansɩa lìù, nə pwə́rə́ wa. Ʋ mʋ̀ ga nə wá ya dansɩa lìù, à dwíí tə, də n dwíí tə də pwə́rə́ wa, máŋá mama wuuu!»