Salʋmʋn payuu tə yáá tɩ̀án
4
1 Pɩ̀ʋ́ Salʋmʋn yà nə yɩ Yɩzərayɛlə lalʋʋ tə mama pɩ̀ʋ́. 2 Nə̀ń ʋ payuu tə yáá tɩ̀án tə yɩra nə. Yɩɩ joŋwanʋ Sadɔkə bìú Azarɩyahu, 3 də Elihorɛfə, də Aya, ba nə yɩ Swiswa bɩ̀á, yà nə pʋ́pʋ́nɩ́ saga tə. Ahiludə bìú Zozafatə yà nə túŋə́ saga tə. 4 Yehoyada bìú Benaya yà nə ywàŋá kwatara yuu nə. Sadɔkə də Abɩyatarə yà yɩ Yɩɩ joŋwana. 5 Natan bìú Azarɩya yà nə ywàŋá pɩ̀ʋ́ tʋ̀tʋ̀nán yáá tɩ̀án tə yuu nə. Natan bìú Zabudə yà yɩ Yɩɩ joŋwanʋ, ʋ ga yɩ pɩ̀ʋ́ tətə dabɛɛ. 6 Ahiswarə yà nə ywàŋá pɩ̀ʋ́ sàń tə yuu nə, yá Abəda bìú Adoniramə yà nə ywàŋá dɩ̀àn tʋ̀tʋ̀nán tə yuu nə.7 Salʋmʋn yà jə tʋ̀tʋ̀nán yun tɩ̀án fugə də bələ, Yɩzərayɛlə lʋʋ nii tə mama wa. Ba mʋ̀ yà nə pɩ̀à won tə mama pɩ̀ʋ́ tə, də ʋ dìə̀ tə nə pɩ̀à ba pɩn wá. Bɩnɩ wa, ba lìù mama yàá ywàń pɩ̀ʋ́ tə də ʋ dìə̀ tə yuu nə cànpə́rɩ́.
8 Nə̀ń ba mʋ̀ tʋ̀tʋ̀nán yun tɩ̀án tə yɩra nə. Urə bìú tə yà nə tɩ Efərayimə pɛɛn nagwanaa tə.
9 Dekɛrə bìú tə yà nə tɩ Makasə, də Swaləbimə, də Bɛtə-Swemɛswə, də Elon, də Bɛtə-Hanan nagwanɛɛ tə.
10 Ezedə bìú tə, ʋ nə wulə Arubɔtə nə, yà nə tɩ Soko nagwanaa tə, də Efɛrə lʋʋ nii tə mama.
11 Abinadabə bìú tə yà nə tɩ Dorə nii tɩbii tə mama. Salʋmʋn bʋ̀á Tafatə yà nə yɩ ʋ kan.
12 Ahiludə bìú Baana yà nə tɩ Taanakə, də Megido nagwanɛɛ tə, də Bɛtə-Swean nagwanaa tə mama, ka nə wulə Sarəta səpuni nə, Zwizəreyɛlə də̀ń con, kʋ nə zɩgɩ Bɛtə-Swean nə, kʋ va kʋ yí Abɛlə-Mehola nə, kʋ va kʋ kɛ̀ń Yɔkəmeyamə.
13 Gebɛrə bìú tə, ʋ nə wulə Ramɔtə nə, Galadə nagwanaa tə wa, yà tɩ Manase bìú Yayirə tɩan tə, Galadə nagwanaa tə wa. Ʋ mʋ̀ yà tə nə tɩ Arəgɔbə tɩan tə, Baswan nagwanaa tə wa. Kʋ mʋ̀ nagwanaa təntə yà jə tɩfaran sapwɩtwa, tə nə lwə̀ tə kɩkarɩ də bə́rí, yá tə mimien ga sun də cɩnɩan borucɔɔ.
14 Yido bìú Ahinadabə yà nə tɩ Mahanayimə nagwanaa tə.
15 Ahimasə yà nə tɩ Nɛfətali nagwanaa tə. Ʋ də yà swe Salʋmʋn bʋ̀á, ʋ yɩrɩ nə yɩ Basəmatə.
16 Huswayi bìú Baana yà nə tɩ Aswɛrə, də Beyalɔtə nagwanɛɛ tə.
17 Paruwa bìú Zozafatə yà nə tɩ Yɩsakarə nagwanaa tə.
18 Ela bìú Swimeyi yà nə tɩ Bɛnzwamɛn nagwanaa tə.
19 Uri bìú Gebɛrə, ʋ nə wulə Galadə lʋʋ nii tə wa, yà tɩ Amɔrə dwíí pɩ̀ʋ́ Sihon, də Baswan pɩ̀ʋ́ Ogə nagwanɛɛ tə. Tʋ̀tʋ̀nà yáá tíú nədʋ yà nə ywàŋá kʋ lʋʋ nii təntə yuu nə.
20 Zwida dwíí tə, də Yɩzərayɛlə dwíí tə yà dáá, ndə mʋʋ nii kasɩlʋ bɩ̀á nə. Ba yà də́, ba nywɩn də ba fwa pupwən.