Yɩɩ nii sʋ̀sʋ̀nʋ̀ twi, ʋ swɩ̀n ʋ zɩgɩ Betɛlə joŋi bwálɩ́ tə nə
13
1 Yɩɩ pɩn nii ʋ tʋtʋnʋ don nə, ʋ pa ʋ nan Zwida, ʋ bà Betɛlə. Ʋ twi də Zwerobʋamə wulə ʋ sʋ̀rɩ́ wusinə, joŋi bwálɩ́ tə yuu wa. 2 Yɩɩ tʋtʋnʋ tə baa, ʋ swɩ̀n ʋ zɩgɩ joŋi bwálɩ́ tə nə, ndə Ba-Yígúrə́-Jə-Tiu nə pɩn wá nii sə ʋ fwa nətʋ, ʋ wʋ́: «Joŋi bwálɩ́! Joŋi bwálɩ́! Nə̀ń kʋ tə Ba-Yígúrə́-Jə-Tiu nə swɩ̀n. Ba wá lɩra bìú Davidə dìə̀ tə wa, ʋ yɩrɩ nə wá yà Zozɩasə. Ʋ wá ja jwəŋə dədwələn joŋwana tə, ba nə sʋ̀rɩ́ wusinə n yuu wa, ʋ ma fwa joŋi n yuu wa. Yá ba wá sʋ̀rɩ́ ləzwəni kurən n yuu wa.» 3 Kʋ dɩɩn tə tətə nə, ʋ pɩn mɩmɩnʋ, ʋ wʋ́: «Nə̀ń mɩmɩnʋ tə, kʋ nə bɩrɩ də kʋ yɩ Ba-Yígúrə́-Jə-Tiu nə swɩ̀n kʋ. Joŋi bwálɩ́ tə wá lwa, yá kʋ yuu tʋnan tə nə vigə də nanʋga wá lwá tɩa.»4 Máŋá tə pɩ̀ʋ́ Zwerobʋamə nə nì sʋgʋ tə, Yɩɩ tʋtʋnʋ tə nə baa, ʋ swɩ̀n ʋ zɩgɩ joŋi bwálɩ́ tə nə, Betɛlə nə, ʋ lɩ ʋ jɩɩn joŋi bwálɩ́ tə yuu wa, ʋ te Yɩɩ tʋtʋnʋ tə con, ʋ ga swɩ̀n, ʋ wʋ́: «Á jana bɛɛ wa tə.» Yá Zwerobʋamə jɩɩn tə, ʋ nə te Yɩɩ tʋtʋnʋ tə con dàń kʋa, ʋ kʋ́ʋ̀ wàrɩ̀ kʋ, ʋ pìí ʋ kəni ʋ con. 5 Joŋi bwálɩ́ tə lwə, yá kʋ yuu tʋnan tə nə vigə də nanʋga lwá tɩa, ndə mɩmɩnʋ tə nə, Yɩɩ tʋtʋnʋ tə nə bɩrɩ, kʋ twá Ba-Yígúrə́-Jə-Tiu sʋgʋ tə nii nə. 6 Pɩ̀ʋ́ tə dàń swɩ̀n Yɩɩ tʋtʋnʋ tə con, ʋ wʋ́: «Lòrì Ba-Yígúrə́-Jə-Tiu, ʋ nə yɩ n Yɩɩ, n lwɛ̀ ʋ nə n pa nə, sə ʋ yá sə à pìí à kə à jɩɩn tə à con.» Yɩɩ tʋtʋnʋ tə dàń lòrì Ba-Yígúrə́-Jə-Tiu, yá pɩ̀ʋ́ tə dàń pìí ʋ kə ʋ jɩɩn tə ʋ con, ndə kʋ yà nə yɩ nətʋ. 7 Pɩ̀ʋ́ tə dàń swɩ̀n Yɩɩ tʋtʋnʋ tə con, ʋ wʋ́: «Bà nə zʋ dìə̀, sə n də́ wodiu, sə à ga pa mʋ́ zìlə́ won.» 8 Yɩɩ tʋtʋnʋ tə le pɩ̀ʋ́ tə, ʋ wʋ́: «Kʋ nə swə kʋ yɩ n dìə̀ tə wiən faan nə n wá pa nə də, à bá zʋ n dìə̀, à bá də́ wodiu, à ma bá nyʋn nɩ́á yəbə. 9 Cɩ́gá, Ba-Yígúrə́-Jə-Tiu pɩn nə nii, ʋ wʋ́: “N bá də́ wodiu, n bá nyʋn nɩ́á, yá n bá pìí n tì cwəŋə tə, n nə twá n ma va.” » 10 Ʋ dàń pìí ʋ tì cwəŋə don, ʋ wà cwəŋə tə ʋ nə twá ʋ ma va Betɛlə pìí ʋ tì.
Yɩɩ nii sʋ̀sʋ̀nʋ̀ tə pɩn ba gɩgarɩ wá, ba kə cʋna wa
11 Yɩɩ nii sʋ̀sʋ̀nʋ̀ bazʋnʋ don yà wulə Betɛlə tɩʋ tə wa. Ʋ bɩ̀á twi ba man kʋ tə mama, Yɩɩ tʋtʋnʋ tə nə tʋn Betɛlə nə, kʋ dɩɩn tə nə, də sʋ̀ràn tə ʋ nə swɩ̀n pɩ̀ʋ́ tə con, ba bɩrɩ wá. Máŋá ba nə man kʋ yoo tə, ba bɩrɩ ba nyɩna tə nə, ba zwɛ̀, 12 ʋ bwe ba, ʋ wʋ́: «Cwəŋə kwà nə ʋ tì, ʋ ma vìí?» Ʋ bɩ̀á tə yà nɩ cwəŋə tə, Yɩɩ tʋtʋnʋ tə, ʋ nə nan Zwida lʋʋ nii nə twá, ʋ ma vìí. 13 Ʋ dàń ma swɩ̀n ʋ bɩ̀á tə con, ʋ wʋ́: «Á tana bɩ̀nà tə á pa nə.» Ba ma tanɩ bɩ̀nà tə, ba pa wá, ʋ zàn ʋ dɩ̀ ka yuu. 14 Ʋ púə́ Yɩɩ tʋtʋnʋ tə kwa, ʋ va ʋ yí wá də ʋ jə̀ə́ sɩsanʋ də̀ń nə. Ʋ bwe wá, ʋ wʋ́: «N mʋ́ nə yɩ Yɩɩ tʋtʋnʋ tə, n nə nan Zwida lʋʋ nii tə?» Ʋ le, ʋ wʋ́: «À mʋ̀ nə!» 15 Ʋ dàń swɩ̀n ʋ con, ʋ wʋ́: «Bàá nə va sàń, sə n də́ wodiu.» 16 Yá Yɩɩ tʋtʋnʋ tə le, ʋ wʋ́: «À wàrɩ̀ à pìí à vìrí də mʋ́, à ma bá zʋ n dìə̀ də. À bá də́ wodiu, à ma bá nyʋn nɩ́á də mʋ́ yəbə. 17 Cɩ́gá, Ba-Yígúrə́-Jə-Tiu swɩ̀n à con, ʋ wʋ́: “N bá də́ wodiu, n bá nyʋn nɩ́á, yá n ba pìí tì cwəŋə tə, n nə twá, n ma va.” » 18 Yá Yɩɩ nii sʋ̀sʋ̀nʋ̀ bazʋnʋ tə swɩ̀n, ʋ súrí lá, ʋ wʋ́: «À də yɩ Yɩɩ nii sʋ̀sʋ̀nʋ̀ ndə n nə. Malɩka nə swɩ̀n Ba-Yígúrə́-Jə-Tiu sʋgʋ kʋ tə à con, ka wʋ́: “Ja wá n ja pìí bà n dìə̀ wa, sə ʋ də́ wodiu, ʋ ga nyʋn nɩ́á.” » Kʋ yà yɩ kʋ̀nkʋ̀n nə ʋ kʋnɩ. 19 Yɩɩ tʋtʋnʋ tə dàń pìí ʋ twá ʋ nə, ʋ va ʋ də́ wodiu, ʋ ga nyʋn nɩ́á bɛɛ tə dìə̀ wa.
Gəru gʋa Yɩɩ nii sʋ̀sʋ̀nʋ̀ tə
20 Máŋá tə, ba nə jə̀ə́ ba də́ wodiu tə, Ba-Yígúrə́-Jə-Tiu swɩ̀n sʋgʋ Yɩɩ nii sʋ̀sʋ̀nʋ̀ bazʋnʋ tə con, ʋ nə pìí ʋ ja ʋ don tə, ʋ bà, ʋ sàń. 21 Yɩɩ nii sʋ̀sʋ̀nʋ̀ bazʋnʋ tə dàń baa ʋ kə Yɩɩ tʋtʋnʋ tə nə, ʋ nə nan Zwida lʋʋ nii tə, ʋ wʋ́: « Nə̀ń kʋ tə Ba-Yígúrə́-Jə-Tiu nə swɩ̀n. “N vɩga yìə̀n tə Ba-Yígúrə́-Jə-Tiu, ʋ nə yɩ n Yɩɩ, nə bɩrɩ mʋ̀, sə n tʋn. N wà ʋ sʋ̀ràn tə ʋ nə pɩn mʋ́ nii zìlí. 22 N pìí n va n də́ wodiu, n ga nyʋn nɩ́á yəbə. Yá Ba-Yígúrə́-Jə-Tiu yà swɩ̀n n con, sə n dàn ká də́ wodiu lá, n dàn ká nyʋn nɩ́á lá. Kʋ mʋ̀ yɩrɩ nə, n wá tɩ, yá ba bá kə n tɩgɩ tə, n nyɩna-ba libəri wa.»
23 Ba nə dí wodiu tə, ba ga nyʋn nɩ́á kwa nə, Yɩɩ nii sʋ̀sʋ̀nʋ̀ bazʋnʋ tə tanɩ Yɩɩ tʋtʋnʋ tə, ʋ nə ja pìí ʋ bà tə bɩ̀nà, ʋ pa wa, 24 yá ʋ zàn ʋ vìí. Gəru nan kʋ jəri wá cwəŋə tə yuu wa, kʋ ja wá kʋ gʋ. Ʋ tɩgɩ tə dàń yà tígə́ cwəŋə tə wa, bɩ̀nà tə zɩga ʋ vàn don nə, gəru tə də ga zɩga ʋ vàn don də nə. 25 Lɩ̀à tì cwəŋə tə ba kɛ̀ń, ba na tɩgɩ tə, cwəŋə tə wa, gəru tə ga zɩga tɩgɩ tə vàn nə. Ba vəli ba man kʋ ba bɩrɩ tɩ̀ʋ́ tə wa, Yɩɩ nii sʋ̀sʋ̀nʋ̀ bazʋnʋ tə nə wulə. 26 Yɩɩ nii sʋ̀sʋ̀nʋ̀ bazʋnʋ tə nə pìí ʋ ja wá ʋ bà Betɛlə tə nì kʋ, yá ʋ dàń swɩ̀n, ʋ wʋ́: «Kʋ yɩ Yɩɩ tʋtʋnʋ tə, ʋ nə vɩga yìə̀n tə, Ba-Yígúrə́-Jə-Tiu nə bɩrɩ wa. Ba-Yígúrə́-Jə-Tiu nə pɩn wá gəru tə nə, yá kʋ jɩn wá kʋ gʋ, kʋ nyʋnyʋgʋ ʋ kurən, ndə Ba-Yígúrə́-Jə-Tiu nə swɩ̀n kʋ ʋ con nətʋ.» 27 Kʋ kwa nə, ʋ swɩ̀n ʋ bɩ̀á tə con, ʋ wʋ́: «Á tana bɩ̀nà á pa nə.» Ba ma tanɩ bɩ̀nà ba pa wá. 28 Ʋ vəli ʋ na tɩgɩ tə cwəŋə tə wa, də bɩ̀nà tə, yá gəru tə ga zɩga tɩgɩ tə vàn nə. Gəru tə yà wà tɩgɩ tə dí, kʋ ma wà bɩ̀nà tə də won fwa. 29 Yɩɩ nii sʋ̀sʋ̀nʋ̀ bazʋnʋ tə tì Yɩɩ tʋtʋnʋ tə tɩgɩ tə, ʋ kə bɩ̀nà yuu wa, ʋ ja pìí ʋ va Betɛlə, sə ʋ gùrì wá, ʋ ga fwa ʋ lúə́. 30 Ʋ ken tɩgɩ tə, ʋ tətə libəri wa, lɩ̀à tə ga dɩ lúə́ gwaran, ba wʋ́: «Nə̀ń kʋ lɛɛ nyɩɛn nʋ̀ʋ̀ à nubiu!» 31 Ba nə gùrì wá ba zwɛ̀ kwa nə, Yɩɩ nii sʋ̀sʋ̀nʋ̀ bazʋnʋ tə swɩ̀n ʋ bɩ̀á tə con, ʋ wʋ́: «Dɩɩn tə à nə tɩga, sə á gùrì nə libəri tə wa, ba nə gùrì Yɩɩ tʋtʋnʋ wà tə. Á wá tún à tɩgɩ tə, ʋ kurən tə səpuni nə. 32 Cɩ́gá, kʋ ba tʋ́tʋ̀ná jə, Ba-Yígúrə́-Jə-Tiu sʋgʋ tə bɛɛ wà tə nə swɩ̀n ʋ zɩgɩ Betɛlə joŋi bwálɩ́ tə nə, də jwəŋə dədwələn yuu dìì tə mama nə, tə nə wulə Samari tɩan tə wa, nii wá sú.»
33 Kʋ mʋ̀ yoo təntə kwa nə, Zwerobʋamə tə wà ʋ tʋtʋnkʋkwɩnan tə nə yá. Ʋ kʋ́ʋ̀ pìí ʋ twɛ́n dun nʋga* lɩ̀à tə mama yuu wa, ba nə swə joŋwana tʋtʋnan, lalʋʋ tə wa, ʋ ma tún ba, sə ba ya joŋwana, jwəŋə dədwələn* tə yuu wa. 34 Mə kʋ zɩgɩ nətʋ, Zwerobʋamə dwíí tə ma zʋ cʋna fwaŋʋ wa. Yá kʋ mʋ̀ nə pɩn, ʋ dwíí tə cʋ̀gʋ̀, kʋ jɛ́n tɩa yuu wa mɩ́ámɩ́án.