<<    <     1 Pɛ̀gá     3     >    >> 
Salʋmʋn swe Ezwipətə pɩ̀ʋ́ bʋ̀á
3
1 Salʋmʋn twá kasweri nə, ʋ jì Ezwipətə pɩ̀ʋ́ Farawon tɩnbɛɛ. Ʋ swe Farawon bʋ̀á, ʋ ja bà ʋ kə Davidə sadiyuu tə wa, kʋ va kʋ yí máŋá tə, ʋ nə lwə̀ ʋ tətə dìə̀ tə, də Ba-Yígúrə́-Jə-Tiu dìə̀ tə, də Zwerizalɛmə tɩʋ tə biritaŋʋ tə ʋ zwɛ̀.
2 Lalʋʋ tə jwəŋə yà yɩ ba fwa jwəŋə dədwələn* cɩcɩ yuu wa. Cɩ́gá, kʋ máŋá tə wa, də ba yà tə wà dìə̀ lwe, ba pa Ba-Yígúrə́-Jə-Tiu nə. 3 Salʋmʋn yà swə Ba-Yígúrə́-Jə-Tiu, ʋ ga twá yìə̀n tə nii nə, ʋ nyɩna Davidə nə pɩn nii, sə tə tʋn. Yá ʋ də jwəŋə, də ʋ wusinə jwəŋə, yà yɩ ʋ fwa jwəŋə dədwələn yuu.
4 Dɩɩn don nə, pɩ̀ʋ́ tə vəli Gabawon, sə ʋ fwa joŋi. Cɩ́gá, mə jwəŋə dədwələn yuu dìə̀ nəfarʋ tə yà wulə kʋ tɩʋ tə wa. Salʋmʋn fwa jwəŋə mʋ̀rʋ̀ ʋ sʋ̀rɩ́, ʋ pa Yɩɩ nə, Yɩɩ joŋi bwálɩ́ təntə yuu wa. 5 Máŋá tə Salʋmʋn nə wulə Gabawon tɩʋ tə wa, Ba-Yígúrə́-Jə-Tiu twi ʋ con tɩtɩn nə, ʋ pandwɩa wa, ʋ swɩ̀n ʋ con, ʋ wʋ́: «Lòrì won tə, n nə pɩ̀à, yá à wá pa kʋ mʋ́.» 6 Salʋmʋn le, ʋ wʋ́: «N tʋn wʋywaŋʋ* nəfarʋ à nyɩna Davidə yɩra, ʋ nə yɩ n tʋtʋnʋ. Ʋ yɩn n yáá con ndə lìù tə nə, n nə wàá ʋ yuu wa n jələ. Ʋ twá cɩ́gá nə, ʋ ma tʋn kʋ tə nə mɛ sə kʋ tʋn, ʋ bɩcan də ga ya nədʋ n yáá con. Yá n cɩ̀gà wʋywaŋʋ nəfarʋ kʋ tə nə, n tún n pa wá. Kʋ mʋ̀ nə yɩ bìú tə ʋ nə jə̀ə́, ʋ padaʋ tə yuu wa, ndə ba nə na kʋ zə̀n. 7 Sɩ́ʋ́n nə, n mʋ̀ Ba-Yígúrə́-Jə-Tiu, n nə yɩ à tíú Yɩɩ, n mʋ̀ nə pɩn à mʋ̀ n tʋtʋnʋ tə jì pɩ̀ʋ́, à nyɩna Davidə bwálɩ́ nə. Yá à mʋ̀ dàń tə yɩ bisɩmaa, à tə yəri nətʋ, à nə wá tʋn tʋtʋŋɩ təntə. 8 À mʋ̀ n tʋtʋnʋ tə wulə n lalʋʋ tə titəŋi wa. Lalʋʋ təntə yɩ n mʋ̀ nə kúrí, kʋ ga dáá zənzən, kʋ pa ba wàrɩ̀ kʋ nii ba jələ, ba wàrɩ̀ kʋ ba gàlɩ̀, kʋ nə dáá zənzən yɩrɩ. 9 N dàń pa wʋbʋŋa à mʋ̀ n tʋtʋnʋ tə nə, sə à ma wànɩ́ à ywàń n lalʋʋ tə yuu nə, sə à yəni lwanɩ, də zəni swɩan duən wa. Kʋ nə tà nətʋ, lìù mama wàrɩ̀ n lalʋʋ tə nə dáá nətən yuu nə ʋ ywàŋá.»
10 Lòrí təntə Salʋmʋn nə lòrì, twá Yuu-Tiu waa nə. 11 Yɩɩ dàń swɩ̀n ʋ con, ʋ wʋ́: «Kʋ nə yɩ mə n lòrì n nə lòrì, n wà mɩdarɩ lòrì n pa n tɩ̀àn nə, n wà jɩjə lòrì, n ma wà lòrì sə n dʋŋa tɩ. Yá n yɩ n lòrì, sə n ja wʋbʋŋa, n ma wànɩ́ n twá cɩ́gá nə, ndə kʋ nə mɛ nətʋ. 12 Kʋ mʋ̀ yɩrɩ, à wá pa mʋ́ kʋ tə, n nə lòrì. À wá pa mʋ́ bɩcan wʋbʋŋa, də yənu, kʋ yiri tə nə wá bɩrɩ də, lìù mama wà dí yáá ʋ ya ndə n nə, lìù mama də ma bá bà n kwa nə, ʋ ya ndə n nə. 13 À tə wá pa mʋ́ kʋ tə də, n nə wà lòrì. À wá pa mʋ́ jɩjə də dun, tə yiri nə wá bɩrɩ də n lʋʋ yanʋ mama wa, pɩ̀ʋ́ don mama bá ya lá nə, ʋ nə wá ya ndə n nə. 14 Yá n nə tì à coŋi tə, n nə twá à yìə̀n tə nə, à nə pɩn tə pʋ́pʋ́nɩ́, sə tə tʋn, də tə tə nə, à nə pɩn nii tə yuu wa, ndə n nyɩna Davidə nə twá tə nə nətʋ, à wá pa mʋ́ mɩdarɩ.»
15 Salʋmʋn zàn dwiən tə nə, ʋ ga lwarɩ də kʋ yɩ Yɩɩ nə swɩ̀n ʋ con pandwɩa tə wa. Ʋ pìí ʋ bà Zwerizalɛmə, ʋ va ʋ zɩga Ba-Yígúrə́-Jə-Tiu nimarʋ culu daka tə yáá con. Ʋ fwa jwəŋə ʋ sʋ̀rɩ́ ʋ pa Yɩɩ nə, ʋ fwa nimarʋ jwəŋə, ʋ ga pa ʋ tʋ̀tʋ̀nà tə mama də́ cànà.
Salʋmʋn bʋra tə yoo ʋ nə bʋ̀rɩ̀
16 Dɩɩn don nə, kacwaran bələ twi ba zɩga pɩ̀ʋ́ Salʋmʋn yáá con. 17 Ba wa lìù don swɩ̀n, ʋ wʋ́: «À lòrì mʋ́ à yuu-tiu, cʋgʋ à kori! À mʋ̀ də kan wa tə nə wulə dìə̀ nədʋ wa. À lɩrɩ bisɩmaa dìə̀ tə wa, də ʋ də wulə lá. 18 À nə lɩrɩ dɩan batwa nii nə, ʋ də lɩrɩ bisɩmaa. Nə mʋ̀ yà nə wulə dìə̀ tə wa, lìù don yà twá ʋ tə̀lə́ dìə̀ tə wa də nəba. Nə mʋ̀ bələ tə yà nə wulə dìə̀ tə wa. 19 Tɩtɩn nə, kan wa tə pə̀ń ʋ bisɩmaa tə yuu wa, yá bisɩmaa tə tɩga. 20 Ʋ zàn tɩtɩkwɩʋn nə, máŋá tə wa, à mʋ̀ n tʋtʋnbʋa tə nə dwɛ̀, ʋ tì à bìú tə, à səpuni nə, ʋ ja va ʋ kə ʋ yɩlɩ nə. Yá ʋ dàń tì ʋ bìú tə nə tɩga tə, ʋ ja bà ʋ kə à yɩlɩ nə. 21 Jɩjʋ kʋ tə nə, à zàn sə à pa yɩlɩ à bìú tə nə, də ʋ tɩga. Tɩa nə pʋrɩ, à zuri à yɩra à ywàń wá zəni, yá à dàń nɩ də kʋ tà à bìú tə, à nə lʋrɩ.» 22 Kan tə don tə le, ʋ wʋ́: «Kʋnkʋn nə! À mʋ̀ bìú nə yɩ wa tə nə wà tɩ tə. N mʋ̀ bìú ga nə yɩ wa tə nə tɩga tə.» Təntən kan tə kʋ́ʋ̀ bwɛ́, ʋ wʋ́: «Kʋ tà nətʋ! N mʋ̀ bìú tə nə tɩga, yá à mʋ̀ bìú tə nə nəŋə.» Mə nətʋ nə ba dàń yà swɩ̀n duən con, pɩ̀ʋ́ tə yáá con. 23 Pɩ̀ʋ́ Salʋmʋn swɩ̀n, ʋ wʋ́: «Wà tə wʋ́: “Kʋ yɩ à mʋ̀ bìú nə nəŋə, yá kʋ yɩ n mʋ̀ bìú tə nə tɩga.” Wà tə də wʋ́: “Kʋ tà nətʋ, n mʋ̀ bìú tə nə tɩga, yá kʋ yɩ à mʋ̀ bìú tə nə nəŋə.» 24 Pɩ̀ʋ́ tə swɩ̀n ʋ súrí lá, ʋ wʋ́: «Á pɩan nə kwatara sɩ̀ʋ́.» Ba ma ja kwatara sɩ̀ʋ́ ba ja bà, pɩ̀ʋ́ tə yáá con. 25 Yá pɩ̀ʋ́ tə swɩ̀n, ʋ wʋ́: «Á pwɩa bìú tə nə nəŋə tə wa bələ, á pa vàn nədʋ kan tə don nə, á ga pa vàn nədʋ kan tə don də nə.» 26 Kan tə, kʋ nə yɩ ʋ mʋ̀ bìú nə nəŋə tə pùə́ cʋ̀gʋ̀ zənzən, ʋ nə swə ʋ bìú tə yɩrɩ. Ʋ dàń swɩ̀n pɩ̀ʋ́ tə con, ʋ wʋ́: «À Yuu-tiu, à lòrì, sə á pa bisɩmaa tə kan tə nə. Á dànà ká gʋ bisɩmaa tə.» Yá kan tə don tə swɩ̀n, ʋ wʋ́: «Ʋ bá ya à mʋ̀ nyiən, ʋ ma bá ya n də nyiən. Á pwɩa wá bələ!» 27 Pɩ̀ʋ́ tə dàń swɩ̀n, ʋ wʋ́: «Á pɩan bisɩmaa tə nə nəŋə tə, təntən kan tə nə. Ʋ mʋ̀ nə yɩ bisɩmaa tə nuu, á dànà ká gʋ bisɩmaa tə.»
28 Yɩzərayɛlə lɩ̀à tə mama nì bʋra tə yoo, pɩ̀ʋ́ tə nə bʋ̀rɩ̀, yá pɩ̀ʋ́ tə fən dàń zʋa ba. Cɩ́gá, ba nɩ də Yɩɩ wʋbʋŋa yà wulə də Salʋmʋn, sə ʋ ma bʋ̀rɩ̀ bʋra kʋ twá cɩ́gá nə.