1 Pɛ̀gá 6

Yɩɩ dìə̀ tə lwiu yoo

1 Yɩzərayɛlə lɩ̀à tə nə nan Ezwipətə lʋʋ nii tə wa, kʋ bɩna biənɩa də sapwɩnɩa kwa nə nə Salʋmʋn dí Yɩzərayɛlə pàrɩ̀. Yá ʋ pàrɩ̀ tə bɩna banɩa nii bɩnɩ tə, bələ nii cànà tə wa, ba nə boŋə Zivə, ʋ sinti Ba-Yígúrə́-Jə-Tiu dìə̀ tə lwiu. 2 Ba-Yígúrə́-Jə-Tiu dìə̀ tə pɩ̀ʋ́ Salomon nə lwə̀ tə danɩ yà yɩ jɩvaŋɩ yiə sapwɩtwa, ka wanɩ yɩ jɩvaŋɩ yiə sapʋa, ka yuu də tɩa yɩ jɩvaŋɩ yiə fɩtwa. 3 Napakwalʋ yà wulə dìə̀ tə yáá nə, kʋ danɩ nə yɩ jɩvaŋɩ yiə sapʋa. Kʋ də dìə̀ tə danɩ yà nə mɛ duən, kʋ lun ga yɩ jɩvaŋɩ yiə fugə.

4 Ʋ ken wogɩganan dìə̀ tə cələrə tə nii nə. 5 Kʋ nə zɩgɩ dibiu tə kʋ nə yɩ Yɩɩ cɩcɩ nyiən tə bírə́ tə də̀ń nə, ba lwə̀ dibii batwa duən yuu wa, ba taŋɩ bírí tə yɩra ba ja kɩkarɩ Yɩɩ dìə̀ tə. 6 Kʋ təntən dìə̀ tə wanɩ yɩ jɩvaŋɩ yiə bonu. Bələ nii nyiən tə yɩ jɩvaŋɩ yiə bardʋ, yá batwa nii nyiən tə wanɩ yɩ jɩvaŋɩ yiə barpɛ. Yɩɩ dìə̀ tə kàrá con bírə́ tə, yuu con tə mʋ̀ yà kʋ̀ʋ́ ba duən mɛ, kʋ pa dəyuu dìì tə baŋɩ tə wà Yɩɩ dìə̀ tə birinaa tə wa zwɩ. 7 Ba nə wulə ba lwe Yɩɩ dìə̀ tə, kʋ yɩ kapana ba nə dí yáá ba sárɩ́, tə bwálɩ́ nə, ba ma tʋŋa. Kʋ dàń pɩn dìə̀ tə lwiu máŋá wa, zizigu mama yà tə̀lə́ lá. Hama nə à yə̀ə́ dèrísə́rə́ də lugu yiri mama yà ba dìə̀ tə wa dwanɩ. 8 Təntən dìə̀ tə mimii, yà yɩ kʋ wulə Yɩɩ dìə̀ tə jɩzən vàn con. Təntən dəyuu dìə̀ tə yɩ kukurə nacanɩ ba twá ba ma zwɩ ka wa, ba ga zɩga təntən dəyuu dìə̀ tə wa, ba twá kukurə nacanɩ, ba dɩ̀ bələ nii dəyuu dìə̀ tə wa. 9 Salʋmʋn nə lwə̀ dìə̀ tə ʋ zwɛ̀ kwa nə, ʋ kwalɩ ka badɩan tə nə, də dapɩparan, ʋ ga ja sɩsaban ywəŋə ʋ ma ja tə ʋ zɩgɩ. 10 Ʋ lwə̀ dəyuu dìì tə yuu də tɩa nə yɩ jɩvaŋɩ yiə bonu, ʋ ja sɩsaban dɛɛ ʋ ma ja tə ʋ marɩ Yɩɩ dìə̀ tə nə.

11 Ba-Yígúrə́-Jə-Tiu swɩ̀n Salʋmʋn con ʋ wʋ́: 12 «Dìə̀ ka tə n nə wulə n lwe nətən, də n nə twá yìə̀n tə nə, à nə pɩn ba pʋ́pʋ́nɩ́ sə tə tʋn, də n nə twá yìə̀n tə nə, à nə pɩn nii sə n tʋn, n nə twá à yìə̀n tə mama nə, à nə pɩn nii tə yuu wa, à wá pa nikanɩ tə à nə kàn də n nyɩna Davidə jì kʋ pa mʋ́. 13 À wá ya dìə̀ ka tə wa, Yɩzərayɛlə lalʋʋ tə titəŋi wa, yá à bá vɩ Yɩzərayɛlə lalʋʋ tə, kʋ nə yɩ à mʋ̀ nyiən à dʋgʋ.»

14 Salʋmʋn lwə̀ dìə̀ tə ʋ zwɛ̀. 15 Dìə̀ tə waa con bírí tə yɩ ʋ zɩgɩ ka tɩa con, ʋ larɩ sɩsaban dapɩparan ka yɩra, ʋ ja dɩ̀ ʋ yí ka badɩan. Mə nətʋ nə ʋ ja dapɩparan ʋ piri dìə̀ tə wa tə mama, ʋ ga ja nyənbori dapɩparan ʋ piri dìə̀ tə tɩpɩrɩ tə yuu nə. 16 Salʋmʋn ja sɩsaban dapɩparan, ʋ zɩgɩ dìə̀ tə waa con dibiu tə tɩpɩrɩ nə, ʋ larɩ bírə́ tə yɩra, kʋ dɩ̀ kʋ yí jɩvaŋɩ yiə sapʋa. Mə nətʋ ʋ lwə̀ dibiu təntə dìə̀ tə waa con, sə kʋ ya Yɩɩ cɩcɩ nyiən, sə kʋ ya bwálɩ́ tə kʋ nə yɩ parɩ. 17 Yɩɩ dìə̀ tə kwa con dibiu tə, kʋ yà nə wulə dibiu tə nə yɩ Yɩɩ cɩcɩ nyiən tə kwa con, yà jə jɩvaŋɩ yiə sapwilə. 18 Ba yà sə̀ dìə̀ tə wa sɩsaban dɛɛ tə, ba fwa gaʋ divɛn tɩ̀ʋ́ bɩ̀á, də wiən duən, ndə tɩ̀án pùnə́ nə tə nə súrí, ba tún tə yɩra. Bírə́ tə mama yà yɩ ka piri də sɩsaban dɛɛ, kʋ pa ba wàrɩ̀ kapan mama ba nɩ.

19 Salʋmʋn kwɛn dibiu tə kʋ nə yɩ Yɩɩ cɩcɩ nyiən tə, sə ba kə Ba-Yígúrə́-Jə-Tiu nimarʋ culu daka tə kʋ wa. 20 Dibiu tə kʋ nə yɩ Yɩɩ cɩcɩ nyiən tə, danɩ yɩ jɩvaŋɩ yiə sapʋa, kʋ wanɩ yɩ jɩvaŋɩ yiə sapʋa, kʋ yuu də tɩa danɩ yɩ jɩvaŋɩ yiə sapʋa. Salʋmʋn yà tà kʋ də sɩ́án, tə nə ba durən jə. Yɩɩ joŋi bwálɩ́ tə ba nə wá ma sʋ̀rɩ́ wusinə tə, yà wulə kwa con dibiu tə wa, ʋ nə púə́ kʋ nə də sɩsaban dɛɛ, ʋ ga tà də sɩ́án tə nə ba durən jə. 21 Salʋmʋn mwàlɩ̀ dìə̀ tə waa tə mama, də sɩ́án tə nə ba durən jə. Ʋ fwa sɩ́án banzala nəmɩnɩ ʋ kə dibiu tə ʋ nə mwàlɩ̀ də sɩ́án, kʋ nə yɩ Yɩɩ cɩcɩ nyiən tə mimii nə. 22 Ʋ dàń yà ja sɩ́án ʋ ma mwàlɩ̀ dìə̀ tə mama, ʋ mwàlɩ̀ dìə̀ tə bwálɩ́ mama. Ʋ jɩn sɩ́án ʋ ma mwàlɩ̀ Yɩɩ joŋi bwálɩ́ tə mama, kʋ yà nə wulə dibiu tə nə yɩ Yɩɩ cɩcɩ nyiən tə mimii nə.

23 Ʋ fwa malɩkɛ bələ, ba nə boŋə kerubə* nyɩnyɩga, də gaʋ olivə* tɩ̀án dɛɛ, ʋ kə dibiu tə wa, kʋ nə yɩ Yɩɩ cɩcɩ nyiən. Tə yɩɩ nə danɩ yà yɩ jɩvaŋɩ yiə fugə. 24 Təntən nyiən tə vàn nədʋ danɩ yà yɩ jɩvaŋɩ yiə bonu, bələ nii vàn tə də danɩ yà yɩ jɩvaŋɩ yiə bonu. Kʋ nə zɩgɩ vàn don nii nə, kʋ va kʋ yí vàn don nii nə, kʋ yɩ jɩvaŋɩ yiə fugə. 25 Bələ nii nyiən tə də yà yɩ jɩvaŋɩ yiə fugə. Tə mɛ bələ cuni də tə danɩ yà yɩ nədʋ. 26 Malɩka tə ba nə boŋə Kerubə nyɩnyɩga tə, yuu danɩ də tɩa yà yɩ jɩvaŋɩ yiə fugə, bələ nii nyiən tə də yà yɩ nətʋ. 27 Salʋmʋn zɩgɩ malɩkɛ tə ba nə boŋə kerubə nyɩnyɩga tə, dìə̀ tə titəŋi wa. Ba tɩɩn tə vànà tə. Təntən nyiən tə vàn yà dwen bírə́ tə nə, bələ nii nyiən tə də vàn yà dwen bírə́ tə don tə nə. Tə vànà bələ tə nə wulə dìə̀ tə titəŋi tə wa, dàń yà dwen duən nə. 28 Salʋmʋn dàń ja sɩ́án, ʋ ma mwàlɩ̀ malɩkɛ bələ tə, ba nə boŋə kerubə nyɩnyɩga tə.

29 Salʋmʋn pɩn ba sə̀ malɩkɛ tə ba nə boŋə kerubə nyɩnyɩga, də kʋra tɩ̀án nɛɛ nyɩnyɩga, də tɩ̀án punə nyɩnyɩga, ba tún Yɩɩ tə dìə̀ tə waa də ka kàrá con, bírí tə mama yɩra. 30 Salʋmʋn ja sɩ́án ʋ ma mwàlɩ̀ Yɩɩ dìə̀ tə dibɩa bələ tə wa tɩpɩrɩ tə.

31 Salʋmʋn lɩ mimii, dibiu tə nə yɩ Yɩɩ cɩcɩ nyiən tə yɩra, kʋ nə jə bòrə̀n bələ, tə nə yɩ gaʋ olivə tɩ̀án dɛɛ. Bírə́ tə nə tì ka pwɛ̀ dəkurən bonu, bòrù tə yà yɩ dəkuu nədʋ. 32 Mimii bòrə̀n bələ tə yɩ Salʋmʋn pɩn ba sə̀ malɩkɛ tə ba nə boŋə kerubə nyɩnyɩga, də kʋra tɩ̀án nɛɛ nyɩnyɩga, də tɩ̀án punə nyɩnyɩga, ba tún tə yɩra, ʋ ga mwàlɩ̀ tə də sɩ́án. Ʋ mwàlɩ̀ malɩkɛ tə ba nə boŋə kerubə nyɩnyɩga tə, də kʋra nɛɛ tə, də sɩ́án. 33 Ʋ ja gaʋ olivə tɩ̀án dɛɛ, ʋ ma fwa Yɩɩ dìə̀ tə də bòrə̀n. Ba nə pwɛ̀ bírə́ tə dəkurən banɩa, bòrə̀n tə yà yɩ kʋ dəkuu nədʋ. 34 Ʋ fwa nyənbori dapɩparan bələ, ʋ kə bòrù tə təntən vàn tə nə, tə nə wàá tə súrí də tə suŋə, ʋ ga kə duən bòrù tə vàn tə don nə. 35 Salʋmʋn pɩn ba sə̀ malɩkɛ tə ba nə boŋə kerubə nyɩnyɩga tə, də kʋra tɩ̀án nɛɛ nyɩnyɩga, də tɩ̀án pùnə́ tə nə súrí nyɩnyɩga, ʋ tún tə yɩra, ʋ ga ja sɩ́án ʋ ma mwàlɩ̀ tə.

36 Kʋ kwa nə, ʋ lwə̀ bírə́, ʋ ja kɩkarɩ dəwoo tə. Bírə́ təntə waa yɩ kapana ba nə sə̀, bərənɛɛ batwa, də sɩsaban baŋɩ birinaa nədʋ, tə nə tɩɩn duən yɩra.

37 Ba tún Ba-Yígúrə́-Jə-Tiu dìə̀ tə dəkuu Salʋmʋn pàrɩ̀ tə bɩna banɩa nii nə, cànà tə wa, ba nə boŋə Zivə. 38 Ba lwə̀ Ba-Yígúrə́-Jə-Tiu dìə̀ tə mama ba zwɛ̀, Salʋmʋn pàrɩ̀ tə bɩna fugə də nədʋ bɩnɩ tə wa, cànà tə wa, ba nə boŋə Bulə, ka nə yɩ cànɩ̀ nana nii nyiən. Ba lwə̀ ka bwálɩ́ mama ba zwɛ̀, ndə ka nə mɛ, sə ka ya nətʋ. Salʋmʋn fwa bɩna barpɛ ʋ ma lwà ka.