Ba tún Yɩɩ nimarʋ culu daka tə Yɩɩ dìə̀ tə wa
8
1 Kʋ kwa nə, Pɩ̀ʋ́ Salʋmʋn ken Yɩzərayɛlə lɩ̀à nəkwɩna tə, də ba dwíə́ tə yáá tɩ̀án tə, də Yɩzərayɛlə lɩ̀à dìì tɩ̀án tə duən yáá nə, Zwerizalɛmə wa, sə ba zɩn Ba-Yígúrə́-Jə-Tiu nimarʋ culu daka tə, Davidə sadiyuu tə wa, ba nə boŋə Sion, ba ja bà Ba-Yígúrə́-Jə-Tiu dìə̀ tə wa. 2 Yɩzərayɛlə bara tə mama twi duən yáá nə pɩ̀ʋ́ Salʋmʋn con, sə ba də́ cànà tə, ba nə boŋə Etanimə, ka nə yɩ barpɛ nii cànà.3 Yɩzərayɛlə lɩ̀à nəkwɩna tə mama twi, yá Yɩɩ joŋwana tə dàń zɩn Ba-Yígúrə́-Jə-Tiu nimarʋ culu daka tə. 4 Ba zɩn Ba-Yígúrə́-Jə-Tiu nimarʋ culu daka tə, ba ga tì Yɩɩ jə́rə́ gànsìlí tə, də Yɩɩ zɩla tə mama, tə yà nə wulə kʋ wa, ba ja pìí. Kʋ yɩn Yɩɩ joŋwana tə, də Levi dwíí tə nə zɩn tə. 5 Pɩ̀ʋ́ Salʋmʋn də Yɩzərayɛlə lalʋʋ tə mama ba nə wulə də wá, Ba-Yígúrə́-Jə-Tiu nimarʋ culu daka tə yáá con, dàń fwa jwəŋə, də vanmɩnɩ, də vanfaran, tə nə dáá zənzən. Tə máŋá yà wàrɩ̀ tə maŋa, tə ma wàrɩ̀ tə gàlɩ̀ də. 6 Yɩɩ joŋwana tə ja Ba-Yígúrə́-Jə-Tiu nimarʋ culu daka tə, ba zʋ ba tún ka yipaa nə, dibiu tə wa, kʋ nə yɩ Yɩɩ cɩcɩ nyiən. Ka yà yɩ ka tígə́ malɩkɛ tə, ba nə boŋə kerubə nyɩnyɩga vànà də̀ń nə. 7 Cɩ́gá, malɩkɛ tə, ba nə boŋə kerubə nyɩnyɩga tə, vànà tə yà yɩ tə tɩɩn tə zɩga, Yɩɩ nimarʋ culu daka tə bwálɩ́ tə yuu con. Tə wá piri Yɩɩ nimarʋ culu daka tə, də ka dɛɛ tə, ba nə ma zɩŋa ka yuu nə. 8 Daka tə səpunə dɛɛ təntə, ba nə ma zɩŋa ka yà dara. Lìù yà nə wulə dìə̀ tə naparʋ tə wa, n na tə níə́ dibiu tə wa, kʋ nə yɩ Yɩɩ cɩcɩ nyiən. Yá kʋ dàń nə tà də n nə zɩga kàrá wa. Mə tə yɩn kʋ bwálɩ́ tə wa, kʋ bà kʋ yí zə̀n. 9 Won don mama yà tə̀lə́ nimarʋ culu daka tə wa, də kʋ nə tà pɩ̀ràn pɩpɛɛ bələ tə, tə nə yɩ Yɩɩ nii tə, Moyizə nə tún ka wa Ɔrɛbə nə. Kʋ yɩn máŋá tə wa, Ba-Yígúrə́-Jə-Tiu nə tún nimarʋ də Yɩzərayɛlə dwíí tə, máŋá tə wa, ba nə nan Ezwipətə lʋʋ nii tə wa.
10 Máŋá tə wa Yɩɩ joŋwana tə nə nan kwa con dibiu tə wa, bakwan súə́ Ba-Yígúrə́-Jə-Tiu dìə̀ tə nii.
11 Yɩɩ joŋwana tə wà wanɩ ba zɩgɩ, sə ba tʋn ba tʋtʋŋɩ tə, bakwan tə yɩrɩ. Cɩ́gá, Ba-Yígúrə́-Jə-Tiu dun tə yà súə́ ʋ dìə̀ tə.
12 Salʋmʋn dàń swɩ̀n, ʋ wʋ́: «Ba-Yígúrə́-Jə-Tiu, n yà swɩ̀n də n wá ya yikunu bwálɩ́ nə! 13 Yá à mʋ̀ lwə̀ dìə̀ à pa mʋ́. Kʋ yɩ bwálɩ́, n nə wá ya kʋ wa, máŋá mama wuuu.»
Sʋran tə Salʋmʋn nə swɩ̀n, ʋ ma pa Yɩɩ dìə̀ tə Yɩɩ nə
14 Yɩzərayɛlə lalʋʋ tə mama yà twi duən yáá nə. Salʋmʋn viviri ʋ yáá, ʋ kə lalʋʋ tə con, ʋ ga lòrì sə Yɩɩ fwa zəni ba yɩra. Lɩ̀à tə mama yà yɩ ba zɩga yɩɩ nə. 15 Ʋ swɩ̀n, ʋ wʋ́: «À bwɩ Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. Ʋ tətə nə pɩn kʋ tə, ʋ yà nə kàn nii də à nyɩna Davidə nii sú, ndə ʋ nə swɩ̀n, ʋ wʋ́: 16 “À mʋ̀ nə lɩ Yɩzərayɛlə lɩ̀à tə, ba nə yɩ à mʋ̀ lɩ̀à, Ezwipətə lʋʋ nii tə wa. Kʋ nə zɩgɩ dɩɩn təntə nə, à wà tɩʋ kúrí Yɩzərayɛlə tɩan tə mama wa, sə ba lwà Yɩɩ dìə̀ lá nə, ba pa nə, sə à bɩrɩ à tɩ̀àn ka wa. Yá à kúrí n mʋ̀ Davidə, sə n ya Yɩzərayɛlə lɩ̀à tə, ba nə yɩ à mʋ̀ lɩ̀à tə yáá tíú.” » 17 Salʋmʋn tə swɩ̀n ʋ súrí lá, ʋ wʋ́: «À nyɩna Davidə yà soni, sə ʋ lwà dìə̀, ʋ pa Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ. 18 Yá Ba-Yígúrə́-Jə-Tiu swɩ̀n à nyɩna Davidə con, ʋ wʋ́: “Kʋ ziən də n nə ken n pubʋŋa wa, sə n lwà dìə̀ n pa nə. 19 Kʋ dàń nə bá ya n mʋ̀ nə wá lwà dìə̀ tə. Kʋ yɩ n bìú tə, ʋ nə wá nan n kwíə́ də̀ń, nə wá lwà dìə̀ ʋ pa nə.” 20 Ba-Yígúrə́-Jə-Tiu twá ʋ sʋgʋ tə nii nə ʋ yà nə swɩ̀n. À jon à nyɩna Davidə yuu nə, à jə̀ń Yɩzərayɛlə lɩ̀à padaʋ tə yuu wa, ndə Ba-Yígúrə́-Jə-Tiu yà nə swɩ̀n kʋ yoo nətʋ. Yá à dàń lwə̀ dìə̀ ka tə, Ba-Yígúrə́-Jə-Tiu yɩrɩ, ʋ nə yɩ Yɩzərayɛlə lɩ̀à Yɩɩ. 21 À lɩ bwálɩ́ à tún à pa Yɩɩ nimarʋ culu daka tə nə. Yɩɩ tún nimarʋ təntə də nə nyɩna-ba, máŋá tə wa, ʋ nə lɩ ba Ezwipətə lʋʋ nii tə wa.»
Salʋmʋn yɩjʋnɩ
22 Salʋmʋn zàn ʋ zɩga Yɩɩ joŋi bwálɩ́ tə yáá nə, Yɩzərayɛlə lalʋʋ tə mama yáá con. Ʋ zɩ̀n ʋ jɩ̀àn ʋ te yɩɩ nə, ʋ ga swɩ̀n, ʋ wʋ́:
23 «Ba-Yígúrə́-Jə-Tiu, Yɩzərayɛlə lɩ̀à Yɩɩ, Yɩɩ don tə̀lə́ ʋ nə yɩ ndə n nə, lanworu wa, nə à yə̀ə́ tɩa yuu wa. N twá n wʋywaŋʋ* tə, də n nimarʋ tə nii nə, n nə tún də n tʋ̀tʋ̀nà tə, ndə kʋ nə mɛ sə kʋ ya nətʋ, də ba nə zìlí mʋ́ də ba bɩcanɩ mama. 24 N twá kʋ tə nii nə, n nə swɩ̀n n tʋtʋnʋ Davidə con, ʋ nə yɩ à nyɩna. Yá kʋ tə n nə swɩ̀n də n nii, n tətə pɩn kʋ nii sú zə̀n kʋ tə. 25 Sɩ́ʋ́n nə, Ba-Yígúrə́-Jə-Tiu, Yɩzərayɛlə lɩ̀à Yɩɩ, n dàń tə pa kʋ tə n nə swɩ̀n n tʋtʋnʋ Davidə con, ʋ nə yɩ à nyɩna tə nii sú. N swɩ̀n ʋ con, n wʋ́: “N dwíí tə n nə wá kə lʋʋ wa nə jɩn ba tɩ̀àn, ba twá à nə zəni, ndə n nə twá à nə zəni nətʋ, máŋá mama lìù wá ya ba wa, ʋ nə wá jə̀ń Yɩzərayɛlə lɩ̀à padaʋ tə yuu, à yáá con.” 26 Sɩ́ʋ́n nə, n mʋ̀ Yɩzərayɛlə lɩ̀à Yɩɩ tə, à lòrì mʋ́, sə n dàń pa kʋ sʋgʋ tə, n nə swɩ̀n n tʋtʋnʋ Davidə con, ʋ nə yɩ à nyɩna tə nii sú!
27 Yá cɩ́gá mama, n mʋ̀ Yɩɩ wàá tɩa yuu wa n yanɩ? Lanworu də kʋ dánɩ́ tə mama, n mʋ́ Yɩɩ tə wàrɩ̀ kʋ də wa. Nɛɛ bagalɩ nə dìə̀ ka tə, à nə lwə̀ à pa mʋ́, dàń mun zənzən? 28 À dàń lòrì mʋ́ Ba-Yígúrə́-Jə-Tiu tə nə yɩ à Yɩɩ, sə n cʋgʋ à mʋ̀ n tʋtʋnʋ tə yɩjʋnɩ, də à lòrì tə. Cʋgʋ à mʋ̀ n tʋtʋnʋ tə bubwiə, də à yɩjʋnɩ tə, à nə swɩ̀n n con, zə̀n kʋ tə. 29 N dàń súrí n yɩ́á n ywàń dìə̀ ka tə yuu zəni, tɩtɩn də yɩcaʋ. Ka mʋ̀ nə yɩ bwálɩ́, n nə swɩ̀n də ba wá bon n yɩrɩ tə lá nə. N dàń cʋgʋ à mʋ̀ n tʋtʋnʋ tə yɩjʋnɩ, à nə fwa bwálɩ́ kʋ tə wa.
30 Cʋgʋ à kori də Yɩzərayɛlə lɩ̀à tə, ba nə yɩ n mʋ̀ lɩ̀à tə kori, nə nə boŋə nə kəni n nə, bwálɩ́ kʋ tə wa. Zɩgɩ lanworu tə wa bwálɩ́ tə wa n nə wulə, n cʋga nə kori, n ga kwɛn nə cʋna n lɩ, nə də mʋ́ pwə́rə́ wa.
31 Lìù nə cʋ̀gʋ̀ ʋ don nə, ba nə pɩn ʋ dù dùrə̀ n joŋi bwálɩ́ tə yáá con dìə̀ ka tə wa, 32 zɩgɩ lanworu tə wa, n cʋgʋ n tʋ̀tʋ̀nà tə, n ga bʋ̀rɩ̀ ba bʋra. Pa càn yí lìù tə nə cʋ̀gʋ̀ ʋ don tə nə, n ga pa ba lwarɩ də lìù tə, ʋ nə yɩ cɩ́gá tíú tə wà yoo cʋ̀gʋ̀.
33 Máŋá tə wa, dʋŋa nə ta Yɩzərayɛlə lɩ̀à tə ba nə yɩ n mʋ̀ lɩ̀à ba də́, n lɩ̀à tə nə tʋn cʋna ba zɩgɩ n nə yɩrɩ, ba nə pìí ba bà n con, ba bʋ n yɩrɩ tə nə, ba nə jʋn mʋ́, ba ga lòrì mʋ́ dìə̀ ka tə wa, 34 zɩgɩ lanworu tə wa n cʋgʋ ba. Kwɛn Yɩzərayɛlə lɩ̀à tə, ba nə yɩ n mʋ̀ lɩ̀à tə cʋna n lɩ, n mʋ̀ də ba pwə́rə́ wa. Yá n dàń wá pa ba pìí ba bà lʋʋ nii tə wa, n nə pɩn ba nyɩna-ba nə.
35 Máŋá tə lanworu nə sun, dwà ga wàrɩ̀ ka nɩ̀, ba nə tʋn cʋna ba zɩgɩ n nə yɩrɩ, ba nə jʋn mʋ́ bwálɩ́ kʋ tə wa, ba pa n yɩrɩ tə na dun, ba ga yá ba cʋna tə, n nə mun ba tə yɩrɩ, 36 zɩgɩ lanworu tə wa, n cʋgʋ ba. Kwɛn n tʋ̀tʋ̀nà tə cʋna tə, n lɩ n mʋ̀ də ba pwə́rə́ wa, ba nə yɩ n mʋ̀ lɩ̀à, ba ga yɩ n tʋ̀tʋ̀nà yɩrɩ. Cɩ́gá, n wá bɩrɩ ba cwəŋə nəzəŋu tə, ba nə mɛ sə ba twá, yá n wá pa dwà nɩ̀ tɩa tə yuu wa, n nə pɩn n lalʋʋ tə nə, ndə bìú tori nə nyɩna jɩjə wa.
37 Máŋá tə wa, nɩan nə twi tə zʋ lʋʋ nii tə wa, nə à yə̀ə́ yayɩpwarʋ, nə à yə̀ə́ kárɩ́ wiən nə kʋa, nə à yə̀ə́ tə nə pʋa kárɩ́ tə wa, jə̀rə̀bakwɛn də jə̀rə̀n nə pɛ̀ duən tə bà zənzən, dʋŋa nə twi ba pú Yɩzərayɛlə lɩ̀à tə, ba kə ba tɩan tə wa, ba nə lwə̀ ba kɩkarɩ də bə́rí, yolwan yiri mama nə twi, nə à yə̀ə́ yayɩgʋ yiri mama nə twi, 38 yɩjʋnɩ tə mama, də lòrì yiri tə mama, Yɩzərayɛlə lɩ̀à tə nə wá lòrì n con, də ba bɩcanɩ mama, ba ga te ba jɩ̀àn dìə̀ ka tə con, 39 zɩgɩ lanworu tə wa, bwálɩ́ tə wa n nə wulə, n cʋgʋ ba kori. N wá kwɛn ba cʋna tə, n lɩ n mʋ̀ də ba pwə́rə́ wa. N dàń wá bà, n pa ba lìù mama na kʋ tə nə mɛ də wá, ndə ʋ tʋtʋnɛɛ tə nə yɩ nətʋ. Cɩ́gá, n mʋ̀ cɩcɩ nə yə̀ə́ ləzoni tə mama bɩcan nə yɩ nətʋ. 40 Kʋ nətʋ wá pa Yɩzərayɛlə lɩ̀à tə dəri n fən, máŋá tə mama wa, ba nə wá ya lʋʋ nii kʋ tə wa, n nə pɩn nə nyɩna-ba nə.
41-42 Cɩ́gá, dwíə́ nəkaran* wá nì n yɩrɩ tə nə wulə tə mɛ yuu wa, də n dɩ̀àn tə nə dáá nətʋ tə yoo. Vee ʋ nə tà Yɩzərayɛlə lɩ̀à tə, ba nə yɩ n mʋ̀ lɩ̀à tə wa lìù, ʋ nə wá nan lʋʋ nii, kʋ nə ŋʋna ʋ bà, n mʋ̀ yɩrɩ, ʋ nə twi sə ʋ jon mʋ̀ dìə̀ ka tə wa, 43 zɩgɩ lanworu tə wa, bwálɩ́ tə wa n nə wulə, n cʋgʋ ʋ kori. N dàń wá pa won tə mama vee tə nə lòrì n con, sə dwíə́ nəkaran tə mama tɩa yuu wa lwarɩ n yɩrɩ tə. Ba dàń wá dəri n fən, ndə Yɩzərayɛlə lɩ̀à tə nə, ba nə yɩ n mʋ̀ lɩ̀à, ba ga wá lwarɩ də dìə̀ ka tə à nə lwə̀ yɩ n mʋ̀ dìə̀.
44 Máŋá tə n lalʋʋ tə nə nan, sə ba ta kʋ̀ʋ̀ də ba dʋŋa, ba nə tì cwəŋə tə n nə bɩrɩ ba, ba nə viviri ba yáá ba te tɩʋ tə con, n nə kúrí, də dìə̀ tə con, à nə lwə̀ à pa mʋ́, ba ga lòrì mʋ́, 45 zɩgɩ lanworu tə wa, bwálɩ́ tə wa n nə wulə, n cʋgʋ ba yɩjʋnɩ tə, də ba lòrì tə, n ga pa ba də́ dɩ̀àn.
46 Máŋá don wa, Yɩzərayɛlə lɩ̀à tə wàá ba tʋŋa cʋna, ba zɩga n nə. Cɩ́gá, ləzwənə tə̀lə́, ʋ nə ba cʋna tʋŋa. N lɩŋa nə zàn ba yuu wa, kʋ pa n kə ba dʋŋʋ jɩɩn wa, dʋŋa tə nə jɩn ba, ba ja va yongaʋ, lʋʋ nii don wa, kʋ nə ŋʋna, nə à yə̀ə́ kʋ nə bwələ, 47 ba nə bʋn, ba ga viviri ba kwa ba ma sà ba cʋna tə, ba nə lòrì mʋ́ lʋʋ nii təntə wa, ba nə jìgə̀ ywə́ŋə́, ba swɩ̀n, ba wʋ́: “Nə tʋn cʋna, nə tʋn yolwana, nə tʋn kʋ tə nə ba ziən!” 48 Ba nə pìí ba bà n con, ba dʋŋa tə lʋʋ nii tə wa, ba nə yɩ ywə́ŋə́, də ba bɩcanɩ mama, də ba jə̀rí mama, ba nə zɩgɩ lá nə, ba te ba yáá lʋʋ nii tə con, n nə pɩn ba nyɩna-ba tə nə, də tɩʋ tə con n nə kúrí tə, də dìə̀ tə con à nə lwə̀ à pa mʋ́, 49 zɩgɩ yɩɩ nə, bwálɩ́ tə wa n nə wulə, n cʋgʋ ba yɩjʋnɩ, də ba lòrì tə, n ga pa ba dʋŋa tə dəri ba yinəgə. 50 N wá kwɛn n lalʋʋ tə cʋna tə, ba nə tʋn ba zɩgɩ n nə, də ba nə vɩga n nii tə, n lɩ n mʋ̀ də ba pwə́rə́ wa. N wá pa sə lɩ̀à tə nə jə ba yongaʋ tə wa dəri ba yinəgə. 51 Cɩ́gá, ba yɩ n mʋ̀ lalʋʋ, ba yɩ n tori, ba yɩ lɩ̀à tə n nə pɩn ba nan Ezwipətə càn nəfarʋ tə wa, tə nə yɩ ndə juu mən nə.
52 Súrí n yɩ́á à mʋ̀ n tʋtʋnʋ tə lòrì tə yuu wa, də n lalʋʋ tə lòrì tə yuu wa. Cʋgʋ nə kori máŋá mama, də nə nə bon nə kə n nə. 53 Cɩ́gá, n mʋ̀ nə pwɛ̀ nəba də lʋʋ níə́ tə duən tə tɩa yuu wa, sə nə ya n tori. N tətə nə twá n tʋtʋnʋ Moyizə nə, n swɩ̀n kʋ, máŋá tə wa, n nə lɩ nə nyɩna-ba Ezwipətə wa. N mʋ̀ nə yɩ Yuu-Tiu Ba-Yígúrə́-Jə-Tiu!»
Salʋmʋn lòrì, sə Yɩɩ fwa zəni Yɩzərayɛlə lɩ̀à yɩra
54 Máŋá tə Salʋmʋn nə jʋn Ba-Yígúrə́-Jə-Tiu wuuu, ʋ ga lòrì wá ʋ zwɛ̀, ʋ zàn Ba-Yígúrə́-Jə-Tiu joŋi bwálɩ́ tə yáá con, ʋ yà nə tʋa lá ʋ nadwana yuu, ʋ zɩ̀n ʋ jɩ̀àn ʋ te yɩɩ nə. 55 Ʋ zàn ʋ zɩgɩ yɩɩ nə, ʋ zɩ̀n ʋ kori ʋ kə yɩɩ nə, ʋ lòrì, sə Yɩɩ fwa zəni Yɩzərayɛlə lalʋʋ tə mama yɩra. Ʋ swɩ̀n, ʋ wʋ́: 56 «À bwɩ Ba-Yígúrə́-Jə-Tiu nə, ʋ nə pɩn sìə́ Yɩzərayɛlə lɩ̀à tə nə, ba nə yɩ ʋ mʋ̀ lalʋʋ, ndə ʋ nə kàn kʋ nikanɩ nətʋ. Cɩ́gá, ʋ tʋn kʋ tə mama, ʋ nə twá ʋ tʋtʋnʋ Moyizə nə ʋ swɩ̀n, yá sʋgʋ nədʋ mama wà tʋtʋ yɩn. 57 Ba-Yígúrə́-Jə-Tiu, ʋ nə yɩ nə Yɩɩ nə wá ya də nəba, ndə ʋ nə yɩn də nə nyɩna-ba nətʋ. Ʋ dàn ká vɩ nəba n dʋgʋ. Ʋ dàn ká yá nəba nə tətə yɩra wa. 58 Ʋ wá pa nə bɩcanɩ viviri tə te ʋ con, sə nə ga ya ʋ coŋi tə mama wa, nə twá ʋ yìə̀n tə nə, ʋ nə pɩn nii tə yuu wa, də tə tə nə, ʋ nə pɩn tə pʋ́pʋ́nɩ́, sə tə tʋn, də yìə̀n tə nə, ʋ nə bɩrɩ sə tə tʋn, ndə ʋ nə pɩn tə nə nyɩna-ba nə nətʋ. 59 Ʋ wá pa sʋ̀ràn tə tə, à nə twá tə nə, à ma lòrì n mʋ̀ Ba-Yígúrə́-Jə-Tiu, ya ʋ yáá con, yɩcaʋ də tɩtɩn. Dɩɩn mama wa, ʋ wá tʋn kʋ tə nə mɛ, ʋ pa à mʋ̀ ʋ tʋtʋnʋ tə nə , də ʋ lalʋʋ tə nə, ba nə yɩ Yɩzərayɛlə lɩ̀à tə. 60 Kʋ nətʋ dàń wá pa, tɩa yuu wa lʋʋ níə́ tə mama lwarɩ, də Ba-Yígúrə́-Jə-Tiu nə yɩ Yɩɩ, yá ʋ don kʋ́ʋ̀ tə̀lə́. 61 Á pɩan á bɩcan mama Ba-Yígúrə́-Jə-Tiu nə, ʋ nə yɩ nə Yɩɩ, ndə á nə pɩn wá á bɩcan zə̀n kʋ tə, sə á ma twá yìə̀n tə nə, ʋ nə pɩn tə pʋ́pʋ́nɩ́ sə tə tʋn, də yìə̀n tə, ʋ nə pɩn nii tə yuu wa.»
Salʋmʋn nə fwa jwəŋə, ʋ ma súrí Yɩɩ dìə̀ tə nii
62 Pɩ̀ʋ́ Salʋmʋn də Yɩzərayɛlə lɩ̀à tə mama fwa jwəŋə Ba-Yígúrə́-Jə-Tiu yáá con. 63 Salʋmʋn gʋa vanfaran mʋ̀rʋ̀ sapʋa də bələ, də vanmɩnɩ mʋ̀rʋ̀ bíí də sapʋa, ʋ ma fwa nimarʋ joŋi, ʋ pa Ba-Yígúrə́-Jə-Tiu nə. Mə kʋ zɩgɩ nətʋ, pɩ̀ʋ́ tə də Yɩzərayɛlə lɩ̀à tə mama dàń ma də́ Ba-Yígúrə́-Jə-Tiu dìə̀ tə nii súrú cànà. 64 Kʋ dɩɩn tə nə, pɩ̀ʋ́ tə pɩn dəwoo tə titəŋi tə, kʋ nə wulə Ba-Yígúrə́-Jə-Tiu dìə̀ tə yáá con jì Yɩɩ nyiən. Cɩ́gá, cɩnɩan joŋi bwálɩ́ tə, kʋ nə wulə Ba-Yígúrə́-Jə-Tiu dìə̀ tə yáá con, yà mun kʋ wàrɩ̀ jwəŋə tə ba nə sʋ̀rɩ́, də pupwən jwəŋə tə, kʋ nə yɩ varʋ càlɩ̀ tə, də nimarʋ jwəŋə tə nwɩn tə mama kʋ zɩŋa. Kʋ mʋ̀ nə pɩn, Salʋmʋn fwa jwəŋə tə, ba nə sʋrɩ, də pupwən jwəŋə tə, də nimarʋ jwəŋə tə nwɩn tə, ʋ sʋ̀rɩ́ dəwoo tə wa.
65 Kʋ máŋá təntə wa, Salʋmʋn də Yɩzərayɛlə lɩ̀à tə mama dí cànà. Ba yɩn púlí nəfarʋ ba nə nan Lebo-Hamatə, ba va ba yí Ezwipətə nacoru tə, ba bà ba zɩga, Ba-Yígúrə́-Jə-Tiu, ʋ nə yɩ nə Yɩɩ tə yáá con. Ba dí cànà tə, dɩan barpɛ, ba tə pìí ba bwɛ́ ka, dɩan barpɛ. Cànà tə dɩan tə mɛ yɩn fugə də banɩa. 66 Dɩan nana dɩɩn tə nə, ʋ pɩn lalʋʋ tə pìí ba vìí. Lalʋʋ tə lòrì, sə Yɩɩ fwa zəni pɩ̀ʋ́ tə yɩra, yá ba dàń zàn ba va, ba gànsìlə́ wa. Ba yà wulə pupwən wa, ba bɩcanɩ ga ywán, zəni tə mama yɩrɩ, Ba-Yígúrə́-Jə-Tiu nə fwa ʋ tʋtʋnʋ Davidə yɩra, də Yɩzərayɛlə lɩ̀à tə yɩra, ba nə yɩ ʋ mʋ̀ lɩ̀à.