Zonatan dí David dabarɩ
18
1 Máŋá tə Davidə nə swɩ̀n Sayulə con, ʋ zwɛ̀, Zonatan vwə ʋ tɩ̀àn Davidə yɩra, ʋ ga sóní wá, ndə ʋ tətə nə. 2 Kʋ nə zɩgɩ kʋ dɩɩn təntə nə, Sayulə cɩ̀gà Davidə nə, ʋ kə ʋ con. Ʋ kʋ́ʋ̀ wà wá yá, sə ʋ pìí ʋ va ʋ nyɩna sàń. 3 Yá Zonatan dàń tún nimarʋ də Davidə, ʋ yà nə swə wá zənzən, ndə ʋ tətə nə tə yɩrɩ. 4 Zonatan dàń lɩ gànzwɩ́ʋ tə, ʋ yà nə zʋa, ʋ pa Davidə nə. Ʋ tì ʋ kwatara gànàn, də ʋ kwatara sɩ̀ʋ́ tə də tətə, də ʋ twan, də ʋ voru, ʋ súrí lá, ʋ pa Davidə nə.5 Bwálɩ́ tə mama, Sayulə nə yàá tʋn Davidə, Davidə yàá va, ʋ ta ʋ də́. Kʋ nətʋ tə pɩn, Sayulə tún wá, sə ʋ ya ʋ kwatara tə yáá tíú. Yá kʋ nətʋ tə yɩn ywánɩ́ də Yɩzərayɛlə lɩ̀à tə mama, də Sayulə tʋ̀tʋ̀nà tə də tətə.
Davidə yimən jə Sayulə
6 Davidə nə gʋa Filisi tɩ̀án bɛɛ tə kwa nə, ʋ də Yɩzərayɛlə kwatara tə ga pìí ba bɩ̀àn sàń, kana nan Yɩzərayɛlə tɩan tə mama wa, ba dwí gungwɛn də kúnkólə́n, ba ga nuŋə, də ba sɛ̀, də ba mà wuwuli, sə ba ma jəri pɩ̀ʋ́ Sayulə. 7 Kana tə duən yà dɩ gwaran tə, yá ba duən joŋə də pupwən, ba wʋ́:
«Sayulə gʋa dʋŋa mʋ̀rʋ̀,
yá Davidə ga gʋ dʋŋa mʋ̀rʋ̀ fugə.»
8 Nuŋə təntə zɩn Sayulə lɩŋa zənzən, ka sʋ̀ràn tə yà nə yɩ̀ wá yɩrɩ. Ʋ dàń ŋʋŋwɩn ʋ waa con, ʋ wʋ́: «Kana tə bɩrɩ də Davidə mɛ də mʋ̀rʋ̀ fugə, ba ga bɩrɩ də à mʋ̀ mɛ də mʋ̀rʋ̀ cɩcɩ. Kʋ dàń ga, sə ba jon pàrɩ̀ tə, ba pa wá.» 9 Kʋ nə zɩgɩ kʋ dɩɩn tə nə, Davidə yimən dàń jə Sayulə.
10 Kʋ tɩpʋrɩ nə, Yɩɩ tʋn jə̀rə́ kʋkwɩʋn, ʋ pa ka bà, ka zʋ Sayulə. Yá ka dàń pɩn, Sayulə wulə ʋ dìə̀ wa, ʋ swɩn sʋ̀ràn, tə nə ba də̀ń jə. Davidə ma tì ʋ bànʋ́ tə, ʋ wulə ʋ dwí, ndə dɩan tə duən nə. Yá Sayulə yà jə ʋ cwiin tə, ʋ jɩɩn wa. 11 Naa nədʋ, də Sayulə dɩlʋ cwiin tə Davidə vàn tə con. Ʋ yà yɩ ʋ bʋŋa, sə ʋ cwiin Davidə, ʋ marɩ bírə́ tə yɩra. Yá kʋ nɛɛ bələ nə, Davidə nə gùrí ʋ jɛ́n, Sayulə yáá nə.
12 Ba-Yígúrə́-Jə-Tiu yà wulə də Davidə, ʋ ga vɩ Sayulə mʋ̀ ʋ dʋgʋ. Kʋ nətʋ tə pɩn, Davidə fən yà jə Sayulə. 13 Kʋ mʋ̀ nə pɩn, Sayulə ma pwɛ̀ Davidə, ʋ lɩ ʋ bɩan nə. Ʋ tún wá, sə ʋ ya kwatara mʋ̀rʋ̀ yáá tíú. Yá Davidə dàń yà ja kwatara tə, ʋ naŋa, ʋ ma tɛ kʋ̀ʋ̀, də ʋ pìí ʋ ja ba, ʋ twi. 14 Ba-Yígúrə́-Jə-Tiu yà wulə də Davidə, kʋ pa, ʋ tʋtʋŋɩ mama yàá jə fɩra. 15 Sayulə nɩ də Davidə tʋtʋŋɩ mama yàá jə fɩra. Kʋ nətʋ tə pɩn, Davidə fən dàń kwɛn tə jə Sayulə. 16 Yá Yɩzərayɛlə də Zwida lɩ̀à tə mama yà swə Davidə, ʋ yà nə wulə ba yáá, ʋ ja ba ʋ naŋa, ʋ ma tɛ kʋ̀ʋ̀, də ʋ pìí ʋ twi, tə yɩrɩ.
Davidə swe Sayulə bʋ̀á Mikalə
17 Dɩɩn don nə, Sayulə swɩ̀n Davidə con, ʋ wʋ́: «Nə̀ń à bʋ̀á nəkwɩa Merabə nə! À wá pa wá mʋ́, sə n ma fwa n kan, də n nə tɛ Ba-Yígúrə́-Jə-Tiu kʋ̀ʋ̀ tə, n ma tʋŋa n pɩn nə, də babarɩ.» Sayulə swɩ̀n nətʋ, ʋ yà nə ba pɩ̀à, sə ʋ tətə gʋ Davidə yɩrɩ. Ʋ yɩ ʋ pɩ̀à, sə Filisi tɩ̀án tə nə gʋ wá. 18 Yá Davidə le Sayulə, ʋ wʋ́: «À mʋ̀ nə yɩ wàà? À dwíí tə, də à nyɩna dìə̀ tə tà won mama, Yɩzərayɛlə wa, sə à ma jì pɩ̀ʋ́ bʋ̀á barɩ.» 19 Yá máŋá tə Sayulə nə mɛ, sə ʋ pa ʋ bʋ̀á Merabə Davidə nə, nə yí, Sayulə pìí ʋ tì wá, ʋ pa Adəriyɛlə nə, ʋ nə yɩ Mehola tíú, sə ʋ ma fwa ʋ kan. 20 Yá Mikalə, ʋ nə yɩ Sayulə bʋ̀á don, yà swə Davidə. Sayulə nì kʋ, yá kʋ yoo tə twá ʋ fɩra nə. 21 Sayulə kʋ́ʋ̀ tanɩ, sə ʋ pa ʋ bʋ̀á Mikalə Davidə nə. Ʋ pɩ̀à, sə kʋ twá də Mikalə, Filisi tɩ̀án tə ma gʋ Davidə. Sayulə kʋ́ʋ̀ swɩ̀n Davidə con, nɛɛ bələ nii nə, ʋ wʋ́: «N wá jì à bʋ̀á barɩ, zə̀n kʋ tə.» 22 Yá Sayulə dàń pɩn nii kʋ tə, ʋ tʋ̀tʋ̀nà tə nə, ʋ wʋ́: «Á swɩan Davidə con, á mʋ̀ də wá cɩcɩ pwə́rə́ wa, də pɩ̀ʋ́ də ʋ tʋ̀tʋ̀nà tə mama swə wá. Á dàń sùgə́ wá, sə ʋ sɛ̀, ʋ jì à bʋ̀á tə barɩ.» 23 Sayulə tʋ̀tʋ̀nà tə swɩ̀n sʋ̀ràn təntə Davidə con. Yá Davidə le ba, ʋ wʋ́: «Á bʋŋa də ka jì pɩ̀ʋ́ bʋ̀á barɩ, yɩ yoo tə, kʋ nə yɩ mwalɩ naaa? À mʋ̀ yɩ zʋrʋ. À tà won mama.» 24 Sayulə tʋ̀tʋ̀nà tə pìí ba bà, ba swɩ̀n Davidə sʋ̀ràn təntə, ba bɩrɩ Sayulə nə.» 25 Yá Sayulə kʋ́ʋ̀ swɩ̀n ba con, ʋ wʋ́: «Á swɩan Davidə con, də pɩ̀ʋ́ tə ba ʋ bʋ̀á tə kwa wiən pɩ̀à. Won tə cɩcɩ, ʋ nə pɩ̀à, ʋ bʋ̀á tə də̀ń nə, kʋ yɩ Filisi tɩ̀án pəntanan bíí, sə ʋ ma fwi ʋ lɩŋa, ʋ dʋŋa yuu wa.» Sayulə yà pɩ̀à, sə kʋ twá nətʋ, Davidə ma tʋ Filisi tɩ̀án tə jɩɩn wa. 26 Sayulə tʋ̀tʋ̀nà tə kʋ́ʋ̀ vəli, ba swɩ̀n Sayulə sʋ̀ràn təntə Davidə con. Yá kʋ yoo tə twá Davidə fɩra nə. Ʋ dàń sɛ̀, sə ʋ jì pɩ̀ʋ́ tə bʋ̀á barɩ. Də máŋá tə, pɩ̀ʋ́ tə nə pɩn, tə wà yí, 27 Davidə zàn, ʋ də ʋ kwatara tə va, ba gʋ Filisi tɩ̀án bara biələ. Davidə goŋi ba pəntanan tə, ʋ ja bà, ʋ pa ba gàlà, pɩ̀ʋ́ tə yáá con, sə ʋ ma wànɩ́, ʋ jì pìʋ́ tə bʋ̀á barɩ. Yá Sayulə dàń pɩn ʋ bʋ̀á Mikalə, Davidə nə, ʋ ma fwa ʋ kan.
28 Sayulə dàń nɩ, ʋ ga sɛ̀, də Ba-Yígúrə́-Jə-Tiu cígá wulə də Davidə, yá ʋ tətə bʋ̀á Mikalə də ga swə Davidə. 29 Kʋ nətʋ tə pɩn, Davidə fən kwɛn, kʋ jə Sayulə. Yá kʋ nə zɩgɩ kʋ nə, Sayulə dàń tì dʋŋɩ də Davidə máŋá mama.
30 Kʋ máŋá tə wa, Filisi yun tɩ̀án tə yàá naŋa, ba tɛ kʋ̀ʋ̀ də Yɩzərayɛlə lɩ̀à tə. Yá máŋá mama, Filisi tɩ̀án tə nə nan, Davidə yàá ta ba, ʋ də́ dɩ̀àn, ʋ doni Sayulə tʋ̀tʋ̀nà tə mama. Yá kʋ nətʋ tə pɩn, Davidə yɩrɩ nan zənzən.