Robʋamə jìgə̀ Zwida payuu tə pɩ̀ʋ́
11
1 Máŋá tə Robʋamə nə yí Zwerizalɛmə, ʋ ken Zwida nagwanaa lɩ̀à tə, də Bɛnzwamɛn dwíí tə kwatara babɩran 180 000 duən yáá nə, sə ba va ba ta Yɩzərayɛlə lɩ̀à tə duən tə, ba ja pìí ba bà ʋ mʋ̀ Robʋamə pàrɩ̀ tə wa. 2 Yá Yɩɩ dàń swɩ̀n ʋ nii sʋ̀sʋ̀nʋ̀ Swemaya con, ʋ wʋ́: 3 «Swɩ̀n Salʋmʋn bìú Robʋamə con, ʋ nə yɩ Zwida pɩ̀ʋ́, də Yɩzərayɛlə lɩ̀à tə mama con, ba nə wulə Zwida nagwanaa tə wa, də Bɛnzwamɛn dwíí tə wa, 4 də à mʋ̀ Ba-Yígúrə́-Jə-Tiu nə swɩ̀n, à wʋ́: “À dànà ká va á ta á nubɩa Yɩzərayɛlə lɩ̀à tə. Á lìù mama pìí ʋ zʋ ʋ dìə̀ wa. Cɩ́gá, yoo kʋ tə yɩ à mʋ̀ nə pɩn kʋ tʋn.” » Ba zìlí Ba-Yígúrə́-Jə-Tiu sʋgʋ tə nii, ba ga pìí ba vìí, ndə Ba-Yígúrə́-Jə-Tiu nə swɩ̀n ba con nətʋ.Robʋamə lwə̀ tɩan duən, ʋ kɩkarɩ də biritaŋan
5 Robʋamə yɩn Zwerizalɛmə wa, ʋ ga lwà tɩan tə nə yɩ dɩ̀àn dəkuu bwálá, Zwida lʋʋ nii tə wa. 6 Ʋ lwə̀ Betəleyɛmə, də Etamə, də Tekʋa, 7 də Bɛtə-Surə, də Soko, də Adulamə, 8 də Gatə, də Mareswa, də Zifə, 9 də Adorayimə, də Lakiswə, də Azeka, 10 də Soreya, də Ayalon, də Ebəron, Zwida lʋʋ nii tə, də Bɛnzwamɛn lʋʋ nii tə wa. Tə yɩn tɩan tə nə jə dɩ̀àn. 11 Ʋ lwà bərətaŋʋ ʋ ma kɩkarɩ tə, ʋ kə tʋ̀tʋ̀nán yun tɩ̀án tə wa, ʋ ga tún wodirən, də nʋga, də divɛn tə wa. 12 Natanan nəfaran, də cwiən yà wulə tɩan təntə nədʋ mama wa, yá ʋ pɩn tə ja dɩ̀àn zənzən. Zwida də Bɛnzwamɛn nagwanɛɛ tə yà yɩ ʋ mʋ̀ nə tɩ.
Yɩzərayɛlə lɩ̀à Yɩɩ joŋwana tə, də Levi dwíí tə ken ba nii Robʋamə kwa
13 Yɩɩ joŋwana tə, də Levi dwíí tə nan Yɩzərayɛlə lʋʋ nii tə bwálɩ́ mama wa, ba bà ba kə ba nii Robʋamə kwa. 14 Levi dwíí tə nan ba yá ba dìì, də ba bwálá ba va Zwida lʋʋ nii tə wa, də Zwerizalɛmə wa. Cɩ́gá, Zwerobʋamə də ʋ bɩ̀á tə yà cɩ̀gà ba nə, sə ba dàn ká tʋn ba joŋwana tʋ̀tʋ̀nán tə, ba pa Ba-Yígúrə́-Jə-Tiu nə. 15 Zwerobʋamə dàń tún ʋ tətə joŋwana jwəŋə dədwələn* yuu woŋwanan tə yɩrɩ, tə nə yɩ bʋtɩlan də nabii nyɩnyɩga, ʋ nə fwa. 16 Yɩzərayɛlə púlə́ tə mama lɩ̀à tə, ba nə pɩ̀à sə ba jʋn Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, twá Levi dwíí tə nə, ba va Zwerizalɛmə, sə ba fwa jwəŋə ba pa Ba-Yígúrə́-Jə-Tiu nə, ʋ nə yɩ ba nyɩna-ba Yɩɩ. 17 Ba pɩn Zwida payuu tə kwɛn kʋ na dɩ̀àn, ba ga pa Salʋmʋn bìú Robʋamə pàrɩ̀ tə na dɩ̀àn bɩna batwa. Cɩ́gá, ba yà twá kʋ tə nə Davidə də Salʋmʋn nə twá kʋ nə bɩna batwa.
Robʋamə dìə̀ lɩ̀à
18 Robʋamə swe Yerimɔtə də ʋ kan Abihayilə bʋ̀á Mahalatə. Yerimɔtə yà yɩ Davidə bìú. Abihayilə də yà yɩ Eliyabə bʋ̀á, ʋ ga yɩ Yɩzayi nàʋ́. 19 Mahalatə lɩrɩ bɩ̀á batwa, ʋ pa wá. Ba mʋ̀ nə yɩ Yewuswə, də Swemarɩya, də Zahamə. 20 Kʋ kwa nə, ʋ swe Maka, ʋ nə yɩ Abəsalomə bʋ̀á. Maaka lɩrɩ Abɩya, də Atayi, də Zɩza, də Swelomitə, ʋ pa wá. 21 Robʋamə yà swə Abəsalomə bʋ̀á Maaka ʋ doni ʋ kana tə mama, də kacəŋə tə mama. Ʋ yà jə kana fugə də nana, də kacəŋə sapwɩtwa. Ʋ lɩrɩ bɩ̀á sapʋa də nana, də bwɩ̀ɩ́ sapwɩtwa. 22 Robʋamə tún Maaka bìú Abɩya, sə ʋ ya ʋ nubɩa tə yuu wa. Cɩ́gá, ʋ yà pɩ̀à sə ʋ mʋ̀ nə jì pɩ̀ʋ́. 23 Ʋ lwarɩ swɩan, ʋ pa ʋ bɩ̀á tə duən tə mama laga duən yáá nə, ba va tɩan tə mama wa, tə nə yɩ dɩ̀àn dəkuu bwálá, Zwida də Bɛnzwamɛn nagwanɛɛ tə wa. Ʋ pɩn ba wodirən zənzən, ʋ ga pa ba kana kapʋpʋ.