1 Pɛ̀gá 16

1 Ba-Yígúrə́-Jə-Tiu dàń twá Hanani bìú Zwewu nə, ʋ ma swɩ̀n sʋ̀ràn tə tə, ʋ zɩgɩ Baswa nə, ʋ wʋ́: 2 «N yà tà won mama, yá à pɩn n jì Yɩzərayɛlə lɩ̀à tə, ba nə yɩ à mʋ̀ lɩ̀à pɩ̀ʋ́. Yá n dàń tì Zwerobʋamə nabwɩɩ tə, n yigu Yɩzərayɛlə lɩ̀à tə, ba nə yɩ à mʋ̀ lɩ̀à, n pa ba tʋn cʋna, ba ma zɩ̀n à lɩŋa. 3 Kʋ mʋ̀ nə pɩn, à wá pa n mʋ̀ Baswa, də n dìə̀ tə nyʋn tɩa yuu wa. À wá pa n dìə̀ tə jì, ndə Nebatə bìú Zwerobʋamə dìə̀ tə nə. 4 N dìə̀ lìù nə tɩga tɩʋ tə wa, ʋ yɩ kukuri nə wá də́. Yá ʋ nə kʋ̀ʋ́ tɩga gaʋ wa, ʋ yɩ dələn nə wá də́.»

5 Ba pʋ́pʋ́nɩ́ Baswa tʋ̀tʋ̀nán tə gɩganɩ, də kʋ tə ʋ nə fwa, də ʋ wʋdɩʋ tə yoo, ba tún Yɩzərayɛlə pɛ̀gá yìə̀n sagɩ tə wa. 6 Baswa tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Tirəsa nə, yá ʋ bìú Ela nə dí pàrɩ̀ tə ʋ yuu nə. 7 Ba-Yígúrə́-Jə-Tiu yà nə dí yáá ʋ twá ʋ nii sʋ̀sʋ̀nʋ̀ Zwewu nə, ʋ nə yɩ Hanani bìú, ʋ ma swɩ̀n Baswa də ʋ dìə̀ tə con, kʋ yɩn yìə̀n bələ yuu wa: Təntən nə, Baswa tʋn kʋ tə nə lwara Ba-Yígúrə́-Jə-Tiu yáá con, yìə̀n tə yɩrɩ ʋ nə tʋn, ʋ ma zɩ̀n Ba-Yígúrə́-Jə-Tiu lɩŋa, ndə Zwerobʋamə də ʋ dìə̀ lɩ̀à nə tʋn nətʋ. Yá bələ nii nə, ʋ gʋa Zwerobʋamə dìə̀ lɩ̀à tə mama.

Yɩzərayɛlə pɩ̀ʋ́ Ela yoo

8 Zwida lʋʋ nii pɩ̀ʋ́ Asa pàrɩ̀ tə sapʋa də bardʋ nii bɩnɩ tə wa, Baswa bìú Ela jìgə̀ Yɩzərayɛlə payuu tə pɩ̀ʋ́ Tirəsa nə. Ʋ dí pàrɩ̀ tə bɩna bələ.

9 Ʋ tʋtʋnʋ Ziməri, ʋ nə ywàŋá ʋ səsen kòrə̀n tə faan yuu nə, tʋn pwìí bələ yoo ʋ yɩra. Ela yà nyʋan sana ʋ bʋbʋnɩ, ʋ wulə Tirəsa nə, Arəsa ʋ nə yɩ pɩ̀ʋ́ dìə̀ tə yáá tíú dìə̀ wa. 10 Ziməri zʋa ʋ gʋ wá Zwida lʋʋ nii pɩ̀ʋ́ Asa pàrɩ̀ tə sapʋa də barpɛ nii bɩnɩ tə wa, yá ʋ dàń dí pàrɩ̀ tə ʋ yuu nə. 11 Máŋá tə ʋ nə jìgə̀ pɩ̀ʋ́, ʋ jə̀ə́ ʋ padaʋ tə yuu wa, ʋ gʋa Baswa dìə̀ lɩ̀à tə mama, ʋ wà bɛɛ mama yá Baswa dwíí tə wa, ʋ ma wà Baswa dabara də yá. 12 Ziməri gʋa Baswa dìə̀ lɩ̀à tə mama, ndə Ba-Yígúrə́-Jə-Tiu nə twá ʋ nii sʋ̀sʋ̀nʋ̀ Zwewu nə, ʋ ma swɩ̀n kʋ nətʋ. 13 Kʋ nətʋ tə tʋn cʋna tə mama yɩrɩ, Baswa də ʋ bìú Ela nə tʋn, ba ga pa Yɩzərayɛlə lɩ̀à tə də tʋn tə cʋna tə, kʋ twá də woŋwanan ba nə fwa, ba ma zɩ̀n Ba-Yígúrə́-Jə-Tiu lɩŋa, ʋ nə yɩ Yɩzərayɛlə lɩ̀à Yɩɩ.

14 Ba pʋ́pʋ́nɩ́ Ela tʋ̀tʋ̀nán tə gɩganɩ, də kʋ tə mama ʋ nə fwa, ba tún Yɩzərayɛlə pɛ̀gá yìə̀n sagɩ tə wa.

Yɩzərayɛlə pɩ̀ʋ́ Ziməri yoo

15 Zwida pɩ̀ʋ́ Asa pàrɩ̀ tə sapʋa də barpɛ nii bɩnɩ tə wa, Ziməri jìgə̀ pɩ̀ʋ́, yá ʋ dí pàrɩ̀ dɩan barpɛ Tirəsa nə. Kʋ máŋá tə wa, də Yɩzərayɛlə lɩ̀à kwatara tə yà kun duən nə, sə ba Gibeton tɩʋ tə, kʋ nə yɩ Filisi tɩ̀án nə tɩ. 16 Kwatara tə yà nə kun duən nə tə nì də Ziməri tʋn pwìí bələ yoo pɩ̀ʋ́ tə yɩra, yá ʋ gʋa pɩ̀ʋ́ tə tətə. Kʋ dɩɩn tə nə, Yɩzərayɛlə lɩ̀à tə mama tún Oməri, ʋ nə yɩ kwatara yáá tíú, sə ʋ ya Yɩzərayɛlə pɩ̀ʋ́, catarɩ laŋa tə wa. 17 Oməri də ʋ kwatara tə mama dàń vìí ba yá Gibeton tɩ̀án, ba ga va ba pú Tirəsa tɩ̀án ba kə ba tɛ. 18 Máŋá tə wa Ziməri nə nɩ də ba jon tɩʋ tə, ʋ zʋa padiə tə dibiu don wa, ʋ ga kə mən padiə tə nə, ʋ ma gʋ ʋ tɩ̀àn. 19 Yoo təntə yí wá, ʋ nə tʋn kʋ tə nə lwara Ba-Yígúrə́-Jə-Tiu yáá con yɩrɩ. Ʋ tì Zwerobʋamə nabwɩɩ tə, ʋ də tʋn cʋna tə, Zwerobʋamə nə tʋn, ʋ ga yigu Yɩzərayɛlə lɩ̀à ʋ pa ba də tʋn tə cʋna tə.

20 Ba pʋ́pʋ́nɩ́ Ziməri tʋ̀tʋ̀nán tə gɩganɩ, də pwìí bələ yoo tə ʋ nə tʋn, ba tún Yɩzərayɛlə pɛ̀gá yìə̀n sagɩ tə wa.

21 Ziməri tɩ̀án tə kwa nə, Yɩzərayɛlə lalʋʋ tə pwɛ̀ púlə́ bələ. Lalʋʋ tə faan yà pɩ̀à sə ba tún Ginatə bìú Tibəni, sə ʋ ya pɩ̀ʋ́. Ba faan tə don də ga pɩ̀à sə ba tún Oməri, sə ʋ ya pɩ̀ʋ́. 22 Oməri kwa lɩ̀à tə twi ba dí dɩ̀àn, Ginatə bìú Tibəni kwa lɩ̀à tə yuu wa. Tibəni tɩga, yá Oməri dàń jìgə̀ pɩ̀ʋ́.

Yɩzərayɛlə pɩ̀ʋ́ Oməri yoo

23 Zwida pɩ̀ʋ́ Asa pàrɩ̀ tə fɩtwa də nədʋ nii bɩnɩ tə wa, Oməri jìgə̀ Yɩzərayɛlə payuu tə pɩ̀ʋ́. Ʋ dí pàrɩ̀ tə bɩna fugə də bələ, yá ʋ yà dí yáá ʋ də́ pàrɩ̀ tə bɩna bardʋ Tirəsa nə. 24 Kʋ kwa nə, ʋ yə̀ Samari paan tə Swemɛrə con, də səbilurən 6000. Ʋ lwə̀ tɩʋ paan tə yuu wa, ʋ dɩ kʋ yɩrɩ Samari, ndə Swemɛrə yɩrɩ tə nə, ʋ yà nə tɩ paan tə.

25 Oməri tʋn kʋ tə nə lwara Ba-Yígúrə́-Jə-Tiu yáá con. Ʋ tʋn cʋna ʋ doni pɛ̀gá tə mama, ba nə nə dí ʋ yáá, ba ya lá. 26 Ʋ twá Nebatə bìú Zwerobʋamə nabwɩɩ tə mama nə. Ʋ tʋn Zwerobʋamə cʋna tə, ʋ nə pɩn Yɩzərayɛlə lɩ̀à tʋn, ba ma zɩ̀n Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ lɩŋa, kʋ twá də ba woŋwanan tə.

27 Ba pʋ́pʋ́nɩ́ Oməri tʋ̀tʋ̀nán tə gɩganɩ, də kʋ tə ʋ nə tʋn, də wʋdɩʋ tə ʋ nə tʋn yoo, ba tún Yɩzərayɛlə pɛ̀gá yìə̀n sagɩ tə wa. 28 Oməri tɩga, yá ba gùrì wá ʋ nyɩna-ba con, ba nə dí yáá ba tɩ. Ba gùrì wá Samari nə. Ʋ bìú Akabə nə dí pàrɩ̀ tə ʋ yuu nə.

Yɩzərayɛlə pɩ̀ʋ́ Akabə yoo

29 Zwida lʋʋ nii pɩ̀ʋ́ Asa pàrɩ̀ tə fɩtwa də nana nii bɩnɩ tə wa, Oməri bìú Akabə jìgə̀ Yɩzərayɛlə payuu tə pɩ̀ʋ́. Oməri bìú Akabə dí pàrɩ̀ tə bɩna sapʋa də bələ, Yɩzərayɛlə lɩ̀à yuu wa, Samari nə. 30 Oməri bìú Akabə tʋn kʋ tə nə lwara Ba-Yígúrə́-Jə-Tiu yáá con, ʋ doni pɛ̀gá tə mama, ba nə dí ʋ yáá ba ya lá. 31 Akabə tʋn Nebatə bìú Zwerobʋamə cʋna tə, yá kʋ tə wà ʋ fɩra yí. Ʋ tə swe Sidon tɩ̀án pɩ̀ʋ́ Ɛtəbalə bʋ̀á Zwezabɛlə, ʋ ga va ʋ tʋ ʋ nadwana yuu woŋwanʋ Baalə* yáá con, ʋ pɩn kʋ dun. 32 Ʋ lwə̀ Baalə woŋwanʋ tə dìə̀ Samari nə, ʋ ga lwà joŋi bwálɩ́ ka wa. 33 Akabə cwɛn woŋwanʋ Aswera* dacəla də, joŋi bwálɩ́ tə yuu wa. Akabə tʋn cʋna ʋ doni Yɩzərayɛlə lɩ̀à pɛ̀gá tə mama, ba nə dí ʋ yáá ba ya lá, ʋ ma zɩ̀n Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ lɩŋa.

34 Kʋ máŋá təntə wa, Hɩyɛlə ʋ nə yɩ Betɛlə tíú, zàn ʋ pìí ʋ lwà Zweriko tɩʋ tə. Máŋá tə Hɩɛlə nə kʋa tɩʋ tə dəkuu, sə ʋ lwà kʋ, ʋ bikwɩa Abiramə tɩga. Máŋá tə ʋ nə kʋ́ʋ̀ ken tɩʋ tə mimii nii bòrə̀n tə, ʋ bələ nii bìú Segubə də tɩga. Kʋ yɩn ndə Ba-Yígúrə́-Jə-Tiu nə twá Nun bìú Zozuwe nə, ʋ ma swɩ̀n kʋ nətʋ.