Yuu-Tiu kʋ́ʋ̀ bwɛ́ ʋ bɩrɩ ʋ tɩ̀àn Salʋmʋn nə
9
1 Máŋá tə Salʋmʋn nə lwə̀ Ba-Yígúrə́-Jə-Tiu dìə̀ tə ʋ padiə tə, ʋ zwɛ̀, də kʋ tə mama ʋ yà nə sóní sə kʋ tʋn, ndə ʋ bɩcan nə pɩ̀à nətʋ, 2 Ba-Yígúrə́-Jə-Tiu kʋ́ʋ̀ twi ʋ bɩrɩ ʋ tɩ̀àn Salʋmʋn nə ʋ pandwɩa wa, nɛɛ bələ nii nə, ndə nətʋ tə, ʋ nə dí yáá ʋ bà ʋ con Gabawon nə. 3 Ba-Yígúrə́-Jə-Tiu swɩ̀n ʋ con, ʋ wʋ́: «À nì n yɩjʋnɩ tə, də lòrì tə, n nə lòrì à con. À sɛ̀ à jon dìə̀ ka tə n nə lwə̀, sə à yɩrɩ bon ka wa máŋá mama, sə ka ya à cɩcɩ nyiən, yá à yɩ́á də à bɩcan wá yà ka wa, máŋá mama. 4 Yá n mʋ̀ nə twá à nə də pùə́ nədʋ, n ga tì cɩ́gá cwəŋə, ndə n nyɩna Davidə nə twá à nə nətʋ, n nə twá yìə̀n tə mama nə, à nə pɩn mʋ́ nii, sə n tʋn, n nə twá à yìə̀n tə nə, à nə pɩn ba pʋ́pʋ́nɩ́ sə tə tʋn, də yìə̀n tə nə, à nə bɩrɩ sə tə tʋn, 5 à wá pa n pàrɩ̀ tə yà Yɩzərayɛlə wa, máŋá mama. À kàn nii də n nyɩna Davidə, à swɩ̀n də máŋá mama lìù wá ya n dwíí tə wa, n nə wá kə lʋʋ wa, ʋ jə̀ń Yɩzərayɛlə lɩ̀à padaʋ tə yuu wa. 6 Yá n mʋ̀ də Yɩzərayɛlə lalʋʋ tə mama dàń nə pìí á viviri á kwa, á ma sà nə, á nə wà yìə̀n tə à nə pɩn nii tə yuu wa, də yìə̀n tə à nə pɩn tə pʋ́pʋ́nɩ́, sə tə tʋn nə twá, á nə tʋŋa á pɩn woŋwanan nə, á twɩ á nadwana yuu tə yáá con, 7 à wá lɩ á mʋ̀ Yɩzərayɛlə lɩ̀à tə lʋʋ nii tə wa, à nə pɩn aba. À wá vɩ dìə̀ tə, à nə sɛ̀ sə à yɩrɩ tə bon ka wa, à dʋgʋ yiŋʋnɩ də nə. Yá Yɩzərayɛlə lɩ̀à tə dàń wá jì ndə mʋnmʋn də cavɩra lɩ̀à nə, dwíə́ nəkaran* tə mama wa. 8 Yá dìə̀ ka tə də ka dun tə mɛ nə tʋa, kʋ wá gwárɩ́ lìù tə mama, ʋ nə wá twá ka vàn nə ʋ kɛ̀ń. Ba wá swɩ̀n də bɛ̀ɛ̀ nə pɩn Ba-Yígúrə́-Jə-Tiu ma fwa lʋʋ nii kʋ tə, də dìə̀ ka tə nətən? 9 Yá ba dàń wá le, ba wʋ́: Kʋ yɩ ba nə vɩga Ba-Yígúrə́-Jə-Tiu, ʋ nə yɩ ba Yɩɩ tə, ʋ nə lɩ ba nyɩna-ba Ezwipətə lʋʋ nii tə wa yɩrɩ. Yá ba dàń pìí ba vwa ba tɩ̀àn woŋwanan nə, ba tʋ ba nadwana yuu tə yáá con, ba pa tə dun. Kʋ mʋ̀ nə pɩn, Ba-Yígúrə́-Jə-Tiu ma pa yolwan kʋ tə mama yí ba.»Salʋmʋn tʋ̀tʋ̀nán duən yoo
10 Salʋmʋn lwə̀ Ba-Yígúrə́-Jə-Tiu dìə̀ tə, də pɩ̀ʋ́ dìə̀ tə bɩna sapʋa nii nə. 11 Tirə pɩ̀ʋ́ Hiramə, yà pɩn sɩsaban dɛɛ, də nyənbori dɛɛ, də sɩ́án pɩ̀ʋ́ Salʋmʋn nə, ndə Salʋmʋn nə pɩ̀à nətʋ. Yá pɩ̀ʋ́ Salʋmʋn də dàń pɩn tɩan sapʋa Hiramə nə, Galile nagwanaa tə wa. 12 Hiramə nan Tirə nə, ʋ va sə ʋ na tɩan tə, Salʋmʋn nə pɩn wá. Ʋ nɩ tə, yá tə wà ʋ fɩra nə twá. 13 Hiramə ma swɩ̀n, ʋ wʋ́: «À nubiu, kʋ yɩ bɛ̀ɛ̀ tɩan yiri nə n pɩn nə nətən?» Ʋ dàń dɩga tə yɩrɩ Kabuləa lʋʋ nii. Mə nətʋ nə, ba boŋə tɩan təntə də, zə̀n mama. 14 Yá Hiramə mʋ̀ yà pɩn sɩ́án tɔnə batwa də faan pɩ̀ʋ́ Salʋmʋn nə.
15 Pɩ̀ʋ́ Salʋmʋn yà pɩn lɩ̀à tʋn dɩ̀àn tʋ̀tʋ̀nán, sə ʋ ma lwà Ba-Yígúrə́-Jə-Tiu dìə̀ tə, də ʋ tətə dìə̀ tə, də gárɩ́ tə ba nə boŋə milo, də Zwerizalɛmə birinaa tə, də Hasɔrə, də Megido, də Gezɛrə tɩan tə. 16 Ezwipətə pɩ̀ʋ́ Farawon yà twi, ʋ ta Gezɛrə tɩ̀án, ʋ ga kə mən tɩʋ tə nə, ʋ ga gʋ Kanaan tɩ̀án tə, ba yà nə wulə tɩʋ tə wa. Máŋá tə, ʋ bʋ̀á tə nə swe Salʋmʋn nə, ʋ tì kʋ tɩʋ tə, ʋ ma də́ zìlə́ ʋ bʋ̀á tə yuu wa. 17 Kʋ mʋ̀ nə pɩn, Salʋmʋn pìí ʋ lwà Gezɛrə tɩʋ tə. Ʋ tə pìí ʋ lwà tɩa con Bɛtə-Horon, 18 də Balatə, də Tamarə tɩan tə də, lʋʋ nii tə kasɔɔ lanworu tə wa. 19 Ʋ lwə̀ tɩan tə mama, ʋ nə túŋə́ wodirən tə wa, də tɩan tə ʋ səsen, də ʋ səsen kòrə̀n nə wulə tə wa. Salʋmʋn lwə̀ won tə mama ʋ nə pɩ̀à Zwerizalɛmə wa, də Liban pɛɛn nagwana tə wa, də lʋʋ nii tə mama wa, ʋ nə də́ pàrɩ̀ kʋ yuu wa. 20 Dwíə́ nəkaran* tə mama, ba yà nə ga Amon dwíí tə wa, də Ɛtə dwíí tə wa, də Perizi dwíí tə wa, də Evi dwíí tə wa, də Yebusə tɩ̀án tə wa, ba mʋ̀ nii ba Yɩzərayɛlə dwíí tə wa də́. 21 Ba bɩ̀á tə, ba nə ga lʋʋ nii tə wa, Yɩzərayɛlə lɩ̀à tə nə wà ba mama gwɩ mɩ́ámɩ́án, Salʋmʋn jɩn ba, ʋ ma fwa ywə́ŋə́. Ʋ ken ba dɩ̀àn tʋ̀tʋ̀nán wa, kʋ bà kʋ yí də zə̀n mama. 22 Yá Salʋmʋn wà Yɩzərayɛlə lɩ̀à tə mʋ̀ lìù nədʋ tətə ma fwa yoŋu. Cɩ́gá, ba yà yɩ kwatara, ba duən yɩ ʋ tʋ̀tʋ̀nà, ba duən yɩ ʋ tʋ̀tʋ̀nán yun tɩ̀án, ba duən yɩ ʋ lɩ̀à tə nə daa ʋ nə, ba duən yɩ ʋ kwatara səsen kòrə̀n yáá tɩ̀án. 23 Lɩ̀à tə ba nə ywàŋá Salʋmʋn tʋ̀tʋ̀nán tə yuu yà yɩ lɩ̀à 550. Ba mʋ̀ yà nə ywàŋá lalʋʋ tə yuu nə, ba nə tʋŋa tʋ̀tʋ̀nán tə.
24 Farawon bʋ̀á tə nan Davidə sadiyuu tə wa, ʋ zʋ ʋ dìə̀ tə wa Salʋmʋn nə lwə̀ ʋ pa wá. Kʋ kwa nə, Salʋmʋn lwə̀ gárɩ́ tə, ba nə boŋə milo.
25 Salʋmʋn yàá fwa jwəŋə ba nə sʋ̀rɩ́*, də nimarʋ* jwəŋə bɩnɩ mama wa, nɛɛ batwa, Yɩɩ joŋi bwálɩ́* tə yuu wa, ʋ nə pɩn ba lwà Ba-Yígúrə́-Jə-Tiu yɩrɩ. Ʋ yàá sʋ̀rɩ́ wusinə Yɩɩ joŋi bwálɩ́ tə yuu wa, kʋ nə wulə Ba-Yígúrə́-Jə-Tiu yáá con. Mə kʋ zɩgɩ nətʋ, ba dàń ma sinti Yɩɩ tʋtʋŋɩ tə, Yɩɩ dìə̀ tə wa.
26 Pɩ̀ʋ́ Salʋmʋn fwa nɩ́á yuu bwərə Esiyon-Gebɛrə nə, kʋ nə bwə́lə́ də Elatə, kʋ nə wulə mɩncanɩ mʋnaa tə nii nə, Edomə lʋʋ nii tə wa. 27 Hiramə tʋn ʋ tʋ̀tʋ̀nà, ba nə jə mʋʋ yuu tʋ̀tʋ̀nán zəni, sə ba kwé Salʋmʋn tʋ̀tʋ̀nà tə, nɩ́á yuu bwərə təntə wa. 28 Ba vəli Ofirə, ba pɛ̀ sɩ́án tɔnə fugə də bələ, ba ja bà ba pa pɩ̀ʋ́ Salʋmʋn nə.