Eli jəri Akabə tʋtʋnʋ Abədɩasə
18
1 Dɩan kapʋpʋ kwa nə, Ba-Yígúrə́-Jə-Tiu swɩ̀n Eli con, dwakʋrɩ tə batwa nii bɩnɩ tə wa, ʋ wʋ́: «Vəli n pa Akabə na mʋ́. Yá à wá pa dwà nà tɩa yuu wa.» 2 Eli dàń vəli, sə ʋ pa pɩ̀ʋ́ Akabə na wá.Kʋ máŋá tə wa, də niən tə yoo dàń yà yɩ fìú, Samari wa. 3 Akabə bon Abədɩasə, ʋ nə ywàŋá pɩ̀ʋ́ dìə̀ tə yuu nə. Abədɩasə yà yɩ lìù tə, ʋ nə dəri Ba-Yígúrə́-Jə-Tiu fən. 4 Máŋá tə Zwezabɛlə nə gʋa Ba-Yígúrə́-Jə-Tiu nii sʋ̀sʋ̀nà tə, Abədɩasə yà jɩn ba wa lɩ̀à bíí ʋ səgə. Ʋ səgə ba finu finu, púlə́ bələ, paan bʋran wa, ʋ pɩn ba wodiu də nɩ́á. 5 Akabə swɩ̀n Abədɩasə con, ʋ wʋ́: «Nə vələ lʋʋ nii tə wa, bwálá tə mama nə nɩ́á nə wulə, də nacorən tə nii nə, nə jə́n gaʋ wá yà lá, sə nə pa səsen tə, də bɩnasəsen tə nə. Kʋ nətʋ wá pa, nə bá gʋ vàná tə. 6 Ba dàń tarɩ lʋʋ nii tə nagwanɛɛ tə, ba lìù mama nə mɛ, sə ʋ twá tə wa. Akabə tì cwəŋə don, ʋ cɩcɩ, yá Abədɩasə də tì cwəŋə don, ʋ cɩcɩ.
7 Máŋá tə Abədɩasə nə wulə cwəŋə wa, də nə̀ń Eli nə ʋ jəri wá. Abədɩasə lwarɩ wá, ʋ tʋ ʋ nadwana yuu, ʋ pú ʋ yáá tɩa, ʋ ga swɩ̀n, ʋ wʋ́: «Kʋ yɩ n mʋ̀ à yuu-tiu Eli naaa?» 8 Eli le wá, ʋ wʋ́: «Kʋ yɩ à mʋ̀ nə! Vəli n swɩ̀n n yuu-tiu Akabə con, də n nɩ à mʋ̀ Eli.» 9 Abədɩasə dàń swɩ̀n, ʋ wʋ́: «Bɛ̀ɛ̀ cʋna nə à mʋ̀ n tʋtʋnʋ tə tʋn, n ma kəni nə Akabə jɩɩn wa, sə ʋ gʋ? 10 Ba-Yígúrə́-Jə-Tiu, ʋ nə yɩ n Yɩɩ wulə! Lʋʋ nii tə̀lə́, payuu də ma tə̀lə́, à yuu-tiu tə nə wà lɩ̀à tʋn kʋ wa, sə ba twarɩ mʋ́. Yá ba nə swɩ̀n də n tə̀lə́ lá, ʋ tə yàá pa lʋʋ nii tə, nə à yə̀ə́ payuu tə lɩ̀à dù dùrə̀, də ba cɩ́gá wà mʋ́ nɩ. 11 Yá sɩ́ʋ́n nə, n dàń wʋ́ à vəli à swɩ̀n à yuu-tiu tə con, də à nɩ n mʋ̀ Eli! 12 Yá máŋá tə, à nə wá kɛ̀ń à yá mʋ́, Ba-Yígúrə́-Jə-Tiu Siŋu tə wá tì mʋ́. À bá yəni n bwálɩ́. À dàń wá tún à nii nətə Akabə con, máŋá tə wa, ʋ nə wá twarɩ mʋ́ ʋ ga. À mʋ̀ nə ʋ dàń wá gʋ! Yá à mʋ̀ n tʋtʋnʋ tə dəri Ba-Yígúrə́-Jə-Tiu fən, kʋ nə zɩgɩ à zandwan mama. 13 Ba wà man ba bɩrɩ n mʋ̀ à yuu-tiu nə, kʋ tə à nə tʋn, máŋá tə wa Zwezabɛlə nə wulə ʋ gwɩ Ba-Yígúrə́-Jə-Tiu nii sʋ̀sʋ̀nà tə naaa? À səgə Ba-Yígúrə́-Jə-Tiu nii sʋ̀sʋ̀nà bíí. À səgə ba finu finu, paan bʋran wa, à ga pɩn ba wodiu də nɩ́á. 14 Yá sɩ́ʋ́n nə, n mʋ̀ dàń wʋ́ à vəli à swɩ̀n à yuu-tiu tə con, də à nɩ n mʋ̀ Eli! Ʋ wá gʋ nə!» 15 Yá Eli le wá, ʋ wʋ́: «Ba-Yígúrə́-Jə-Tiu, ʋ nə yɩ Kwatara Yɩɩ tə, à nə yɩ ʋ tʋtʋnʋ wulə! Zə̀n kʋ tə, à wá pa Akabə na nə ʋ yáá nə.
Eli twi Akabə yáá con
16 Abədɩasə nə vəli ʋ yí Akabə, ʋ tún ʋ nii ʋ bɩrɩ wá. Yá Akabə dàń vəli sə ʋ jəri Eli. 17 Máŋá tə ʋ nə nɩ Eli, ʋ swɩ̀n ʋ con, ʋ wʋ́: «Mə n mʋ̀ nə kəni basarʋ tə Yɩzərayɛlə lʋʋ nii tə wa!» 18 Eli le wá, ʋ wʋ́: «À ba basarʋ kəni Yɩzərayɛlə lʋʋ nii tə wa, kʋ yɩ n mʋ̀ də n nyɩna dìə̀ tə nə ken basarʋ tə Yɩzərayɛlə lʋʋ nii tə wa, á nə vɩga Ba-Yígúrə́-Jə-Tiu yìə̀n tə, ʋ nə pɩn nii tə yuu wa, á ga pìí á pɩn dun woŋwanan Baalə* nə yɩrɩ. 19 Sɩ́ʋ́n nə, pa Yɩzərayɛlə lɩ̀à tə mama bà duən yáá nə à con, Karəmɛlə paan tə yuu wa, kʋ súrí woŋwanʋ Baalə nii sʋ̀sʋ̀nà 450 tə, də woŋwanʋ Aswera* nii sʋ̀sʋ̀nà 400 tə nə, ba nə də́ wodiu də Zwezabɛlə.»
Eli də Baalə nii sʋ̀sʋ̀nà tə wulə Karəmɛlə paan tə yuu wa
20 Akabə pɩn ba bon Yɩzərayɛlə lɩ̀à tə mama, də woŋwanan nii sʋ̀sʋ̀nà tə bà kə duən yáá nə, Karəmɛlə paan tə yuu wa. 21 Lalʋʋ tə mama nə kun duən nə máŋá tə wa, Eli twi ʋ yí ba yɩra, ʋ ga swɩ̀n, ʋ wʋ́: «Á wá ya yɛɛ bələ wa, kʋ dán kʋ mɛ nətə? Kʋ nə yɩ Ba-Yígúrə́-Jə-Tiu nə yɩ Yɩɩ, á pɩan á tɩ̀àn wá! Kʋ kʋ́ʋ̀ nə yɩ woŋwanʋ Baalə nə yɩ Yɩɩ, á pɩan á tɩ̀àn kʋ!» Yá lalʋʋ tə wà yoo mama le. 22 Eli kʋ́ʋ̀ swɩ̀n lalʋʋ tə con, ʋ wʋ́: «À mʋ̀ cɩcɩ nə yɩ Ba-Yígúrə́-Jə-Tiu nii sʋ̀sʋ̀nʋ̀, à nə ga, yá woŋwanʋ Baalə nii sʋ̀sʋ̀nà 450 nə wulə. 23 Ba dàń pɩan nəba nabɩran bələ, sə ba kúrí kʋ don ba ca kʋ, ba tún dɛɛ yuu wa, ba nə dàn ká kə mən kʋ nə. À də wá tanɩ kʋ don tə, à tún dɛɛ yuu wa, à bá kə mən kʋ nə. 24 Á dàń wá bon á kə á yɩɩ tə nə, à də wá bon à kə Ba-Yígúrə́-Jə-Tiu nə. Yɩɩ tə ʋ nə wá le ʋ pa mən kwé, mə ʋ mʋ̀ Yɩɩ tə nə wá yà cɩ́gá Yɩɩ.» Lalʋʋ tə mama le, ba wʋ́: «Nə sɛ̀ kʋ!»
25 Eli swɩ̀n woŋwanʋ Baalə nii sʋ̀sʋ̀nà tə con, ʋ wʋ́: «Á kúrə́ nabɩʋ tə don, á təntən á tanɩ kʋ. Cɩ́gá, á mʋ̀ nə dáá. Á boŋə á kə á yɩɩ tə nə, á nə dànà ká kə mən.» 26 Ba tì nabɩʋ tə, ba nə pɩn ba tə, ba tanɩ kʋ, ba ga bon ba kə woŋwanʋ Baalə nə wuuu, kʋ nə zɩgɩ jɩjʋ, kʋ va kʋ yí yɩcaʋ gùlú. Ba swɩ̀n, ba wʋ́: «Baalə, le nəba nʋʋ!» Yá kori wà lá yɩn kʋ le ba. Ba dàń yà wulə ba faŋa woŋwanʋ joŋi bwálɩ́ tə yáá con, ba nə lwə̀. 27 Yɩcaʋ gùlú máŋá wa, Eli ja ba ʋ də́ bɩyɩrɩ, ʋ wʋ́: «Á cə̀rə́ á kə yɩɩ nə, Baalə nə yɩ yɩɩ tə yɩrɩ, kʋ wàá də ʋ wulə ʋ bʋŋa won don yoo, nə à yə̀ə́ yoo don nə cɩ̀gà ʋ yáá nə, nə à yə̀ə́ ʋ vəli cwəŋə, kʋ ma wàá də, kʋ yɩ ʋ dwɛ̀, yá ʋ wá zàn dwiən tə nə.» 28 Ba dàń cə̀rí ba kə yɩɩ nə, ba ja sɩ̀án də cwiən, ba ma goŋi ba tɩ̀àn, ndə kʋ nə yɩ ba yofwamɩʋn nətʋ, jana ga pàlɩ̀ ba yɩra. 29 Máŋá tə yɩcaʋ gùlú nə kɛ̀ń, ba kʋ́ʋ̀ bon ba kə woŋwanʋ Baalə tə nə də ba dɩ̀àn mama, kʋ va kʋ yí máŋá tə, ba nə fwa didəni joŋia tə. Yá ba wà kori nì, kʋ nə le ba, ba wà mɩmɩnʋ mama nɩ.
30 Eli dàń swɩ̀n lalʋʋ tə mama con, ʋ wʋ́: «Á bɩ̀àn á yí à yɩra!» Lalʋʋ tə mama dàń twi ba yí ʋ yɩra. Eli pìí ʋ zɩ̀n Ba-Yígúrə́-Jə-Tiu joŋi bwálɩ́ tə, kʋ yà nə tʋa. 31 Eli tì kapana fugə də bələ, ndə Zwakɔbə bɩ̀á fugə də bələ tə dwíə́ tə nə. Mə ʋ mʋ̀ Zwakɔbə con nə, Ba-Yígúrə́-Jə-Tiu yà swɩ̀n, ʋ wʋ́: «N yɩrɩ wá ya Yɩzərayɛlə.» 32 Eli ja kapana təntə ʋ ma lwà Yɩɩ joŋi bwálɩ́, Ba-Yígúrə́-Jə-Tiu yɩrɩ. Ʋ kʋa bʋʋ ʋ ja kɩkarɩ Yɩɩ joŋi bwálɩ́ tə, nɩ́á litərə fɩtwa nə wàá kʋ wa. 33 Ʋ kwɛn dɛɛ tə ʋ tún, ʋ ca nabɩʋ tə ʋ tún dɛɛ tə yuu wa. 34 Ʋ dàń swɩ̀n, ʋ wʋ́: «Á taŋa nɩ́á də kwàrɩ́ banɩa, á ja bà á lwá joŋi tə, də dɛɛ tə yuu wa.» Ʋ kʋ́ʋ̀ swɩ̀n ba con, ʋ wʋ́: «Á taŋa nɩ́á tə á kə lá, nɛɛ bələ nii nə.» Ba kʋ́ʋ̀ bwɛ́ ba tʋn kʋ. Ʋ kʋ́ʋ̀ bwɛ́ ʋ swɩ̀n, ʋ wʋ́: «Á taŋa nɩ́á tə nɛɛ batwa nii nə, á kə lá.» Ba tan nɩ́á tə nɛɛ batwa nii nə, ba kə lá. 35 Yá nɩ́á tə pàlɩ̀ tə kɩkarɩ Yɩɩ joŋi bwálɩ́ tə, tə sú gwàlʋ́ tə.
36 Didəni joŋi tə fwaŋʋ máŋá nə yí, Eli fwarɩ ʋ yí Yɩɩ joŋi bwálɩ́ tə yɩra, ʋ ga swɩ̀n, ʋ wʋ́: «Ba-Yígúrə́-Jə-Tiu, n nə yɩ Abərahamə, də Yɩzakə, də YɩzərayɛləbYɩɩ, pa sə ba lwarɩ zə̀n kʋ tə, də n mʋ̀ nə yɩ Yɩzərayɛlə lɩ̀à Yɩɩ, yá à yɩ n tʋtʋnʋ, à tʋŋa yìə̀n tə tə mama, kʋ twá n sʋgʋ tə nə. 37 N dàń le nə Ba-Yígúrə́-Jə-Tiu! Le nə, sə lalʋʋ kʋ tə lwarɩ, də n mʋ̀ Ba-Yígúrə́-Jə-Tiu nə yɩ Yɩɩ, n mʋ̀ ga nə wá pa, ba bɩcanɩ pìí tə bà n con.»
38 Ba-Yígúrə́-Jə-Tiu dàń pɩn mən cú tə də́ joŋi tə, də dɛɛ tə, də kapana tə, də tɩa tə. Mən tə pɩn nɩ́á tə yà nə wulə gwàlʋ́ tə wa pupwin tə nyʋn lá. 39 Máŋá tə lalʋʋ tə mama nə nɩ kʋ nətʋ tə, ba tʋa ba pú ba yáá tɩa, ba ga swɩ̀n, ba wʋ́: «Kʋ yɩ Ba-Yígúrə́-Jə-Tiu nə yɩ Yɩɩ! Kʋ yɩ Ba-Yígúrə́-Jə-Tiu nə yɩ Yɩɩ!» 40 Eli swɩ̀n ba con, ʋ wʋ́: «Á jana woŋwanʋ Baalə nii sʋ̀sʋ̀nà tə, á dànà ká pa ba ladʋa tətə jɛ́n!» Lalʋʋ tə dàń jɩn ba mama. Eli ja ba ʋ cú Kison nacoru tə wa, ʋ kə sɩ̀ʋ́ ba bɩan nə lá.
Dwà tə pìí ka bà
41 Eli swɩ̀n Akabə con, ʋ wʋ́: «Vəli n də́, n ga nyʋn. Cɩ́gá, à nə̀ń dwà mà gùlú.» 42 Akabə dàń vəli sə ʋ də́, ʋ ga nyʋn. Yá Eli mʋ̀ dɩ̀gà Karəmɛlə paan tə yuu wa, ʋ kwa tɩa, ʋ kə ʋ yáá ʋ nadwana pwə́rə́ wa. 43 Eli swɩ̀n ʋ tʋtʋnʋ tə con, ʋ wʋ́: «Dɩ̀ n ywàń mʋʋ vàn con, n jə́n.» Ʋ dɩ̀gà ʋ ywàń, ʋ ga swɩ̀n, ʋ wʋ́: «Won mama tə̀lə́ lá.» Eli tʋn wá nətʋ wuuu, nɛɛ barpɛ. 44 Nɛɛ barpɛ tə nii nə, ʋ tʋtʋnʋ tə swɩ̀n, ʋ wʋ́: «Bakwan nəmanbiə nə zaŋa mʋʋ tə wa, kʋ mɛ ndə jɩtalɩ nə.» Eli swɩ̀n ʋ tʋtʋnʋ tə con, ʋ wʋ́: «Vəli n swɩ̀n Akabə con, sə ʋ kə ʋ səsen, ʋ pìí ʋ vìí lala, dwà tə dàn ká cɩ̀ ʋ nə.» 45 Tɩa tə yáá mama ken nəzonu də bakwan. Vʋʋ nyɩ́n kʋ zàn, yá kʋ yɩ dwafara nə wulə ka nɩ̀. Akabə zàn ʋ dɩ̀ ʋ səsen kòrù wa, ʋ ma vələ Zwizəreyɛlə. 46 Ba-Yígúrə́-Jə-Tiu dɩ̀àn tə cúə́ Eli yuu wa, yá ʋ zàn ʋ vwa ʋ taŋa voru, ʋ dəri ʋ va ʋ kɛ́n Akabə, ʋ də́ ʋ yáá ʋ yí Zwizəreyɛlə.