Yɩɩ nii sʋ̀sʋ̀nʋ̀ Eli swɩ̀n dwakʋrɩ yoo, kʋ nə bɩ̀àn
17
1 Eli, ʋ nə yɩ Tiswibə tíú, Galadə nagwanaa tə wa, twi ʋ swɩ̀n Akabə con, ʋ wʋ́: «Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, à ga yɩ ʋ tʋtʋnʋ wulə! Nə̀ń kʋ tə ʋ nə swɩ̀n: Bɩna tə tə pwə́rə́ wa, dwà nə à yə̀ə́ nyʋ̀nʋ̀ bá yà lá, də kʋ nə tà à pɩn nii.»Eli vəli ʋ wulə Keritə nacoru tə nii nə
2 Ba-Yígúrə́-Jə-Tiu swɩ̀n Eli con, ʋ wʋ́: 3 «Nan bwálɩ́ kʋ tə wa, n va yɩɩ yipɩan con, n səgə Keritə nacoru tə nii nə, kʋ nə wulə Zʋrədɛn mʋnaa tə yɩɩ yipɩan con. 4 N wá nyʋn nɩ́á nacoru tə wa, à ga wá pa nii batɩankanan nə, sə tə lɩ n nii nə.» 5 Eli twá kʋ tə nə, Ba-Yígúrə́-Jə-Tiu nə swɩ̀n ʋ con. Ʋ vəli ʋ wulə Keritə nacoru tə nii nə, kʋ nə wulə Zʋrədɛn mʋnaa tə yɩɩ yipɩan con. 6 Batɩankanan tə yàá ja wodiu də nàŋʋ́, tə ja twi jɩjʋ də didəni, tə pɩn wá, ʋ ga nywɩn nɩ́á nacoru tə wa.
Eli wulə Sarɛpəta tɩ̀án kadənu tə con
7 Máŋá don twi kʋ yí, də nacoru tə nɩ́á tə wʋa. Cɩ́gá, dwà yà wà nɩ̀ lʋʋ nii tə wa. 8 Yá Ba-Yígúrə́-Jə-Tiu swɩ̀n sʋ̀ràn tə tə Eli con, ʋ wʋ́: 9 «Zàn n va n ya Sarɛpəta tɩʋ tə wa, kʋ nə yɩ Sidon lʋʋ nii nə tɩ kʋ. Nə̀ń, à pɩn nii kadənu don nə, sə ʋ lɩ n nii nə lá.» 10 Eli zàn ʋ zʋ cwəŋə, ʋ vələ Sarɛpəta. Máŋá tə ʋ nə ma zwɩ tɩʋ tə wa, də nə̀ń kadənu don nə, ʋ wulə ʋ pɛ̀ dɛɛ. Eli bon wá, ʋ swɩ̀n, ʋ wʋ́: «À lòrì mʋ́, vəli n pɩ̀à nɩ́á mancɩn, n ja bà n pa nə, sə à nyʋn.» 11 Kadənu tə vəli ʋ pɩ̀à nɩ́á tə, ʋ ja bà. Eli kʋ́ʋ̀ bon wá, ʋ swɩ̀n ʋ con, ʋ wʋ́: «À lòrì mʋ́, vəli n pɩ̀à wodiu mancɩn n jɩbwa wa, n ja bà n pa nə.» 12 Kan tə le, ʋ wʋ́: «Ba-Yígúrə́-Jə-Tiu, ʋ nə yɩ n Yɩɩ wulə! À bà won mama jə, kʋ nə bɩga. Mun mancɩn nə à jə nagwala wa, də nʋga mancɩn kwə̀rə̀ wa. Mə dɛɛ bələ nə à wulə à pɛ̀, sə à ja va à ma fwa wodiu, à də à bìú tə də́. Kʋ kwa nə, nə wá tɩ.» 13 Eli ma swɩ̀n ʋ con, ʋ wʋ́: «Dàn ká pa fən ja mʋ́, vəli n fwa ndə n nə swɩ̀n nətʋ. Ja kʋ tə n nə jə tə, n dí yáá n ywɛ́ mun mancɩn, n ja pa nə. Kʋ kwa nə, n dàń wá fwa n də n bìú tə nyiən. 14 Cɩ́gá, nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə swɩ̀n: “Mun tə nə wulə nagwala tə wa bá zwɛ̀, yá nʋga tə nə wulə kwə̀rə̀ tə də wa bá zwɛ̀, kʋ ja vələ dɩɩn tə, Ba-Yígúrə́-Jə-Tiu nə wá pa dwà nà tɩa yuu.” » 15 Kan tə vəli ʋ twá Eli sʋgʋ tə nii nə, ʋ tʋn kʋ tə ʋ nə swɩ̀n ʋ con. Yá kan tə, də ʋ bìú tə, də Yɩɩ nii sʋ̀sʋ̀nʋ̀ tə dàń dí wodiu máŋá mama wuuu, kʋ dán. 16 Mun tə wà zwɛ̀ nagwala tə wa, yá nʋga tə də wà zwɛ̀ kwə̀rə̀ tə wa, ndə Ba-Yígúrə́-Jə-Tiu nə twá Eli nə, ʋ ma swɩ̀n kʋ.
Eli bwin kadənu tə bìú
17 Tə yìə̀n təntə kwa nə, kadənu tə bìú tə twi ʋ tʋ yɩŋa. Ʋ yayɩgʋ tə yɩn càn zənzən, kʋ pa ʋ tɩ. 18 Kan tə dàń ma swɩ̀n Eli con, ʋ wʋ́: «Bɛ̀ɛ̀ nə pɩn n ma fwa nə nətən, Yɩɩ tʋtʋnʋ? Kʋ yɩ n twi, sə n pìí n lìí à cʋna Yɩɩ yáá con, n ga pa à bìú tə tɩ naaa?» 19 Eli ma le kan tə, ʋ wʋ́: «Pa nə n bìú tə.» Ʋ dàń jon bìú tə ʋ nuu jɩɩn wa, ʋ ja dɩ̀ dəyuu dìə̀ tə wa, ʋ Eli tətə yà nə wulə ka wa, ʋ tún ʋ tətə gədo yuu. 20 Eli dàń lòrì Ba-Yígúrə́-Jə-Tiu, ʋ wʋ́: «N mʋ̀ Ba-Yígúrə́-Jə-Tiu, n nə yɩ à tíú Yɩɩ, kadənu wa tə nə jon nə, ʋ kə ʋ dìə̀. Cɩ́gá mama, n pɩ̀à sə ʋ bìú tə tɩ, sə ʋ ga ya pucʋnɩ wa?» 21 Eli tɩɩn ʋ tɩ̀àn, ʋ pə̀ń bisɩmaa tə yuu wa, nɛɛ batwa, ʋ ga bon ʋ kə Ba-Yígúrə́-Jə-Tiu nə, ʋ wʋ́: «N mʋ̀ Ba-Yígúrə́-Jə-Tiu, n nə yɩ à tíú Yɩɩ, à lòrì mʋ́, sə n pa bisɩmaa wa tə siŋu tə pìí kʋ bà ʋ yɩra wa.» 22 Ba-Yígúrə́-Jə-Tiu le Eli lòrì tə, ʋ ga pa bisɩmaa tə siŋu tə pìí kʋ bà ʋ yɩra wa, ʋ ga pìí ʋ bwin. 23 Eli dàń tì bisɩmaa tə, ʋ ja nan dəyuu dìə̀ tə wa, ʋ cú ʋ pa ʋ nuu nə. Ʋ swɩ̀n, ʋ wʋ́: «Ywàń, n bìú tə, ʋ nəŋə!» 24 Kan tə swɩ̀n Eli con, ʋ wʋ́: «Sɩ́ʋ́n nə, à dàń yə̀ə́ də n yɩ Yɩɩ tʋtʋnʋ, yá Ba-Yígúrə́-Jə-Tiu sʋgʋ tə, kʋ nə wulə n nii wa, yɩ cɩ́gá.»