Zwida pɩ̀ʋ́ Abɩyamə yoo
15
1 Nebatə bìú Zwerobʋamə pàrɩ̀ tə fugə də nana nii bɩnɩ tə wa, Yɩzərayɛlə yuu wa, Abɩyamə jìgə̀ pɩ̀ʋ́ Zwida lʋʋ nii tə wa. 2 Ʋ dí pàrɩ̀ bɩna batwa Zwerizalɛmə nə. Ʋ nuu yɩrɩ nə yɩ Maka, ʋ ga yɩ Abəsalomə bʋ̀á. 3 Ʋ tʋn cʋna tə mama, ʋ nyɩna tə nə dí yáá ʋ tʋn. Ʋ wà ʋ bɩcan mama pɩn Ba-Yígúrə́-Jə-Tiu nə, ʋ nə yɩ ʋ Yɩɩ, ndə nətʋ tə, ʋ nɩbɛɛ Davidə yà nə pɩn ʋ bɩcan Yɩɩ nə. 4 Yá Davidə yuu yɩrɩ, Ba-Yígúrə́-Jə-Tiu, ʋ nə yɩ ʋ Yɩɩ pɩn wá bìú, sə ʋ jon ʋ yuu nə, ʋ də́ pàrɩ̀ tə, sə kʋ pa pàrɩ̀ tə wànɩ́ kʋ mɛn Zwerizalɛmə wa. 5 Cɩ́gá, Davidə tʋn kʋ tə nə yɩ mənəmənə, Ba-Yígúrə́-Jə-Tiu yáá con. Ʋ nə yɩn lʋʋ wa, ʋ wà kʋ tə mama Ba-Yígúrə́-Jə-Tiu nə bɩrɩ wá sə ʋ tʋn vɩ, də kʋ nə tà yoo tə, ʋ nə tʋn Uri yɩra, ʋ nə yɩ Ɛtə dwíí. 6 Máŋá tə mama Robʋamə nə yɩn lʋʋ wa, kʋ̀ʋ̀ yɩn ʋ də Zwerobʋamə pwə́rə́ wa. 7 Ba pʋ́pʋ́nɩ́ Abɩyamə tʋ̀tʋ̀nán tə gɩganɩ, də kʋ tə mama ʋ nə fwa, ba tún Zwida pɛ̀gá yìə̀n sagɩ tə wa. Kʋ̀ʋ̀ yɩn Abɩyamə də Zwerobʋamə də pwə́rə́ wa. 8 Abɩyamə tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Davidə sadiyuu tə wa. Ʋ bìú Asa nə dí pàrɩ̀ tə, ʋ yuu nə.Zwida pɩ̀ʋ́ Asa yoo
9 Yɩzərayɛlə pɩ̀ʋ́ Zwerobʋamə pàrɩ̀ tə sapʋa nii bɩnɩ tə wa, Asa jìgə̀ Zwida payuu pɩ̀ʋ́. 10 Ʋ dí pàrɩ̀ bɩna sapwilə də nədʋ, Zwerizalɛmə nə. Ʋ nɩ̀ɩ̀ yɩrɩ yà nə yɩ Maka, ʋ ga yɩ Abəsalomə bʋ̀á.
11 Asa tʋn kʋ tə nə yɩ mənəmənə Ba-Yígúrə́-Jə-Tiu yáá con, ndə ʋ nɩbɛɛ Davidə nə. 12 Ʋ pɩn kacwaran tə, də bacwaran tə nə cwàrɩ̀ ba pɩn woŋwanan tə nə, jɛ́n lʋʋ nii tə wa. Ʋ pɩn woŋwanan tə mama ʋ nyɩna-ba tə yà nə fwa jɛ́n. 13 Ʋ jon pakan dun tə tətə ʋ nuu Maaka con, ʋ nə fwa woŋwanʋ Aswera* nyɩnyɩga yɩrɩ. Asa cʋ̀gʋ̀ ʋ woŋwanʋ tə, ʋ sʋ̀rɩ́ kʋ Sedəron nacoru tə wa. 14 Asa sóní Ba-Yígúrə́-Jə-Tiu də ʋ waa mama, ʋ lʋʋ wúlú mama wa, yá də kʋ nətʋ mɛ, ʋ wá pɩn jwəŋə dədwələn* tə mʋ̀ nyʋn lá. 15 Ʋ pɛ̀ wiən tə ʋ nyɩna tə yà nə pɩn Yɩɩ nə, də wiən tə ʋ tətə nə pɩn Yɩɩ nə, ʋ ja va Ba-Yígúrə́-Jə-Tiu dìə̀ tə wa. Tə mʋ̀ nə yɩ wárʋ́, də sɩ́án, də wiən yirə duən.
16 Kʋ̀ʋ̀ yɩn Asa də Yɩzərayɛlə pɩ̀ʋ́ Baswa pwə́rə́ wa, máŋá tə mama wa, ba nə yɩn lʋʋ wa. 17 Dɩɩn don nə, Yɩzərayɛlə pɩ̀ʋ́ Baswa vəli ʋ ta kʋ̀ʋ̀ də Zwida lʋʋ nii tə. Ʋ lwə̀ biritaŋʋ ʋ ma kɩkarɩ Rama tɩʋ tə, sə ʋ ma cɩ̀ Zwida pɩ̀ʋ́ Asa də ʋ lɩ̀à tə yáá nə, ba dàn ká twá vàn təntə yuu. 18 Asa tì wárʋ́ tə mama, də sɩ́án tə mama, tə yà nə ga Ba-Yígúrə́-Jə-Tiu dìə̀ tə wa, də pɩ̀ʋ́ dìə̀ tə wa, ʋ ma tʋn ʋ tʋ̀tʋ̀nà, sə ba ja va ba pa Tabərimon bìú Bɛn-Hadadə nə, ʋ nə yɩ Eziyon nàʋ́, ʋ ga yɩ Siiri pɩ̀ʋ́, ʋ wulə Damasə nə, sə ba ga swɩ̀n ʋ con, ba wʋ́: 19 «Nə túŋə́ nimarʋ də duən, ndə n nyɩna də à nyɩna yà nə tún nimarʋ nətʋ. Nə̀ń wárʋ́ də sɩ́án nə, à tʋn n nə, sə à ma də́ zìlə́ n yuu wa. N dàń vəli n karɩ n nimarʋ tə, n nə tún də Yɩzərayɛlə pɩ̀ʋ́ Baswa, sə ʋ yá nə sənbwen.» 20 Bɛn-Hadadə sɛ̀ pɩ̀ʋ́ Asa kori tə, ʋ ga tʋn ʋ kwatara yáá tɩ̀án, ba va ba ta Yɩzərayɛlə tɩan tə. Ba ta Yion tɩ̀án, də Dan tɩ̀án, də Abɛlə-Bɛtə-Maka tɩ̀án, də Kinerɔtə nagwanaa tə mama, kʋ súrí Nefətali lʋʋ nii tə mama nə. 21 Máŋá tə Baswa nə nì kʋ, ʋ dàń yá biritaŋʋ tə lwiu nə, ʋ yà nə lwè, sə ʋ ma kɩkarɩ Rama tɩʋ tə, ʋ ga pìí ʋ va ʋ jə̀ń Tirəsa nə. 22 Pɩ̀ʋ́ Asa dàń bon ʋ kə Zwida lʋʋ lɩ̀à tə mama nə, ʋ wà lìù lɩ ʋ dʋgʋ, sə ba pɛ̀ kapana tə, də dɛɛ tə Baswa yà nə ma lwè biritaŋʋ, sə ʋ ma kɩkarɩ Rama tɩʋ tə, ba ja bà. Pɩ̀ʋ́ Asa dàń ja tə ʋ ma lwà biritaŋʋ, ʋ ma kɩkarɩ Geba, də Misəpa tɩan tə, Bɛnzwamɛn nagwanaa tə wa.
23 Ba pʋ́pʋ́nɩ́ Asa tʋ̀tʋ̀nán tə gɩganɩ, də ʋ wʋdɩʋ tə, də kʋ tə mama ʋ nə fwa, də tɩan tə ʋ nə lwə̀ biritaŋʋ, ʋ ma kɩkarɩ yoo, ba tún Zwida pɛ̀gá yìə̀n sagɩ tə wa. Máŋá tə ʋ nə kwɩn, nɛɛ yayɩgʋ jɩn wá. 24 Asa tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá ʋ nyɩna Davidə sadiyuu tə wa. Ʋ bìú Zozafatə nə dí pàrɩ̀ tə, ʋ yuu nə.
Yɩzərayɛlə pɩ̀ʋ́ Nadabə yoo
25 Asa pàrɩ̀ tə bələ nii bɩnɩ tə wa, Zwerobʋamə bìú Nadabə jìgə̀ Yɩzərayɛlə payuu tə pɩ̀ʋ́. Yá ʋ dí pàrɩ̀ tə bɩna bələ. 26 Ʋ tʋn kʋ tə nə lwara Ba-Yígúrə́-Jə-Tiu yáá con. Ʋ tì ʋ nyɩna nabwɩɩ tə, ʋ tʋn cʋna tə ʋ nyɩna tə nə pɩn Yɩzərayɛlə lɩ̀à tʋn. 27 Yɩsakarə dwíí tə wa, Ahɩya bìú Baswa tʋn pwìí bələ yoo pɩ̀ʋ́ tə yɩra. Máŋá tə nə, Nadabə də Yɩzərayɛlə kwatara tə nə wulə ba tɛ Gibeton tɩʋ tə, kʋ nə yɩ Filisi tɩ̀án tɩʋ, Baswa gʋa Nadabə. 28 Kʋ yoo tə tʋn Zwida lʋʋ nii pɩ̀ʋ́ Asa pàrɩ̀ tə batwa nii bɩnɩ tə wa, yá Baswa dàń dí pàrɩ̀ tə Nadabə yuu nə. 29 Máŋá tə ʋ nə jìgə̀ pɩ̀ʋ́, ʋ gʋa Zwerobʋamə dìə̀ lɩ̀à tə mama, ʋ wà ba lìù nədʋ tətə yá. Kʋ tʋn ndə nətʋ tə, Ba-Yígúrə́-Jə-Tiu yà nə twá ʋ nii sʋ̀sʋ̀nʋ̀ Ahɩya nə, ʋ nə yɩ Silo tíú, ʋ ma swɩ̀n. 30 Kʋ nətʋ tə tʋn, Zwerobʋamə cʋna tə yɩrɩ ʋ yà nə tʋn, ʋ ga yigu Yɩzərayɛlə lɩ̀à tə də, ʋ pa ba tʋn tə cʋna təntə, ba ma zɩ̀n Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ lɩŋa.
31 Ba pʋ́pʋ́nɩ́ Nadabə tʋ̀tʋ̀nán tə gɩganɩ, də kʋ tə mama ʋ nə fwa, ba tún Yɩzərayɛlə pɛ̀gá yìə̀n sagɩ tə wa. 32 Kʋ̀ʋ̀ yɩn Asa də Yɩzərayɛlə pɩ̀ʋ́ Baswa pwə́rə́ wa, máŋá tə mama wa, ba nə yɩn lʋʋ wa.
Yɩzərayɛlə pɩ̀ʋ́ Baswa yoo