Sayulə pɩn nii, sə ba gʋ Davidə
19
1 Sayulə swɩ̀n ʋ bɩ̀ú Zonatan, də ʋ tʋ̀tʋ̀nà tə mama con, sə ba gʋ Davidə. Yá Sayulə bìú Zonatan yà swə Davidə zənzən. 2 Kʋ nətʋ tə pɩn, Zonatan swɩ̀n kʋ, ʋ bɩrɩ Davidə nə, ʋ wʋ́: «À nyɩna Sayulə pɩ̀à, sə ʋ gʋ mʋ́. N dàń cɩ̀ n tɩ̀àn nə. Jwɩan jɩjʋ nə, sə n pɩ̀à bwálɩ́, n səgə lá. 3 À mʋ̀ wá nan, à zɩgɩ à nyɩna səpuni nə, kárá tə wa, bwálɩ́ tə nə, n nə səgə lá. Yá à dàń wá swɩ̀n n yoo à nyɩna con. À wá na kʋ tə, ʋ nə bʋŋa, yá kʋ kwa nə, à wá swɩ̀n kʋ, à bɩrɩ mʋ́.»4 Zonatan bʋ̀à Davidə nə, ʋ bɩrɩ ʋ nyɩna Sayulə nə. Ʋ swɩ̀n ʋ con, ʋ wʋ́: «N mʋ̀, à nyɩna pɩ̀ʋ́, n wà mɛ, sə n tʋn lwanɩ, n zɩgɩ n tʋtʋnʋ Davidə nə. Cɩ́gá, ʋ wà lwanɩ tʋn, ʋ zɩgɩ n nə. Yá ʋ tʋ̀tʋ̀nán tə yɩ zəni nəfarʋ, kʋ pa mʋ́. 5 Ʋ lɩ ʋ mɩɩ, ʋ ja ʋ jɩɩn wa, ʋ ma gʋ Filisi tɩ̀án bɛɛ tə. Yá Ba-Yígúrə́-Jə-Tiu twá kʋ nə, ʋ pa Yɩzərayɛlə lɩ̀à tə mama də́ dɩ̀àn zənzən. N nɩ kʋ nətʋ tə, yá n pùə́ ga poli. Bɛ̀ɛ̀ dàń nə pɩn, n pɩ̀à, sə n tʋn lwanɩ? N pɩ̀à, sə n lwá lìù tə, ʋ nə wà yoo cʋ̀gʋ̀ jana! Bɛ̀ɛ̀ nə pɩn, n pɩ̀à, sə n gʋ Davidə, kʋ ga ba də̀ń jə?» 6 Sayulə cʋgʋ Zonatan kori, ʋ ga dù, ʋ wʋ́: «Kʋ yɩ cɩ́gá, Ba-Yígúrə́-Jə-Tiu wulə! À dùə̀ də, à bá gʋ Davidə.» 7 Zonatan dàń bon Davidə, ʋ swɩ̀n sʋ̀ràn təntə mama, ʋ bɩrɩ wá. Kʋ kwa nə, Zonatan jɩn Davidə ʋ va Sayulə con. Yá Davidə kʋ́ʋ̀ yɩn Sayulə con, n tʋn ʋ pa wá, ndə fuən tə nə.
8 Kʋ̀ʋ̀ tə kʋ́ʋ̀ nyɩ́n kʋ zàn. Yá Davidə kʋ́ʋ̀ nan, ʋ ta Filisi tɩ̀án tə. Ʋ dí dɩ̀àn zənzən ba yuu wa, kʋ pa ba dəri ʋ yáá nə.
9 Dɩɩn don nə, jə̀rə́ kʋkwɩʋn tə, Ba-Yígúrə́-Jə-Tiu nə yàá tʋn tə, twi ka zʋ Sayulə, də ʋ jə̀ə́ ʋ dìə̀ wa, ʋ jə ʋ cwiin ʋ jɩɩn wa. Davidə yà wulə ʋ dwi bànʋ́ tə. 10 Sayulə yà pɩ̀à, sə ʋ cwiin Davidə, ʋ marɩ bírə́ tə yɩra. Yá Davidə dàń gùrí, ʋ jɛ́n Sayulə yáá nə, cwiin tə ga kɛ̀ń, kʋ ja bírə́ tə. Davidə dəri ʋ jɛ́n, kʋ tɩtɩn tə nə. 11 Sayulə tʋn lɩ̀à Davidə sàń nə, kʋ tɩtɩn tə nə, sə ba cɩ̀ wá, ba gʋ jɩjʋ nə. Yá Davidə kan Mikalə swìn kʋ, ʋ bɩrɩ wá, ʋ wʋ́: «N nə wà dəri n jɛ́n, tɩtɩn kʋ tə nə, tɩa nə pʋrɩ, ba wá gʋ mʋ́.» 12 Mikalə pɩn Davidə twá təkurə, ʋ nan, ʋ dəri. Mə kʋ zʋgɩ nətʋ, ʋ ma dəri ʋ jɛ́n. 13 Kʋ kwa nə, Mikalə dàń tì ba dìə̀ woŋwanʋ*, ʋ tún gədo tə yuu, ʋ ja bʋ̀n tànʋ̀ ʋ ma yeri kʋ yuu, ʋ ga piri kʋ də gànʋ̀. 14 Máŋá tə Sayulə lɩ̀à tə nə twi, sə ba ja Davidə, Mikalə swɩ̀n ba con, ʋ wʋ́: «Davidə yɩ ʋ yɩ̀.» 15 Yá Sayulə pɩn lɩ̀à tə pìí, ba va, sə ba na Davidə. Sayulə swɩ̀n ba con, ʋ wʋ́: «Á vələ, á tì wá, də ʋ gədo tə mɛ, á ja bà, á pa nə, sə à gʋ wá.» 16 Lɩ̀à tə twi, ba zʋ Davidə dìə̀ tə wa, də dìə̀ woŋwanʋ nə tígə́ gədo tə yuu, bʋ̀n tànʋ̀ yeri kʋ yuu. 17 Yá Sayulə dàń bwe Mikalə, ʋ wʋ́: «Bɛ̀ɛ̀ nə pɩn, n ma tʋn swɩan tə tə à yɩra, n pa à dʋŋʋ tə jɛ́n?» Mikalə le Sayulə, ʋ wʋ́: «Davidə swɩ̀n à con, də à nə wà wá yá, à pa ʋ vìí, ʋ wá gʋ nə.»
Davidə dəri, ʋ va Samiyɛlə con, Rama nə
18 Yá Davidə nə dəri ʋ jɛ́n nətʋ tə, ʋ vəli Samiyɛlə con Rama nə. Ʋ swɩ̀n kʋ tə mama, Sayulə nə ma fwa wá, ʋ bɩrɩ Samiyɛlə nə. Kʋ kwa nə, ʋ də Samiyɛlə vəli ba wulə Nayɔtə nə. 19 Lɩ̀à twi ba swɩ̀n Sayulə con, də Davidə wulə Nayɔtə nə, Rama nii nə. 20 Yá Sayulə dàń tʋn lɩ̀à, sə ba va ba ja Davidə. Ba vəli ba na Yɩɩ nii sʋ̀sʋ̀nà púlí, də ba wulə ba swɩ̀n Yɩɩ nii sʋ̀ràn, Samiyɛlə ga wulə ba yáá. Yɩɩ Siŋu* tə súə́ Sayulə lɩ̀à tə, yá ba də dàń wulə ba swɩ̀n, Yɩɩ nii sʋ̀ràn. 21 Lɩ̀à twi ba swɩ̀n kʋ, ba bɩrɩ Sayulə nə. Ʋ ma kʋ́ʋ̀ tʋn lɩ̀à duən. Yá ba də vəli, ba swɩ̀n Yɩɩ nii sʋ̀ràn tə. Ʋ kʋ́ʋ̀ tʋn lɩ̀à duən də, nɛɛ batwa nii nə. Yá ba də tə vəli, ba swɩ̀n Yɩɩ nii sʋ̀ràn tə. 22 Sayulə tətə dàń ma va Rama. Ʋ nə vəli ʋ yí nɩ́á gwàlʋ́* tə, kʋ də̀ń nə lu, kʋ nə wulə Seku nə, ʋ bwe, ʋ wʋ́: «Samiyɛlə də Davidə yɩ ba wulə yə̀n nə?» Ba le wá, ba wʋ́: «Ba wulə Nayɔtə nə, Rama nii nə.» 23 Sayulə ma zɩgɩ lá, ʋ va Nayɔtə, Rama nii nə. Yɩɩ Siŋu tə súə́ Sayulə də, yá ʋ dàń vəli, də ʋ swɩ̀n Yɩɩ nii sʋ̀ràn, ʋ ja va ʋ yí Nayɔtə, Rama nii nə. 24 Sayulə də lɩ ʋ gànàn, yá ʋ də dàń swɩ̀n Yɩɩ nii sʋ̀ràn, Samiyɛlə yáá con. Sayulə tʋa ʋ nadwana yuu, də ʋ yaswələ, kʋ yɩtʋrɩ tə mama, də kʋ tɩtɩn tə mama. Kʋ mʋ̀ nə pɩn, ba swɩ̀n, ba wʋ́: «Sayulə də twá ʋ wulə Yɩɩ nii sʋ̀sʋ̀nà wa naaa?»