Salʋmʋn padiə tə lwiu yoo
7
1 Salʋmʋn lwà ʋ tətə padiə. Ʋ fwa bɩna fugə də batwa, ʋ ma lwà ka ʋ zwɛ̀ mɩ́ámɩ́án. Mə nətʋ ʋ dàń lwə̀ patɩʋ tə mama ʋ zwɛ̀.2 Ʋ dí yáá ʋ lwà dìə̀ tə, ba nə boŋə Liban Pun tə. Ka danɩ yɩ jɩvaŋɩ yiə bíí, ka wanɩ yɩ jɩvaŋɩ yiə finu. Ka yuu də tɩa yɩ jɩvaŋɩ yiə fɩtwa. Ka yà zɩga sɩsaban dɛɛ bírí puŋə banɩa yuu wa. Sɛdərə baŋɩ yà tígə́ sɩsaban ywəŋə bírí puŋə tə yuu wa. 3 Dəyuu tə yà yɩ sɩsaban dapɩparan, ba nə púə́ baŋɩ sapwɩlə də bonu yuu wa, tə nə tɩɩn fugə də bonu bonu, lɛ́ɛ́ batwa ywəŋə tə yuu wa. 4 Cələrə lɛ́ɛ́ batwa yà wulə dìə̀ tə vàn nədʋ mama nə. Cələri nədʋ mama lɛ́ɛ́ batwa tə wa, yà yɩ kʋ te də kʋ don. 5 Cələrə tə mama danɩ də tə wanɩ yà mɛ duən, tə ga te duən lɛ́ɛ́ batwa tə wa. 6 Salʋmʋn lwə̀ dəwoo dìə̀ tə yáá nə. Kʋ danɩ yɩ jɩvaŋɩ yiə finu, kʋ wanɩ yɩ jɩvaŋɩ yiə fɩtwa. Ʋ lwə̀ ywəŋə napakwalʋ dìə̀ tə yáá nə. 7 Ʋ lwə̀ padiə bwálɩ́ tə ʋ jəni, ʋ ma bʋ̀rɩ̀ bʋra. Ʋ ja sɩsaban dɛɛ ʋ zɩgɩ ka tɩa, ʋ piri ka, ʋ dɩ̀ ʋ yí ka badɩan nə.
8 Ʋ dìə̀ tətə ʋ yà nə wulə ka wa, yà yɩ ka wulə dəwoo don wa kʋ cɩcɩ. Ka də yà yɩ ʋ lwə̀ ndə dìə̀ tə don tə nə, ʋ nə jəni ka wa, ʋ bʋ̀rɩ̀ bʋra tə. Salʋmʋn tə lwə̀ dìə̀ don, ka nə nyən ndə ka nə, ʋ pa Farawon bʋ̀á tə nə, ʋ nə swe ʋ ma fwa ʋ kan.
9 Tə dìì tə mama lwiu wa, kʋ yɩ kapana, ba nə kúrí ba sə̀ tə yɛɛ bələ tə mama. Yá mə tə mʋ̀ nə ba ma lwà dìə̀ tə, kʋ nə zɩgɩ ka dəkuu, kʋ dɩ̀ kʋ yí ka yuu, kʋ súrí dəwofarʋ tə bírí tə nə. 10 Dìì tə dəkurən yɩ kapana nəfaran tə nə ziən nə ba ma tún tə. Tə yɩ kapana tə nə yí jɩvaŋɩ yiə fugə də jɩvaŋɩ yiə nana. 11 Mə tə mʋ̀ yuu wa nə ba tún kapana tə, ba nə sə̀, də sɩsaban baŋɩ tə. 12 Dəwofarʋ tə bírə́ tə mama, ka nə kɩkarɩ kʋ yà jə kapana ba nə sə̀ lɛ́ɛ́ batwa duən yuu wa, də sɩsaban baŋɩ lɛ́ɛ́ nədʋ, ndə Ba-Yígúrə́-Jə-Tiu dìə̀ tə waa con dəwoo tə, də Yɩɩ dìə̀ tə yáá napakwalʋ tə nə yɩ nətʋ.
Tʋ̀tʋ̀nán tə Salʋmʋn nə pɩn Hiramə nə
13 Pɩ̀ʋ́ Salʋmʋn tʋn, sə ba pɩ̀à tʋtʋnʋ don Tirə tɩʋ tə wa, ʋ yɩrɩ nə yɩ Hiramə. 14 Ʋ yɩ Nɛfətali dwíí tə wa kadənu don bìú. Ʋ nyɩna yɩ Tirə tíú, ʋ tətə yà ga tʋŋa də cɩnɩa. Ʋ yà jə wʋbʋŋa də yənu, cɩnɩan tʋ̀tʋ̀nán mama yuu wa. Ʋ twi pɩ̀ʋ́ Salʋmʋn con, yá ʋ dàń tʋn pɩ̀ʋ́ Salʋmʋn tʋ̀tʋ̀nán tə mama tə nii sú.
15 Hiramə fwa cɩnɩan ywəŋə bələ, tə yuu də tɩa danɩ yɩ jɩvaŋɩ yiə fugə də nana, yá ŋwənə jɩvaŋɩ yiə fugə də bələ nə wàá tə nədʋ mama titəŋi ka kɩkarɩ. 16 Ʋ fwa ywəŋə yun zɩlan bələ də cɩnɩan, sə ba tún ywəŋə tə yuu wa. Tə nədʋ mama yuu də tɩa yɩ jɩvaŋɩ yiə bonu. 17 Ʋ tə fwa wogɩganan duən ndə banzala nəmɩnɩ nə, sə ba tún ywəŋə yun zɩlan tə yuu wa. Yoŋi nədʋ mama yuu zɩlʋ yà jə tə barpɛ. 18 Ʋ tə fwa gərenadə tɩ̀ʋ́ bɩ̀á nyɩnyɩga. Ʋ ken tə lɛ́ɛ́ bələ ywəŋə tə yun zɩlan tə wogɩganʋ nədʋ mama nə. 19 Yoŋi mama yuu yà jə zɩlʋ bələ nii nyiən, kʋ yuu də tɩa danɩ nə yɩ jɩvaŋɩ yiə banɩa, kʋ ga nyən ndə buu mɩna pùní nə. 20 Gərenadə tɩ̀ʋ́ bɩ̀á nyɩnyɩga biələ yà kɩkarɩ zɩlan tə nə wulə ywəŋə bələ tə yuu wa, tə dɩ̀ tə bwə́lə́ ywəŋə tə bwálá nəfaran tə, zɩlan tə wogɩganan tə yuu con. 21 Ʋ cwɛn ywəŋə bələ təntə Yɩɩ dìə̀ tə napakwalʋ tə yáá con. Ʋ cwɛn jɩzən yoŋi tə, ʋ dɩ kʋ yɩrɩ Yakɛn, ʋ ga cwɛn jɩgwiə yoŋi tə, ʋ dɩ kʋ yɩrɩ Bozə. 22 Ba fwa wiən tə nə nyən ndə buu mɩna gapunə nə, ba tún ywəŋə tə yuu wa. Mə nətʋ ba tʋn ywəŋə tə tʋ̀tʋ̀nán tə ba zwɛ̀.
23 Ʋ fwa cɩnɩan kwarɩ nəfarʋ. Kʋ nə zɩgɩ kʋ nii tə vàn don nə, kʋ twá kʋ titəŋi wa, kʋ va kʋ yí kʋ nii tə vàn don, kʋ yɩ jɩvaŋɩ yiə fugə. Kʋ mama yà zə́n kʋ yɩ kəkəlu. Kʋ nii də tɩa yɩ jɩvaŋɩ yiə bonu. Kʋ nii kəkəlu tə yɩ jɩvaŋɩ yiə fɩtwa. 24 Ba yà nàn kʋ nii kiru tə də̀ń con, də gaʋ divɛn tɩ̀án lənə nyɩnyɩga, ba nə fwa də cɩnɩan ba ja kɩkarɩ. Jɩvaŋɩ yii mama wa, tə fugə nə wulə lá, tə ja kɩkarɩ lɛ́ɛ́ bələ. Tə də kwarɩ nəfarʋ tə mama yà yɩ ba nyɩan ba lwá naa nədʋ. 25 Kwarɩ nəfarʋ tə yà yɩ kʋ zɩga nɩan fugə də bələ nyɩnyɩga yuu wa, ba nə fwa də cɩnɩa. Tə batwa yáá yà te jɩzən saparʋ con, tə batwa yáá te yɩɩ yizwɩa con, tə batwa yáá te jɩgwiə saparʋ con, tə batwa tə duən yáá te yɩɩ yipɩan con, yá tə kwa ga te duən kwarɩ tə də̀ń nə. 26 Kwarɩ nəfarʋ tə ləni yà mɛ də jɩtalɩ wanɩ. Kʋ nii tə yà yɩ ba fwa kʋ ndə wùrú zʋŋa nii nə, ka nii nə yɩ ndə buu mɩna pùní nə. Nɩ́á litərə mʋ̀rʋ̀ sapwɩnɩa yà nə zwɩ kʋ wa.
27 Kʋ kwa nə Hiramə fwa cɩnɩan kòrə̀n fugə. Kòrə̀n tə nədʋ mama danɩ yà yɩ jɩvaŋɩ yiə banɩa, kʋ wanɩ yɩ jɩvaŋɩ yiə banɩa, kʋ yuu də tɩa yɩ jɩvaŋɩ yiə batwa. 28 Nə̀ń nətʋ ba nə fwa tə kòrə̀n təntə. Kʋ yɩ cɩnɩan pɩ́pàrán nə ba ma fwa tə. Cɩnɩan pɩ́pàrán təntə yà swaga duən wa kʋ səpunə banɩa tə mɛ wa. 29 Ba yà fwa gərən, də nɩan, də malɩkɛ ba nə boŋə kerubə nyɩnyɩga, ba tún cɩnɩan pɩ́pàrán tə yuu con, də tə də̀ń con, ba ga nàn kʋ də wiən tə nə ziə tɩa. 30 Kòrə̀n tə nədʋ mama yà jə cɩnɩan nɛɛ banɩa tə nə bəbəli. Tə nɛɛ tə yà jə wiən banɩa ndə pɩna nə. Pɩna təntə yɩ lugu ba nyɩan ba ma lwá tə də kòrù tə mɛ naa nədʋ. Tə yà yɩ tə wulə kòrə̀n tə də̀ń nɩgʋnjɩan banɩa tə nə, yá tə wà wiən tə nə ziə kʋ yɩra tə pɩrɩ tə kɛ̀ń. 31 Kòrə̀n tə waa con yà jə nii, kʋ danɩ nə yí jɩvaŋɩ yii nədʋ, kʋ nə ja dɩ̀ kʋ baan con. Kʋ nii təntə yà yɩ kəkəlu, kʋ wanɩ yà yɩ jɩvaŋɩ yii nədʋ də faan. Ba yà fwa wiən ba tún kʋ nii təntə də yɩra, ba ma nàn kʋ. Tə cɩnɩan pɩ́pàrán təntə wanɩ də tə danɩ yà mɛ duən, tə yà tà kəkələn. 32 Tə nɛɛ banɩa tə yà yɩ tə wulə kòrə̀n tə də̀ń nə. Naa tə nədʋ mama yɩɩ nə danɩ yà yɩ jɩvaŋɩ yii nədʋ də faan. 33 Tə nɛɛ təntə yà yɩ ba fwa tə ndə səsen kòrù nɛɛ nə. Tə lakəsə tə, də tə zantə tə, də tə rɛywɛn tə, də moyo tə mama yà yɩ lugu nə ba nyɩan ba ma fwa tə. 34 Kòrù tə nigʋnjɩan banɩa tə, yà jə wiən banɩa ndə nɛɛ nə, tə də kʋ mama yà nə yɩ won nədʋ. 35 Kʋ nii tə baan con yɩ ba nàn kʋ, ba kɩkarɩ ba ja dɩ̀ jɩvaŋɩ yii faan. Kòrù tə baan con, də kʋ də̀ń con, də kʋ cɩnɩan pɩ́pàrán tə mama yà yɩ won nədʋ. 36 Hiramə fwa malɩkɛ tə ba nə boŋə kerubə tə nyɩnyɩga, də gərən nyɩnyɩga, də kʋra nɛɛ nyɩnyɩga, ʋ tún bwálá pɩ́pàrán tə wa, won nə tə̀lə́ tə wa. Ʋ fwa wiən ʋ ma nàn kʋ mama ʋ kɩkarɩ. 37 Mə nətʋ nə ʋ fwa kòrə̀n fugə tə, yiri nədʋ. Tə yɩ lugu yiri nədʋ ʋ nyɩan ʋ ma fwa tə mama. Tə mama yà mɛ duən, tə ga nyən duən.
38 Ʋ fwa cɩnɩan kwarɛ fugə. Kʋ nədʋ mama yà jə jɩvaŋɩ yiə banɩa. Kʋ waa nɩ́á yà yí ndə litərə mʋ̀rʋ̀ də biəyardʋ nə. Kwarɩ mama yà wulə kòrə̀n fugə tə nədʋ mama yuu wa. 39 Ʋ zɩgɩ kòrə̀n tə bonu dìə̀ tə jɩzən vàn con, ʋ ga zɩgɩ tə bonu tə duən dìə̀ tə jɩgwiə con. Yá ʋ dàń zɩgɩ kwarɩ nəfarʋ tə dìə̀ tə jɩzən vàn con, kʋ nə daa jɩgwiə saparʋ də yɩɩ yipɩan con.
Yɩɩ dìə̀ tə waa zɩla tə mama
40 Hiramə fwa cakwarɩ, ʋ fwa pɛlə, də wùrú zwɩɩn sə ba kə jana là. Hiramə dàń tʋn tʋ̀tʋ̀nán tə mama ʋ zwɛ̀, ʋ pa pɩ̀ʋ́ Salʋmʋn nə, Ba-Yígúrə́-Jə-Tiu dìə̀ tə wa.
41 Kʋ yɩn ywəŋə bələ də tə yuu zɩlan kəkələn,
tə nə tígə́ ywəŋə bələ tə yuu wa.
Ʋ fwa wogəganan bələ,
sə tə pú ywəŋə tə yuu zɩlan kəkələn tə nə.
42 Ʋ fwa tɩ̀ʋ́ tə ba nə boŋə Gərenadiye tə bɩ̀á nyɩnyɩga biənɩa,
ʋ tún ywəŋə tə yuu wogəganan tə yuu wa, lɛ́ɛ́ bələ,
43 də kòrə̀n fugə tə,
də kwara fugə tə nə tígə́ tə yuu wa,
44 də kwarɩ nəfarʋ tə,
də nɩan fugə də bələ nyɩnyɩga tə,
kwarɩ nəfarʋ tə nə zɩga tə yuu wa,
45 də cakwarɩ tə, də pɛlə tə, də wùrú zwɩɩn tə, ba nə ma kəni jana.
Tə mʋ̀ wiən təntə mama Hiramə nə fwa, ʋ pa pɩ̀ʋ́ Salʋmʋn nə, Ba-Yígúrə́-Jə-Tiu dìə̀ tə wa, yà yɩ də cɩnɩan, kʋ nə swə́lə́. 46 Pɩ̀ʋ́ tə pɩn ba nyɩan cɩnɩan, ba ma lwá tə Zʋrədɛn vara tə wa, Sukotə tɩʋ tə, də Sarətan tɩʋ tə pwə́rə́ wa. 47 Salʋmʋn pɩn ba fwa zɩla təntə mama, ba kə Yɩɩ dìə̀ tə wa, ʋ ga wà pɩn ba kəri cɩnɩan tə dun nə mɛ nətʋ ba lwarɩ, tə yà nə dáá zənzən yɩrɩ.
48 Salʋmʋn tə pɩn ba fwa zɩla tə duən tə mama, sə ba kə Ba-Yígúrə́-Jə-Tiu dìə̀ tə wa.
Tə mʋ̀ nə yɩ sɩ́án joŋi bwálɩ́ tə,
ba nə ma sʋ̀rɩ́ wusinə,
də sɩ́án tabɩlʋ tə,
ba yàá nə túŋə́ Yɩɩ dìə̀ dipɛn tə kʋ yuu wa,
49 də sɩ́án canzɩlan fugə tə,
tə bonu nə zɩga dibiu tə nə yɩ Yɩɩ cɩcɩ nyiən tə nii nə, jɩzən vàn yuu,
tə bonu duən ga zɩga kʋ jɩgwiə vàn yuu,
də wiən tə nə yɩ ndə pùnə́ nə,
də cànán tə, də pɩnan tə,
50 də sɩ́án kwarɩ tə, də sɩ́án sɩ̀án tə, də sɩ́án wùrú zwɩɩn tə, ba nə ma twɛ́n nɩ́á, də sɩ́án wùrú zwɩɩn tə, ba nə ma kəni jana, də sɩ́án wusinə nəvwe tə,
də dibiu tə nə yɩ Yɩɩ cɩcɩ nyiən mimii tə sɩ́án bòrù nɛɛ tə, də kwa con dìə̀ tə mimii tə nyiən tə.
51 Mə kʋ zɩgɩ nətʋ, pɩ̀ʋ́ Salʋmʋn ma tʋn Ba-Yígúrə́-Jə-Tiu dìə̀ tə tʋ̀tʋ̀nán tə mama ʋ zwɛ̀. Ʋ dàń pɩn ba ja wiən tə ʋ nyɩna Davidə yà nə tún ʋ pa Ba-Yígúrə́-Jə-Tiu nə, ba bà. Tə mʋ̀ nə yɩ səbiu, də sɩ́án, də zɩla duən. Ʋ ken tə Ba-Yígúrə́-Jə-Tiu dìə̀ tə jɩjə wiən tə wa.