Siswɛmə jə́rə́ tə yoo
12
1 Robʋamə vəli Siswɛmə, yá Yɩzərayɛlə lɩ̀à tə mama dàń yà jeri duən là, sə ba tún wá, sə ʋ yà pɩ̀ʋ́. 2 Nebatə bìú Zwerobʋamə yà dəri pɩ̀ʋ́ Salʋmʋn yáá nə, ʋ va Ezwipətə. Ʋ nì kʋ nətʋ tə, də ʋ tə wulə Ezwipətə nə, yà ʋ dàń mɛn là. 3 Ba tʋn ba bon Zwerobʋamə. Ʋ də Yɩzərayɛlə lalʋʋ tə mama dàń twi Robʋamə con, ba swɩ̀n, ba wʋ́: 4 «N nyɩna ken nəba càn zənzən wa. Sɩ́ʋ́n nə, n mʋ̀ dàń fʋ càn tə n nyɩna yà nə kəni nə nə n ga, yá nə dàń wá tʋn nə pa mʋ́.» 5 Robʋamə swɩ̀n ba con, ʋ wʋ́: «Á vələ, sə á pìí á bà, dɩan batwa nii nə.» Lalʋʋ tə dàń pìí ba vìí.6 Pɩ̀ʋ́ Robʋamə dàń pɩ̀à kwìə̀ nəkwɩna tə con, ba nə yɩn də ʋ nyɩna Salʋmʋn, máŋá tə wa, ʋ nə yɩn lʋʋ wa. Ʋ bwe ba, ʋ wʋ́: «Bɛ̀ɛ̀ kwìə̀ nə á wá pa nə, sə à pa lalʋʋ kʋ tə nə?» 7 Ba swɩ̀n ʋ con, ba wʋ́: «Zə̀n kʋ tə, n nə sɛ̀ n tʋn n pa lalʋʋ kʋ tə nə, n nə le ba də bɩcabwanʋ, ba wá yà n tʋ̀tʋ̀nà, máŋá mama wuuu.» 8 Yá Robʋamə wà kwìə̀ tə nəkwɩna tə nə pɩn wá jələ. Ʋ pìí ʋ pɩ̀à ba tə, ʋ də ba nə yɩn bìsɩ́ná, ba bori də duən kwìə̀. 9 Ʋ bwe ba, ʋ wʋ́: «Bɛ̀ɛ̀ kwìə̀ nə á wá pa nə, sə à pa lalʋʋ kʋ tə nə, ba nə swɩ̀n, sə à fʋ càn tə à nyɩna nə kəni ba nə à ga?» 10 Ʋ duən tɩ̀án tə, ʋ də ba nə bori də duən dàń swɩ̀n ʋ con, ba wʋ́: «Nə̀ń kʋ tə n nə wá swɩ̀n lalʋʋ təntə con, ba nə swɩ̀n sə n fʋ càn tə, n nyɩna yà nə kəni ba nə n ga. N wá swɩ̀n ba con də, n jɩfʋnbiə cuni dwə n nyɩna vàn. 11 N nyɩna yà kəni càn ba nə zənzən, yá n mʋ̀ dàń wá kə ba càn wa, n doni nətʋ. N nyɩna yà yɩ tanpɩra nə, ʋ ma kəni ba cwəŋə wa, yá n mʋ̀ dàń yɩ danbwalaa nə n wá ma kə ba cwəŋə wa.»
12 Zwerobʋamə də lalʋʋ tə mama dàń pìí ba bà Robʋamə con, dɩan batwa tə nii nə, ndə ʋ yà nə swɩ̀n, ba con nətʋ. 13 Pɩ̀ʋ́ Robʋamə le lalʋʋ tə də nicɔɔ, ʋ wà nəkwɩna tə kwìə̀ tə, ba nə pɩn wá jələ. 14 Ʋ twá ləzwəndʋn tə kwìə̀ tə nə, ʋ ma swɩ̀n ba con, ʋ wʋ́: «À nyɩna ken aba càn zənzən wa, yá à mʋ̀ dàń wá kə aba càn wa à doni nətʋ. À nyɩna yɩ tanpɩra nə, ʋ ma kə aba cwəŋə wa, yá à mʋ̀ yɩ danbwala nə, à wá ma kə aba cwəŋə wa.» 15 Mə kʋ twá nətʋ, pɩ̀ʋ́ tə ma vɩ̀, sə ʋ cʋgʋ lalʋʋ tə sʋgʋ. Cɩ́gá, Ba-Yígúrə́-Jə-Tiu yà pɩn kʋ nətʋ tʋn, sə kʋ pa sʋgʋ tə, ʋ nə twá də Yɩɩ nii sʋ̀sʋ̀nʋ̀ Ahɩya, ʋ nə yɩ Silo tíú, ʋ swɩ̀n Nebatə bìú Zwerobʋamə con, nii sú.
Yɩzərayɛlə payuu tə pwɛ̀ bələ
16 Máŋá tə Yɩzərayɛlə lɩ̀à tə mama nə lwarɩ də pɩ̀ʋ́ tə ba pɩ̀à, sə ʋ cʋgʋ ba kori tə, lalʋʋ tə le pɩ̀ʋ́ tə, ba wʋ́: «Nə də Davidə ba yoo jə də duən, nə də Yɩzayi bìú tə ba tori jə də duən. Yɩzərayɛlə lɩ̀à-ba, á lìù mama pìí n va n sàń. Davidə dwíí tíú, sɩ́ʋ́n nə n dàń tɩnɩ n payuu tə.» Yá Yɩzərayɛlə lɩ̀à tə mama dàń pìí ba va ba sàná wa. 17 Robʋamə dàń dí pàrɩ̀ tə Yɩzərayɛlə lɩ̀à tə yuu wa, ba nə wulə Zwida nagwanaa tə cɩcɩ wa. 18 Pɩ̀ʋ́ Robʋamə dàń tʋn Hadoramə, sə ʋ va ʋ ywàń dɩ̀àn tʋ̀tʋ̀nán tə yuu nə. Yá Yɩzərayɛlə lɩ̀à tə mama dɩlʋ wá də kapana ba gʋ. Pɩ̀ʋ́ Robʋamə yɩ ʋ ken dɩ̀àn, ʋ ma wànɩ́ ʋ zʋ ʋ səsən kòrù wa, ʋ dəri ʋ va Zwerizalɛmə. 19 Mə kʋ zɩgɩ nətʋ, Yɩzərayɛlə lɩ̀à tə ma vɩ̀ Davidə dìə̀ tə nii, kʋ bà kʋ yí də zə̀n mama.
20 Yɩzərayɛlə lɩ̀à tə mama nì də Zwerobʋamə pìí ʋ bà. Ba pɩn ba bon wá, ʋ bà lalʋʋ tə con, yá ba tún wá, sə ʋ ya pɩ̀ʋ́ Yɩzərayɛlə mama yuu wa. Mə kʋ zɩgɩ nətʋ, Zwida nagwanaa lɩ̀à tə cɩcɩ ma pìí ba vwa ba tɩ̀àn Davidə dìə̀ tə nə.
21 Máŋá tə Robʋamə nə yí Zwerizalɛmə, ʋ ken Zwida nagwanaa lɩ̀à tə, də Bɛnzwamɛn dwíí tə kwatara babɩran 180 000 duən yáá nə, sə ba va ba ta Yɩzərayɛlə lɩ̀à tə, ba ja pìí ba bà ʋ mʋ̀ Salʋmʋn bìú Robʋamə pàrɩ̀ tə wa. 22 Yá Yɩɩ dàń swɩ̀n ʋ tʋtʋnʋ Swemaya con, ʋ wʋ́: 23 «Swɩ̀n Salʋmʋn bìú Robʋamə con, ʋ nə yɩ Zwida pɩ̀ʋ́, də Zwida dìə̀ tə mama con, də Bɛnzwamɛn dìə̀ tə con, də lalʋʋ tə gɩganɩ tə con. 24 Swɩ̀n ba con də à mʋ̀ Ba-Yígúrə́-Jə-Tiu nə swɩ̀n, à wʋ́: “Á dànà ká va á ta á nubɩa Yɩzərayɛlə lɩ̀à tə. Á lìù mama pìí ʋ zʋ ʋ dìə̀ wa. Cɩ́gá, yoo kʋ tə yɩ à mʋ̀ nə pɩn kʋ tʋn.” » Ba zìlí Ba-Yígúrə́-Jə-Tiu sʋgʋ tə nii, ba ga pìí ba vìí, ndə Ba-Yígúrə́-Jə-Tiu nə swɩ̀n ba con nətʋ.
25 Zwerobʋamə lwə̀ biritaŋʋ ʋ ma kɩkarɩ Siswɛmə tɩʋ tə, Efərayimə pɛɛn nagwanaa tə wa, ʋ wulə kʋ wa. Kʋ kwa nə, ʋ nan Siswɛmə, ʋ lwà biritaŋʋ ʋ ma kɩkarɩ Penuwɛlə tɩʋ tə də.
Zwerobʋamə cʋna tə yoo
26 Zwerobʋamə dàń swɩ̀n ʋ waa con, ʋ wʋ́: «Sɩ́ʋ́n nə, payuu tə cɩ́gá wàá kʋ pìí kʋ twi, kʋ yanɩ Davidə dìə̀ tə nyiən. 27 Cɩ́gá, lalʋʋ kʋ tə nə vəli Zwerizalɛmə ba fwa jwəŋə Ba-Yígúrə́-Jə-Tiu dìə̀ tə wa, ba bɩcan wá pìí kʋ va ba yuu-tiu Zwida pɩ̀ʋ́ Robʋamə con. Ba dàń wá gʋ nə, ba ga pìí ba va Robʋamə con. 28 Pɩ̀ʋ́ tə dàń pɩ̀à kwìə̀, yá kʋ kwa nə, ʋ fwa sɩ́án nabii bələ, ʋ ga swɩ̀n lalʋʋ tə con, ʋ wʋ́: «Á vəli Zwerizalɛmə zənzən, á ja lɛ, Yɩzərayɛlə lɩ̀à-ba, nəŋə á woŋwanan tə, tə nə lɩ aba Ezwipətə lʋʋ nii tə wa, tə ja bà.» 29 Ʋ tún kʋ don Betɛlə nə, yá ʋ tún kʋ don tə Dan nə. 30 Mə kʋ zɩgɩ nətʋ, Zwerobʋamə ma yigu lalʋʋ tə, ʋ pa ba tʋn cʋna. Lalʋʋ tə wa lɩ̀à zənzən nan ba pú sɩ́án nabiə tə don kwa, ba va ba yí Dan. 31 Zwerobʋamə lwə̀ jwəŋə dədwələn* yuu dìì, ʋ lɩ lalʋʋ tə wa lɩ̀à ʋ tún, sə ba yà joŋwana. Ba lɩ̀à təntə yà wà Levi dwíí tə wa nan.
32 Zwerobʋamə tún cànà, sə ba də́ bɩnɩ tə cànɩ̀ nana nii cànà tə dɩan fugə də bonu dɩɩn nə. Ka cànà tə nyən ndə cànà tə nə, ba nə yàá də́ Zwida nagwanaa tə wa. Yá ʋ tətə dàń vəli jwəŋə dədwələn tə yuu. Nə̀ń nətʋ tə, ʋ yà nə fwa Betɛlə nə. Ʋ fwa jwəŋə ʋ pa sɩ́án nabii tə nə, ʋ nə fwa, ʋ ga tún jwəŋə dədwələn tə, ʋ nə lwə̀ joŋwana. 33 Ʋ vəli jwəŋə dədwələn tə yuu, ʋ nə lwə̀ Betɛlə nə, bɩnɩ tə cànɩ̀ nana nii cànà tə dɩan fugə, də bonu dɩɩn nə. Cànà təntə yɩ ʋ tətə nə kúrí ka dɩɩn tə, ndə ʋ nə pɩ̀à nətʋ. Zwerobʋamə pɩn Yɩzərayɛlə lalʋʋ tə də́ cànà, ʋ tətə dàń ga dɩ̀ joŋi bwálɩ́ tə yuu wa, sə ʋ sʋ̀rɩ́ wusinə.