Eli jɩɩn gwàrɩ̀
19
1 Pɩ̀ʋ́ Akabə dàń vəli ʋ man kʋ tə mama Eli nə tʋn, ʋ bɩrɩ ʋ kan Zwezabɛlə nə, də nətʋ Eli nə gʋa Baalə nii sʋ̀sʋ̀nà tə mama, də sɩ̀ʋ́. 2 Zwezabɛlə tʋn lìù Eli con, ʋ wʋ́: «Jwɩan máŋá ka tə wa, də à nə wà kʋ tə n nə tʋn Baalə nii sʋ̀sʋ̀nà tə yɩra tʋn n də yɩra, sə woŋwanan tə cʋ̀gʋ̀ à yáá də à kwa.» 3 Eli nə nì kʋ nətʋ tə, fən zʋa wá, yá ʋ dàń zàn ʋ dəri, sə ʋ jon ʋ mɩɩ. Ʋ vəli ʋ yí Bɛrəsweba, kʋ nə yɩ Zwida nagwanaa tə wa tɩʋ, ʋ yá ʋ tʋtʋnʋ tə lá nə. 4 Ʋ tətə dàń vəli yɩtʋrɩ pə́rɩ́ kasɔɔ lanworu tə wa, ʋ va ʋ jə̀ə́ fʋfʋlon də̀ń nə, ʋ ga lòrì tɩan, ʋ wʋ́: «Kʋ dàń mɛ nətʋ! Sɩ́ʋ́n nə, Ba-Yígúrə́-Jə-Tiu, jon à mɩɩ tə. Cɩ́gá, à də ba à nyɩna-ba tə kʋkwa.» 5 Ʋ dàń mɛ fʋfʋlon tə də̀ń nə ʋ tígə́ ʋ dwɛ̀. Yá malɩka dàń twi, ka dwen ʋ yɩra, ka wʋ́: «Zàn yɩɩ nə, n də́ wodiu.» 6 Eli ywàń ʋ yuu con, də nə̀ń gàtó ba nə wùə̀ kapana tə nə lɩŋa yuu wa, kʋ súrí nɩ́á kwàrá nə. Ʋ dí tə, ʋ nyʋn nɩ́á tə, ʋ ga pìí ʋ tígə́. 7 Ba-Yígúrə́-Jə-Tiu Malɩka tə kʋ́ʋ̀ twi, ka dwen ʋ yɩra nɛɛ bələ nii nə, ka wʋ́: «Zàn yɩɩ nə, n də́ wodiu tə. Cɩ́gá, n mɛ sə n va cwəŋə ka dara.» 8 Ʋ zàn ʋ də́ ʋ ga nyʋn nɩ́á. Wodiu təntə dàń pɩn ʋ na dɩ̀àn, ʋ wànɩ́ ʋ va dɩan sapwilə tɩtɩn də yɩcaʋ, ʋ va ʋ yí Ɔrɛbə paan tə, ka nə yɩ Yɩɩ paan.Yɩɩ pìí ʋ dàn Eli jɩɩn
9 Eli nə yí Ɔrɛbə paan tə, ʋ zʋa ka bʋʋ don wa, ʋ jʋ lá. Ba-Yígúrə́-Jə-Tiu dàń swɩ̀n sʋgʋ kʋ tə ʋ con, ʋ wʋ́: «Eli, bɛ̀ɛ̀ nə n fwa yəbə?» 10 Ʋ le, ʋ wʋ́: «À swə n mʋ̀ Ba-Yígúrə́-Jə-Tiu, n nə yɩ kwatara Yɩɩ, də cɩ́gá sonu. Cɩ́gá, Yɩzərayɛlə lɩ̀à tə vɩga n nimarʋ tə, n nə tún də ba. Ba gwɩrɩ n joŋi bwálá tə, ba ga gʋ n nii sʋ̀sʋ̀nà tə, də kwatara sɩ̀ʋ́. À mʋ̀ cɩcɩ nə ga, yá ba pɩ̀à nə, sə ba lɩ à mɩɩ.» 11 Ba-Yígúrə́-Jə-Tiu dàń swɩ̀n, ʋ wʋ́: «Nan n zɩgɩ à yáá con, paan tə yuu wa. À wá twá lá à kɛ̀ń.» Kʋ máŋá tə wa, vʋʋ nəfarʋ nyɩ́n kʋ zàn, kʋ fuli də dɩ̀àn, kʋ lwe pɛɛn də pɩ̀ràn, Ba-Yígúrə́-Jə-Tiu yáá con, yá Ba-Yígúrə́-Jə-Tiu yà tə̀lə́ vʋʋ təntə wa. Vʋʋ tə kwa nə, kʋ yɩ tɩa tə nə vuvugu, yá Ba-Yígúrə́-Jə-Tiu yà tə̀lə́ tɩa tə vuvugu tə wa. 12 Tɩa tə vuvugu tə kwa nə, kʋ yɩ mən nə yɩn lá, yá Ba-Yígúrə́-Jə-Tiu yà tə̀lə́ mən tə wa. Mən tə kwa nə, kʋ yɩ siŋu, kʋ nə yɩ bwabwa dwanɩ nə twi. 13 Máŋá tə Eli nə nì kʋ, ʋ ja ʋ ganzwɩfarʋ tə, ʋ ma pú ʋ yáá nə, ʋ ga nan ʋ zɩga bʋʋ tə nii nə. Kori dàń swɩ̀n ʋ con, kʋ wʋ́: «Eli, bɛ̀ɛ̀ nə n fwa yəbə?» 14 Ʋ le, ʋ wʋ́: «À swə n mʋ̀ Ba-Yígúrə́-Jə-Tiu, n nə yɩ kwatara Yɩɩ, də cɩ́gá sonu. Cɩ́gá, Yɩzərayɛlə lɩ̀à tə vɩga n nimarʋ tə, n nə tún də ba. Ba gwɩrɩ n joŋi bwálá tə, ba ga gʋ n nii sʋ̀sʋ̀nà tə, də kwatara sɩ̀ʋ́. À mʋ̀ cɩcɩ nə ga, yá ba pɩ̀à nə, sə ba lɩ à mɩɩ.» 15 Ba-Yígúrə́-Jə-Tiu ma swɩ̀n Eli con, ʋ wʋ́: «Pìí n va n tì n cwəŋə tə, ka nə twá kasɔɔ lanworu tə wa, n va Damasə. Máŋá tə n nə yí lá, n wá twɛ́n dun nʋga* Hazayɛlə yuu wa, sə ʋ yà Siiri lʋʋ nii tə pɩ̀ʋ́. 16 N tə wá va n twɛ́n dun nʋga Niməswi bìú Zewu yuu wa, sə ʋ yà Yɩzərayɛlə payuu pɩ̀ʋ́. Yá n tə wá twɛ́n dun nʋga Elize yuu wa, ʋ nə yɩ Abɛlə-Mehola tíú, Swafatə bìú, sə ʋ yà Yɩɩ nii sʋ̀sʋ̀nʋ̀, ʋ jon n yuu nə. 17 Lìù tə ʋ nə wá jɛ́n Hazayɛlə kwatara sɩ̀ʋ́ tə yáá nə, Zwewu nə wá gʋ kʋ tíú, yá lìù tə də ʋ nə wá jɛ́n Zwewu kwatara sɩ̀ʋ́ tə yáá nə, Elize nə wá gʋ kʋ tíú. 18 Yá à wá yá bara mʋ̀rʋ̀ barpɛ, Yɩzərayɛlə lʋʋ nii tə wa. Ba mʋ̀ nə yɩ lɩ̀à tə, ba nə wà ba nadwana yuu twɩ, ba pa dun woŋwanʋ Baalə nə, ba ga wà kʋ pùrì ba kə ba nyʋnɩ nə.»
Eli bon Elize sə ʋ jon ʋ yuu nə
19 Eli nan lá nə, ʋ va ʋ yí Swafatə bìú Elize, də ʋ wulə ʋ vàrɩ̀. Navalan bələ bələ dəkurən fugə bələ yà nə wulə ʋ yáá. Yá ʋ dàń yà wulə ʋ vàrɩ̀ də dəkurən fugə də bələ nii nyiən tə. Eli vəli ʋ twá Elize səpuni nə, ʋ ga tì ʋ ganzwɩfarʋ tə, ʋ dɩlɩ Elize yuu wa. 20 Elize dàń dʋgʋ ʋ navalan tə, ʋ ga dəri ʋ pú Eli kwa, ʋ swɩ̀n, ʋ wʋ́: «Yá sə à va à kɩra à nyɩna də à nuu, sə à ga pìí à bà, à twá n nə.» Eli le wá, ʋ wʋ́: «Vəli n ga bà, yoo tə yɩrɩ à nə fwa n yɩra.» 21 Elize pìí ʋ ba ʋ kárá tə wa, ʋ ja nɩan bələ tə ʋ gʋ, ʋ ma fwa joŋi, ʋ tì nɩan vàrʋ́ tə dɛɛ tə ʋ ma wà tə, ʋ pa lalʋʋ tə də́. Kʋ kwa nə, ʋ dàń zàn ʋ pú Eli kwa, ʋ jì ʋ tʋtʋnʋ.