Yɩɩ nii sʋ̀sʋ̀nʋ̀ Ahɩya swɩ̀n də Zwerobʋamə bìú Abɩya wá tɩ
14
1 Dɩɩn don nə, Zwerobʋamə bìú Abɩya tʋa yɩŋa. 2 Zwerobʋamə dàń swɩ̀n ʋ kan con, ʋ wʋ́: «N wá zàn n lwàń n tɩ̀àn, sə ba dàn ká lwarɩ də n yɩ à mʋ̀ Zwerobʋamə kan. N wá va Silo. Mə là nə Yɩɩ nii sʋ̀sʋ̀nʋ̀ Ahɩya wulə. Mə ʋ mʋ̀ nə swɩ̀n də à wá jì lalʋʋ kʋ tə pɩ̀ʋ́. 3 Zàn n tì dipɛn dàlá fugə, n fwa cakʋla, n tì tʋ̀ràn kwàrá n súrí lá, n ja va n ma na wá. Ʋ wá bɩrɩ mʋ́ yoo tə nə wá yí nə bisɩmabara tə.» 4 Zwerobʋamə kan tə dàń tʋn kʋ nətʋ, ʋ zàn ʋ va Silo. Ʋ vəli ʋ zʋ Ahɩya dìə̀ wa. Ahɩya dàń yà jìgə̀ bazʋnʋ, ʋ yɩ́á cəə lá, yá ʋ ba lá na. 5 Ba-Yígúrə́-Jə-Tiu yà dí yáá ʋ swɩ̀n Ahɩya con, ʋ wʋ́: «Nə̀ń Zwerobʋamə kan nə, ʋ bɩ̀àn n con, sə ʋ bwe ʋ bisɩmaa yuu nə, ʋ nə yɩ̀ yɩrɩ. Ʋ nə twi, ʋ wá ja ʋ tɩ̀àn ʋ jì ndə lìù don nə. N dàń wá swɩ̀n nətən də nətən, ʋ con.6 Máŋá tə Ahɩya nə nì kan tə nɛɛ dwana, də ʋ ma galɩ mimii tə, sə ʋ zʋ dìə̀ tə wa, Ahɩya swɩ̀n, ʋ wʋ́: «Zʋ, Zwerobʋamə kan. Bɛ̀ɛ̀ nə pɩn, n ja n tɩ̀àn n fwa ndə lìù don nə? Ba tʋn nə n con, sə à pa mʋ́ kori kʋ nə cà. 7 Vəli n swɩ̀n Zwerobʋamə con, də Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə swɩ̀n yoo kʋ tə, ʋ wʋ́: “À zɩ̀n mʋ́ à kə yɩɩ nə, lalʋʋ kʋ tə titəŋi wa, à tún mʋ́, sə n yà Yɩzərayɛlə lalʋʋ tə, kʋ nə yɩ à mʋ̀ lɩ̀à yáá tíú. 8 À jon payuu tə Davidə dìə̀ tə con, à pa mʋ́. Yá n wà yɩn ndə à tʋtʋnʋ Davidə nə, ʋ nə twá à yìə̀n tə nə, à nə pɩn nii tə yuu wa, ʋ nə vwə ʋ tɩ̀àn à nə, də ʋ waa mama, ʋ ma tʋn kʋ tə nə yɩ mənəmənə, à yáá con. 9 N tʋn cʋna n doni lɩ̀à tə mama, ba nə yɩn n yáá. N ja cɩnɩan n ma fwa woŋwanan, də wiən nyɩnyɩga, n ma zɩ̀n à lɩŋa. Yá n vɩga nə n dʋgʋ n kətuu kwa. 10 Kʋ mʋ̀ dàń nə pɩn, à wá pa lɛɛ yí n dìə̀ tə. À wá pa n dìə̀ bara tə mama, ba nə tɩ ba tɩ̀àn, də ba tə nə yɩ ywə́ŋə́ nyʋn tɩa yuu wa. À wá pa ba nyʋn tɩa yuu wa, ndə ba nə zwarɩ ywərən, ba pa tə jɛ́n. 11 N dìə̀ lìù nə tɩga tɩʋ wa, ʋ yɩ kukuri nə wá də́. Ʋ nə kʋ́ʋ̀ tɩga gaʋ wa, ʋ yɩ dələn nə wá də́.” Cɩ́gá, Ba-Yígúrə́-Jə-Tiu nə swɩ̀n kʋ.»
12 Yɩɩ nii sʋ̀sʋ̀nʋ̀ Ahɩya swɩ̀n Zwerobʋamə kan tə con, ʋ súrí lá, ʋ wʋ́: «N mʋ̀ dàń zàn n va sàń. Máŋá tə n nə wá dɩ̀ n naa tɩʋ tə wa, bisɩmaa tə wá tɩ. 13 Yɩzərayɛlə lɩ̀à tə mama wá kwi ʋ lúə́, ba ga gùrì wá. Cɩ́gá, ʋ mʋ̀ cɩcɩ nə yɩ lìù tə, ba nə wá kə libəri wa, Zwerobʋamə dìə̀ lɩ̀à tə wa. Ʋ mʋ̀ cɩcɩ con nə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nɩ won kʋ nə ziən, Zwerobʋamə dìə̀ lɩ̀à tə wa. 14 Ba-Yígúrə́-Jə-Tiu wá tún pɩ̀ʋ́ don Yɩzərayɛlə lɩ̀à yuu wa. Ʋ mʋ̀ pɩ̀ʋ́ tə wá pa Zwerobʋamə dìə̀ tə nyʋn tɩa yuu wa, kʋ dɩɩn təntə nə. Kʋ yɩ zə̀n yoo, yá kʋ manwarɩ kʋ wulə kʋ tʋŋa də tətə. 15 Ba-Yígúrə́-Jə-Tiu wá mà Yɩzərayɛlə lɩ̀à tə, ʋ pa ba jì ndə buu nii mɩncanɩ nə, nɩ́á nə vuvugə. Ʋ wá lɩ Yɩzərayɛlə lʋʋ nii nəzəŋu kʋ tə wa, ʋ yà nə pɩn ba nyɩna-ba tə nə, ʋ ga laga ba duən yáá nə, ʋ kə Əfəratə mʋnaa tə vàn tə don nə. Mə kʋ mʋ̀ nə wá yí ba, ba nə fwa woŋwanʋ Aswera* dacəli tə, ba ma zɩ̀n Ba-Yígúrə́-Jə-Tiu lɩŋa tə yɩrɩ. 16 Ʋ wá vɩ̀ ba ʋ dʋgʋ, cʋna tə yɩrɩ Zwerobʋamə nə tʋn, ʋ ga pa Yɩzərayɛlə lɩ̀à də tʋn tə cʋna tə.»
17 Zwerobʋamə kan tə dàń zàn ʋ vìí. Ʋ nə yí Tirəsa, ʋ dɩ ʋ naa ʋ dìə̀ mimii wa, bisɩmaa tə tɩga, 18 ndə Ba-Yígúrə́-Jə-Tiu nə twá də ʋ nii sʋ̀sʋ̀nʋ̀ Ahɩya, ʋ nə yɩ ʋ tʋtʋnʋ, ʋ ma swɩ̀n nətʋ. Ba gùrì wá, yá Yɩzərayɛlə lɩ̀à tə mama dàń kwi ʋ lúə́.
Zwerobʋamə tɩan yoo
19 Ba pʋ́pʋ́nɩ́ Zwerobʋamə tʋ̀tʋ̀nán tə gɩganɩ, də nətʋ ʋ nə ta kʋ̀ʋ̀, də nətʋ ʋ nə dí pàrɩ̀, ba tún Yɩzərayɛlə pɛ̀gá yìə̀n sagɩ tə wa. 20 Zwerobʋamə dí pàrɩ̀ tə bɩna sapʋa də bələ. Ʋ tɩga, yá ba gùrì wá ʋ nyɩna-ba con, ba nə dí yáá ba tɩ, yá ʋ bìú Nadabə nə dí pàrɩ̀ tə, ʋ yuu nə.
Zwida pɩ̀ʋ́ Robʋamə pàrɩ̀ tə yoo
21 Salʋmʋn bìú Robʋamə jìgə̀ Zwida payuu tə pɩ̀ʋ́. Ʋ yà jə bɩna sapwilə də nədʋ, máŋá tə wa ʋ nə jìgə̀ pɩ̀ʋ́, yá ʋ dí pàrɩ̀ bɩna fugə də barpɛ Zwerizalɛmə tɩʋ tə wa, Ba-Yígúrə́-Jə-Tiu yà nə kúrí Yɩzərayɛlə dwíə́ tə wa, sə ʋ kə ʋ yɩrɩ tə kʋ wa. Ʋ nuu yɩrɩ yà nə yɩ Naama, ʋ ga yɩ Amon dwíí tə bʋ̀á.
22 Zwida lʋʋ lɩ̀à tə tʋn kʋ tə nə lwara Ba-Yígúrə́-Jə-Tiu yáá con. Ba cʋna tə zɩ̀n ʋ lɩŋa tə doni ba nyɩna-ba cʋna tə. 23 Ba də lwə̀ jwəŋə dədwələn*, ba zɩ̀n culu kapana* ba zɩgɩ yɩɩ nə, ba cwɛn woŋwanʋ Aswera* culu dacəli pɛɛn nəfaran tə mama yuu wa, də tɩ̀án tə mama nə jə vʋran də̀ń nə. 24 Kacwaran də bacwaran də tətə yɩn lʋʋ nii tə wa, ba yà nə cwàrɩ̀ ba pɩn woŋwanan tə nə. Ba tʋn tʋtʋnkʋkwɩnan tə mama dwíə́ nəkaran* tə nə tʋn Ba-Yígúrə́-Jə-Tiu ma dɩŋɩ ba, ʋ yá lʋʋ nii tə nə, ʋ pa Yɩzərayɛlə lɩ̀à nə.
25 Robʋamə pàrɩ̀ tə bonu nii bɩnɩ tə wa, Ezwipətə pɩ̀ʋ́ Swiswakə twi ʋ ta Zwerizalɛmə tɩ̀án. 26 Ʋ pɛ̀ Ba-Yígúrə́-Jə-Tiu dìə̀ tə wa jɩjə wiən tə, də padiə tə wa jɩjə wiən tə. Ʋ pɛ̀ tə mama mɩ́ámɩ́án. Ʋ pɛ̀ sɩ́án nàtànɩ̀ tə mama, Salʋmʋn yà nə fwa. 27 Pɩ̀ʋ́ Robʋamə dàń pìí ʋ fwa tə duən də cɩnɩan, ʋ pa kwatara yun tɩ̀án tə nə, ba nə cɩ̀ pɩ̀ʋ́ dìə̀ mimii tə nə, sə ba ywàń tə yuu nə. 28 Máŋá mama pɩ̀ʋ́ tə nə vələ Ba-Yígúrə́-Jə-Tiu dìə̀ tə wa, kwatara tə yàá tì tə ba ja va. Kʋ kwa nə, ba yàá pìí ba ja tə, ba va ba tún kwatara dìə̀ tə wa.
29 Ba pʋ́pʋ́nɩ́ Robʋamə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa.
30 Kʋ̀ʋ̀ yɩn Robʋamə də Zwerobʋamə pwə́rə́ wa, máŋá mama wuuu.
31 Robʋamə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ nuu yɩrɩ yà nə yɩ Naama, ʋ yɩ Amon dwíí tə bʋ̀á. Ʋ bìú Abɩyamə nə dí pàrɩ̀ tə, ʋ yuu nə.